Nahinumdom Ka Ba?

Nadiskobrehan mo bang ang bag-ong mga isyu sa Ang Bantayanang Torre may praktikal nga bili kanimo? Nganong dili nimo sulayan ang imong memorya pinaagi sa mosunod nga mga pangutana?

◻ Unsa ang sulbad sa suliran karon sa pagmabdos sa mga tin-edyer?

Ang mga batan-on kinahanglang hatagag moral ug espirituwal nga giya. Gipakita sa Bibliya nga responsabilidad sa mga ginikanan ang pagbuhat niini. (Efeso 6:4)—4/15, panid 4.

◻ Nganong lisod ang pagmatutog mga anak nga malamposon?

Ang mga ginikanan ug mga anak dili hingpit ug, busa, makahimog mga sayop. (Roma 5:12) Gawas pa, ang nagatubong mga anak maimpluwensiyahan kaayo sa daotang mga hilig sa katilingban karong adlawa; kini magadaot sa ilang mga prinsipyo ug panglantaw sa kinabuhi. (2 Timoteo 3:1-5)—5/1, panid 4.

◻ Unsang ang upat ka iladong mga kalainan tali sa matuod nga mga Kristohanon ug mga Kristohanon sa ngalan lamang?

Ang matuod nga mga Kristohanon nagalikay sa dugo. (Buhat 15:28, 29) Gihuptan nila ang hataas moral nga sukdanan. (1 Corinto 6:9, 10) Ang tinuod nga mga Kristohanon nagapabiling neyutral bahin sa politika ug sa daghang mga away sa mga nasod. (Juan 17:16) Kadtong nagasunod kang Jesus nagagamit sa iyang panig-ingnan ingong sulundan sa ilang panimalaynong mga relasyon. (Efeso 5:21-25)—5/1, mga panid 17-19.

◻ Nganong gitawag sa mga Hudiyo si Jesus nga Samarianhon? (Juan 8:48)

Gidumtan sa mga Hudiyo ang mga Samarianhon. Busa, ang pulong ilang gigamit ingon nga pagpahayag sa pagkayugot ug pagpakaulaw kang Jesus.—5/15, panid 8.

◻ Unsa ang “maputling pinulongan” nga gihisgotan sa Sofonias 3:9?

Kini mao ang pinulongan sa Kasulatanhong kamatuoran nga makapaarang sa mga tawong nahadlok sa Diyos sa tanang nasod ug rasa sa pag-alagad kang Jehova abaga sa abaga.—5/15, panid 16.

◻ Unsang mga kagawasan ang mosangpot sa pag-ugmad sa usa ka relasyon uban sa Diyos?

Ang kagawasan gikan sa makapaulipon nga kahadlok sa tawo ug sa bug-at nga mga kostumbre nga walay kapuslanan o dili bililhon. (Proverbio 29:25) Lain pa, kagawasan sa kahadlok sa kamatayon. (Ecclesiastes 9:5, 10; Juan 5:28, 29)—6/1, mga panid 5, 6.

◻ Unsay gipasabot ni Jesus sa miingon siya: “Ang kagabhion nagasingabot sa dihang walay tawo ang makabuhat”? (Juan 9:4)

Si Jesus nagtumong dinhi sa panahon nga siya manaog ngadto sa lubnganan ug dili na makabuhat sa kahibulongang mga buhat nga iyang gihimo samtang buhi pa siya.—6/1, panid 8.

◻ Unsay kahulogan sa bawtismo sa tubig?

Ang kompletong pagtuslob sa tubig maoy haom nga simbolo sa pagpahinungod sa usa ka tawo ngadto sa Diyos, nga niana ang indibiduwal mahimong ordinadong ministro. Siya, sa pagkamatuod, samtang anaa sa ilalom sa tubig, namatay sa iyang nangaging dalan sa kinabuhi, ug sa paghaw-as gikan sa tubig, siya, ingnon ta, mabuhi ngadto sa usa ka bag-ong dalan sa pagsakripisyo-sa-kaugalingon diha sa pag-alagad kang Jehova. (Itandi ang Roma 6:2-4; 12:1; Filipos 3:16.)—6/15, panid 29.

◻ Unsa ang pila ka paagi sa pagpasundayag sa pagkamapasalamaton kang Jehova?

Kon dako ang pagkamapasalamaton, ang nagatuklod nga tinguha sa pag-alagad sa Diyos magaawas diha sa mapabilhong kasingkasing. Ang usa ka paagi sa pagtagbaw sa maong tinguha mao ang pagpakig-ambit sa ministeryo, tingali sa payunir nga pag-alagad. Ang lain mao ang pagkooperar sa programa sa pagtukod nga karon nagakahitabo sa tibuok yuta.—7/1, panid 11.

◻ Nganong gihatagan ni Jesus ug gahom ang 70 niya ka disipulo sa pag-ayo sa masakiton sa dihang gipadala niya sila sa usa ka kampanya sa pagwali sa Galilea?

Ang maong mga disipulo, pinaagi sa paghimo sa maong mga milagro, nag-andam sa dalan aron himoon ni Jesus ang pagsundal o pagsunod nga buluhaton. Ang mga milagro nga ilang gihimo nakapaikag sa daghang tagbalay nga makahibalag kang Jesus ug mamati sa iyang mensahe sa Gingharian.—7/1, mga panid 16-17.

◻ Si Jesus nagtumong ba kang Judas sa gisultihan niya si Pilato: “Ang tawo nga nagtugyan kanako nganha kanimo may labaw nga sala”?—Juan 19:11.

Mopatim-aw nga si Jesus nagtumong sa tanan nga maoy nakaingon sa iyang pagkahusay atubangan kang Pilato. Kana tinong nag-apil kang Judas Iskariote, nga nagluib kang Jesus. (Lucas 22:2-6) Apan ang hataas nga saserdoteng si Caipas ug ubang relihiyosong lider nalangkit usab sa pagpadakop kang Jesus. (Mateo 26:59-65; 27:1, 2, 20-23) Lagmit kadtong tanang sad-an naapil sa gisulti ni Jesus sa Juan 19:11.—7/15, panid 30.

◻ Unsa ilabina ang makapatay nga kapeligrohan nga nalangkit sa pagsimbag imahen?

Ang salmista miingon mahitungod sa mga Israelinhon: “Kay nag-alagad sa mga diyosdiyos sa mga pagano, sila nalit-agan sa paghalad sa ilang kaugalingong mga anak lalaki ug mga anak babaye ngadto sa mga demonyo.” (Salmo 106:36, 37, The Jerusalem Bible) Ang Kristohanon Gregong Kasulatan nagapasidaan sa samang kapeligrohan. (1 Corinto 10:19, 20) Ang pagsimba sa imahen sa bisan unsang matang nagabukas sa posibilidad nga ang usa ka imahen magsilbing usa ka dapit sa pakigkontak sa mga demonyo.—8/1, panid 6.