Ang Adlaw ni Jehova—Usa ka Hinungdanong Tema

1, 2. (a) Unsang hinungdanong tema ang gihisgotan sa tanang 12 ka manalagna? (b) Sa unsang paagi ang pipila sa 12 ka manalagna direktang naghisgot sa adlaw ni Jehova?

“ANG dakong adlaw ni Jehova haduol na. Kini haduol na, ug nagadali sa hilabihan.” (Sofonias 1:14) Ang mga manalagna sa Diyos nagbalikbalik pagpasidaan bahin sa nagsingabot nga adlaw ni Jehova. Sagad nilang gihisgotan nga ang pag-abot niana makaapekto sa matag adlaw nga kinabuhi sa mga tawo, sa ilang moral, ug sa ilang panggawi. Ang ilang mga pagmantala niana sa kanunay may pagkadinalian. Kon ikaw mismo nakadungog sa maong mga mensahe, unsa kahay imong reaksiyon?

² Sa pagbasa sa mga basahon sa 12 ka manalagna, imong masayran nga silang tanan naghisgot sa direkta o di-direktang paagi sa adlaw ni Jehova.a Busa, sa dili pa hisgotan ang bililhong impormasyon nga gipahayag sa maong mga manalagna diha sa sunod nga mga kapitulo, hinumdomi ang gibalikbalik nga tema: ang adlaw ni Jehova. Unom ka manalagna ang direktang migamit sa maong mga pulong o sa susamang mga termino. Tatawng gibatbat ni Joel “ang dako ug makalilisang nga adlaw ni Jehova.” (Joel 1:15; 2:1, 2, 30-32) Giingnan ni Amos ang mga Israelinhon nga mangandam sa pag-atubang sa ilang Diyos, kay ang adlaw ni Jehova maoy adlaw sa kangitngit. (Amos 4:12; 5:18) Gisulti ni Sofonias sa ulahi ang mga pulong nga gikutlo sa parapo 1. Ug sa dayon nang malaglag ang Jerusalem, si Abdias nagpasidaan: “Haduol na ang adlaw ni Jehova batok sa tanang kanasoran.”—Abdias 15.

3. Nganong makaingon kita nga ang mga manalagna human sa pagkadestiyero naghisgot bahin sa adlaw ni Jehova?

³ Imong makita usab nga ang duha ka manalagnang gipadala ngadto sa mga Hudiyo sa ilang pagbalik gikan sa pagkadestiyero migamit ug susamang mga pulong. Si Zacarias naghisgot bahin sa adlaw sa dihang pagalaglagon ang tanang kanasoran nga mobatok sa Jerusalem. Iyang gitin-aw pagbatbat kon unsay mahitabo sa “usa ka adlaw nga mailhang iya ni Jehova.” (Zacarias 12:9; 14:7, 12-15) Ug si Malaquias nagpasidaan sa katawhan bahin sa umaabot nga “dako ug makalilisang nga adlaw ni Jehova.”—Malaquias 4:1-5.

4. Sa unsang paagi ang pipila sa 12 ka manalagna naghisgot sa adlaw ni Jehova?

⁴ Bisan pag wala mogamit sa mga pulong “adlaw ni Jehova,” gipasabot sa ubang unom ka manalagna ang maong adlaw. Si Oseas naghisgot nga si Jehova makighusay sa Israel ug sa ulahi sa Juda. (Oseas 8:13, 14; 9:9; 12:2) Ang maong mga mensahe sagad nga maoy kabahin sa gihimo ni Jehova niadtong panahona. Pananglitan, si Jonas nagmantala bahin sa paghukom sa Diyos sa Nineve, ug si Miqueas naghubit kon unsay mahitabo sa dihang ang Diyos molihok batok sa rebelyosong mga katawhan. (Jonas 3:4; Miqueas 1:2-5) Misaad si Nahum nga si Jehova manimalos sa Iyang mga kaaway. (Nahum 1:2, 3) Mituaw si Habacuc alang sa hustisya ug iyang gihubit “ang adlaw sa kasakit.” (Habacuc 1:1-4, 7; 3:16) Ang pipila ka mensahe niining mga basahona tinong naghisgot sa mga panghitabo nga maglangkit sa matuod nga mga Kristohanon. Pananglitan, si Haggeo, usa sa mga manalagna nga nanagna sa pagbalik sa mga Hudiyo gikan sa pagkadestiyero, mitagna sa pag-uyog sa mga nasod. (Haggeo 2:6, 7) Si apostol Pablo mikutlo gikan sa mga pulong sa Haggeo 2:6 aron awhagon ang mga Kristohanon nga maanaa sa inuyonang kahimtang sa dihang pagahanawon sa Diyos ang simbolikong daotang langit.—Hebreohanon 12:25-29; Pinadayag 21:1.

