Kapitulo 6
Unsa Na ang Nahimo sa Diyos?
1. Unsa ang gituohan karon sa daghang tawo bahin sa Diyos, apan tinuod ba kini?
DAGHANG tawo karon nagatuo nga ang Diyos dili aktibong interesado sa yuta o siya walay ginabuhat nga bisan unsang butang mahitungod sa mga suliran nga nagasamok sa katawhan. Apan ang kamatuoran mao nga ang Diyos nagatagad gayod. Matuod, tingali wala siya magahimo sa gidahum sa mga tawo nga iyang himuon. Apan wala kini magakahulogan nga walay iyang nahimo. Sa aktuwal, siya nagbuhat ug mga butang alang sa katawhan sukad sa sinugdanan sa tawhanong kasaysayan hangtod gayod karong panahona.
2. Sa unsang paagi ang pagkamubo sa ilang kaugalingong kinabuhi nagaapektar sa panghunahuna sa mga tawo niining butang?
2 Usa ka katarungan alang sa pagbati sa pipila ka tawo nga walay ginahimo ang Diyos mao ang pagkamubo sa gitas-on sa ila mismong kinabuhi. Kini nagahimo kanila nga walay pailub sa paghuman sa mga butang sulod sa mubong panahon nga ginatugot sa ilang kinabuhi. Busa ang usa ka tinguha sa pagbaton ug mga kausaban sulod sa ilang kaugalingong kinabuhi nagadominar sa ilang panghunahuna. Ang ilang hilig, diay, mao ang paghukom sa Diyos sa sukaranan sa maong tawhanong kasinatian, uban sa tanang limitasyon niini.
3. Sa unsang paagi ang gitas-on sa kinabuhi ni Jehova nagaapektar sa iyang katakus sa pagdumala sa mga situasyon sa labing maayo posible nga panahon?
3 Sa laing bahin, si Jehova buhi sa walay katapusan. (Salmo 90:2, 4; Isaias 44:6) Pinasukad sa iyang panghunahuna mahimong makita niya sa tukma kon asa sa agos sa panahon ang iyang mga buhat mosangko sa labing ikaayo alang sa tanan nga nalangkit maingon man sa epektibo nga kaugmaran sa iyang katuyoan. (Isaias 40:22; 2 Pedro 3:8, 9) Sa eksakto mao kana ang gihimo sa Diyos.
Kon sa Unsang Paagi ang Diyos Nagbutyag sa Iyang Kaugalingon
4. Unsa ang gibutyag ni Jehova nga maoy iyang katuyoan, ug busa unsang kahibalo ang iyang gitagana alang sa katawhan?
4 Ang katuyoan ni Jehova mao ang pagtagana sa usa ka matarung nga administrasyon alang sa tanang linalang, usa nga magapaduyog sa katawhan diha sa kalinaw ug panaghiusa, nga nagapahimulos sa bug-os nga kasegurohan. (Efeso 1:9, 10; Proverbio 1:33) Bisan pa niana, ang Diyos wala magapugos kang bisan kinsa sa pagpasakop ubos sa iyang administrasyon. Sila lamang nga nagaalagad kaniya ug nahigugma sa iyang paagi sa pagmando ang ginadawat. Uban sa panglantaw sa pagpahaluna sa usa ka patukoranan alang sa entirong kalibutan nga magakinabuhi sumala sa iyang matarung nga mga sukdanan sa administrasyon, ang Diyos nagpaigo nga mabatonan sa katawhan ang kahibalo sa maong mga sukdanan ug ang paagi sa paglihok sa iyang administrasyon. Sa samang panahon gihimo sa Diyos nga posible alang sa katawhan sa pagbaton ug hinungdanong kahibalo mahitungod sa iyang kaugalingon ug sa iyang personal nga mga hiyas.—Juan 17:3.
