Unsay Epekto Kanimo ang Pagkahibalo sa Kamatuoran Bahin sa Impiyerno?
KADTONG nagtudlo nga ang impiyerno usa ka dapit sa pagsakit naghatag ug sayop nga hunahuna bahin kang Jehova nga Diyos ug sa iyang mga hiyas. Tinuod, ang Bibliya nag-ingon nga ang Diyos maglaglag sa mga daotan. (2 Tesalonica 1:6-9) Apan ang matarong nga kasuko dili mao ang kinalabwang hiyas sa Diyos.
Ang Diyos dili mapanimaslon. Misukna pa gani siya: “Malipay ba ako diha sa kamatayon sa daotan?” (Ezequiel 18:23, Ang Biblia—Bag-ong Hubad Nga Binisaya) Kon dili malipay ang Diyos sa kamatayon sa daotan, malipay kaha siyang magtan-aw nga sakiton sila sa walay kataposan?
Ang kinalabwang hiyas sa Diyos mao ang gugma. (1 Juan 4:8) Sa pagkatinuod, “ang GINOO maayo ngadto sa tanan; ug maluoy siya sa tanan nga iyang nahimo.” (Salmo 145:9, Ang Biblia—Bag-ong Hubad Nga Binisaya) Sa baylo, buot sa Diyos nga atong ugmaron ang kinasingkasing nga gugma alang kaniya.—Mateo 22:35-38.
Unsay Angayng Mopalihok Kanimo—Ang Kahadlok ba sa Impiyerno o ang Gugma Alang sa Diyos?
Ang pagtulon-an nga ang mga kalag mag-antos sa impiyerno nagpahinabog hilabihang pagkahadlok sa Diyos. Sa kasukwahi, ang usa ka tawo nga nakakat-on sa kamatuoran bahin sa Diyos ug mahigugma kaniya makaugmad ug maayong matang sa kahadlok. “Ang pagkahadlok sa GINOO maoy sinugdanan sa kaalam; ang tanan nga nagsunod sa ilang mga lagda adunay maayong pagpanabot,” nagpatin-aw ang Salmo 111:10. (Ang Biblia—Bag-ong Hubad Nga Binisaya) Kini nga matang sa pagkahadlok maoy pagbatig kahingangha ug halalom nga pagtahod alang sa Maglalalang, dili hilabihang kalisang. Tungod niini mahadlok kitang mobuhat ug mga butang nga dili-makapahimuot kaniya.
Tagda kon sa unsang paagi ang pagkakat-on sa kamatuoran bahin sa impiyerno nakaapektar kang Kathleen, usa ka 32-anyos nga babaye nga tiggamit ug droga kaniadto. Ang iyang kinabuhi natugob sa mga parti, kapintasan, pagdumot sa kaugalingon, ug imoralidad. Siya miingon: “Ako motan-aw sa akong usa-ka-tuig nga anak nga babaye ug maghunahuna, ‘Unsa man ning gibuhat nako sa akong anak. Maimpiyerno gyod ko ani.’” Naningkamot si Kathleen sa pag-undang sa paggamit ug droga, apan wala gayod siya molampos. “Gusto kong magtinarong,” matod niya, “apan miserable kaayo ang akong kinabuhi ug ang kalibotan. Morag walay katarongan nga magtinarong.”
Dayon nahimamat ni Kathleen ang mga Saksi ni Jehova. “Akong nasayran nga wala diay impiyernong kalayo. Ang pamatuod sa Kasulatan makataronganon kaayo,” matod niya. “Ang pagkahibalo nga dili diay ko sakiton sa impiyerno nakahatag kanakog dakong kahupayan.” Apan nasayran usab niya ang saad sa Diyos nga ang mga tawo mahimong mabuhi sa walay kataposan sa yuta nga nahinloan sa pagkadaotan. (Salmo 37:10, 11, 29; Lucas 23:43) “Karon aduna na koy tinuod nga paglaom—mabuhi sa walay kataposan sa Paraiso!” matod pa niya.
Makahunong kaha si Kathleen sa pag-abuso sa droga nga wala ang hulga nga maimpiyerno? Siya miasoy: “Sa dihang ganahan na gani kong mogamit ug droga, ako moampo, nga mangayog tabang kang Jehova nga Diyos. Akong hunahunaon ang iyang panglantaw niining mahugaw nga bisyo, ug dili nako gusto nga mahigawad siya kanako. Iyang gitubag ang akong mga pag-ampo.” (2 Corinto 7:1) Ang kahadlok nga dili makapahimuot sa Diyos maoy nakapaarang kang Kathleen sa paghunong sa pag-abuso sa droga.
Oo, ang pag-ugmad ug gugma alang sa Diyos ug ang maayong matang sa pagkahadlok kaniya—dili ang kahadlok nga sakiton sa impiyerno—mao ang magpalihok kanato sa pagbuhat sa kabubut-on sa Diyos aron magmalipayon kita hangtod sa kahangtoran. Ang salmista misulat: “Bulahan ang matag usa nga nahadlok kang Jehova, nga nagalakaw sa iyang mga dalan.”—Salmo 128:1, American Standard Version.
[Kahon/Mga hulagway sa panid 9]
KINSAY MAKAGULA GIKAN SA IMPIYERNO?
Ang ubang mga hubad sa Bibliya makapalibog tungod kay pareho niining gihubad ug “impiyerno” ang duha ka managlahi nga Gregong mga pulong—Geʹen·na ug Haiʹdes. Sa Bibliya, ang terminong Geʹen·na nagtumong sa bug-os nga kalaglagan, nga walay paglaom sa pagkabanhaw. Sa kasukwahi, kadtong anaa sa Haiʹdes, o Hades, adunay paglaom nga mabanhaw.
Busa, human sa kamatayon ug pagkabanhaw ni Jesus, gipasaligan ni apostol Pedro ang iyang mga mamiminaw nga si Jesus “wala biyai sa impiyerno.” (Buhat 2:27, 31, 32; Salmo 16:10; King James Version) Ang pulong nga gihubad ug “impiyerno” niining bersikuloha mao ang Gregong pulong nga Haiʹdes. Si Jesus wala moadto sa usa ka kalayonhong dapit. Ang Hades, o “impiyerno,” mao ang lubnganan. Apan dili kay si Jesus ra ang gipagula sa Diyos gikan sa Hades.
Maylabot sa pagkabanhaw, ang Bibliya nag-ingon: “Ang kamatayon ug ang impiyerno mitugyan sa mga patay nga anaa kanila.” (Pinadayag 20:13, 14, KJ) Ang paghabwa sa “impiyerno” magpasabot ug pagbuhi pag-usab niadtong pagahukman sa Diyos nga takos sa pagkabanhaw. (Juan 5:28, 29; Buhat 24:15) Pagkanindot nga paglaom sa umaabot—ang pagkakita sa atong mga minahal nga mabuhi pag-usab! Si Jehova, ang Diyos sa walay kinutoban nga gugma, magabuhat niini.