Pahimusli Kining Talagsaong Higayon!

SI Peter talitapos na sa iyang pagtuon sa medisina sa dihang ang mensahe sa Bibliya sa kaluwasan nakadani sa iyang interes. Sa dihang siya migraduwar ug misugod pagpanambal isip doktor sa usa ka ospital, ang iyang mga superyor padayong nagdasig kaniya sa pag-espesyalisar ingong siruhano sa utok. Ania ang usa ka higayon nga pahimuslan dayon sa daghang bag-ong doktor.

Bisan pa, si Petera mihukom nga dili modawat niini nga higayon. Ngano? Siya ba wala lamay ambisyon ug panukmod nga gikinahanglan? Dili, gipalandong pag-ayo ni Peter kining tanyaga. Human mahimong dedikado, bawtismadong Saksi ni Jehova, gitinguha niyang mogugol ug dakong panahon kutob sa mahimo diha sa nagkalainlaing mga bahin sa Kristohanong ministeryo. Sa dihang siya makuwalipikar isip usa ka siruhano sa utok, siya nangatarongan, dugang ug dugang mahurot sa iyang propesyon ang iyang panahon ug kusog. Siya ba buang nga mibalibad niining linaing palaaboton, o siya ba maalamon?

Alang sa uban, ang desisyon ni Peter daw binuang. Ugaling, gipalandong niya ang mga teksto sa Bibliya sama sa Efeso 5:15, 16. Didto si apostol Pablo nag-awhag sa mga isigka-Kristohanon: “Padayong magbantay pag-ayo nga ang inyong paglakaw dili ingon sa dili-maalamon kundili ingon sa maalamon nga mga tawo, nga magapalit sa nahiangayng panahon alang sa inyong kaugalingon, tungod kay ang mga adlaw tuman-kadaotan.”

Palihog matikdi ang mga pulong “nahiangayng panahon.” Gihubad kini gikan sa Gregong pulong nga gigamit kasagaran diha sa Bibliya nga nagpunting sa panahon o yugto sa panahon nga gitiman-an sa pipila ka mga bahin o nahiangayng espesipikong kalihokan. Dinhi gipasiugda ni Pablo nga ang mga Kristohanon angayng mogahig panahon alang sa hinungdanong mga butang. Sa pagkatinuod, kinahanglang “matino [nila] ang mas hinungdanong mga butang.” (Filipos 1:10) Kini maoy kuwestiyon sa pag-una sa kinahanglanong mga butang.

Busa, unsa ang diyosnong katuyoan alang sa atong panahon? Unsa ang kabubut-on sa Diyos alang niadtong kinsa nahigugma kaniya? Ang mga tagna sa Bibliya tin-awng nagpaila sa atong adlaw ingong “ang panahon sa kataposan,” o ang “kataposang mga adlaw.” (Daniel 12:4; 2 Timoteo 3:1) Gipatin-aw ni Kristo Jesus kon unsa ang labawng hinungdanon sa atong adlaw. Siya espesipikong miingon nga sa dili pa matapos kining daotang sistema sa mga butang, “kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran.” Niana lamang nga moabot ang kataposan.​—Mateo 24:3, 14.

Busa, kinahanglang pahimuslan nato ang matag higayon sa pagsangyaw sa maayong balita sa Gingharian ug sa paghimog mga tinun-an. (Mateo 28:19, 20) Sanglit kining mga buluhatona dili na gayod masubli pa, kini mao ang kataposang higayon sa paghatag sa atong kabug-osan diha niining nagaluwas-ug-kinabuhing buluhaton. “Karon mao na ang panahon nga ilabinang dalawaton.” Sa pagkatinuod, “karon mao na ang adlaw sa kaluwasan.”​—2 Corinto 6:2.

Paghimog Usa ka Maalamong Desisyon

Si Peter​—ang batan-ong lalaki nga gihisgotan sa sinugdan​—mainampingong nagpalandong sa iyang desisyon ug nagtimbangtimbang sa iyang mga kapilian. Iyang naamgohan nga dili sayop nga magtuon siya nga may tumong nga mahimong siruhano sa utok. Apan unsa ang labing hinungdanon alang kaniya? Kini mao ang iyang kalihokan diha sa Kristohanong ministeryo, nga nagtagad sa pagkadinalian niining buluhatona. Sa samang panahon, siya may mga obligasyon nga tumanon. Siya minyo ug kinahanglang suportahan ang iyang asawa, nga nakigbahin diha sa pagsangyaw nga buluhaton nga bug-os panahon. (1 Timoteo 5:8) Si Peter kinahanglang magbayad usab sa mga utang maylabot sa iyang edukasyon. Nan, unsay iyang gihukom nga buhaton?

