“Kami Nagkahiusa sa Pagdesisyon”

1, 2. (a) Unsang seryosong mga pangutana ang giatubang sa nagamandong lawas sa Kristohanong kongregasyon sa unang siglo? (b) Unsang tabang ang nadawat sa maong mga brader aron makab-ot ang hustong desisyon?

NAGHINAMHINAM ang tanan sa himoong desisyon. Nagtinan-away ang mga apostoles ug mga ansiyano kay nahibalo sila nga importante kaayo ang desisyon nga ilang himoon. Mitungha ang seryosong mga pangutana tungod sa isyu sa pagpatuli. Ilalom ba sa Moisesnong Balaod ang mga Kristohanon? Aduna bay kalainan tali sa Hudiyo nga mga Kristohanon ug sa Hentil nga mga Kristohanon?

² Gikonsiderar na sa mga brader nga nanguna ang daghang ebidensiya. Gihisgotan nila ang mga tagna sa Pulong sa Diyos ug ang lig-ong mga ebidensiya nga nagpadayag sa panalangin ni Jehova. Gipahayag nila ang tanan nilang nahibaloan ug gibati bahin sa maong isyu. Nabatonan na nila ang tanang impormasyon nga ilang gikinahanglan sa paghimog desisyon. Tin-aw nga gigiyahan sila sa espiritu ni Jehova. Sundon ba nila ang maong giya?

3. Sa unsang paagi makabenepisyo kita sa pagtuon sa asoy sa Buhat kapitulo 15?

³ Kinahanglan ang dakong pagtuo ug kaisog aron madawat ang giya sa espiritu niini nga kahimtang. Mahimong mosamot ang pagdumot sa Hudiyong mga lider sa relihiyon. Ug basig supakon sila sa mga igsoon sa kongregasyon nga gusto gihapon nga sundon ang Moisesnong Balaod. Unsay himoon sa nagamandong lawas? Atong tan-awon. Samtang atong tun-an kini nga asoy, atong masabtan nga ang maong mga lalaki naghatag ug sumbanan nga gisunod karon sa Nagamandong Lawas sa mga Saksi ni Jehova. Kini maoy usa ka sumbanan nga kinahanglan usab natong sundon dihang mohimo kitag mga desisyon ug makaatubang ug mga problema ingong Kristohanon.

“Nahiuyon Kini sa Nasulat sa Basahon sa mga Propeta” (Buhat 15:13-21)

4, 5. Unsang matagnaong mga pulong ang gikutlo ni Santiago?

⁴ Ang tinun-ang si Santiago, nga igsoon ni Jesus sa inahan, mao ang misulti.a Lagmit siya ang nagdumala sa panagkatigom niadtong panahona. Ang iyang mga pulong morag sumaryo sa desisyon nga nakab-ot sa maong grupo. Si Santiago miingon sa nagkatigom nga mga lalaki: “Giasoy pag-ayo ni Simeon kon sa unsang paagi giliso sa Diyos sa unang higayon ang iyang pagtagad ngadto sa kanasoran aron magkuha gikan kanila ug usa ka katawhan alang sa iyang ngalan. Ug nahiuyon kini sa nasulat sa basahon sa mga Propeta.”—Buh. 15:14, 15.

⁵ Ang gisulti ni Simeon o Simon Pedro, ug ang ebidensiya nga gihatag ni Bernabe ug Pablo lagmit nagpahinumdom kang Santiago sa tukma nga mga kasulatan nga nagpatin-aw sa isyung gihisgotan. (Juan 14:26) Human moingon nga “nahiuyon kini sa nasulat sa basahon sa mga Propeta,” si Santiago mikutlo sa mga pulong sa Amos 9:11, 12. Kanang basahona maoy bahin sa Hebreohanong Kasulatan nga sagad gitawag nga “basahon sa mga Propeta.” (Mat. 22:40; Buh. 15:16-18) Imong mamatikdan nga ang mga pulong nga gikutlo ni Santiago medyo lahi sa mga pulong sa basahon ni Amos karon. Lagmit mikutlo si Santiago sa Septuagint, nga maoy usa ka Gregong hubad sa Hebreohanong Kasulatan.

