Diyosnong Pagtahod sa Dugo

“Ako nagasangpit kaninyo sa pagsaksi niining adlawa mismo nga ako hinlo gikan sa dugo sa tanang tawo.”—BUHAT 20:26.

1. Sa unsang paagi ang mga pulong ni Pablo sa Buhat 20:26 nagabanaag sa hunahuna ni Jehova sa dugo?

ANG maong mga pulong ni apostol Pablo ingong usa ka Kristohanon nagbanaag sa iyang matarong nga pagtahod sa dugo, ang pluwido sa kinabuhi. Sa ulahi niining paghisgota, atong susihon unsay gipasabot ni Pablo nianang pahayaga. Apan ato unang tagdon kon unsay ginaingon sa Maglalalang sa hayopnon ug tawhanong mga kalag mahitungod sa dugo. Amo nang napahayag nga ginaisip ni Jehova nga Diyos ang dugo, ingong nagahawas sa kinabuhi, nga sagrado. Kadtong patuyang o dinanghag nga nag-ulag dugo, ug sa dugo sa tawo ilabina, masad-an sa dugo atubangan sa Diyos. Bisan pa niana, dili ba may mga paagi nga ang dugo magamit sa kaayohan sa katawhan?

2. (a) Nganong ang pagkaon ug dugo usa ka sala nga kamatayon ang silot alang sa mga Israelinhon? (b) Sa unsang paagi ang mga Israelinhon nakabatog kaayohan sa pagbantay nianang balaora?

² Ang balaod sa Diyos ngadto sa Israel mahitungod sa dugo gipahayag nga mapasiugdahon: “Dili ka mokaon sa dugo sa bisan unsang matang sa unod, tungod kay ang kalag [kinabuhi, King James Version; American Standard Version] sa tanang matang sa unod mao ang dugo niini. Si bisan kinsa nga mokaon niana pagaputlon.” Usa ka sala nga kamatayon ang silot nga ang Israelinhon o ang mga dumuloong sa ilang taliwala mokaon ug dugo, bisan alang sa gikinahanglang pagkaon. Una sila mokaon sa unod, kinahanglang ibubo nila ang dugo ug tabonan kana sa abog, sa ingon masambingayong nagbalik sa kinabuhi ngadto sa Diyos. (Levitico 17:13, 14) Kadto usa ka balaang balaod. Pinaagi sa pagbantay niadto, nahuptan sa mga Israelinhon ang maayong espirituwal nga relasyon uban kang Jehova, ang Tinubdan sa kinabuhi. Ug ilang gipahimuslan usab ang segundaryong mga kaayohan, ang pagpatunhay sa lawasnong kahimsog.

Ang Dugo ni Kristo

3. (a) Nganong ang dugo ni Jesus sa pagkatalagsaon “bililhon”? (b) Sa unsang paagi ang Hebreohanong Kasulatan nagapunting sa halad ni Jesus?

³ Ugaling, diha sa hunahuna ni Jehova ang usa ka talagsaong paggamit sa dugo. Kadto maoy sa pagtubos sa katawhan gikan sa sala ug kamatayon pinaagi sa “bililhong dugo” ni Kristo Jesus. Bisan una pa sa “pagkatukod sa kalibotan” (pinaagi sa pagpatungha sa makasasalang Adan ug Eva sa matubos nga mga kaliwat), si Jehova nasayod daan sa unsang paagi iyang pagaluwason ang katawhan. (1 Pedro 1:18-20; Roma 6:22, 23) Ang “dugo ni Jesus nga iyang Anak [ang] nagahinlo kanato gikan sa tanang sala.” (1 Juan 1:7) Hinungdanon kaayo ang maong paggamit sa dugo nga gipasulat sa Diyos diha sa Hebreohanong Kasulatan ang daghang hulagway ug landong nga nagapunting sa hingpit nga halad ni Jesus.​—Hebreohanon 8:1, 4, 5; Roma 15:4.