5. Gikan sa mga buhat sa paglalang, unsa ang atong makat-onan bahin sa Diyos?
5 Ingon nga espiritu, si Jehova, natural, dili makita sa tawo. Busa, sa unsang paagi siya magapahinabo sa mga tawo nga unod ug dugo sa pagsabut niining mga butang? Sa usa ka butang, daku ang makat-onan mahitungod sa mga hiyas sa Maglalalang gikan sa buhat sa iyang kamot. (Roma 1:20) Ang kahibudnganang inter-relasyon taliwala sa buhing mga butang ug sa kinaiyanhong mga balaod nga nagabuot sa tanang materya nagahatag pamatuod sa iyang kaalam. Ang dakung gahum nga makita sa mga oseano, sa panahon, ug sa enerhiya sa mga bituon nagahatag ebidensiya sa iyang pagkalabing gamhanan. (Job 38:8-11, 22-33; 40:2) Ug ang pagkadaiya sa mga kalan-on nga magpagana sa igtitilaw, ang katahum sa mga bulak, mga langgam, mga pagsidlak ug mga pagsalup sa adlaw, ug ang madulaong siaw sa mga mananap—tanan nagasugilon sa gugma sa Maglalalang sa katawhan ug sa iyang tinguha nga kita makakaplag ug kalipay sa kinabuhi. Apan ang pagbutyag sa Diyos sa iyang kaugalingon dili kutob ra niining mga butang.
6. (a) Sa unsang paagi si Jehova nagtagana sa tinong mga bugna sa iyang kabubut-on? (b) Sa unsang paagi pa si Jehova nagbutyag sa iyang mga prinsipyo ug mga hiyas sa tawo?
6 Sa nagkalainlaing okasyon siya usab nagsulti gikan sa mga langit. Sa ubang mga hitabo siya misulti pinaagi sa mga anghel, sama sa Bukid sa Sinai sa Peninsula sa Arabia, diin siya mihatag sa iyang balaod ngadto sa minilyong mga Israelita. (Exodo 20:22; Hebreohanon 2:2) Unya, pinaagi sa iyang mga manalagna siya nakigsulti sa mga tawo latas sa daghang kasiglohan ug nagpasulat kanila sa mga bugna sa iyang kabubut-on. (2 Pedro 1:21) Busa, si Jehova inanay nga nagpasinati sa tawo sa Iyang matarung nga mga sukdanan ug sa Iyang kabubut-on. Ang usa ka hinungdanong bahin niini mao ang paagi sa iyang pagbutyag sa iyang mga prinsipyo ug mga hiyas pinaagi sa mga pakiglabot niya sa katawhan. Kini nakadugang sa mainit nga kahinam sa tawhanong kasinatian ngadto sa iyang sinulat nga Pulong. Pagkamatudluon gayod ug pagkamadanihon dili lamang ang pagpamati ug pagbasa sa mga deklarasyon sa katuyoan sa Diyos kondili usab nahuptan diha sa rekord sa Bibliya ang dili mapapas nga mga panig-ingnan nga moabag kanato sa pagsabut sa iyang kabubut-on sa mas maayo pa! (1 Corinto 10:11) Ug unsa ang gibutyag nianang maong rekord?
7. (a) Sa unsang paagi ang Diyos nagpasundayag nga siya dili sa walay katapusan magatugot sa dili pagkamatarung? (b) Sa pagkahibalo kon giunsa pagpangisip ni Jehova ang maong paggawi, unsa ang atong buhaton?
7 Kini nagatagana ug ebidensiya nga ang Diyos dili sa walay katapusan magatugot sa dili pagkamatarung. Matuod, siya nagtugot sa kaliwatan ni Adan ug Eva sa pagsunod sa ilang kaugalingong paagi, sa pagtukod sa dili kalikayang rekord sa kawalay katakus sa tawo sa pagmando sa iyang kaugalingon nga malampuson. Apan ang Diyos wala magabiya sa katawhan nga walay ebidensiya sa Iyang paghukom batuk sa ilang dili matarung mga paagi. Busa siya nagdala sa lunop sa adlaw ni Noe tungod ‘ang yuta nahimong puno sa pagkamalapason.’ (Genesis 6:11-13) Iyang gilaglag ang dunot sa moral nga mga siyudad sa Sodoma ug Gomorra. (Genesis 19:24, 25; Judas 7) Iyang gitugotan ang nasud sa Israel, nga nag-angkon sa pag-alagad kaniya, nga idistiyero tungod kay sila nagbuhat sa bakak nga pagsimba. (Jeremias 13:19, 25) Sa pagkat-on kon giunsa pagpangisip sa Diyos ang maong paggawi, kita duna sa oportunidad sa paghimog kausaban sa atong kinabuhi sa pagpakita sa atong gugma kon unsa ang matarung. Buhaton ba nato?