6. Sa unsang paagi gipatin-aw sa Kasulatan ang isyung gihisgotan?

⁶ Pinaagi ni propetang Amos, gitagna ni Jehova nga moabot ang panahon nga Siya magpatindog sa “balongbalong ni David,” nga mao ang harianong kaliwat nga motultol sa Mesiyanikong Gingharian. (Ezeq. 21:26, 27) Si Jehova makiglabot ba pag-usab sa unodnong mga Hudiyo ingong usa ka nasod? Dili. Ang tagna dugang nag-ingon nga ang “katawhan sa tanang kanasoran” tigomon ingong ‘katawhan nga gitawag sa ngalan sa Diyos.’ Hinumdomi, si Pedro bag-o pang nagpamatuod nga ang Diyos ‘wala gayod maghimog kalainan tali kanato [Hudiyong mga Kristohanon] ug kanila [Hentil nga mga magtutuo], apan nagputli sa ilang kasingkasing pinaagi sa pagtuo.’ (Buh. 15:9) Sa ato pa, kabubut-on sa Diyos nga ang mga Hudiyo ug mga Hentil mahimong mga manununod sa Gingharian. (Roma 8:17; Efe. 2:17-19) Ang maong inspiradong mga tagna wala gayod maghisgot nga ang Hentil nga mga magtutuo kinahanglang magpatuli diha sa unod o mahimong Hudiyo nga mga kinabig.

7, 8. (a) Unsay gisugyot ni Santiago? (b) Unsaon nato pagsabot ang mga pulong ni Santiago?

⁷ Kay nasabtan ni Santiago ang ebidensiya sa Kasulatan ug ang lig-ong pamatuod nga iyang nadungog, siya misugyot: “Busa maoy akong hukom nga, dili maayo nga lisodlisoron kadtong gikan sa kanasoran nga miliso sa Diyos, hinuon sulatan sila nga likayan ang mga butang nga nahugawan sa mga idolo, ang seksuwal nga imoralidad, ang hayop nga naluok, ug ang dugo. Kay sukad sa karaang kapanahonan, duna nay nagmantala bahin kang Moises sa siyudad ug siyudad, kay sa matag igpapahulay ginabasag kusog ang iyang mga basahon diha sa mga sinagoga.”—Buh. 15:19-21, footnote.

⁸ Si Santiago, nga lagmit maoy nagdumala sa miting, miingon: “Busa maoy akong hukom.” Gipakita ba niya nga naa siyay awtoridad nga maoy modesisyon para sa uban? Wala gayod! Ang Gregong mga pulong nga gihubad “maoy akong hukom” mahimong magkahulogan usab nga “nagtuo ko” o “mohatag kog opinyon.” Si Santiago nagsugyot lang kon unsay ilang himoon base sa ebidensiya nga ilang nadungog ug sa gisulti sa Kasulatan bahin sa maong isyu.

9. Unsa ang mga kaayohan sa sugyot ni Santiago?

⁹ Maayo ba ang gisugyot ni Santiago? Oo, kay gisunod kadto sa mga apostoles ug mga ansiyano. Unsay mga kaayohan niini? Pinaagi niini nga sugyot, dili ‘malisdan’ ang Hentil nga mga Kristohanon kay dili na nila kinahanglang sundon ang Moisesnong Balaod. (Buh. 15:19) Sa laing bahin, ang maong desisyon magpakitag pagtahod sa konsensiya sa Hudiyong mga Kristohanon, nga sulod sa daghang tuig nakadungog “kang Moises . . . kay sa matag igpapahulay ginabasag kusog ang iyang mga basahon diha sa mga sinagoga.”b (Buh. 15:21) Ang maong sugyot makapasuod gayod sa Hudiyo nga mga Kristohanon ug sa Hentil nga mga Kristohanon. Labaw sa tanan, kadto makapalipay kang Jehova nga Diyos kay ang desisyon nahiuyon man sa iyang katuyoan. Pagkamaayong paagi aron masulbad ang usa ka problema nga lagmit makapabahinbahin ug makadaot sa tibuok kongregasyon sa katawhan sa Diyos! Ug pagkamaayong panig-ingnan alang sa Kristohanong kongregasyon karon!

