Makahinumdom Ka Ba?

Nawili ka ba sa pagbasa sa nangaging mga isyu sa Ang Bantayanang Torre? Nan tan-awa kon makahinumdom ka ba sa mosunod nga mga punto:

◻ Sa unsa nga diwa nga nakaingon si Pablo nga siya “hinlo gikan sa dugo sa tanang tawo”? (Buhat 20:26, 27)

Sa matin-aw, sa panahon sa iyang kinabuhi si Pablo wala gayod makaulag dugo diha sa gubat ni nakakaon siyag dugo. Apan, labing hinungdanon, siya labing maikagon sa mga kinabuhi ingong gihawasan sa ilang dugo. Siya nabalaka nga mawad-an sila sa ilang mga kinabuhi sa adlaw sa paghukom tungod sa kapakyasan niya sa paghatag kanila ug bug-os nga pamatuod.​—9/1, panid 27.

◻ Nganong epektibo kaayo ang wali ni Jesus sa kiliran sa bukid?

Bililhon ang wali ni Jesus dili lamang tungod sa espirituwal nga unod niini kondili tungod sa pagkayano ug pagkatin-aw niini.​—9/15, panid 9.

◻ Nganong epektibo kaayo ang tambag ni apostol Pablo?

Ang pagkaepektibo niini nakita sa kamatuoran nga kadtong gihatagan niini nasayod nga gimahal sila ni Pablo. Lain pa, misalig siya sa diyosnong kaalam, dili sa iyang kaugalingong mga opinyon, ug siya mihatag ug tambag uban ang espiritu sa kalumo. (2 Timoteo 3:16; Tito 3:1, 2)​—9/15, panid 12, 13.

◻ Unsay gibarogan sa upat ka mananap nga nakita ni Daniel sa iyang damgo nga natala sa Daniel kapitulo siyete?

Sila nagbarog sa mga gahom sa kalibotan gikan pa sa mga adlaw ni Daniel paunahan hangtod sa pagkatukod sa Gingharian sa Diyos. Kini sila mao: Babilonya, Medo-Persia, Gresya, ug Roma uban ang salingsing niini, ang Anglo-Amerikanong Gahom sa Kalibotan.​—10/1, panid 7.

◻ Nganong ang pagwali sa maayong balita mahitungod sa Gingharian mao ang praktikal nga paagi sa pagpakitag gugma sa silingan?

Ang buluhatong pagsangyaw praktikal tungod kay makatabang kini sa mga tawo sa pagpadapat sa moral nga mga prinsipyo. Kini sa baylo makapalikay kanila sa mga problema sa kinabuhi.​—10/1, panid 23.

◻ Nganong ang terminong “Anak sa tawo” tukma kang Jesus?

Dihang giaplikar ni Jesus kining terminoha sa iyang kaugalingon usa siya ka tawo, ug busa siya sa literal “anak sa tawo.” Iyang gihatag usab ang iyang kinabuhi aron sa paglukat sa katawhan, busa gituman ang papel ingong labing suod nga paryente sa tawo​—tinuod nga “Anak sa tawo.” (Mateo 20:28; Hebreohanon 2:11-17)​—10/15, panid 6.

◻ Nganong importante ang makahuloganong komunikasyon tali sa mga ginikanan ug sa mga anak?

Ang maong pagsultihay makamugnag mutuwal nga pagsinabtanay ug pagtinagdanay sa usag usa. Dihang magpakita ang mga bata ug pagkamainandamon sa pagpakigsulti bahin sa personal nga mga butang, mahibaloan sa ilang mga ginikanan kon unsay anaa sa ilang mga kasingkasing. Lain pa, makita sa mga bata nga ang mga emosyon ug mga motibo sa ilang mga ginikanan sama ra sa ilaha. Kining tanan makaamot ug dako sa pagkahimong malipayon, hiusang pamilya.​—11/1, panid 18, 19.

◻ Sa unsang paagi malikayan sa Kristohanon ang mga suliran maylabot sa relasyon sa negosyo?

Kinahanglang susihog maayo sa Kristohanon ang iyang mga motibo sa dili pa mosulod ug bisan unsang negosyo. Ang tambag sa Bibliya diha sa Roma 14:19 kinahanglang isilsil sa hunahuna, nga “kab-oton ta ang mga butang nga makaamot sa pagdinaitay ug nga makalig-on sa usag usa.”​—11/15, panid 19.

◻ Unsa ang mga kaayohan sa pagsunod sa dinasig nga tambag sa pagminyo “diha lamang sa Ginoo”? (1 Corinto 7:39)

Ang Kristohanong mga kapikas makadasig sa usag usa sa malamposong pagsagubang sa nagkalainlaing mga pagsulay ug busa makapabiling matinumanon sa Diyos. Magkausa, sila makasukol sa bisan unsang mga kalisdanan nga makahuyang sa bugkos sa kaminyoon. Ang ilang mga paningkamot sa pag-alagad kang Jehova ug sa pagkinabuhi sumala sa iyang mga paagi makaamot ug malamposong kaminyoon nga makapasidungog kang Jehova.​—11/15, panid 26.

◻ Unsang maayong sugyot maylabot sa mga amot ang gihatag ni apostol Pablo sa kongregasyon sa Corinto?

Si Pablo misulat diha sa 1 Corinto 16:2: “Sa nahaunang adlaw sa matagsemana ang matag usa kaninyo . . . magagahin ug magatigom sumala sa iyang pag-uswag.” Ang pagkaregular mao ang sekreto nga gihatagag pasiugda, dili kaayo ang bili. Karon, kining prinsipyoha aplikado sa katawhan ni Jehova aron maabot ang gikinahanglang mga galastohan sa Kingdom Hall o sa paghimo sa ubang mga amot alang sa intereses sa Gingharian.​—12/1, panid 30.