8. Kon ipadangat sa Diyos ang kalaglagan, may bisan kinsa ba nga maluwas? Iilustrar.
8 Ang rekord sa Bibliya nagbutyag usab nga may pagpalahi ang Diyos tali sa mga matarung ug mga dautan. Sa globong Lunop, wala laglaga sa Diyos si Noe, kinsa “usa ka magwawali sa pagkamatarung,” apan nagluwas kaniya ug sa pito pa. (2 Pedro 2:5) Ug, una pa ang kalayo ug asupre nag-ulan sa Sodoma, ang kaikyasan nahimong posible alang sa matarung nga Lot ug sa iyang panimalay.—Genesis 19:15-17; 2 Pedro 2:7.
9. Unsa ang atong nakat-onan gikan sa paagi sa pakiglabot ni Jehova sa karaang Israel?
9 Sa panahon nga ang katawhan sa Israel, kinsa nanumpa sa pag-alagad sa Diyos, nagpamatuod nga dili matinumanon wala dayon niya isalikway sila. Ingon sa iyang gisulti kanila: “Ako nagpadayon sa pagpadala kaninyo sa tanan nakong mga alagad ang mga manalagna, matag adlaw sayong nagamata ug nagpadala kanila.” Apan wala sila mamati. (Jeremias 7:25, 26) Bisan sa nagkaduol na ang panahon sa kalaglagan sa Jerusalem, si Jehova nag-ingon: “May bisan unsang kalipay ba ako sa kamatayon sa usa nga dautan, . . . kon dili hinuon nga siya magabalik gikan sa iyang mga dalan ug mabuhi? . . . Busa magbalik ug mabuhi, O kamong katawhan.”—Ezequiel 18:23, 32.
10. Gawas pa sa iyang pailub, unsa pa ang gitudlo kanato niining mga kasaysayan sa Bibliya bahin sa Diyos?
10 Nan, unsa ang atong nakita? Nga sa paagi nga lalum nga nagatandog sa kasingkasing sa hilig sa matarung nga mga tawo, si Jehova nagaklaro sa iyang dakung pailub uban sa katawhan. Sa samang panahon, ang iyang mga pagtratar usab sa kusganon nagasilsil kanato sa iyang gugma sa pagkamatarung ug sa importansiya sa atong pagkinabuhi harmonya sa iyang mga kinahanglanon.
11. (a) Unsang gibungat nga katuyoan ang gipahayag ni Jehova sa Eden? (b) Unsa na ang nahimo sa Diyos sukad niadto?
11 Ang usa pa ka butang, nga sukaranan kaayo, gipasiugda. Gikan sa sinugdanan nahimong matin-aw nga ang Diyos dunay tinong katuyoan sa tagsa ka butang nga iyang gihimo. Ug siya bisan kanus-a wala mapakyas sa paglihok kon ang kahumanan sa iyang katuyoan nagkinahanglan sa aksiyon. Kining sukaranang katuyoan gipahayag didto mismo sa Eden. Sa pagpakanaug sa hukom kang Satanas, si Jehova nagtagna nga si Satanas may oportunidad sa pagbangon sa usa ka “binhi,” kadtong kinsa magapasundayag sa iyang mga taras ug magpaluyo kaniya. Siya usab nagtagna sa pagpatungha sa laing “binhi,” usa ka matarung manluluwas. Kini Siya magapadapat sa makamatay magsamad sa “orihinal nga bitin, sa usa nga gitawag Yawa ug Satanas,” ug busa buhian ang katawhan gawas sa iyang dautang dominasyon. (Genesis 3:15; Pinadayag 12:9) Human ikapahayag kining katuyoan, si Jehova nagpadayon sa paghimog tinong mga pagpangandam alang sa ultimang administrasyon sa mga kalihokan sa yuta unya ubos sa gisaad nga “binhi.” Kining bulohaton sa pagpangandam nagkinahanglan ug panahon, sama sa atong makita.
Kon Nganong Tinong Nakiglabot Siya Uban sa Karaang Israel
12, 13. (a) Ngano ang Diyos nagpili sa Israel ug naghatag sa iyang mga balaod nianang usa ka nasud lamang? (b) Busa, unsa ang atong makat-onan sa kasaysayan sa Israel ug nianang sa ubang mga nasud?