Si Peter mihukom sa pag-espesyalisar sa radiologo ug sa mga ultrasound scan. Kini maoy buluhaton nga nagkinahanglan lamang ug naandang adlaw sa pagtrabaho. Nadawat usab niya ang iyang pagbansay sa panahon sa regular nga mga oras sa pagtrabaho. Oo, basin isipon sa uban nga dili kaayo dungganon kini nga posisyon, apan kini maghatag kaniyag dugang panahon sa pagdeboto sa espirituwal nga mga pangagpas.

Ang laing konsiderasyon nagtukmod sa desisyon ni Peter. Samtang wala maghukom sa uban nga mihukom ug lahi, siya nasayod nga ang pagkalangkit pag-ayo sa sekular nga mga butang makapatunghag kapeligrohan alang sa usa ka Kristohanon. Kini magpahinabo kaniya nga mapasagdan ang espirituwal nga mga responsabilidad. Kini giilustrar sa laing panig-ingnan nga nasentro usab sa pagpangempleyo.

Usa ka bug-os panahong magsasangyaw sa Gingharian maoy usa ka batid nga tigdibuho. Gisuportahan niya ang iyang kaugalingon sa panalapi pinaagi sa pagbaligya sa iyang mga dibuho. Samtang nagdeboto sa kadaghanan sa iyang panahon sa hinungdanon-kaayong Kristohanong ministeryo, hayahay niyang masuportahan sa ingon ang iyang kaugalingon. Ugaling, misugod pagdako ang tinguha nga pauswagon pa ang iyang karera sa pagdibuho. Siya nalinga pag-ayo sa pagdibuho ug sa kalibotan sa arte, miundang sa bug-os panahong ministeryo, ug sa kadugayan nahimo nang bug-os dili-aktibo kon bahin sa buluhatong pagsangyaw sa Gingharian. Sa ulahi, siya nalangkit sa dili-kasulatanhong paggawi, nga misangpot sa iyang pagkadili-bahin na sa Kristohanong kongregasyon.​—1 Corinto 5:11-​13.

Linain ang Atong Panahon

Sama niadtong nag-alagad kang Jehova karon, sa pagkatinuod buot natong magpabiling matinumanon kaniya. Nasayod kita nga kita nagkinabuhi na sa labing talagsaong panahon sa tawhanong kasaysayan. Aron makapadayon sa pag-alagad sa Diyos ug makasagubang ug maayo sa presenteng-adlaw nga mga sirkumstansiya, kita tingali nagkinahanglang maghimog nagkalainlaing mga pagpasibo. Atong ikatandi kini sa panahon sa ting-ani sa usa ka mag-uuma. Kana maoy usa ka panahon sa linaing kalihokan, sa dihang ginalaoman ang mga mag-uuma nga magkugi sila pag-ayo labaw kay sa naandan ug sa pagtrabaho sa mas hataas nga mga oras sa mga adlaw sa pagtrabaho. Ngano? Tungod kay ang ani kinahanglang pagatigomon sulod sa limitadong yugto sa panahon.

Limitado na lamang kaayo ang nahibiling panahon sa presenteng daotang sistema sa mga butang. Karon sukad masukad, ang matuod nga Kristohanon kinahanglang maningkamot sa iyang kaugalingon sa pagsunod sa panig-ingnan ni Jesus ug sa paglakaw sa iyang mga tunob. Ang iyang kurso sa kinabuhi sa yuta tin-awng nagpakita kon unsay labing hinungdanon alang kaniya. Siya miingon: “Kinahanglan nga atong buhaton ang mga buhat niya nga nagpadala kanako samtang adlaw pa; ang gabii nagasingabot dihang wala nay tawo nga makabuhat.” (Juan 9:4) Sa pag-ingon nga nagasingabot ang gabii, gipunting ni Jesus ang panahon sa iyang pagsulay, paglansang, ug kamatayon, sa dihang ang iyang yutan-ong ministeryo matapos ug siya dili na makabahin sa mga buhat sa iyang langitnong Amahan.