UNSA BA ANG ADLAW NI JEHOVA?

5, 6. Sumala sa mga manalagna, unsa unyay mahitabo sa adlaw ni Jehova?

⁵ Ikaw adunay balidong hinungdan sa pagkahibulong kon unsay mahitabo sa adlaw ni Jehova. Basin mangutana ka, ‘Ang adlaw ni Jehova makaapekto ba sa akong pagkinabuhi karon ug sa akong kaugmaon?’ Sumala sa gipaila sa mga manalagna, ang adlaw ni Jehova maoy usa ka yugto sa dihang si Jehova molihok batok sa iyang mga kaaway aron ipahamtang ang paghukom, nga maoy adlaw sa pakiggubat. Kanang makalilisang nga adlaw lagmit mahimong usa ka adlaw sa talagsaong mga panghitabo sa langit. “Ang adlaw ug ang bulan mongitngit, ug ang mga bituon mapagngan sa ilang kahayag.” (Joel 2:2, 11, 30, 31; 3:15; Amos 5:18; 8:9) Unsa ang mga hitabo sa yuta diin kita nagpuyo? Si Miqueas miingon: “Ang mga bukid mangatunaw sa ilalom [ni Jehova], ug ang ubos nga kapatagan mangapikas, sama sa talo tungod sa kalayo, sama sa katubigan nga gibubo sa usa ka titip nga dapit.” (Miqueas 1:4) Ang maong kahubitan tingali masambingayon, apan makahinapos kita gikan niana nga ang mga buhat sa paghukom sa Diyos magpahinabog mga kalaglagan diha sa yuta ug sa mga molupyo niini. Hinuon ang mga buhat sa paghukom sa Diyos dili makadaot sa tanang tawo. Ang mao mismong mga manalagna naghisgot ug dagayang mga panalangin alang niadtong ‘mangita sa maayo’ ug mao nga magpadayong buhi.—Amos 5:14; Joel 3:17, 18; Miqueas 4:3, 4.

⁶ Ang uban pa sa 12 ka manalagna mihatag ug dugang nga tin-awng mga kahubitan bahin sa adlaw ni Jehova. Si Habacuc tin-awng naghulagway kon sa unsang paagi pagadugmokon ni Jehova “ang kabukiran nga walay kataposan” ug pagatumpagon “ang kabungtoran nga mohangtod sa panahong walay tino,” nga maoy haom nga mga paghulagway sa daw-malungtaron nga tawhanong mga organisasyon. (Habacuc 3:6-12) Oo, ang adlaw ni Jehova “maoy usa ka adlaw sa mabangis nga kasuko, usa ka adlaw sa kasakitan ug kagul-anan, usa ka adlaw sa bagyo ug sa kagun-oban, usa ka adlaw sa kangitngit ug sa kangiob, usa ka adlaw sa panganod ug sa mabagang kangiob.”—Sofonias 1:14-17.

7. Unsang hampak ang gitagna, ug sa unsang paagi mahimong matuman kini?

⁷ Pagkadakong kasakitan ang modangat niadtong makig-away batok sa Diyos! “Maut-ot ang iyang unod, samtang siya nagabarog; ug ang iyang mga mata maut-ot sa ilang mga luyak, ug ang iyang dila maut-ot sa iyang baba.” (Zacarias 14:12) Kon kaha ang maong panan-awon matuman sa literal nga paagi o dili, imong masabtan nga kini magkahulogan nga ang daghan makasinatig trahedya. Bisan pag ang katumanan niini dili literal, ang mga dila sa mga kaaway sa Diyos madunot sa diwa nga dili na kini makasultig masuklanong mga pulong. Ug ang mga ideya bahin sa nagkahiusang pagbatok sa katawhan sa Diyos mahimong hanap.