10. Sa unsang paagi ginasunod sa Nagamandong Lawas karon ang panig-ingnan sa katumbas niini sa unang siglo?

¹⁰ Ang miaging kapitulo naghisgot nga sama sa nagamandong lawas sa unang siglo, ang Nagamandong Lawas sa mga Saksi ni Jehova karon nagsalig kang Jehova, ang Soberano sa Uniberso, ug kang Jesu-Kristo, ang Ulo sa kongregasyon, alang sa giya sa tanang butang.c (1 Cor. 11:3) Sa unsang paagi nila kini ginahimo? Si Albert D. Schroeder, nga nag-alagad isip membro sa Nagamandong Lawas sukad niadtong 1974 hangtod sa kataposan sa iyang kinabuhi sa yuta niadtong Marso 2006, miingon: “Ang Nagamandong Lawas magtigom sa adlawng Miyerkoles ug sugdan kana pinaagi sa pag-ampo alang sa giya sa espiritu ni Jehova. Gipaningkamotan gayod nila nga ang tanang butang nga ilang hisgotan ug tanang desisyon nga ilang himoon nahiuyon sa Pulong sa Diyos, ang Bibliya.” Sa susamang paagi, si Milton G. Henschel, nga dugay nang membro sa Nagamandong Lawas hangtod nga natapos ang iyang kinabuhi sa yuta niadtong Marso 2003, nangutana sa mga estudyante nga migraduwar sa ika-101 nga klase sa Watchtower Bible School of Gilead: “Duna bay laing organisasyon sa yuta diin kadtong mga nanguna mokonsulta sa Pulong sa Diyos, ang Bibliya, sa dili pa mohimog hinungdanong mga desisyon?” Siyempre, wala.

“Magpadalag Piniling mga Lalaki” (Buhat 15:22-29)

11. Sa unsang paagi nahibaloan sa mga kongregasyon ang desisyon sa nagamandong lawas?

¹¹ Ang nagamandong lawas sa Jerusalem nagkahiusa sa pagdesisyon bahin sa isyu sa pagpatuli. Apan angay kanang ipatin-aw sa makapalig-on ug mahigugmaong paagi ngadto sa mga kongregasyon aron sila magkahiusa. Unsay kinamaayohang paagi sa paghimo niini? Ang asoy nag-ingon: “Ang mga apostoles ug ang mga ansiyano, uban sa tibuok kongregasyon, midesisyon nga magpadalag piniling mga lalaki gikan sa ilang taliwala ngadto sa Antioquia, uban kang Pablo ug Bernabe; ilang gipadala si Silas ug si Judas nga gitawag ug Barsabas, mga lalaki nga nanguna taliwala sa mga igsoon.” Dugang pa, may sulat nga gidala ang maong mga lalaki aron basahon ngadto sa tanang kongregasyon sa Antioquia, Sirya, ug Cilicia.—Buh. 15:22-26.

12, 13. Unsa ang maayong resulta sa pagpadala (a) kang Judas ug Silas? (b) ug sulat gikan sa nagamandong lawas?

