Ang mga Saksi ni Jehova Usa ba ka Kulto?
SI Jesu-Kristo giakusar nga usa ka palahubog, ulitan, tiglapas sa adlawng Igpapahulay, bakakon nga saksi, tigpasipala sa Diyos, ug mensahero ni Satanas. Siya giakusar usab nga usa ka subersibo.—Mateo 9:34; 11:19; 12:24; 26:65; Juan 8:13; 9:16; 19:12.
Human nga namatay ug nabanhaw si Jesus, ang iyang mga tinun-an usab ang nahimong tumong sa seryoso nga mga akusasyon. Usa ka grupo sa unang-siglong mga Kristohanon gidala sa mga tawo ngadto sa mga magmamando sa siyudad nga nanagsinggit: ‘Gigubot niining mga tawhana ang gipuy-ang yuta.’ (Buhat 17:6) Sa laing okasyon si apostol Pablo ug ang iyang kaubang si Silas gidala ngadto sa mga awtoridad ug giakusar nga nakapukaw ug dakong kagubot sa siyudad sa Filipos.—Buhat 16:20.
Si Pablo sa ulahi giakusar nga usa ka “tawong samokan ug tig-ugdag pag-alsa sa pamunoan taliwala sa tanang Hudiyo sa tibuok gipuy-ang yuta” ug naningkamot “sa pagpanamastamas sa templo.” (Buhat 24:5, 6) Ang mga punoan sa mga Hudiyo sa Roma tukmang naghubit sa kahimtang sa mga sumusunod ni Jesus sa dihang sila midawat: “Sa pagkamatuod mahitungod niini nga sekta nahibaloan namo nga sa bisan diin kini ginasultihan ug pagbatok.”—Buhat 28:22.
Dayag, kining bag-ong grupo nga gitukod ni Jesu-Kristo giisip sa pipila nga usa ka relihiyosong grupo nga radikal ug mga hunahuna ug mga buhat nga lahi niadtong gidawat sa maong adlaw ingong normal nga paggawi sa katilingban. Sa walay duhaduha, daghan karong adlawa nagaisip sa mga Kristohanon ingong usa ka makadaot nga kulto. Ang mga magsusumbong kasagaran ilado ug tinahod nga sakop sa komunidad, ug daw kini nakahatag ug dugang kabug-at niining mga sumbonga. Daghan ang mituo sa mga akusasyon batok kang Jesus ug sa iyang mga sumusunod. Bisan pa, tingali sama sa imo nang nahibaloan, ang matag usa niining mga sumbonga bakak! Dili buot ingnon nga kay gipanulti kining mga butanga sa mga tawo kini tinuod na.
Komosta karong adlawa? Husto ba ang pagpunting sa mga Saksi ni Jehova ingong usa ka relihiyosong grupo nga radikal ug mga hunahuna ug mga buhat nga lahi nianang gidawat ingong normal nga paggawi sa katilingban? Ang mga Saksi ni Jehova ba usa ka kulto?
Kon Unsay Gipakita sa Ebidensiya
Usa ka opisyal sa kagamhanan sa siyudad sa St. Petersburg, Rusya, mibatbat: “Ang mga Saksi ni Jehova gipresentar kanamo ingong usa ka matang sa sekta nga nagatago nga manglingkod diha sa kangitngit ug nagapamatay ug mga bata ug nagapatay sa ilang kaugalingon.” Apan, ang mga tawo sa Rusya dili pa dugay mas nakasinati sa tinuod nga kinaiya sa mga Saksi. Human nagtrabaho uban sa mga Saksi ni Jehova may kalabotan sa usa ka internasyonal nga kombensiyon, ang mao gihapong opisyal miingon: “Karon nakita ko ang normal, mapahiyomong mga tawo, nga mas maayo pa gani sa mga tawo nga akong nailhan. Sila maoy mga malinawon ug kalmado, ug sila naghigugmaay pag-ayo sa usag usa.” Siya midugang: “Wala gayod ako makasabot kon nganong ang mga tawo mosultig kabakakan mahitungod kanila.”
