Gituman Nila ang Kabubut-on ni Jehova

Si Pedro Nagsangyaw Panahon sa Pentekostes

BUGNAW nga buntag kadto sa tingpamulak sa tuig 33 K.P. Alegre ang palibot! Ang nagkisaw nga panon sa mga Hudiyo ug mga kinabig nagbaha sa mga karsada sa Jerusalem. Gikan sila sa mga dapit sama sa Elam, Mesopotamia, Capadocia, Ehipto, ug Roma. Pagkanindot nilang tan-awon nga nagsul-ob sa ilang lumad nga besti ug sa pagpamati sa ilang nagkalainlaing mga pinulongan! Ang uban nakapanaw ug halos duha ka libong kilometro aron makatambong niining espesyal nga okasyon. Unsa nga okasyon? Ang Pentekostes​—usa ka malipayong Hudiyohanong pista nga nagtimaan sa kataposan sa pagpangani sa sebada.​—Levitico 23:15-21.

Miulbo ang aso gikan sa mga halad sa halaran sa templo, ug ang mga Levihanon nanag-awit sa Hallel (Salmo 113 ngadto sa 118). Sa hapit nang mag-alas 9:00 s.b., may nahitabong katingalahan. Gikan sa langit, may nahitabong kabanha nga “sama gayod nianang nagahuros makusog nga hangin.” Napuno niini ang tibuok balay diin duolan sa 120 ka tinun-an ni Jesu-Kristo ang nagtigom. Nag-ingon ang asoy sa Kasulatan: “Ang mga dila nga maorag kalayo napakita ngadto kanila ug naapod-apod, ug usa ang mipahiluna diha sa matag usa kanila, ug silang tanan napuno sa balaang espiritu ug misugod sa pagsulti uban sa lainlaing mga dila, ingon sa gitugot sa espiritu nga ilang ipamulong.”​—Buhat 2:1-4.

Ang Matag Usa Nakadungog sa Iyang Kaugalingong Pinulongan

Wala magdugay, daghang tinun-an nanggawas sa balay. Sa katingalahan, sila makasulti ug nagkalainlaing mga pinulongan sa panon sa mga tawo! Palandonga kon unsa ka katingalahan kadto sa dihang ang usa ka bisita gikan sa Persia ug usa ka lumad sa Ehipto nakadungog sa ilang kaugalingong mga pinulongan nga gisulti sa mga taga-Galilea. Masabtan, ang panon sa mga tawo nahibulong. “Unsay buot ipasabot niining butanga?” sila nangutana. Ang pipila misugod sa pagbiaybiay sa mga tinun-an, nga nag-ingon: “Sila tugob sa tam-is nga bino.”​—Buhat 2:12, 13.

Sunod mitindog si apostol Pedro ug namulong sa panon sa mga tawo. Iyang gipatin-aw nga kining milagrosong gasa sa mga dila maoy katumanan sa saad sa Diyos pinaagi ni manalagnang Joel: “Ako magbubo ug bahin sa akong espiritu diha sa tanang matang sa unod.” (Buhat 2:14-21; Joel 2:28-32) Oo, mao pay pagbubo sa Diyos sa iyang balaang espiritu diha sa mga tinun-an ni Jesus. Kini maoy tin-aw nga ebidensiya nga si Jesus gibanhaw gikan sa mga patay ug karon atua na sa langit diha sa tuong kamot sa Diyos. “Busa,” si Pedro miingon, “angayng mahibalo sa tino ang tibuok nga balay sa Israel nga ang Diyos naghimo kaniyang Ginoo ug Kristo, kining maong Jesus nga inyong gilansang.”​—Buhat 2:22-36.

Unsay reaksiyon sa mga tigpatalinghog? “Sila nasamdan sa kasingkasing,” nag-ingon ang asoy, “ug sila miingon kang Pedro ug sa uban pang mga apostol: ‘Mga katawhan, mga igsoon, unsay among buhaton?’” Si Pedro mitubag: “Paghinulsol kamo, ug magpabawtismo ang matag usa kaninyo.” Mao gayod kanay gihimo sa duolan sa 3,000! Human niadto, “sila padayong nagdeboto sa ilang kaugalingon sa ginatudlo sa mga apostol.”​—Buhat 2:37-42.

Pinaagi sa pagpamulong niining halandomon kaayong okasyon, gigamit ni Pedro ang una sa “mga yawi sa gingharian sa mga langit” nga gisaad ni Jesus nga ihatag diha kaniya. (Mateo 16:19) Kining mga yawiha maoy nagbukas sa linain nga mga pribilehiyo ngadto sa nagkalainlaing mga pundok sa mga tawo. Kining unang yawi maoy nagpaposible sa mga Hudiyo nga mahimong dinihogan-sa-espiritu nga mga Kristohanon. Sa ulahi, ang ikaduha ug ikatulong mga yawi nagtanyag niining mao gihapon nga kahigayonan ngadto sa mga Samarianhon ug sa mga Hentil.​—Buhat 8:14-17; 10:44-48.

Pagtulon-an Alang Kanato

Bisan pag kining panon sa mga Hudiyo ug mga kinabig may samang tulubagon ingong katilingban sa kamatayon sa Anak sa Diyos, matinahurong namulong kanila si Pedro, nga nagtawag kanilang “mga igsoon.” (Buhat 2:29) Ang iyang tuyo mao ang pagpalihok kanila sa paghinulsol, dili sa paghukom kanila. Busa, ang iyang paagi positibo. Iyang gipresentar ang mga kamatuoran ug gipaluyohan ang iyang mga punto ug mga kinutlo pinaagi sa Kasulatan.

Maayong sundon niadtong nagwali sa maayong balita karon ang panig-ingnan ni Pedro. Kinahanglang maningkamot sila sa pagpangitag puntong giuyonan sa ilang mga mamiminaw ug unya mataktikanhong mangatarongan kanila gikan sa Kasulatan. Sa dihang ang kamatuoran sa Bibliya ipresentar sa positibong paagi, ang matarong-ug-kasingkasing mosanong.​—Buhat 13:48.

Ang kadasig ug kaisog ni Pedro sa adlaw sa Pentekostes nangibabaw nga lahi kaayo sa iyang paglimod kang Jesus sa mga pito ka semanang miagi. Niadtong okasyona si Pedro naparalisar sa kahadlok sa tawo. (Mateo 26:69-75) Apan si Jesus nangaliyupo alang kang Pedro. (Lucas 22:31, 32) Tino, ang tapos-pagkabanhaw nga pagpakita ni Jesus kang Pedro nakalig-on sa apostol. (1 Corinto 15:5) Tungod niini, ang pagtuo ni Pedro wala mahugno. Wala magdugay, siya maisogong nagsangyaw. Busa, sukad niadto, siya nagsangyaw dili lamang sa panahon sa Pentekostes kondili hangtod sa nahibilin sa iyang kinabuhi.

Komosta kon kita nakasala sa usa ka paagi, sama kang Pedro? Magpakita kita ug paghinulsol, mag-ampo nga pasayloon, ug maghimog mga lakang aron makadawat ug espirituwal nga tabang. (Santiago 5:14-16) Nan kita makapadayong masaligon nga ang atong balaang pag-alagad dalawaton sa atong maluluy-ong langitnong Amahan, si Jehova.​—Exodo 34:6.