12 Dugay nang panahon una milungtad ang mga nasud sa ato karong panahon, ang Diyos nagpili sa usa ka nasud nga iyang gigamit ingon nga iyang kaugalingong katawhan sulod sa gatusan ka tuig. Ngano? Aron sa paghimo sa usa ka buhing pasundayag sa pagpalakaw sa iyang matarung mga prinsipyo. Kanang nasura, ang karaang Israel, nahimo sa mga kaliwat ni Abraham, usa ka tawo kinsa nagpasundayag sa dakung pagtuo sa Maglalalang. Kanila si Jehova nag-ingon: “Dili tungod kay kamo ang labing daghan sa tanang katawhan nga si Jehova nagpakitag gugma kaninyo busa siya nagpili kaninyo, kay kamo ang labing diyutay sa tanang katawhan. Apan tungod sa gugma ni Jehova kaninyo, ug tungod sa iyang paghupot sa sumpa nga iyang gipanumpa sa inyong mga amahan.”—Deuteronomio 7:7, 8; 2 Hari 13:23.
13 Human luwasa sila gikan sa pagkaulipon sa Egipto, si Jehova nagtanyag kanila sa pagpasulod sa usa ka espesyal relasyon uban kaniya, ug sila nagtubag: “Ang tanan nga gipamulong ni Jehova kami sugot sa pagtuman.” (Exodo 19:8) Dayon si Jehova mihatag kanila sa iyang mga reglamento, busa nagpahaluna kanila nga lahi sa tanang ubang mga nasud ug nagtagana sa detalyadong inpormasyon mahitungod sa iyang matarung mga suntoan. (Deuteronomio 4:5-8) Busa, ang kasaysayan sa karaang Israel nagataganag rekord kon unsa ang mahitabo kon ang matarung mga balaod sa Diyos sugton kon supakon. Sa kasamtangan, ang kasaysayan sa ubang mga nasud nagabutyag sa sangputanan niadtong kinsa nagakinabuhi nga walay balaod sa Diyos.
14. (a) Gidaut ba sa Diyos ang dili-Israelita nga mga nasud sa dili paghilabot sa ilang mga kalihokan? (b) Apan, sa unsang paagi sila nagbaton ug kaayohan sa dili takus nga kalolot sa Diyos?
14 Kumusta na man kadtong ubang mga nasud? Sila nagpadayon sa ilang kaugalingong paagi, nagpili sa ilang kaugalingong mga porma sa gobiyerno. Ang ilang katawhan wala sa bug-os mawad-i sa tanang pagkamaayo sa ilang kinabuhi. Sila sa gihapon duna sa hiyas sa konsiyensiya, ug kini usahay magapalihok kanila uban sa tawhanong kabalaka alang sa ilang isigkatawo. (Roma 2:14; Buhat 28:1, 2) Apan ang ilang pagpanunod sa sala ug ang ilang pagsalikway sa langitnong paggiya nagpahinabo kanila sa pagsunod sa kurso sa kaugalingong kaayohan nga mitultol ngadto sa mapintas nga mga gubat ug dunot nga mga buhat. (Efeso 4:17-19) Ang Diyos dili gayod responsable alang sa kaalaut nga gipatungha sa paagi sa kinabuhi nga sila mismo ang nagpili. Ang mga panahon lamang nga ang Diyos nanghilabot sa dihang ang tawhanong kalihokan sukwahi sa katumanan sa iyang mga katuyoan. Sa kasamtangan, ang Diyos sa kalulot nagtugot kanila sa pagpakig-ambit diha sa kalipay sa pagkinabuhi, sa katahum sa kalalangan ug sa bunga sa yuta.—Buhat 14:16, 17.
15. Unsang mga kahikayan alang sa kaulahiang panalangin sa katawhan niining mga nasud ang gihimo sa Diyos?
15 Ni si Jehova nagsira sa mga tawo niining mga nasud nga makadawat sa mga kaayohan nga gisaad pinaagi sa “binhi” ni Abraham. Si Jehova nag-ingon makitungod niining “binhi” nga moabut pinaagi sa linya sa pamilya ni Abraham: “Pinaagi sa imong binhi ang tanang mga nasud sa yuta piho nga magapanalangin sa ilang kaugalingon gumikan sa kamatuoran nga ikaw namati sa akong tingug.” (Genesis 22:18) Busa bisan tuod si Jehova tinong nakiglabot sa Israel, siya usab sa walay dapigdapig nagapatuman sa katumanan sa iyang katuyoan aron sa pagpanalangin sa ubang mga nasud sa ulahi, walay sapayan nga sila walay kabangkaagan niini.—Buhat 10:34, 35.