4. Unsang mga pasiunang talan-awon ang gitagana sa drama nga nahitala sa Genesis kapitulo 22?

⁴ Kasiglohan una sa paghatag sa Kasugoan ngadto sa Israel, gisugo ni Jehova si Abraham sa paghalad kang Isaac sa Bukid sa Moria. Sa ingon giilustrar sa Diyos sa unsang paagi iyang ihalad ang iyang bugtong Anak, si Jesus. Ang kinabubut-ong pagpasakop ni Isaac sa maong dramatikanhong hitabo naghulagway sa pagkamasinugtanon ni Jesus ngadto sa kabubut-on sa iyang Amahan sa pagbubo sa iyang dugo-sa-kinabuhi ingong halad.​—Genesis 22:1-3, 9-14; Hebreohanon 11:17-19; Filipos 2:8.

5. Sa unsang paagi ang mga halad sa Moisesnong Kasugoan may halalom espirituwal nga kahulogan?

⁵ Ang Moisesnong Kasugoan mitagana usab sa “usa ka landong sa maayong mga butang umaabot,” nga nagpunting sa unahan sa halad ni Jesus alang sa katawhan. Ang Kasugoan nagtugot sa usa lang ka paggamit sa dugo​—diha sa mga halad nga hayop ngadto kang Jehova. Ang maong mga halad dili lamang rituwal. Kadto may halalom relihiyosong kahulogan. Sa detalyado, sila naglandong sa halad ni Jesus ug sa tanang mahimo pinaagi niana.​—Hebreohanon 10:1; Colosas 2:16, 17.

6. Ang mga halad sa Adlaw sa Pagtabon sa Sala nagalandong sa pagtubos alang sa unsang duha ka pundok? Sa unsang paagi?

⁶ Pananglitan, ang pagtuman ni Aaron sa mga halad sa Adlaw sa Pagtabon sa Sala naghulagway sa unsang paagi ang dakong Hataas nga Saserdote, si Jesus, magagamit sa merito sa iyang bililhong dugo sa kinabuhi mismo sa pagtagana sa kaluwasan, nahauna alang sa iyang saserdotehanong “balay” sa 144,000 ka dinihogang mga Kristohanon aron sila kahatagan sa pagkamatarong ug makabaton sa panulondon isip mga hari ug mga saserdote uban kaniya sa mga langit. Sunod, ang halad alang sa “ang katawhan” naghulagway sa pagtubos ni Jesus sa tanang tawo nga magapanunod sa kinabuhing walay kataposan dinhi sa yuta. Bisan karon, ang “usa ka dakong panon” kanila giisip nga matarong alang sa kaluwasan sa umaabot nga dakong kasakitan. Kini tungod kay “ilang gilabhan ang ilang mga biste ug gipaputi sila sa dugo sa Kordero,” ug gipakita ang ilang pagtuo pinaagi sa paghatag sa Diyos ug balaang pag-alagad.​—Levitico 16:6, 15, 18-22; Hebreohanon 9:11, 12; Pinadayag 14:1, 4; 7:4, 9, 14, 15.

7. Nganong kita mahimong magkalipay sa pagkatuman nianang karaang mga landong?

⁷ ‘Ang kinabuhi anaa sa dugo.’ Ang dugo ni Jesus hingpit, mao nga ang iyang halad mosangpot sa paghatag ug hingpit nga kinabuhi sa tanan niadtong motuo. Kita magmaya ug dako nga kadtong karaang mga hulagway natuman diha sa mahigugmaong halad ni Jesus!​—Levitico 17:14; Buhat 20:28.

Dugo—Usa ka Moral nga Isyu

8, 9. (a) Unsa ang pipila sa kahibulongang mga obra sa dugo? (b) Sama kang David, sa unsang paagi kita magpahayag ug diyosnong pagtahod sa paagi sa atong pagkabuhat?

⁸ Ang kahibulongang kaalam makita diha sa desinyo sa dugo. Ang mga ebolusyonista, nga wala gihapon masayod kon unsaon pagpatin-aw ang sinugdan sa kinabuhi, mosulay sa pagsulti kanato nga sa usa ka paagi ang atong dugo sa kinabuhi miagi sa ebolusyon. Pagkadili katuohan!