¹² Ingong “mga lalaki nga nanguna taliwala sa mga igsoon,” si Judas ug Silas kuwalipikado nga morepresentar sa nagamandong lawas. Kining upat ka lalaki makapatin-aw nga ang mensahe nga ilang gidala dili lamang tubag sa isyu bahin sa pagpatuli kondili maoy bag-ong instruksiyon sa nagamandong lawas. Kining “piniling mga lalaki” makapasuod sa Hudiyong mga Kristohanon sa Jerusalem ug sa Hentil nga mga Kristohanon diha sa ubang dapit. Pagkamaalamon ug mahigugmaon nga kahikayan! Walay duhaduha nga kadto nakaamot sa kalinaw ug panaghiusa sa katawhan sa Diyos.

¹³ Ang sulat nagtaganag tin-aw nga instruksiyon alang sa Hentil nga mga Kristohanon dili lang bahin sa isyu sa pagpatuli kondili bahin usab sa angay nilang buhaton aron sila uyonan ug panalanginan ni Jehova. Ang pangunang bahin sa sulat nag-ingon: “Ang balaang espiritu ug kami mismo nagkauyon nga dili magsangon kaninyo ug dugang pa nga palas-anon gawas niini nga mga kinahanglanon: nga padayong likayan ang mga butang nga gihalad ngadto sa mga idolo, ang dugo, ang hayop nga naluok, ug ang seksuwal nga imoralidad. Kon kamo magpahilayo gayod niining mga butanga, mabulahan kamo. Maayong panglawas kaninyo!”—Buh. 15:28, 29.

14. Nganong ang katawhan ni Jehova nagkahiusa bisan pag nagkabahinbahin ang mga tawo sa kalibotan karon?

¹⁴ Karon, ang mga Saksi ni Jehova nagkahiusa. Parehas ra ang ilang mga pagtulon-an ug buluhaton, bisan pag dunay mga 8,000,000 ka Saksi ni Jehova sa kapig 100,000 ka kongregasyon sa tibuok yuta. Sa unsang paagi sila nagkahiusa, nga kaylap man ang kagubot ug nagkabahinbahin ang mga tawo sa kalibotan karon? Ang pangunang hinungdan sa panaghiusa mao ang tin-awng direksiyon ni Jesu-Kristo, ang Ulo sa kongregasyon, pinaagi sa “matinumanon ug maalamong ulipon,” nga mao ang Nagamandong Lawas. (Mat. 24:45-47) Ang laing hinungdan sa panaghiusa mao ang kinabubut-on nilang pagsunod sa giya sa Nagamandong Lawas.

“Sila Nalipay Pag-ayo sa Maong Pagdasig” (Buhat 15:30-35)

15, 16. Unsay resulta sa isyu bahin sa pagpatuli, ug ngano?

¹⁵ Ang asoy sa Mga Buhat nag-ingon nga dihang ang upat ka lalaki gikan sa Jerusalem nakaabot sa Antioquia, “ilang gitigom ang tibuok panon ug gitunol kanila ang sulat.” Unsay reaksiyon sa mga igsoon didto sa instruksiyon nga gikan sa nagamandong lawas? ‘Human mabasa [ang sulat], sila nalipay pag-ayo sa maong pagdasig.’ (Buh. 15:30, 31) Dugang pa, si Judas ug Silas “nagdasig sa mga igsoon pinaagi sa daghang pakigpulong ug nagpalig-on kanila.” Kay kining duha ka lalaki nagpahayag o nagpahibalo sa kabubut-on sa Diyos, gitawag sila nga “mga propeta,” sama kang Bernabe, Pablo, ug uban pa.—Buh. 13:1; 15:32; Ex. 7:1, 2.

¹⁶ Dayag nga gipanalanginan ni Jehova ang tanang gihimo aron masulbad ang isyu. Nganong maayo ang resulta? Tungod sa tin-aw ug husto sa panahon nga instruksiyon nga gihatag sa nagamandong lawas, nga gibase sa Pulong sa Diyos ug sa giya sa balaang espiritu. Ang laing hinungdan mao ang mahigugmaong paagi ug personal nga pagpahibalo sa mga desisyon ngadto sa mga kongregasyon.