16. (a) Sulod niining tanang panahon, unsa na ang nahimo sa Diyos konektado sa saad mahitungod sa Binhi? (b) Kinsa ang napamatud-an nga mao kanang gisaad nga Binhi?
16 Sa panahon nga si Jehova nakiglabot sa karaang Israel, siya nagtagana sa daghang mga tagna nga magapuno sa importante nga kinahanglanon alang sa mga tawo sa pagtuo—kon unsaon sa pag-ila sa gisaad nga Binhi ni Abraham kon siya sa kaulahian magaabut. Bisan ang iyang linya sa panimalay, pinaagi sa tribo ni Juda ug sa balay ni David, gitino. (Genesis 49:10; Salmo 89:35, 36) Ang iyang dapit natawhan, ang Betlehem, ginganlan. (Miqueas 5:2) Kasiglohan sa pasiuna ang mismong tuig sa dihang siya dihogan ingong Mesiyas gipakita. (Daniel 9:24-27) Ang iyang saserdotehanong mga serbisyo alang sa katawhan gilandungan. Ug mao man usab ang sakripisyo sa iyang kaugalingon nga magabukas sa oportunidad alang sa walay katapusang kinabuhi ngadto sa katawhan sa tanang kanasuran. (Hebreohanon 9:23-28) Busa, kon magaabut na ang tinudlong panahon, ang tanang butang klarong magapaila kang Jesu-Kristo ingong ang Binhi sa saad nga pinaagi kaniya ang mga panalangin sa kaulahian magaabut sa katawhan.—Galacia 3:16, 24; 2 Corinto 1:19, 20.
Ang Pagpangandam sa mga Magmamando Alang sa Katawhan
17. Pinaagi kang Jesus, unsa ang dad-on sa Diyos, ug sa unsang paagi gipasiugda kini sa panahon sa iyang pagkatawo?
17 Una pa sa pagkatawo ni Jesus ang iyang inahan si Maria gisuginlan sa usa ka anghel nga ang iyang anak hatagan sa walay katapusang gingharian. Ang mga magbalantay sa karnero duol sa Betlehem gipahibalo sa iyang pagkatawo, ug unya sila nakadungog sa panon sa mga kasundalohan sa langit nga nagadayeg sa Diyos ug nagaingon: “Himaya sa kahitas-an sa Diyos, ug sa yuta kalinaw taliwala sa mga tawong maayong kabubut-on.”—Lucas 1:31-33; 2:10-14.
18. (a) Sa unsang paagi ang iyang mga kasinatian sa yuta nag-andam kaniya alang sa mga katungdanan sa hari ug saserdote? (b) Unsa ang epekto sa iyang kamatayon sa pagbaton sa kalinaw?
18 Palandunga ang mga kaayohan sa pagkinabuhi sa yuta niining umaabut langitnong Hari. Ingon nga usa ka tawo siya nahibalo ug nakasabut sa mga suliran sa katawhan. Siya nagkinabuhi ug nagbuhat uban kanila, nagsalo sa ilang kasubo ug personal nga nag-antus sa kalisud. Ubos sa labing mapait nga pagsulay siya nagpamatuod sa iyang pagkamaunongon kang Jehova ug sa iyang gugma sa pagkamatarung. Niining paagiha ang Diyos nagpaandam kang Jesus sa pagkahimong masinabtanong Hari maingon man Hataas nga Saserdote aron sa pagpadapat sa nagahatag-kinabuhi nga mga kaayohan sa katawhan. (Hebreohanon 1:9; 4:15; 5:8-10) Dugang pa, pinaagi sa iyang kaugalingong kinabuhi nga gihalad, si Jesu-Kristo nagbukas sa dalan alang sa katawhan sa pagbaton pag-usab sa malinawong relasyon uban sa Diyos.—1 Pedro 3:18.
19. (a) Sa unsang paagi kita nahibalo nga si Jesus gibanhaw ug mikayab sa langit? (b) Mahitungod sa iyang pagkahari, unsa ang iyang gibuhat human makabalik sa langit?
