ANANIAS
[Si Jah Mitubag Kanako].
1. Amahan ni Maaseias ug apohan ni Azarias, kinsa mitabang kang Nehemias sa pagtukod pag-usab sa mga paril sa Jerusalem.—Neh 3:23.
2. [Gr. nga porma sa Heb. nga ngalang Hananias, nga nagkahulogang “Si Jehova Nagpakitag Pabor; Si Jehova Mapuangoron”].
Usa ka membro sa unang Kristohanong kongregasyon sa Jerusalem. Human sa Pentekostes 33 K.P. ang materyal nga mga panginahanglan sa mga magtutuo nga nagpabilin sa Jerusalem naatiman pinaagi sa pagtinabangay taliwala sa mga Kristohanon. Usa ka komon nga pondo ang gihimo alang niini nga katuyoan. Gisuportahan kini pinaagi sa mga amot nga naggikan sa halin sa mga yuta ug mga balay nga gibaligya sa mga membro sa kongregasyon ug dayon giamot kini nga kinabubut-on. (Buh 4:34-37) Si Ananias nagbaligya ug usa ka yuta ug, uban sa bug-os nga kasayoran sa iyang asawa, naghatag lamang ug bahin sa halin, samtang nagpakaaron-ingnon nga naghatag sa bug-os nga kantidad, sa walay duhaduha aron madayeg ug mapasidunggan pag-ayo sulod sa kongregasyon. Apan, tungod sa linaing gasa sa kahibalo pinaagi sa espiritu, nasabtan ni Pedro nga siya nagpakaaron-ingnon, nagyagyag kaniya nga ‘namakak sa balaang espiritu ug sa Diyos,’ ug si Ananias natumba ug nabugtoan sa gininhawa. Sa dihang mibalik ang mga tawo nga naglubong kaniya paglabay sa mga tulo ka oras, ilang nakita ang iyang asawa nga si Sapira nga namatay usab tungod kay misulay sa samang pagpakaaron-ingnon.—Buh 5:1-10.
3. Usa ka Kristohanong tinun-an sa Damasco. Human makabig si Saulo, si Ananias gihatagan ug panan-awon diin si Jesus naghatag kaniya sa ngalan ug sa dapit nga giestaran ni Saulo ug nagsugo kaniya sa pagduaw kang Saulo. Bisan tuod nagpanuko sa sinugdan tungod kay siya nasayod sa mabangis nga paglutos ni Saulo sa mga Kristohanon, si Ananias human niadto misanong ug miadto kang Saulo, nagpasig-uli sa iyang panan-aw, nagpahibalo kaniya bahin sa iyang buluhaton nga mahimong saksi sa Diyos, ug naghikay nga siya mabawtismohan. Si Saulo (Pablo), sa panahon sa iyang pagdepensa sa ulahi atubangan sa Hudiyong mga magsusupak, naghisgot kang Ananias ingong usa ka tawo nga “masimbahon sumala sa Balaod, nga kaniya may maayong panghimatuod ang tanang Hudiyo nga nagpuyo didto [sa Damasco].” Tungod sa iyang pagka-Kristohanon, kini nga komendasyon sa mga Hudiyo maoy usa gayod ka talagsaong pamatuod sa iyang matarong nga panggawi.—Buh 9:10-18; 22:12-16.
4. Hudiyong hataas nga saserdote gikan sa mga 48 hangtod sa 58 K.P. Siya maoy anak nga lalaki ni Nedebaeus ug gitudlo sa katungdanan pinaagi ni Herodes nga hari sa Chalcis, ang igsoon ni Herodes Agripa I. (Jewish Antiquities ni Josephus, XX, 103 [v, 2]) Siya gipadala sa Roma niadtong 52 K.P. aron moatubang sa husay tungod sa pipila ka suliran nga mitungha tali sa mga Hudiyo ug mga Samarianhon, apan siya giabsuwelto ni Claudio I, ang emperador.
Niadtong mga 56 K.P., samtang nagdumala sa paghusay kang Pablo atubangan sa Sanhedrin, si Ananias nagsugo sa pagsagpa kang Pablo. Si Pablo misanong niini pinaagi sa pagtagna nga ang Diyos magabalos sa maong sayop nga buhat, ug siya nagtawag kang Ananias ingong “pinaputing bungbong.” Kay gibadlong bahin niini, si Pablo nangayog pasaylo tungod kay siya wala mahibalo nga ang nagsugo sa pagsagpa kaniya mao diay ang hataas nga saserdote ug nagkutlo sa Exodo 22:28 sa pag-ila sa iyang obligasyon nga magpakita ug nahiangayng pagtahod. Ang pipila nagtuo nga ang hinungdan sa pangatarongan ni Pablo nga siya wala mahibalo maoy tungod kay ang katungdanan ni Ananias ingong hataas nga saserdote wala pa matino sa legal nga paagi human sa iyang pagbalik gikan sa Roma, apan walay igong pamatuod labot niini. Lagmit kini maoy dugang pamatuod lamang sa pagkahanap sa panan-aw ni Pablo ingon sa gipakita sa ubang mga teksto. Ang sugo ni Ananias mahimong daklit ra kaayo ug gisingka pagsulti mao nga naglisod si Pablo sa pag-ila sa nagsulti.—Buh 23:2-5.
Human sa husay sa Sanhedrin, si Ananias, nga giubanan sa pipila ka ansiyano ug sa usa ka orador sa publiko, mipanaw ngadto sa Cesarea aron magsang-at ug mga sumbong batok kang Pablo sa atubangan ni Gobernador Felix. (Buh 24:1) Wala nay dugang paghisgot bahin kaniya diha sa rekord sa Kasulatan. Apan, ang sekular nga kasaysayan nag-asoy kaniya ingong usa ka tawong mapahitas-on ug mapintas, kansang panggawi panahon sa iyang hataas nga pagkasaserdote ug sa misunod nga katuigan human siya ipalagpot nailhan tungod sa kadalo. Sa hapit na magsugod ang pag-alsa sa mga Hudiyo niadtong 66-70 K.P., si Ananias gigukod sa mga elemento sa Hudiyong populasyon tungod sa iyang pagpakigkombuya sa mga awtoridad sa Roma. Bisan tuod mitago sa usa ka agianan sa tubig, siya napalgan ug gibuno.
5. Usa ka siyudad nga gipuy-an sa mga sakop sa tribo ni Benjamin human makabalik gikan sa pagkadestiyero. (Neh 11:32) Gituohan nga kini mao ra usab ang Betania (el-ʽAzariyeh [El ʽEizariya]) nga 2.5 km (1.5 mi) sa SHS sa Patukoranan sa Templo didto sa Jerusalem.—Tan-awa ang BETANIA Num. 1.