17. Sa unsang paagi ang mga tigdumala sa sirkito karon nagsundog kang Pablo, Bernabe, Judas, ug Silas?

¹⁷ Sa pagsunod sa maong sumbanan, ang Nagamandong Lawas sa mga Saksi ni Jehova karon mohatag ug giya sa hustong panahon alang sa mga igsoon sa tibuok kalibotan. Sa dihang mohimog mga desisyon, kana ipahibalo ngadto sa mga kongregasyon sa tin-aw ug prangka nga paagi. Ang usa ka paagi sa pagpahibalo niana mao ang pagduaw sa mga tigdumala sa sirkito. Kining masakripisyohong mga brader moduaw sa mga kongregasyon, nga mohatag ug tin-aw nga instruksiyon ug magpalig-on sa mga igsoon. Sama kang Pablo ug Bernabe, sila mogahin ug daghang oras sa pagsangyaw, sa ‘pagpanudlo ug pagmantala, kauban ang daghan pa, sa maayong balita sa pulong ni Jehova.’ (Buh. 15:35) Sama kang Judas ug Silas, sila magdasig “sa mga igsoon pinaagi sa daghang pakigpulong” ug magpalig-on kanila.

18. Sa unsang paagi mapaneguro sa katawhan sa Diyos nga sila padayong makadawat sa panalangin ni Jehova?

¹⁸ Komosta man ang mga kongregasyon? Sa unsang paagi ang mga kongregasyon sa tibuok yuta padayong magmalinawon ug magkahiusa bisag nagkabahinbahin ang mga tawo karon? Hinumdomi nga ang tinun-ang si Santiago misulat sa ulahi: “Ang kaalam nga gikan sa langit maoy una sa tanan putli, unya makigdaiton, makataronganon, andam mosunod . . . Dugang pa, ang bunga sa pagkamatarong gipugas diha sa malinawong mga kahimtang alang niadtong mga nagapakigdait.” (Sant. 3:17, 18) Dihang iyang gisulat kining mga pulonga, wala ta mahibalo kon naghunahuna ba si Santiago sa panagkatigom sa Jerusalem o wala. Apan gipakita sa asoy sa Buhat kapitulo 15 nga panalanginan lang ta ni Jehova kon nagkahiusa ta ug andam mosunod sa nagapanguna.

19, 20. (a) Nganong ang kongregasyon sa Antioquia nakabaton ug kalinaw ug panaghiusa? (b) Unsay gihimo ni Pablo ug Bernabe human masulbad ang isyu sa pagpatuli?

¹⁹ Human madawat sa kongregasyon sa Antioquia ang desisyon sa nagamandong lawas, sila nakabatog kalinaw ug panaghiusa. Imbes makiglalis sa mga brader gikan sa Jerusalem, ang mga igsoon sa Antioquia mapasalamaton sa pagduaw ni Judas ug Silas. Ang asoy nag-ingon: “Human makagugol ug pipila ka panahon didto, gipagikan sila sa mga igsoon nga nanghinaot nga maayo ra ang ilang panaw pabalik sa Jerusalem.”d (Buh. 15:33) Seguradong ang mga igsoon sa Jerusalem nalipay usab dihang nadunggan nila ang report sa duha ka igsoon bahin sa ilang panaw. Tungod sa dili hitupngang pagkamaayo ni Jehova, milampos ang ilang katuyoan!

²⁰ Human masulbad ang maong isyu, si Pablo ug Bernabe nagpabilin sa Antioquia. Makapokus na sila sa pagpanguna sa buluhatong pagsangyaw. Mao sab nay ginahimo sa mga tigdumala sa sirkito dihang moduaw sila sa mga kongregasyon nga giasayn kanila. (Buh. 13:2, 3) Pagkadakong panalangin alang sa katawhan ni Jehova! Apan sa unsang paagi padayong gigamit ug gipanalanginan ni Jehova kadtong duha ka madasigong tig-ebanghelyo? Ato kining hisgotan sa sunod nga kapitulo.