KON NGANONG MOLIHOK ANG DIYOS SA GUGMA

8, 9. (a) Aron masabtan ang mga buhat ni Jehova batok sa mga daotan, unsay angay nimong tagdon? (b) Sa unsang paagi ang imong pagkamaunongon sa matag adlaw nga kinabuhi nalangkit sa paglihok ni Jehova?

⁸ Mahimong nakadungog ka nga ang mga tawo nangutana: ‘Makahimo ba ang mahigugmaong Diyos sa pagpahinabo sa maong katalagman diha sa iyang mga kaaway? Kinahanglan bang ang Diyos magpahinabog kalaglagan sa yuta? Dili ba si Jesus miawhag nga ipadayon ang paghigugma bisan sa mga kaaway ug sa ingon magpamatuod nga mga anak sa Amahan diha sa mga langit?’ (Mateo 5:44, 45) Sa pagtubag niining mga pangutanaha, mahimo nimong hisgotan ang pagsugod mismo sa mga suliran sa katawhan. Ang Diyos naglalang sa unang tawhanong magtiayon sumala sa iyang larawan ug kasamahan—sila hingpit. Ugaling lang, ilang gipasulod ang sala ug kamatayon sa tawhanong pamilya ug sa ingon niana sa atong mga kinabuhi. Sila midapig sa kiliran ni Satanas nga Yawa bahin sa isyu kon kinsa ang adunay supremong katungod sa pagmando sa katawhan. (Genesis 1:26; 3:1-19) Sa pag-aginod sa mga siglo, si Satanas naningkamot sa pagpamatuod nga kon ang mga tawo hatagag panukmod sa pagbiya kang Jehova, sila dili na mag-alagad Kaniya. Nahibalo ka nga si Satanas napakyas. Si Jesu-Kristo ug ang daghang ubang mga alagad ni Jehova nagmatinumanon ngadto sa Diyos ug nagpadayag nga sila nag-alagad kaniya tungod sa gugma. (Hebreohanon 12:1-3) Sa walay duhaduha imong manganlan ang daghang tawo nga maunongong nag-alagad sa Diyos sa maong paagi.

⁹ Dugang pa, ikaw nalangkit niining isyuha nga mosangko sa pagwagtang ni Jehova sa pagkadaotan. Pananglitan, samtang magbasa ka sa 12 ka basahon, imong mamatikdan nga ang pipila ka manalagna nagyagyag sa maluhong estilo-sa-kinabuhi sa katawhan nga wala magtagad sa pagsimba kang Jehova. Ang mga manalagna nagtambag sa katawhan sa Diyos nga ‘ibutang ang ilang kasingkasing sa ilang mga dalan’ ug magbag-o sa ilang mga kinabuhi. (Haggeo 1:2-5; 2:15, 18; Amos 3:14, 15; 5:4-6) Oo, ang mga manalagna nagpakita sa katawhan kon unsaon pagkinabuhi. Kadtong midawat sa maong tambag nagpadayag nga si Jehova mao ang ilang Soberano, sa ingon nagpamatuod nga si Satanas maoy bakakon. Si Jehova magpamatuod nga siya maoy maunongon kanila sa dihang iyang laglagon ang iyang mga kaaway.—2 Samuel 22:26.

