SEKTA
Ang Gregong pulong (haiʹre·sis, nga gigikanan sa Iningles nga pulong nga “heresy,” sa Cebuano, “erehes”) nga gihubad nga “sekta” nagkahulogang “pagpili” (Lev 22:18, LXX) o “nga kanang pinili,” busa “usa ka pundok sa mga tawo nga naglain sa ilang kaugalingon gikan sa uban ug nagsunod sa ilang kaugalingong mga tinuohan [usa ka sekta o pundok].” (Greek-English Lexicon of the New Testament ni Thayer, 1889, p. 16) Kini nga termino gigamit sa pagtumong sa mga sumusunod sa duha ka pangunang mga sanga sa Judaismo, ang mga Pariseo ug mga Saduseo. (Buh 5:17; 15:5; 26:5) Ang mga dili-Kristohanon nagtawag usab sa Kristiyanidad ingong usa ka “sekta” o “sekta sa mga Nasaretnon,” lagmit naglantaw niini ingong pagbulag gikan sa Judaismo.—Buh 24:5, 14; 28:22.
Ang magtutukod sa Kristiyanidad, si Jesu-Kristo, miampo nga ang panaghiusa mangibabaw unta taliwala sa iyang mga sumusunod (Ju 17:21), ug ang mga apostoles interesado gayod sa pagpreserbar sa panaghiusa sa Kristohanong kongregasyon. (1Co 1:10; Jud 17-19) Ang kawalay panaghiusa sa pagtuo mahimong mopatunghag mainit nga panaglantugi, panagsumpaki, ug gani panag-away. (Itandi ang Buh 23:7-10.) Busa ang mga sekta angayng pagalikayan, sanglit kini maoy lakip sa mga buhat sa unod. (Gal 5:19-21) Ang mga Kristohanon gipasidan-an batok sa pagkahimong tigpasiugdag mga sekta o sa pagkahisalaag tungod sa bakak nga mga magtutudlo. (Buh 20:28; 2Ti 2:17, 18; 2Pe 2:1) Sa iyang sulat ngadto kang Tito, si apostol Pablo nagsugo nga, human pahimangnoi sa makaduha, ang usa ka tawo nga nagpadayon sa pagpasiugdag usa ka sekta angayng isalikway, dayag nga nagkahulogang siya kinahanglang ipalagpot gikan sa kongregasyon. (Tit 3:10) Kadtong dili buot malangkit sa pagpahinabog pagkabahinbahin sulod sa kongregasyon o dili mopaluyo sa partikular nga pundok mailhan tungod sa ilang pagkamatinumanon ug madayag ang ebidensiya nga sila nakabaton ug pag-uyon sa Diyos. Dayag nga kini mao ang gipasabot ni Pablo sa dihang gisultihan ang mga taga-Corinto: “Gikinahanglan usab nga adunay mga sekta sa inyong taliwala, aron ang mga tawong inuyonan madayag usab sa inyong taliwala.”—1Co 11:19.