19 Human sa kamatayon ni Jesus, ang Diyos nagbangon kaniya ngadto sa kinabuhi usab, ug siya nakita sa kapin sa 500 tawhanong mga saksi kinsa makapamatuod nga nahitabo gayod ang maong pagkabanhaw. (1 Corinto 15:3-8) Kap-atan ka adlaw human si Jesus gibanhaw, siya nagkayab ngadto sa langit ug nawala sa panan-aw sa iyang nagtan-awng mga tinun-an. (Buhat 1:9) Gikan sa langit siya nagpadayon sa pagpalihok sa iyang pagkahari ngadto sa iyang kaugalingon matinumanong mga sumusunod, ug ang mga kaayohan sa iyang pagmando naghimo kanila nga lahi sa ubang katawhan. Apan panahon na ba kini karon alang kaniya sa pagsugod sa pagmando sa mga nasud? Dili, kay ang ubang mga butang sa dakung programa sa Diyos nagkinahanglan sa pagtagad.—Hebreohanon 10:12, 13.
20. Unsang bag-ong bulohaton ang gibuksan ni Jesus alang sa iyang mga disipulo sa yuta?
20 Ang usa ka dakung bulohaton kinahanglan himuon sa tibuok yuta. Una sa kamatayon ug pagkabanhaw ni Jesus walay mga Israelita ang naggula ingon nga mga magwawali sa pagkonbertir sa ubang mga nasud. Apan ang bisan kinsa nga naghandum sa pagbaton sa pagsimba kang Jehova kanunay man nga makaambit ug mga kaayohan uban sa Israel. (1 Hari 8:41-43) Bisan pa niana, ang pagsugod sa Kristiyanidad nagbukas ug usa ka daku bag-ong bulohaton. Si Jesu-Kristo mismo nagpahaluna sa panig-ingnan ug nagbilin niana ingong panulondon sa iyang mga disipulo, nga nag-ingon kanila una pa sa iyang pagkayab sa langit: “Mahimong mga saksi ko kamo sa Jerusalem ug sa tanang Judea ug sa Samaria ug ngadto sa kinatumyang dapit sa yuta.”—Buhat 1:8.
21. Inay sa pagkonbertir sa kalibutan, unsa ang nalampos sa Diyos pinaagi sa maong pagsangyaw?
21 Ang tumong ba mao ang pagkonbertir sa kalibutan? Dili. Hinuon, gipakita ni Jesus nga sulod sa yugto padulong sa “konklusyon sa sistema sa mga butang” adunay pagpanigum una sa “mga anak sa gingharian.” Oo, ang ubang mga membro sa nagasingabut nga gobiyerno sa Gingharian kinahanglan pilion. (Mateo 13:24-30, 36-43) Ang bisan kinsa nga nagabasa sa Kristohanon Gregong mga Kasulatan sayong makakita nga umpisa sa Pentekostes sa 33 K.P., ang uban gidapit aron makig-ambit uban ni Jesu-Kristo sa iyang pagmando sa Gingharian sa langit.—2 Timoteo 2:12; Hebreohanon 3:1; 1 Pedro 1:3, 4.
22. (a) Unsang mga hiyas ang kinahanglanon sa Diyos niining umaabut nga mga manununod sa langitnong Gingharian? (b) Busa, dalidali ba ang pagpili?
