ASOS

Usa ka dunggoanang lungsod sa Misia sa A nga baybayon sa Gulpo sa Adramito, busa sakop sa Romanhong lalawigan sa Asia. Kining dapita nailhan karong adlawa nga Behramkale (kaniadto, Behramköy).

Sa iyang ikatulong misyonaryong panaw, si apostol Pablo mipauli sa Jerusalem ug mihapit sa Troas. Gikan didto iyang gipalawig si Lucas ug ang uban pa sakay sa usa ka sakayan padulong sa Asos, diin siya nagplano nga moapas kanila didto. Ang sakayan kinahanglang molawig libot sa Cape Baba (Lectum) aron makaabot sa Asos (sa pikas bahin sa habog nga lawis gikan sa Troas), ug tungod niana dili kaayo layo ang gibaktas ni Pablo (mga 32 km; 20 mi) ug nakaabot gihapon sa Asos sa hustong oras aron makasakay sa maong sakayan, ug dayon milawig paingon sa Mitilene sa pulo sa Lesbos, sa H sa Asos.​—Buh 20:​6, 13, 14.