⁹ Ginabuhat sa atong komplikadong dugo ang katingalahan gayong mga obra. Kini nagadalag mosustento-sa-kinabuhing oksiheno ug mga sustansiya ngadto sa tanang bahin sa atong lawas. Kini nagakuha sa mga hugaw. Kini nagadalag puting mga korpuskulo sa pagbugno sa sakit ug sa platelets nga magaayo sa ginagmay ug dagkong mga daot. Kini nagatabang sa pagpaigoigo sa temperatura sa lawas. Ang atong dugo lahi sa matag usa kanato; ang mga geneticist sa Inglaterra nagahisgothisgot pa sa paggamit sa “mga marka sa tudlo sa DNA” nga mapatungha gikan sa mga sampol sa dugo sa pag-ila sa mga kriminal. Ang dugo maoy usa ka organo taliwala sa daghang parte sa lawas nga nakapahimo ni Haring David sa pagpatugbaw: “Oh Jehova ikaw nagsusi kanako, ug ikaw nakaila kanako. Pagadayegon ko ikaw tungod kay sa makalilisang nga paagi ako kahibulongan nga pagkabuhat”!​—Salmo 139:1, 14.

10. (a) Kinsay magahukom kon sa unsang paagi magamit ang dugo? (b) Unsang tin-awng direksiyon ang gihatag sa Diyos kang Noe ug sa Israel? (c) Unsang panig-ingnan nagapakita nga ang dugo balaan bisan pag mahitabo ang usa ka emerhensiya?

¹⁰ Dili ba angay nga ang matarong Mag-uumol sa katawhan, ang Tigdesinyo sa atong dugo, mao ang Usa nga mohukom sa unsang paagi gamiton ang maong sapasapa sa kinabuhi? (Job 36:3) Kana iyang gibuhat sa tinong paagi. Siya mipahayag ngadto sa atong katigulangang si Noe: “Ang unod lamang uban ang kalag niini​—ang dugo​—dili ninyo pagakan-on.” (Genesis 9:4) Ug sa iyang gisubli ang iyang Kasugoan ngadto sa Israel, iyang gipahayag sa tin-aw: “Sa yano ihukom ang dili pagkaon sa kalag uban sa unod. Dili ka magkaon niana. Igabubo mo kini sa yuta sama sa tubig.” (Deuteronomio 12:23, 24) Pihong ang maong sugo diha sa hunahuna ni David sa dihang ang tulo sa iyang mga manggugubat nagpameligro sa ilang mga kinabuhi aron siya madad-an ug tubig mainom gikan sa atabay sa Bethlehem. Iyang “gibubo kadto ngadto kang Jehova” ingong naghawas sa ilang dugo sa kinabuhi. (2 Samuel 23:15-17) Bisan diha pa sa emerhensiya ang pagkabalaan sa dugo dili mahimong dili tagdon.​—Tan-awa usab ang 1 Samuel 14:31-34.

Diha sa Kristohanong Kongregasyon

11, 12. (a) Unsang gitultolan-sa-espiritung lawas ang naghukom mahitungod sa doktrinal nga mga suliran sa unang siglo? (b) Sa unsang relihiyosong kahimtang gibutang sa maong nagmandong lawas ang pagkaon ug dugo? (c) Nganong ang mga abono sa dugo katumbas sa pagkaon ug dugo agi sa baba?

¹¹ Makahanduraw ka ba sa usa ka dakong lawak sa unang-siglong Jerusalem? Nagtigom didto ang mga apostol ni Jesus ug ang ubang ansiano sa Kristohanong kongregasyon. Unsay ilang gihisgotan? Si Pablo ug Bernabe miabot gikan sa Antioquia sa pag-atubang kanila sa usa ka sulirang mitungha mahitungod sa sirkunsisyon. Kadtong konsilyoha mihukom nga ang bag-ong-nakabig nga mga Kristohanon dili kinahanglang magpasirkunsidar sa unod.​—Buhat 15:1, 2, 6, 13, 14, 19, 20.