22 Ang pagpili niining umaabut kaubanang mga magmamando sa katawhan nagkinahanglan ug panahon. Ngano? Alang sa usa ka butang, kanang kahigayonana kinahanglang ipadangat sa katawhan sa tanang mga nasud. Ug, samtang daghan ang nag-angkon nga nangupot niini, sa pagkamatuod pipila ra ang nagpamatuod nga matinumanong mga sumusunod sa Anak sa Diyos. (Mateo 22:14) Kinahanglan batonan ang taas nga mga suntoan. Bisan tuod ang mga Kristohanon wala magkinabuhi ingon nga usa ka nasudnong grupo nga separado sama sa karaang Israel, sila giisip ingong mga dumuluong, nagalaban sa laing paagi sa kinabuhi. (1 Pedro 2:11, 12) Kinahanglan sila magapabiling hinlo sa imoral ug dunot nga mga buhat sa kalibutan libut kanila. (1 Corinto 6:9, 10) Aron mahimong tinuod nga “mga anak sa Diyos,” kinahanglan sila magapamatuod sa ilang kaugalingon nga “malinawon,” dili makig-ambit sa mga gubat sa mga nasud ug dili magabalus kon pagalutoson tungod sa ilang pagtuo. (Mateo 5:9; 26:52; Roma 12:18, 19) Kinahanglan nga sila magapasundayag sa pagkamaunongon sa pagmando sa Diyos pinaagig pagdumili sa pagpaluyo sa politikal nga mga gobiyerno, nga ginahulagway sa Bibliya ingon nga ‘mga mananap.’ (Pinadayag 20:4, 6) Tungod niining tanan ug tungod kay sila nagbayaw sa ngalan ni Jesu-Kristo sa iyang papel ingon nga dinihogang Hari sa Diyos, sila nahimong “mga tumong sa pagdumot sa tanang mga nasud.” (Mateo 24:9) Busa kadtong kinsa mahimong langitnong mga magmamando sa katawhan uban kang Kristo wala dalidalia pagpili.
23. (a) Pila ang gidaghanon nianang langitnon administratibong lawas uban kang Kristo? (b) Gikan kang kinsa sila gipili, ug ngano?
23 Dili tungod kay ang gidaghanong pilion maoy daku nga ang pagpili nadugay kaayo. Sumala sa mga Kasulatan, limitado sa Diyos ang gidaghanon niining piniling lawas administratibo ubos ni Jesu-Kristo ngadto sa 144,000 ka persona. (Pinadayag 14:1-3) Apan ang Diyos maampingong nagpili kanila. Sila gikuha “gikan sa tagsa ka tribo ug sinultihan ug katawhan ug nasud.” (Pinadayag 5:9, 10) Taliwala kanila mao ang katawhan gikan sa tanang lakaw sa kinabuhi, lalaki ug babaye, katawhan kinsa nakaambit sa tanang nagkalainlaing suliran sa katawhan. Sa kurso sa ilang pagsul-ob sa bag-o Kristohanong personalidad, walay bisan unsang suliran ang wala atubanga ug buntoga sa pipila kanila. (Efeso 4:22-24; 1 Corinto 10:13) Pagkamalipayon ta tungod niini! Ngano? Sanglit kini nagahatag kanato sa pasalig nga sila mahimong mga hari ug mga saserdote nga may simpatiya ug maluluy-on, takus sa pagtabang sa mga lalaki ug mga babaye sa tanang matang aron sa pagbenepisyo gikan sa tagana sa Diyos sa walay katapusang kinabuhi.
24. Kumusta na man ang minilyon sa ubang katawhan kinsa nabuhi ug namatay sulod niining panahon, nga daghan kanila ignorante sa Bibliya?
24 Kumusta na man ang katawhan nga gawas niining kahikayana? Sulod niining tanang panahon, ang Diyos wala magbalda sa lainlaing mga gobiyerno. Iyang gitugotan ang mga tawo sa paagi nga ilang gipili. Siyempre, minilyon sa mga tawo ang nabuhi ug namatay, daghan kanila wala bisan kanus-a makadungog mahitungod sa Bibliya o sa Gingharian sa Diyos. Apan ang Diyos wala malimot kanila. Siya nag-andam alang sa panahon nga gihisgutan ni apostol Pablo: “Ako nagalaum sa Diyos . . . nga dunay usa ka pagkabanhaw sa matarung ug sa dili matarung.” (Buhat 24:15) Unya, ubos sa labing paborable nga mga kahimtang sa Bag-ong Kahikayan sa Diyos, hatagan sila sa bug-os nga oportunidad sa pagkat-on sa mga dalan ni Jehova. Pinasukad niini, mahimong ilang batonan ang personal nga baruganan sa isyu sa unibersohanong pagkasoberano. Kadtong mahigugmaon sa pagkamatarung makahupot sa kahigayonan nga mabuhi sa walay katapusan.
Samtang “ang Katapusan” Nagakaduol
25, 26. (a) Sa igong panahon, unsang dugang awtoridad ang ihatag kang Kristo, ug batuk kang kinsa siya magalihok? (b) Sa unsang paagi kini magaapektar sa mga kahimtang sa yuta?