Ang mga Saksi ni Jehova walay rituwalistiko nga mga tigom, ni ang ilang pagsimba tinagoan. Usa ka dili-Saksi nga awtor nga si Julia Mitchell Corbett miingon: “Kon sila magtigom, sagad kapin sa usa sa usa ka semana, diha sa mga Kingdom Hall (ang lugar nga ilang tigoman wala tawga nga mga simbahan), ang kadaghanan sa ilang panahon igugol sa pagtuon ug sa paghisgot sa Bibliya.” Ang ilang mga tigomanan klarong gitiman-an sa usa ka karatola. Ang ilang mga tigom bukas, ug ang publiko gidapit sa pagtambong. Ang wala-magpahibalong mga bisita mainitong abiabihon.
Ang “mga Saksi nakaangkon sa dungog nga matinud-anon, matinahuron, ug kugihan,” midugang si Corbett diha sa iyang librong Religion in America. Daghang dili mga Saksi moadmiter dayon nga walay katingad-anan o makahahadlok maylabot sa mga Saksi ni Jehova. Ang ilang paggawi dili lahi nianang gidawat ingong normal nga kinaiya sa katilingban. Ang The New Encyclopœdia Britannica tukmang nag-ingon nga ang mga Saksi “malig-on sa paghupot ug hataas moral nga lagda sa personal nga paggawi.”
Ang direktor sa balita ug sa espesyal nga mga proyekto alang sa estasyon sa telebisyon sa Tinipong Bansa misulat ngadto sa mga Saksi ni Jehova agig tubag sa usa ka mapihigong report bahin sa mga Saksi diha sa programa sa balita sa TV nga 60 Minutes. Siya miingon: “Kon daghan pa untang tawo ang nagakinabuhi sa paagi sa inyong pagtuo, kining nasora dili unta maingon niini ang kahimtang. Usa ako ka tigbalita nga nahibalo nga ang inyong organisasyon gitukod diha sa gugma ug sa malig-ong pagtuo sa Maglalalang. Buot ko nga masayod kamo nga dili tanang mga tawo nga Tigbalita ingon niana ka mapihigon.”
Usa ka Ilado nga Relihiyon
Makataronganon ba ang pag-ingon nga ang mga Saksi ni Jehova maoy usa ka gamay ekstremistang relihiyosong grupo? Sa usa ka diwa, ang mga Saksi ni Jehova diyutay sa gidaghanon kon itandi sa ubang mga relihiyon. Apan, hinumdomi ang giingon ni Jesus: “Sigpit ang ganghaan ug hagip-ot ang dalan padulong ngadto sa kinabuhi, ug diyutay ra ang nakakaplag niini.”—Mateo 7:13, 14.
Bisan pa, ang mga Saksi dili usa ka gamay ekstremista nga grupo sa kulto. Sa tingpamulak sa 1993, kapin sa 11 ka milyong tawo ang mitambong sa Memoryal sa kamatayon ni Kristo. Apan labing hinungdanon kay sa ilang gidaghanon mao ang ilang moral nga kinaiya ug sulundang paggawi, diin naangkon nila ang pagdayeg sa tibuok kalibotan. Tino nga kini mao ang hinungdan nga opisyal nga giila sila sa daghang kanasoran ingong usa gayod ka relihiyon.
Talagsaon mao ang dili pa dugay nga balaod sa European Court of Human Rights. Gipahayag niini nga angay tagamtamon sa mga Saksi ang kagawasan sa hunahuna, konsensiya, ug relihiyon ug nga sila adunay katungod sa pagsulti bahin sa ilang pagtuo ug sa pagtudlo niini ngadto sa uban. Dili unta mahitabo kini kon ang mga Saksi ni Jehova nailhan pa nga nagagamit ug malimbongon ug dili subay sa maayong pamatasan nga mga paagi sa pagpangabig ug mga membro o kon sila nagagamit pa ug inabtik nga mga paagi sa pagkontrolar sa mga hunahuna sa ilang mga sumusunod.