10. Nganong ang napanid-an ni Miqueas nakadugang ug hinungdan nga molihok si Jehova?

¹⁰ Adunay laing hinungdan nga molihok ang Diyos. Iliso ang imong pagtagad balik sa ikawalong siglo W.K.P. sa dihang si Miqueas nanagna sa Juda. Sa pagsulti nga samag siya mao ang nasod, iyang gipanig-ingon ang kahimtang ngadto sa usa ka parasan o prutasan human sa pagpamupo, nga walay nahibiling ubas o igos. Kana ang kahimtang niadto sa katilingban sa Juda, diin halos wala nay makaplagan nga mga matul-id. Gipangita sa mga Israelinhon ang ilang mga isigkalungsoranon, nga gibanhigan sila alang sa pag-ulag dugo. Ang ilang mga pangulo ug mga maghuhukom determinado gayong makasapi sa hinakog nga paagi. (Miqueas 7:1-4) Kon nagkinabuhi ka sa maong kahimtang, unsay imong bation? Lagmit gayod, ikaw mobatig kahangawa sa inosenteng mga biktima. Busa, labi pa gayod ang kahangawa ni Jehova sa mga dinaogdaog! Si Jehova nag-usisa karon sa katawhan. Sa imong hunahuna unsay iyang makaplagan? Ang mga daogdaogan sa pagkamadaoton nagapamintaha sa uban ug mabangisong nagaatake sa ilang mga silingan. Bahin sa mga maunongon, sila diyutay ra kaayo kon itandi sa populasyon sa kalibotan. Apan dili kinahanglang mawad-an kitag paglaom. Tungod sa gugma alang sa mga biktima, ipahamtang ni Jehova ang hustisya.—Ezequiel 9:4-7.

11. (a) Moresulta sa unsa ang adlaw ni Jehova alang sa mga nahadlok kaniya? (b) Sa unsang paagi naapektohan ang mga taga-Nineve sa mapasidan-ong mensahe ni Jonas?

¹¹ Tin-aw nga ang adlaw ni Jehova moresulta sa pagkalaglag sa iyang mga kaaway ug kaluwasan niadtong nahadlok ug nag-alagad kaniya.b Gitagna ni Miqueas nga ang mga nasod magaganayan paingon sa bukid sa balay ni Jehova, nga mosangpot sa kalinaw ug panaghiusa sa tibuok kalibotan. (Miqueas 4:1-4) Niadtong panahona, ang pagmantala sa mga manalagna bahin sa adlaw ni Jehova nagpahinabo bag dakong kausaban sa mga kinabuhi sa katawhan? Alang sa pipila, kadto nagpahinabog kausaban. Hinumdomi nga sa dihang nagmantala si Jonas ug usa ka paghukom batok sa Nineve, ang mabangis, daotang mga molupyo niadtong siyudara “nagbutang ug pagtuo sa Diyos” ug “mitalikod sa ilang daotang dalan.” Ingong resulta, wala idayon ni Jehova ang paglaglag kanila niadtong panahona. (Jonas 3:5, 10) Naapektohan gayod ang mga kinabuhi sa mga taga-Nineve sa mensahe bahin sa umaabot nga adlaw sa paghukom ni Jehova!

SA UNSANG PAAGI APEKTADO KA SA MAONG ADLAW?

12, 13. (a) Bahin kang kinsa nanagna ang 12 ka manalagna? (b) Nganong makaingon kita nga ang matagnaong mga pulong sa 12 ka manalagna nagpunting gayod sa mga katumanan sa umaabot nga mga panahon?

¹² ‘Apan kadtong mga manalagnaa nagkinabuhi daghan nang mga siglo kanhi,’ tingali adunay motutol. ‘Ang ilang mga mensahe bahin sa adlaw ni Jehova mapadapat ba kanako?’ Tinuod, nagkinabuhi ang maong mga manalagna ug daghang katuigan sa wala pa matawo si Jesus, apan angay natong tagdon kon sa unsang paagi mapadapat ang ilang mga pulong bahin sa adlaw ni Jehova sa ika-21ng siglo. Unsang praktikal nga mga kaayohan ang atong makuha gikan sa ilang gisulti bahin sa dakong adlaw ni Jehova? Adunay usa ka butang nga makatabang aron masabtan nga ang ilang mensahe nahiangay sa atong adlaw ug makabaton kitag kaayohan niana. Kini mao nga atong ilhon nga ang mga manalagna nagpasidaan bahin sa adlaw ni Jehova batok sa Israel, Juda, kasikbit nga mga nasod, ug sa pipila ka gahom sa kalibotan niadtong panahona.c Ang hinungdanon mao nga nangatuman ang maong mga tagna! Ang mga Asiryanhon misulong gayod sa Samaria, ang Juda gilaglag niadtong 607 W.K.P., ug ang kasikbit nga mabatokong mga nasod sa wala madugay nangalaglag. Ngadtongadto, ang Asiryanhon ug Babilonyanhong mga gahom sa kalibotan nangapukan, nga ang tanan maoy katumanan sa espesipikong mga tagna.