25 Una pa sa pagsulod sa maong Bag-ong Kahikayan, mahitabo ang kulba-hinam nga mga hitabo. Ang Bibliya nagtagna sa dakung kausaban sa mga kalihokan sa kalibutan. Si Jesu-Kristo sa maong panahon magalingkod sa trono ingon nga Hari dili lamang sa pagmando sa iyang kaugalingong mga disipulo apan uban sa awtoridad sa paglihok sa tibuok kalibutan. Ang proklamasyon himuon sa langit: “Ang gingharian sa kalibutan nahimong gingharian sa atong Ginoo ug sa iyang Kristo, ug siya magagahum ingon nga hari ngadto sa walay katapusan.” (Pinadayag 11:15) Ang Hari magalihok una batok sa “magmamando sa kalibutan” mismo, si Satanas nga Yawa, ug sa iyang mga demonyo. (Juan 14:30) Kining dautang mga puwersa itagbong gikan sa mga langit ug kinutuban sa palibut sa yuta. Unsa man ang resulta?
26 Ang matagnaong hubit nagarekord sa usa ka tingug gikan sa langit nga nagaingon: “Tungod niini magmalipayon, kamong mga langit ug kamo kinsa nagpuyo kanila! Alaut ang yuta ug ang dagat, tungod kay ang Yawa nanaug kaninyo, uban sa dakung kasuko, nga nahibalo nga mubo na lamang ang iyang panahon.” (Pinadayag 12:12) Ang walay kasamang kaguliyang mahitabo taliwala sa mga nasud, apan dili pa magaabut gilayon ang katapusan.
27. (a) Samtang “ang katapusan” nagakaduol, unsang dakung bulohaton sa paglain ang mahitabo, ug sa unsang paagi? (b) Unsa ka daku ang gitagnang kalaglagan sa kalibutan?
27 Mao kini ang panahon alang sa dakung bulohaton sa paglain. Ubos sa direksiyon ni Jesu-Kristo nga naentrono, ang iyang matinumanong mga sumusunod magapadayon sa pagsangyaw “niining maayong balita sa gingharian” ngadto sa tanang pinuy-anang yuta alang sa usa ka pagpamatuod sa tanang mga nasud. Ang katawhan bisan asa hatagan sa oportunidad sa pagpakita sa ilang pagpangisip sa langitnong pagmando. (Mateo 24:14; 25:31-33) Kon human na kini, ingon sa gipatin-aw ni Jesus, “unya ang katapusan magaabut.” Kini usa ka “dakung kasakitan nga wala pa mahitabo sukad sa sinugdan sa kalibutan hangtud karon, wala, ni mahitabo pa kini pag-usab.” (Mateo 24:21) Bisan kanus-a ang mga tawo dili na mangutana, Unsa na ang nahimo sa Diyos? Ang mga maluwas lamang mao kadtong kinsa nagpakitag igong pagtagad sa pagkaplag kon unsa ang iyang nahimo ug sa pagdala sa ilang kinabuhi harmonya sa iyang mga kinahanglanon una pa magaabut ang kalaglagan sa kalibutan.
28. (a) Kanus-a mahitabo ang paglingkod sa trono ni Kristo ug sa paglain sa katawhan sa tanang mga nasud? (b) Busa, unsa ang dinalian alang kanato nga buhaton ingon nga mga indibiduwal?
28 Apan kanus-a mahitabo kining mga butang? Kanus-a si Kristo hatagan sa gahum sa pagmando ingon nga Hari ug sa pagpadayon sa paglain sa katawhan sa tanang mga nasud? Ang kamatuoran nagapakita nga kini mga butang nga nahimo na sa Diyos niining ika-20 ka siglo. Si Kristo anaa na sa iyang langitnong trono, ug ang bulohaton sa paglain haduol na karong matapos. Mubo na lamang ang panahong nahibilin alang kanimo sa pagpaila sa imong kaugalingon sa kiliran ni Jehova sa isyu sa unibersohanong pagkasoberano. Ang “dakung kasakitan” haduol na! Ang pagsusi sa tagna sa Bibliya sa kahayag sa bag-o pang kasaysayan nagapamatuod niini nga tinuod. Kami nagaawhag kanimo sa pagpalandung niini sa maampingon.
[Hulagway sa panid 62]
Pinaagig pagkinabuhi taliwala sa mga tawo, ang katawhan labaw gayod nga nasabtan sa bag-ong magmamando sa yuta