¹² Sa pagpahayag sa maong desisyon, ang nagdumalang ansiano, si Santiago, nagsuma sa mga kinahanglanon nga nahipatong pa sa mga Kristohanon. Siya miingon: “Gipalabi sa balaang espiritu ug kanamo ang dili pagdugang sa inyong palas-anon, gawas niining mga butang kinahanglanon, ang paglikay sa mga butang hinalad sa mga diyosdiyos ug sa dugo ug sa mga butang linuok [mao nga mahawiran ang dugo] ug sa pakighilawas. Kon mabinantayon kamong magpahilayo niining mga butanga, magmauswagon kamo. Maayong panglawas kaninyo!” (Buhat 15:28, 29) Busa ang pagsimbag diyosdiyos, pagkaon sa dugo, ug pakighilawas gibutang sa samang relihiyosong kahimtang. Ang mga Kristohanon kinahanglang maglikay niining tanan aron mahuptan ang espirituwal nga kahimsog ug makig-ambit sa katumanan sa mga saad sa Diyos. Bahin sa dugo, dili bililhon kon kini kan-on pinaagi sa baba o iabono agi sa kaugatan. Ang katuyoan sama ra​—ang pagsustento ug pagpakaon sa lawas. Sumala sa tin-awng gipaila ni Santiago, ang pagkapakyas sa paglikay sa dugo maoy paglapas sa kasugoan sa Diyos.

13. (a) Ang paglikay sa dugo misangpot sa unsang dugang panalipod alang sa mga Saksi ni Jehova? (b) Sa unsang paagi ang ubang balaang balaod nanalipod sa katawhan sa Diyos?

¹³ Ang presenteng pagkaylap sa AIDS, hepatitis, ug ubang sakit pinaagi sa mga abono sa dugo nagapailang ang maayong panglawas sa pisikal kadaghanan nalangkit usab sa pagbantay sa mga kasugoan sa Diyos. Sa panahon sa Bibliya, gihatag sa Diyos sa Israel ang tinong mga balaod mahitungod sa diyeta, kuwarentinas, panglimpiyo sa lawas, ug sanitasyon nga nahiangay gayod sa ilang pagpuyo sa kamingawan. (Levitico 11:2-8; 13:2-5; Deuteronomio 23:10-13) Pinaagi sa pagbantay sa maong mga kalagdaan, nahuptan sa Israel dili lamang ang suod espirituwal nga relasyon uban sa ilang Diyos kondili napanalipdan usab sa lawas gikan sa mga sakit nga mihampak sa ilang mga silingan. Sa miagi pa lang nga siglo nasugdan pag-ila sa medikal nga mga tawo ang praktikal nga kaalam luyo sa pipila nianang mga balaora. Daghan ang nakaamgo, usab, nga makataronganon ang balaod sa Diyos bahin sa dugo.

14. Sa nagmasinugtanon ang Israel, unsang pag-ayo ug mga panalangin ang ilang nabatonan?

¹⁴ Sa dihang nagmasinugtanon ang Israel, gituman sa Diyos ngadto kanila ang mga saad: “Kon kamo magapatalinghog gayod sa tingog ni Jehova nga inyong Diyos ug magabuhat kon unsay matarong sa iyang mga mata ug magapamati sa iyang mga sugo ug magabantay sa tanan niyang lagda, dili ko igabutang kaninyo ang mga sakit nga akong gibutang sa mga taga-Ehipto; tungod kay ako si Jehova mao ang nagaayo kaninyo.” Labawng hinungdanon, ang pagkamasinugtanon naghan-ay sa Israel alang sa umaabot nga mga panalangin sa Gingharian.​—Exodo 15:26; 19:5, 6.

15. Unsang bag-ong panig-ingnan ang nagailustrar sa unsang paagi kita mapanalanginan sa pagsugot sa mga lagda sa Diyos?

¹⁵ Ang mga Saksi ni Jehova nagaila sa daghang kaayohang gitagana sa modernong medisina. Pananglitan, dihang ang usa ka Kingdom Hall duol sa Sydney, Australia, giguba sa bomba sa usa ka terorista sa miaging tuig ug kapin sa 50 ka nasamdang Saksi gidala dayon sa duol nga ospital, sila mapasalamatong ang mga doktor may daghang suplay sa dili-dugo nga mga pluwido aron iabono. Naluwas ang tanang samdan. Sila mapasalamaton tungod sa maong mga abono nga nahiuyon sa mga lagda ni Jehova. Ingong dugang panalangin, walay mausa kanila ang nameligrong matakdan sa mga sakit nga ikapasa pinaagi sa dugo.