¹³ Iliso karon ang imong hunahuna sa adlaw sa Pentekostes 33 K.P., nga nakalabay na ang taas nga panahon human sa unang pagkatuman sa kadaghanan sa maong mga tagna. Niadtong adlawa, gipadapat ni apostol Pedro ang tagna ni Joel ngadto sa pagbubo sa balaang espiritu sa Diyos. Unya gikutlo ni Pedro ang basahon ni Joel: “Ang adlaw mahimong kangitngit ug ang bulan mahimong dugo sa dili pa moabot ang dako ug bantogang adlaw ni Jehova.” (Buhat 2:20) Nagpakita kini nga adunay laing mga katumanan sa mga tagna bahin sa adlaw ni Jehova. Bahin sa tagna ni Joel, kini may ikaduhang katumanan sa 70 K.P. sa dihang ang Romanhong kasundalohan naglaglag sa Jerusalem, nga tinong panahon kadto sa kangitngit ug dugo.

14, 15. (a) Nganong makaingon kita nga ang mga tagna bahin sa adlaw ni Jehova mahinungdanon kanato karon? (b) Kanus-a nato madahom nga mahitabo ang adlaw ni Jehova?

¹⁴ Hinuon, ang tagna ni Joel ug ang ubang mga tagna bahin sa adlaw ni Jehova aduna pay kataposang mga katumanan, nga mapadapat kanatong buhi sa ika-21ng siglo. Nganong ikaingon kini? Gitambagan ni Pedro ang mga Kristohanon nga ‘ibutang kanunay sa hunahuna ang presensiya sa adlaw ni Jehova.’ Ang apostol mipadayon sa pag-ingon: “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.” (2 Pedro 3:12, 13) Walay bag-ong mga langit (usa ka bag-ong teokratikanhong kagamhanan) uban ang usa ka bag-ong yuta (katilingban sa matarong nga katawhan ilalom sa maong kagamhanan) nga natukod human gayod sa pagkalaglag sa Jerusalem niadtong 70 K.P. Busa ang matagnaong mga pulong bahin sa adlaw ni Jehova kinahanglang adunay laing katumanan. Oo, kining mga tagnaa hinungdanon kanato karon nga nagkinabuhi sa ‘makuyaw nga mga panahon’!—2 Timoteo 3:1.

¹⁵ Ang nahugpong nga kahubitan bahin sa adlaw ni Jehova sumala sa gipahayag niining 12 ka basahon sa Bibliya makapahunahuna kanato sa mga pulong ni Jesu-Kristo: “Aduna unyay dakong kasakitan nga ang ingon niana wala pa mahitabo sukad sa sinugdan sa kalibotan hangtod karon, ug dili na gayod mahitabo pa.” Siya miingon nga “dihadiha human sa” pagsugod sa maong dakong kasakitan, “ang adlaw mongitngit, ug ang bulan dili mohatag sa kahayag niini, ug ang mga bituon mangahulog gikan sa langit, ug ang mga gahom sa mga langit mangatay-og.” (Mateo 24:21, 29) Kini makatabang kanato sa pag-ila kon kanus-a ang adlaw ni Jehova. Haduol na kini. Gipaila sa Kasulatan nga ang dakong kasakitan maglaglag sa “Dakong Babilonya,” ang tibuok-kalibotang imperyo sa bakak nga relihiyon. Unya, sa kinatayuktokan sa dakong kasakitan, ang adlaw ni Jehova magpapha sa mga kaaway sa Diyos gikan sa nawong sa yuta.—Pinadayag 17:5, 12-18; 19:11-21.

