TROFIMO

[Pagpakaon; Pag-amoma].

Isigkamagbubuhat ni apostol Pablo; usa ka Kristohanong Hentil nga taga-Efeso. (Buh 21:29) Si Trofimo nahimong Kristohanon tingali sulod sa panahon nga ang ministeryo ni Pablo nagdugay didto sa Efeso sa iyang ikatulong misyonaryong panaw. Human niadto si Trofimo nahimong usa sa mga nagapanawng kauban ni Pablo sa iyang pabalik nga biyahe agi sa Macedonia paingon sa Asia Minor ug padayon ngadto sa Jerusalem. (Buh 20:3-5, 17, 22) Didto sa Jerusalem nakita si Trofimo kauban ni Pablo, ug sa dihang si Pablo nagkuyog ug pipila ka kauban ngadto sa nataran sa templo, ang mga Hudiyo naghunahuna nga si Trofimo nga usa ka Hentil misulod saylo sa Sawang sa mga Hentil, sa ingon nahugawan ang templo. Tungod niining sayop nga pagtuo ilang giatake ug gidakop si Pablo. (Buh 21:26-30; 24:6) Pipila ka tuig sa ulahi, human sa unang pagkabilanggo ni Pablo, si Trofimo mipanaw na usab uban kaniya. Apan sa pag-abot nila sa Mileto, dili layo sa lungsod nga natawhan ni Trofimo, si Trofimo nasakit ug wala na makapadayon sa pag-uban.​—2Ti 4:20.