Tinuod, sa panahon sa iyang tulo-ug-tunga ka tuig nga ministeryo, gigugol ni Jesus ang pipila sa iyang panahon sa paghimog mga milagro ug sa pag-ayo sa masakiton. Bisan pa niana, iyang gigamit ang labing daghan sa iyang panahon sa pagsangyaw sa mensahe sa Gingharian ug sa ‘pagwali ug kapagawasan sa mga bihag’ sa bakak nga relihiyon. (Lucas 4:18; Mateo 4:17) Si Jesus naningkamot pag-ayo sa iyang ministeryo ug usab migugol ug panahon sa pagbansay sa iyang mga tinun-an aron sila makatukod sa pundasyon nga iyang gipahimutang ug epektibong makapadayon sa buluhatong pagsangyaw. Gipahimuslan ni Jesus ang matag higayon sa pagpalambo sa mga intereses sa Gingharian ug buot nga ang iyang mga tinun-an mobuhat sa samang butang.​—Mateo 5:14-​16; Juan 8:12.

Sama kang Jesus, kita nga iyang modernong-adlawng mga sumusunod nagkinahanglang makakita sa kahimtang sa katawhan sama sa makita ni Jehova nga Diyos. Ang panahon nagkaupos na alang niining sistema sa mga butang, ug sa kamaluluy-on buot sa Diyos nga ang tanan makahigayon sa pagbatog kaluwasan. (2 Pedro 3:9) Busa, dili ba maalamong ibutang ang tanang ubang mga pangagpas sa ikaduhang dapit sa pagbuhat sa kabubut-on ni Jehova? (Mateo 6:25-​33) Ilabina sa panahong ingon niini ka linaing panahon, usa ka butang nga normal lantawong hinungdanon mahimong dili kaayo hinungdanon diha sa atong mga kinabuhi ingong mga Kristohanon.

Aduna bay bisan kinsa kanato nga nagbasol sa pag-una sa atong mga kinabuhi sa kabubut-on sa Diyos? Wala gayod, kay ang Kristohanong kurso sa pagsakripisyo-sa-kaugalingon kahibulongang pagagantihan. Pananglitan, gisultihan ni Jesus ang iyang mga tinun-an: “Sa pagkamatuod ako magaingon kaninyo, Walay usa nga nagbiya ug balay o mga igsoong lalaki o mga igsoong babaye o inahan o amahan o mga anak o kaumahan tungod ug alang kanako ug tungod ug alang sa maayong balita nga dili makabaton ug usa ka gatos ka pilo karon niining yugtoa sa panahon, mga balay ug mga igsoong lalaki ug mga igsoong babaye ug mga inahan ug mga anak ug kaumahan, nga may mga paglutos, ug sa umaabot nga sistema sa mga butang kinabuhing walay-kataposan.”​—Marcos 10:29, 30.

Walay makahatag ug bili nga salapi sa mga ganti nga napahimuslan niadtong nagagamit sa ilang panahon sa pagdayeg kang Jehova ug pagmantala sa mensahe sa Gingharian. Sila nakatagamtam ug daghan kaayong panalangin! Kini naglakip sa matuod nga mga higala, sa katagbawan sa pagbuhat sa kabubut-on sa Diyos, sa pahiyom sa pag-uyon sa Diyos, ug sa palaabotong kinabuhing walay kataposan. (Pinadayag 21:3, 4) Ug pagkadakong panalangin ang pagtabang sa katawhan sa espirituwal ug ang pagpasidungog sa balaang ngalan ni Jehova ingong iyang mga Saksi! Walay duhaduha, ang ‘pagpalit sa nahiangayng panahon’ sa pagkatinuod maoy usa ka maalamon ug magantihong dalan. Karon nga wala pa gayod sukad ang panahon sa pagpakigbahin sa pagmantala sa maayong balita sa Gingharian sa Diyos. Mopahimulos ka ba ug magpabilin diha niining talagsaong higayon?

[Footnote]