16. Sa unsang dakong paagi matuman ang mga tagna bahin sa adlaw ni Jehova?

¹⁶ Nasabtan sa mga Saksi ni Jehova ang pangunang mga timailhan sa mga katumanan sa mga tagna bahin sa adlaw ni Jehova. Sa subsob ug nagkalainlaing mga paagi, ang apostatang Jerusalem, ang dili-matinumanong Samaria, ang mabatokong mga Edomhanon, ang mabangis nga mga Asiryanhon, ug ang mga Babilonyanhon naghulagway sa mga kinaiyahan sa bakak nga relihiyon. Kanang tanang relihiyon pagalaglagon sa unang hugna sa dakong kasakitan. Unya, sa pagpadayon sa “dako ug makalilisang nga adlaw ni Jehova,” ang ilang politikanhon ug komersiyal nga mga hinigugma pagalaglagon.—Joel 2:31.

PAMATUD-I NINYO NGA KAMO ANDAM

17, 18. (a) Nganong nagpahayag si Amos ug kaalaotan niadtong “nangandoy sa adlaw ni Jehova”? (b) Unsay mahitabo niadtong dili andam alang sa adlaw ni Jehova?

¹⁷ Tungod kay ang mga mensahe sa paghukom unang mapadapat sa bakak nga relihiyon, ang pipila ka Kristohanon basin mobati nga dili sila maapektohan sa pagkatuman sa maong mga tagna. Bisan pa niana, ang gisulti ni Amos sa mga Israelinhon adunay kapuslanan sa tanan: “Alaot kadtong nangandoy sa adlaw ni Jehova!” Ang pipila ka Israelinhon sa adlaw ni Amos naghunahuna nga ang adlaw ni Jehova moresulta lang sa mga panalangin alang kanila, kay nagtuo nga kana mao unya ang adlaw sa dihang ang Diyos molihok alang sa iyang katawhan. Gipangandoy pa gani nila ang maong adlaw! Apan, alang sa mga mahunahunaon sa kaugalingon, ang adlaw ni Jehova mahimong “kangitngit, ug walay kahayag,” nagpadayon si Amos. Oo, ang maong mga Israelinhon makasinati sa mabangis nga kasuko ni Jehova!—Amos 5:18.

¹⁸ Unya gibatbat ni Amos kon unsay mahitabo niadtong nangandoy sa adlaw ni Jehova. Hunahunaa ang usa ka lalaki nga nagdagan palayo sa usa ka leyon ug unya nakatagbo ug usa ka oso. Sa pagdagan palayo sa oso, siya midangop sa usa ka balay. Nga naghangos, iyang gisirhan ang pultahan ug siya misandig sa bungbong, ug unya gipaak siya sa usa ka halas. Sa usa ka paagi kana mao ang dangatan sa mga tawo nga dili gayod andam alang sa adlaw ni Jehova.—Amos 5:19.

19. Unsay praktikal nga mga paagi nga kita angayng maandam alang sa adlaw ni Jehova?

¹⁹ Nasabtan mo ba ang kapuslanan tingali sa maong asoy alang kanimo? Hinumdomi nga gitumong ni Amos ang iyang mga pulong ngadto sa katawhan nga napahinungod na sa Diyos. Bisan pa niana, sila may mga lihok ug mga tinamdan nga kinahanglang ipasibo. Dili ba mapuslanon nga susihon ang imong kinabuhi aron makita kon ikaw nagapangandam ba alang sa maong hinungdanong adlaw o kon gikinahanglan ang pipila ka pagpasibo? Sa unsang paagi mapamatud-an nimo nga ikaw tinuod nga andam? Dayag, dili pinaagi sa pagtukod ug usa ka tagoanan, pagpondo ug kinahanglanong mga pagkaon, pagtuon kon unsaon pagpalunsay sa tubig, o pagtigom ug bulawang mga sensilyo, sama sa gihimo sa pipila ka tawong nangandam alang sa kaluwasan panahon sa kagubot. “Ang ilang plata o ang ilang bulawan dili makaluwas kanila sa adlaw sa mabangis nga kasuko ni Jehova,” nag-ingon si Sofonias. Busa ang pagkaandam wala magdepende sa pagpondog materyal nga mga butang. (Sofonias 1:18; Proverbio 11:4; Ezequiel 7:19) Hinunoa, kinahanglan kitang magmaigmat sa espirituwal nga paagi ug magkinabuhi sa matag adlaw ingong andam nga mga tawo. Kinahanglan nato ang hustong tinamdan—ug mga lihok nga nahiangay niana. Si Miqueas miingon: “Apan bahin kanako, magalantaw ako kang Jehova. Magpakita ako ug mahulatong tinamdan sa Diyos sa akong kaluwasan.”—Miqueas 7:7.

