Nakahinumdom Ka Ba?

Nalingaw ka bang nagbasa sa dili pa dugayng mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

◻ Sanglit ang masupilong mga manulonda gibalhog man sa Tartaro, unsay kahulogan niini alang kanila? (2 Pedro 2:4)

Sila wala nay lugar diha sa balaang organisasyon ni Jehova ug karon gikuhaan ug balaang kahayag. Apan, sila nagalihok gihapon ubos sa pagtultol ni Satanas ug nagpadayon sa pagbaton ug suod nga pakigkontak sa mga tawo, naningkamot sa pagkontrolar sa mga lalaki, mga babaye, ug bisan mga bata. (Pinadayag 12:12, 17)—4/15, panid 14.

◻ Nganong hinungdanon ang “pagdumot sa daotan” diha sa mga mata ni Jehova? (Salmo 97:10)

Kadtong nagadumot sa daotan dili mangitag mga paagi sa pagpatuyang niana. Sa laing bahin, ang mga tawo nga dili magdumot niana tingali sa pisikal maglikay gikan niana samtang sa kaisipan nagapangandoy nga sila makabahin sa daotang mga butang.—4/15, panid 21.

◻ Diha sa ilustrasyon ni Jesus bahin sa mga talanton, unsang solemneng leksiyon ang gihatag alang sa tanang nagaangkong mga sumusunod ni Kristo? (Mateo 25:14-30)

Sila kinahanglang molihok sa pagpadaghan sa mga katigayonan sa ilang langitnong Agalon pinaagi sa pagbatog bug-os nga bahin sa buluhatong pagwali. Diha lamang nga sila mapasaligan nga makabaton sa pagdayeg ni Jesus ug magantihan. Busa sila makalikay nga masalibay ngadto sa kangitngitan sa gawas ug sa kalaglagan sa kataposan.—5/1, panid 9.

◻ Unsay buot ipasabot ni Jesus dihang iyang gisultihan ang iyang mga tinun-an sa pag-ampo: “Ayaw kami itugyan sa panulay”? (Mateo 6:13)

Kadtong mga pulonga dili sabton nga nagkahulogan nga si Jehova magsulay kanato nga makahimog sala. Hinunoa, kita, sa ingon, makapangayo kang Jehova nga dili kita tugotan nga madaog kon sulayon o maipit sa pagsupak kaniya. Kita makapangaliyopo nga tultolan kita sa atong mga tikang aron walay pagsulay ang modaog kanato nga grabe kaayo nga dili nato maantos. (1 Corinto 10:13)—5/15, panid 19.

◻ Angay ba alang sa usa ka Kristohanon sa pagdawat sa ineksiyon sa usa ka gamayng tipik sa dugo, sama sa immune globulin o albumin?

Sa pagsunod sa kasugoan sa Diyos, ang mga Kristohanon dili modawat sa mga abuno sa pangunang mga bahin sa dugo—plasma, pulang mga selula, puting mga selula, ug platelets. Ang pila ka mga Saksi ni Jehova, hinunoa, mibati nga sila makadawat sa ineksiyon sa usa sa gagmayng mga tipik sa protena sa plasma. Makaiikag, ang pila niining maong mga protena sa kinaiyanhon moagi gikan sa sapa-sapa sa dugo sa usa ka babayeng mabdos ngadto sa bulag nga sistema sa dugo sa bata diha sa iyang tagoangkan.—6/1, panid 30, 31.

◻ Unsang katuyoan ang natuman sa paghugas ni Jesus sa mga tiil sa mga tinun-an sa kataposang balidong Paskuwa?

Si Jesus nagtudlo sa iyang mga tinun-an ug leksiyon sa pagkamaubsanon. Kinahanglang walay usa ang mangitag unang dapit, maghunahuna nga siya importante. Hinunoa, ang tanan kinahanglang magsunod sa pananglitan ni Jesus ug andam sa pag-alagad sa usag usa nga walay pagpihig, bisan unsa pa ka menos o ubos sa buluhaton. (Juan 13:12-17)—6/15, panid 9.

◻ Sa unsa nga diwa nga ang mga Hudiyo sa Berea ‘mainampingong nagtuki’ sa Kasulatan? (Buhat 17:11)

Dili kay nagduhaduha ang mga taga Berea kang Pablo ug sa balita nga iyang gidala ngadto kanila, apan sila naghimog pagtuki aron sa pagpamatuod nga si Jesus mao ang Mesiyas. Nga daghan kanila nahimong mga magtutuo nagpakita nga ang ilang motibo maputli. (Buhat 17:12)—6/15, panid 18.

◻ Unsa “ang basahon sa mga Gubat ni Jehova”? (Numeros 21:14)

Kini maoy usa ka kasaligang kasaysayan sa mga gubat sa Diyos alang sa iyang katawhan. Tingali nagsugod kini uban sa kadaogan ni Abraham batok sa sinangkapang mga manunulong sa Yutang Saad sumala sa narekord diha sa Genesis kapitulo 14. Ang dakong kataposan sa basahon mao “ang gubat sa dakong adlaw sa Diyos nga Makagagahom” sa Har–Magedon. (Pinadayag 16:14, 16)—7/1, panid 20, 22.

◻ Sa unsang paagi ang Pulong sa Diyos, ang Bibliya, makatabang kanato sa pag-antos sa kasakit?

Ang Bibliya nagsulti kanato kon nganong gitugotan ni Jehova ang kasakit, ug kini usab nagpasalig kanato nga ang kasakit sa dili madugay matapos. (Roma 5:12; Pinadayag 21:1-5)—7/15, panid 4, 5.

◻ Sa unsang paagi ang katawhan sa Diyos karong adlawa “nagapabanaag nga samag mga salamin sa himaya ni Jehova”? (2 Corinto 3:18)

Ang himaya sa Diyos nagasidlak pinaagi sa “mahimayaong maayong balita bahin kang Kristo, nga mao ang dagway sa Diyos.” Ang mga Saksi ni Jehova nagapabanaag niini nga himaya pinaagi sa pagpahayag sa himaya ni Jehova ug sa himaya sa iyang Gingharian pinaagi sa iyang Anak. (2 Corinto 4:4-6)—7/15, panid 15, 16.

◻ Kanus-a angay magpabawtismo ang usa ka tawo?

Ang bawtismo maoy usa ka tikang nga pagahimoon kon ang usa nakahimo na ug bug-os, dili-pinugngan, ug walay-kondisyon nga pagpahinungod kang Jehova pinaagi kang Kristo Jesus sa pagbuhat sa kabubut-on sa Diyos.—8/1, panid 14.