Kinabuhi ug Ministeryo ni Jesus

Ang Pagkagahian sa mga Pariseo sa Dili-pagtuo

ANG mga ginikanan sa buta niadto nga makililimos nahadlok sa dihang gipatawag sila atubangan sa mga Pariseo. Sila nahibalo nga gitino na nga palagpoton gikan sa sinagoga ang bisan kinsa nga motuo kang Jesus. Kini nga pagputol sa pagpakigkuyog sa uban diha sa komunidad mohatag dakong kalisod, ilabina sa kabos nga pamilya. Busa mapanagan-on ang mga ginikanan.

“Inyo ba kining anak nga giingon ninyong nahimugsong buta?” nangutana ang mga Pariseo. “Nan, naunsa ba nga makakita na man siya karon?”

“Kami nahibalo nga kini siya mao ang among anak ug nga siya nahimugso nga buta,” miingon ang mga ginikanan. “Apan naunsa nga nakakita na man siya karon, kami wala mahibalo, ug wala usab kami mahibalo kinsa ang nagpabuka sa iyang mga mata.” Siyempre gisultihan sila sa ilang anak nga lalaki sa tanang nahitabo, apan maalamong miingon ang mga ginikanan. “Pangutan-a lang siya kay dako na man siya. Mosulti siya alang sa iyang kaugalingon.”

Busa, gipatawag ba usab sa mga Pariseo ang tawo. Niining higayona ilang gihadlok siya pinaagi sa pagpadayag nga naghipos silag ebidensiya batok kang Jesus. “Dayega ang Diyos,” sila miingon. “Kami nahibalo nga kadtong tawhana makasasala.”

Ang tawong buta niadto nga nahibalo sa ilang akusasyon, miingon: “Ako wala mahibalo kon siya makasasala ba.” Apan siya midugang. “Usa ka butang nga akong nahibaloan mao kini, nga kaniadto buta ako apan karon makakita na ako.”

Naningkamot nga makakitag sayop sa iyang testimoniya, nangutana pag-usab ang mga Pariseo: “Unsa may iyang gibuhat kanimo? Giunsa man niya pagpabuka ang imong mga mata.”

“Gitug-anan ko na kamo,” mireklamo ang tawo, “ug wala kamo mamati pag-usab? Nganong buot man kamong mamati pag-usab?” Sa makantalitahon siya nangutana: “Buot ba usab kamong mahimong iyang mga tinun-an?”

Nasuko niining tubaga ang mga Pariseo. “Ikaw tinun-an niya,” sila miakusar, “apan kami mga tinun-an ni Moises. Kami nasayod nga ang Diyos nakigsulti kang Moises; apan bahin niining tawhana, ambot kon tagadiin siya.”

Mipahayag ug katingala, ang mapainubsanong makililimos mitubag: “Kahibulongan gayod kini kaayo, nga kamo wala makahibalo kon tagadiin siya, apan gipabuka niya ang akong mga mata.” Unsay atong makuhang konklusyon gikan niini? Gipunting sa makililimos ang gidawat nga pasikaranan: “Nahibalo kita nga ang Diyos dili mamati sa mga makasasala, apan kon mahadlokon sa Diyos ang tawo ug magatuman sa iyang kabubut-on, siya mamati kaniya. Sukad pa sa sinugdan wala pa gayod igdungog nga dihay nakapabuka sa mga mata sa usa ka tawong nahimugso nga buta.” Busa, ang konklusyon matin-aw: “Kon kadtong tawhana dili pa gikan sa Diyos, wala gayod siyay arang mahimo.”

Walay tubag ang mga Pariseo niining prangka, matin-aw nga katarongan. Dili sila makadawat sa kamatuoran, ug busa ilang gipasipalahan ang tawo: “Sa tumang kasal-anan ikaw natawo, ug unya mangahas ikaw sa pagpanudlo kanamo?” Human niini, ilang gilabog sa gawas ang tawo, dayag gipalagpot siya gikan sa sinagoga.

Sa dihang nahibaloan ni Jesus ang ilang gihimo, iyang gipangita ang tawo ug miingon: “Mituo ba ikaw sa Anak sa tawo?”

“Kinsa man siya, ginoo,” mitubag ang makililimos nga buta niadto, “aron ako motuo kaniya?”

“Siya mao ang nakigsulti kanimo,” mitubag si Jesus.

Dihadiha, miluhod ang tawo atubangan kang Jesus ug miingon: “May pagtuo ako kaniya, Ginoo.”

Dayon mipatin-aw si Jesus: “Ako mianhi niining kalibotana aron sa pagpanghukom: aron kadtong mga dili makakita managpakakita ug kadtong makakita mangabuta.”

Ang mga Pariseo nga nakadungog niini nangutana: “Mga buta ba diay usab kami?” Kon ilang dawaton nga buta sila sa hunahuna, duna silay katarongan sa ilang pagsupak kang Jesus. Gisultihan sila ni Jesus: “Kon buta pa kamo, wala unta kamoy sala.” Apan, sa pagkagahian nilag ulo sila miinsister nga dili sila buta ug nga wala magkinahanglan ug esprituwal nga kadan-agan. Busa si Jesus miingon: “Apan kay nagaingon man kamo karon, ‘Makakita kami.’ Nagapabilin ang inyong kasal-anan.” Juan 9:19-41.

◆ Nganong nahadlok ang mga ginikanan sa niadto-buta nga makililimos sa dihang gipatawag sila sa atubangan sa mga Pariseo, ug busa sa unsang paagi mapanagan-ong mitubag sila?

◆ Sa unsang paagi gihadlok sa mga Pariseo ang tawong buta niadto?

◆ Unsang makataronganong argumento sa tawo ang nakapasuko sa mga Pariseo?

◆ Nganong walay katarongan ang mga Pariseo sa ilang pagsupak kang Jesus?