20. Unsang mga butang ang dili makapausab sa atong mahulatong tinamdan?

²⁰ Kon ikaw adunay mahulatong tinamdan, mohatag kag ebidensiya nga ikaw andam, nga nagalantaw sa adlaw ni Jehova. Dili ka mabalaka bahin sa petsa sa pag-abot nianang adlawa o kon unsa ka dugay ka nang naghulat niana. Ang tanang tagna bahin nianang adlawa matuman sa gitakdang panahon ni Jehova ug dili malangan. Giingnan ni Jehova si Habacuc: “Ang panan-awon alang pa sa tinudlong panahon, ug kini nagadali paingon sa kataposan, ug kini dili magbakak. Bisan pa kon kini malangan [gikan sa tawhanong punto debista], padayon sa pagpaabot niini; kay kini matuman gayod. Kini dili maulahi [gikan sa punto debista ni Jehova].”—Habacuc 2:3.

21. Sa unsang paagi makabaton kag kaayohan gikan sa imong matun-an niining basahona?

²¹ Dinhi niining basahona, imong mahibaloan kon sa unsang paagi makapakita kag mahulatong tinamdan alang sa Diyos sa kaluwasan. Unsang mga kaayohan ang imong madahom? Buweno, kini hisgotan ilabina sa usa ka bahin sa Bibliya nga tingali dili nimo sinati—ang giingong 12 ka Gagmay nga Manalagna. Busa, imong masabtan unya ang mga punto nga makapukaw sa hunahuna. Pananglitan, sa Seksiyon 2, imong mabasa kon unsaon “pagpangita kang Jehova” ug magpadayong buhi. (Amos 5:4, 6) Pinasukad niining 12 ka basahon, mahimo nimong masabtan kon sa unsang paagi mas mailhan si Jehova ug mas masabtan nimo ang kahinungdanon sa pag-alagad kaniya, sa mas bug-os pang mga paagi. Sa tabang sa maong mga manalagna, walay duhaduhang molalom pa ang imong pagsabot sa iyang personalidad. Sa Seksiyon 3, mas tin-aw nimong masabtan kon unsay gidahom ni Jehova kanimo diha sa imong mga pagpakiglabot sa mga membro sa imong pamilya ug sa uban. Kana makatabang kanimo nga maandam alang sa iyang dakong adlaw. Sa kataposan, sa Seksiyon 4, imong masusi ang tambag sa mga manalagna bahin sa kon unsay angay nimong tinamdan samtang nagkaduol ang adlaw ni Jehova, nga mahibaloan usab ang epekto niini diha sa imong Kristohanong ministeryo. Walay duhaduhang mahinam ka samtang imong tagdon ang mensahe sa mga manalagna bahin sa kon unsa unyay kahimtang sa imong kaugmaon.

22. Unsay imong reaksiyon sa tambag nga makaplagan diha sa mga basahon sa 12 ka manalagna?

²² Nahinumdom ka ba sa mga pulong ni Sofonias bahin sa pagkadinalian nga gikutlo sa sinugdanan niining kapituloha? (Sofonias 1:14) Naapektohan ang kinabuhi sa batan-ong Haring Josias sa iyang mensahe. Sa dihang si Josias 16 anyos pa lamang, siya misugod sa pagpangita kang Jehova. Sa dihang siya nag-20 anyos na, iyang gisugdan ang usa ka kampanya batok sa pagsimbag idolo, nga nahiuyon sa pagdasig ni Sofonias sa katawhan sa Juda ug Jerusalem. (2 Cronicas 34:1-8; Sofonias 1:3-6) Naapektohan ba ang imong matag adlaw nga kinabuhi sa pasidaan bahin sa adlaw ni Jehova sama kang Josias? Tan-awon nato kon sa unsang paagi ang 12 ka manalagna makatabang sa matag usa kanato.