Mga Pangutana Gikan sa mga Magbabasa
Sa estriktong pagkasulti, aduna bay kalainan tali sa mga termino sa Bibliya nga “ubang mga karnero” ug “dakong panon”?
Oo, bisan pag dili angay nga maghinobra kita ka sensitibo bahin sa paggamit sa pulong o mabalaka kon ibaylobaylog gamit sa usa ang mga termino.
Kadaghanan sa mga Kristohanon sinati sa mga pulong diin atong makita kining mga terminoha. Ang usa maoy sa Juan 10:16. Didto si Jesus nag-ingon: “Ako adunay ubang mga karnero, nga wala niining torila; sila usab kinahanglang akong dad-on, ug sila mamati sa akong tingog, ug sila mahimong usa ka panon, usa ka pastol.” Ang laing ekspresyon, ang “dakong panon,” mabasa sa Pinadayag 7:9. Atong mabasa: “Human niining mga butanga nakita ko, ug, tan-awa! usa ka dakong panon sa katawhan, nga walay tawong makaihap, gikan sa tanang kanasoran ug mga tribo ug katawhan ug mga dila, nga nagbarog atubangan sa trono ug atubangan sa Kordero, nga nagsininag mga puting taas-nga-bisti; ug adunay mga palwa sa palma diha sa ilang mga kamot.”
Atong tagdon una ang Juan 10:16. Kinsa ang mga karnero? Aw, maayong hinumdoman nga ang tanang matinumanong mga sumusunod ni Jesus gitawag nga mga karnero. Sa Lucas 12:32, iyang gitawag kadtong sakop sa iyang mga tinun-an nga moadto sa langit ingong ang “gamayng panon.” Panon sa unsa? Sa mga karnero. Ang “mga karnero” sa “gamayng panon” mahimong bahin sa Gingharian sa langit. Apan, adunay uban, kadtong adunay lahi nga paglaom, kinsa giisip usab ni Jesus ingong mga karnero.
Ato kining mabasa sa Juan kapitulo 10. Human maghisgot bahin sa mga karnero sama sa iyang mga apostoles nga iyang gidapit alang sa kinabuhi sa langit, si Jesus midugang sa bersikulo 16: “Ako adunay ubang mga karnero, nga wala niining torila; sila usab kinahanglang akong dad-on.” Ang mga Saksi ni Jehova dugay nang nakasabot nga niining bersikuloha si Jesus naghisgot bahin sa mga tawo nga adunay paglaom nga mabuhi sa yuta. Daghang mga matinumanon sa una-Kristohanong mga panahon, sama kang Abraham, Sarah, Noe, ug Malakias, ang nakabaton niining paglaoma. Busa husto nga ilakip nato sila ingong bahin sa “ubang mga karnero” sa Juan 10:16. Sa Milenyo, kining matinumanong una-Kristohanong mga saksi pagabanhawon ug nianang panahona makakat-on ug modawat kang Kristo Jesus, nga mahimong “ubang mga karnero” sa Maayong Magbalantay.
Nasayod usab kita nga sukad natapos ang katibuk-ang pagpanawag sa langitnong matang, minilyon ang nahimong tinuod nga mga Kristohanon. Kini sila usab hustong pagatawgong “ubang mga karnero,” sanglit sila dili bahin sa “gamayng panon.” Hinunoa, ang ubang mga karnero karon nagapaabot nga mabuhi mismo sa usa ka yutan-ong paraiso.
Karon, unsay ikasulti bahin sa ilhanan sa “dakong panon” nga gihisgotan sa Pinadayag 7:9? Aw, tan-awa ang bersikulo 13 ug ang pangutana, “Kinsa kini sila ug diin man sila gikan?” Makita nato ang tubag diha sa Pinadayag 7:14: “Mao kini sila ang nanagpakagawas gikan sa dakong kasakitan.” Busa ang “dakong panon” gilangkoban niadtong kinsa nakagawas, o nakalabang-buhi, sa dakong kasakitan. Sumala sa giingon sa bersikulo 17, sila ‘pagagiyahan ngadto sa mga tuboran sa mga tubig sa kinabuhi’ ibabaw sa yuta.
Hinunoa, masabtan nga aron sila makalabang-buhi sa nagsingabot nga dakong kasakitan, kinahanglang nalabhan na nilang daan ang ilang mga bisti sa dugo sa Kordero, nga nahimong tinuod nga mga magsisimba. Busa, bisan pag ang Pinadayag 7:9 naghubit niining maong panon human sa kasakitan, mahimo natong ipadapat ang terminong “dakong panon” ngadto sa tanang adunay yutan-ong mga paglaom nga naghatag kang Jehova ug balaang pag-alagad karon, sa dili pa magsugod ang dakong kasakitan pinaagi sa pag-atake sa mga nasod sa bakak nga relihiyon.
Agig sumaryo, mahimong atong hinumdoman ang “ubang mga karnero” ingong usa ka halapad nga termino, nga naglangkob sa tanang alagad sa Diyos nga adunay paglaom nga mabuhi sa walay kataposan sa yuta. Kini naglakip sa mas limitadong kategoriya sa mga karnerohon karon nga ginatigom ingong usa ka “dakong panon” nga adunay paglaom nga mabuhi latas sa umaabot nga dakong kasakitan. Kadaghanan niadtong matinumanong mga Kristohanon nga buhi karon maoy bahin sa “ubang mga karnero,” ug sila maoy bahin usab sa “dakong panon.”
Maayong isulti pag-usab nga, bisag maayo nga mahimong tin-aw bahin niining mga detalyeha, dili angay nga ang mga Kristohanon maghinobra sa pagkabalaka sa pulong—nga matawag nga kutikutihan sa pulong. Si Pablo nagpasidaan labot sa pipila nga “miburot sa garbo” ug nalangkit sa “mga debate bahin sa mga pulong.” (1 Timoteo 6:4) Kon kita mismo nakasabot sa pipila ka kalainan tali sa mga termino, maayo kana. Apan, dili nato angay sawayon, sa dayag man o sa tago, ang uban nga dili kaayo tukma sa paggamit sa mga termino sa Bibliya.