Daghan kaayo sa tibuok kalibotan ang sinati kaayo sa mga Saksi ni Jehova. Sa minilyong dili mga Saksi nga nagtuon sa Bibliya uban sa mga Saksi o kinsa nakatuon uban kanila sa usa ka panahon o sa lain, kami mangutana, May mga pagsulay ba nga gipugos kamo sa pagtuo? Migamit ba ang mga Saksi ug mga paagi sa pagkontrolar sa inyong hunahuna? “Wala” sa tino mao ang imong prangkang tubag. Matin-aw, kon gigamit pa kining mga paagiha, hilabihan unta kaayo ka daghan ang mga biktima nga magkasumpaki sa bisan unsang argumento pabor sa mga Saksi ni Jehova.
“Maikagon Kaayo sa Pagtabang sa mga Tawo”
Ang mga membro sa kulto sagad magpalain sa ilang kaugalingon gikan sa pamilya, mga higala, ug bisan sa katilingban sa katibuk-an. Ingon ba niana ang mga Saksi ni Jehova? “Dili ako membro sa mga Saksi ni Jehova,” misulat ang usa ka tigbalita sa Republika sa Czech. Bisan pa siya midugang: “Dayag nga sila [mga Saksi ni Jehova] may malig-on kaayong moral nga kusog. . . . Ilang giila ang mga awtoridad sa kagamhanan apan nagtuo nga ang Gingharian sa Diyos lamang ang adunay katakos sa pagsulbad sa tanang mga problema sa katawhan. Apan bantayi—sila dili mga panatiko. Sila maoy mga tawo nga maikagon kaayo sa pagtabang sa mga tawo.”
Ug sila wala magkinabuhi diha sa usa ka dapit, nga magpalain gikan sa mga paryente ug sa uban. Ang mga Saksi ni Jehova nagaila nga ilang Kasulatanhong responsabilidad ang paghigugma ug pag-atiman sa ilang mga pamilya. Sila nagkinabuhi ug nagtrabaho uban sa katawhan sa tanang rasa ug mga relihiyon. Kon adunay mga katalagmang moabot, sila abtik sa pagsanong pinaagi sa pagtaganag mga hinabang ug ubang makitawhanong tabang.
Labing hinungdanon, sila nagapakigbahin sa usa ka edukasyonal nga programa nga dili hitumbasan. Pila ka relihiyon ang adunay organisadong sistema sa paghimog personal nga mga pagduaw sa matag indibiduwal diha sa ilang komunidad? Ginahimo kini sa mga Saksi ni Jehova kapin sa 200 ka nasod diha sa kapin sa 200 ka pinulongan! Sa matin-aw, ang mga Saksi ni Jehova “maikagon kaayo sa pagtabang sa mga tawo.”
Bug-os nga Nagsunod sa Bibliya
Sa pagkamatuod, ang mga pagtulon-an sa mga Saksi ni Jehova lahi gikan niadtong gitagana sa mga iglesya. Ang mga Saksi ni Jehova nagtuo nga si Jehova mao ang labing makagagahom nga Diyos ug nga si Jesus mao ang iyang Anak, nga dili bahin sa usa ka diyos nga tulo ka persona. Ang ilang pagtuo bug-os nga nalangkit sa pagtuo nga ang Gingharian sa Diyos lamang ang makahatag kahupayan sa nag-antos nga katawhan. Sila nagapasidaan sa mga tawo sa umaabot nga kalaglagan niining dunot nga sistema sa mga butang. Sila nagawali bahin sa saad sa Diyos sa usa ka yutan-ong paraiso alang sa masinundanong mga tawo. Sila wala magsimba sa krus. Sila dili mosaulog ug Pasko. Sila nagtuo nga ang kalag mamatay o nga walay impiyerno nga kalayo. Sila dili mokaon ug dugo, ni modawat sila sa mga pag-abunog dugo. Sila naglikay sa pag-apil-apil sa politika ug sa pagpakigbahin sa gubat. Nakapangutana ka na ba sa imong kaugalingon kon nganong ang mga pagtulon-an sa mga Saksi ni Jehova lahi kaayo?