“Hinlo Gikan sa Dugo sa Tanang Tawo”

16. Sama kang Pablo, unsang tinamdan ang angay atong ipakita bahin sa sagradong pag-alagad?

¹⁶ Ugaling, moliso na usab kita sa unang siglo. Mga pito ka tuig ang nakalabay sukad si Pablo ug Bernabe nakadungog nga gipahibalo ni Santiago ang pagdili sa pagsimbag diyosdiyos, sa dugo, ug sa pakighilawas. Niadtong panahona nakahimo si Pablo ug duha ka misyonaryong biyahe latas sa Asia Minor ug ngadto sa Sidlakang Uropa. Sa maong panahon, sa iyang paghibalik agi sa Mileto, siya nakahimo sa pagpakigsulti sa mga ansiano sa Efeso, kinsa nangadto didto aron makigkita kaniya didto. Iyang gipahinumdoman sila nga wala siya magpahigawas sa iyang kaugalingon sa ilang taliwala sa “pagpaulipon sa Ginoo uban ang labing dakong pagpaubos sa hunahuna ug sa mga luha ug mga pagsulay.” Kita ba karong adlawa sama ka masakripisyohon-sa-kaugalingon sa paghatag sa tanan natong nabatonan diha sa pag-alagad kang Jehova? Angay gayod.​—Buhat 20:17-19.

17. Sama kang Pablo, sa unsang paagi atong pagatumanon ang atong pag-alagad?

¹⁷ Giunsa pagtuman ni Pablo ang maong pag-alagad? Misangyaw siya sa bisan diin siya makakaplag ug mga tawo, ilabina diha sa ilang mga balay, ug wala magsapayan kon unsay ilang relihiyon. Siya wala magpugong sa pagtudlo niadtong mga ansiano, ug pihong sila mikuyog kaniya samtang siya nagtudlo “sa dayag ug sa balay-balay.” Dili lamang sila ang nakabatog kaayohan sa madasigong ministeryo ni Pablo, kay siya ‘bug-os nagpamatuod ngadto sa mga Hudiyo ug ngadto sa mga Grego mahitungod sa paghinulsol ngadto sa Diyos ug pagtuo sa Ginoong Jesus.’ Matikdi ang pulong “bug-os.” Kita ba karong adlawa mabug-oson sa pagtino nga ang tanang matang sa katawhan, tanang etnikong pundok, magadawat sa pamatuod?​—Buhat 20:20, 21; Pinadayag 14:6, 7.

18. (a) Sama kang Pablo, sa unsang paagi angay natong ilangkit ang atong kalag sa pag-alagad sa Diyos? (b) Sama kang Pablo, unsay atong pagabuhaton atubangan sa nagdaghang mga kapit-osan?

¹⁸ Ang pulong “bug-os” makita usab sa sunod nga pahayag ni Pablo: “Wala ko isipa ang akong kalag nga minahal kanako, aron lamang akong matapos ang akong dalan ug ang ministeryo nga akong nadawat sa Ginoong Jesus, sa paghatag ug bug-os nga pamatuod ngadto sa maayong balita sa dili-takos nga kalulot sa Diyos.” (Buhat 20:24) Wala unyay bili alang sa iyang kalag, o kinabuhi, kon dili niya tumanon sa ingon ang iyang ministeryo. Kana ba ang atong pagbati mahitungod sa atong ministeryo? Samtang kining kataposang mga adlaw nagadali ngadto sa kataposan, ug samtang ang mga kalisod, paglutos, sakit, o pagkatigulang moapektar kanato, ato ba gihapong ginapasundayag ang espiritung sama sa kang Pablo sa pagpangita sa bug-os sa “takos” nga mga tagbalay?​—Mateo 10:12, 13; 2 Timoteo 2:3, 4; 4:5, 7.

19. Nganong si Pablo nakaingon, “Ako hinlo gikan sa dugo sa tanang tawo”?

¹⁹ Wala magdahom si Pablo nga igkita pag-usab kadtong mga ansiano sa Efeso. Bisan pa niana, uban ang bug-os nga pagsalig siya nakasulti kanila: “Kamo akong ginasangpit sa pagsaksi karong adlawa mismo nga ako hinlo gikan sa dugo sa tanang tawo.” Sa unsang paagi? Si Pablo wala mag-ulag dugo sa pakiggubat. Siya wala makakaog dugo. Ug siya labing maikagon sa mga kinabuhi sa uban, ingong gihawasan sa ilang dugo. Dili niya buot makitang sila mawad-an sa ilang mga kinabuhi sa Adlaw sa Paghukom sa Diyos tungod sa pagkapakyas niya sa paghatag ug bug-os nga pamatuod. Siya wala magpugong sa pagpahayag ngadto sa maong mga ansiano ug sa uban sa “tanang tambag sa Diyos.”​—Buhat 20:26, 27.