Usa ka mantalaan sa Massachusetts, ang Daily Hampshire Gazette, nagsaysay nga ang “istriktong interpretasyon [sa mga Saksi ni Jehova] sa Bibliya nagdili sa daghang kalihokan nga gituohan sa uban nga husto . . . , agig paningkamot sa pagsunod sa panig-ingnan sa unang-siglong mga Kristohanon ug sa pulong sa Bibliya.” Ang The Encyclopedia of Religion miuyon nga “ang tanan nga ilang gituohan gipasukad sa Bibliya. Ilang ‘pamatud-an ug teksto’ (sa ato pa, mohatag ug usa ka pagkutlo sa Bibliya sa pagsuportar) halos ang matag pulong sa pagtuo, nagadawat nga walay pagtutol sa awtoridad sa Bibliya, nga bug-os giilisan ang tradisyon.” Ang librong Religion in America nag-ingon: “Ang grupo malig-on kaayo sa pagsentro sa pagtagad niini diha sa pagtuon sa Bibliya, ug ang mga pagtulon-an niini gipaluyohan sa usa ka makuti nga sistema sa mga pagkutlo sa kasulatan.”
Kinsa ang Ilang Pangulo?
Tungod niining suod nga pagsunod sa mga pagtulon-an sa Bibliya nga ang paghimaya ug pagsimba sa tawhanong mga pangulo nga maoy kinaiyahan sa mga kulto karong adlawa dili makaplagan taliwala sa mga Saksi ni Jehova. Ilang gisalikway ang ideya labot sa klero-layko nga pagpihig. Ang The Encyclopedia of Religion tukmang nagbatbat mahitungod sa mga Saksi ni Jehova: “Ang klero nga matang ug ang mapihigong mga titulo gidili.”
Ilang gisunod si Jesu-Kristo ingong ilang Pangulo ug ingong Ulo sa Kristohanong kongregasyon. Si Jesus mao ang miingon: “Ayaw kamo pagpatawag nga Rabbi, kay usa ang inyong magtutudlo, samtang tanan kamo mga igsoon. Dugang pa, ayaw ninyo tawgang amahan ang bisan kinsa dinhi sa yuta, kay usa ra ang inyong Amahan, ang langitnong Usa. Ni magpatawag kamo nga ‘mga pangulo,’ kay usa ang inyong Pangulo, ang Kristo.”—Mateo 23:8-12.
Matin-aw nga ang mga Saksi ni Jehova dili gayod usa ka kulto sama nga si Jesus dili ulitan ug palahubog. Sa pagkamatuod, dili ang tanan kinsa naimpluwensiyahan sa bakak nga mga taho bahin kang Jesus ug sa iyang mga tinun-an ang naaghat sa pagbutangbutang kaniya. Ang uban tingali sa yano kulang lang sa kahibalo. Kon duna kay mga pangutana bahin sa mga Saksi ni Jehova ug sa ilang mga pagtuo, nganong dili makigsinati kanila sa dugang pa? Ang mga pultahan sa ilang mga Kingdom Hall bukas kaayo alang sa tanan nga mangita sa kamatuoran.
Ikaw usab makapahimulos gikan sa ilang mabinantayong pagtuki alang sa tukmang kahibalo sa Bibliya ug sayra kon unsaon sa pagsimba sa Diyos nga nahiuyon sa mga pulong ni Jesus: “Ang takna nagasingabot, ug mao na karon, sa dihang ang matuod nga mga magsisimba mosimba sa Amahan pinaagi sa espiritu ug kamatuoran, kay, sa pagkatinuod, ang Amahan nagapangita sa mga ingon kanila nga mosimba kaniya.”—Juan 4:23.