20. (a) Nahiuyon sa sublisubli nga pasidaan ni Jehova kang Ezekiel, unsang responsabilidad ang atong pagatumanon karong adlawa? (b) Unsay sangpotanan alang kanato ug niadtong magapatalinghog kanato?

²⁰ Samtang magkaduol ang “dakong kasakitan,” ang panginahanglan sa pagpahayag sa tanang tambag sa Diyos mahimong labi pang dinalian. Ang kahimtang susama sa iya sa mga 2,600 ka tuig kanhi dihang taliabot ang kalaglagan sa Jerusalem. Ang pulong ni Jehova miabot sa iyang manalagnang si Ezekiel, nga miingon: “Anak sa tawo, gihimo ko ikaw nga usa ka magbalantay sa balay sa Israel, ug kinahanglang makadungog ka gikan sa akong baba sa mga pulong ug kinahanglang imong pasidan-an sila gikan kanako. Dihang ako magaingon sa usa nga daotan, ‘Ikaw mamatay gayod,’ ug ikaw wala magpasidaan kaniya ug magapahayag aron sa pagpasidaan sa daotan gikan sa iyang daotang dalan aron magpabilin siyang buhi, siya tungod kay daotan, sa iyang kasal-anan siya mamatay, apan ang iyang dugo akong panilngon gikan sa imong kamot.” (Ezekiel 3:17-21; 33:7-9) Ang dinihogang mga alagad ni Jehova ug ang “dakong panon” sa ilang mga kauban nakabaton sa susamang responsabilidad karong adlawa. Ang atong pagpamatuod kinahanglang bug-os. Sa ingon, sa adlaw sa panimalos sa Diyos kita maluwas uban niadtong magpatalinghog kanato.​—Isaias 26:20, 21; 1 Timoteo 4:16; Pinadayag 7:9, 14, 15.

21. Sa unsang mga paagi kita makapakitag diyosnong pagtahod sa dugo, ug uban ang unsang sangpotanan?

²¹ Bahin sa Kristohanong neyutralidad, paglikay sa dugo, paghatag ug bug-os nga pamatuod, ug pagtuo sa bililhong halad ni Jesus, pasagding ang matag usa kanato madeterminado sa pagsugot sa tanang tambag sa Diyos. Sa ingon kita makaambit sa makalipayng katumanan sa Salmo 33:10-12: “Si Jehova mismo nagbungkag sa tambag sa kanasoran; iyang gipakyas ang mga hunahuna sa mga katawhan. Sa panahong walay katinoan ang tambag mismo ni Jehova mobarog . . . Malipayon ang nasod kansang Diyos mao si Jehova.”

Unsay imong tubag?

◻ Unsa ang usa ka paggamit sa dugo nga mopatunghag malungtarong mga panalangin?

◻ Sa unsang paagi kita makabatog kaayohan sa paglikay sa dugo?

◻ Sa unsang paagi kita makapabiling “hinlo gikan sa dugo sa tanang tawo”?

◻ Unsang panig-ingnan sa pagkabug-os ang angay natong sundon?

[Blurb sa panid 26]

Ang The Wall Street Journal sa Marso 20, 1986, nagdala sa usa ka artikulong may titulong “Ang mga Bangko sa Dugo Dili Luwas Gikan sa AIDS.” Ang unang parapo mabasa: “Ang suplay sa dugo sa U.S. dili kaayo luwas kay sa ipatuo kanato sa mga organisasyon sa bangko sa dugo. Ang mga abono lagmit pangunang paagi sa pagkaylap sa Acquired Immune Deficiency Syndrome saylo sa presenteng mga pundok nga nameligro kaayo ngadto sa katibuk-ang populasyon. Ang pagsusi sa pangontra sa AIDS nga gigamit sa pagsusi sa mga donasyong dugo dili makapasalig nga ang tanang naapektahang yunit matiktikan. Grabe pa, ang mga magbabangko sa dugo maukon-ukonon sa pagkuha sa mga lakang nga makapauswag sa pagkaluwas sa mga abono.”