Gituman Nila ang Kabubut-on ni Jehova
Gibawtismohan ni Felipe ang Etiopianhong Opisyal
SAMTANG nagsakay sa iyang karwahe, gigamit sa usa ka Etiopianhon ang iyang panahon nga maalamon. Siya kusog nga nagbasa—nga sagad maoy batasan sa mga biyahedor sa unang siglo. Kining tawhana maoy usa ka opisyal nga “anaa sa gahom ilalom ni Candace nga rayna sa mga Etiopiano.”a Siya “maoy tinugyanan sa tanan niyang bahandi”—sa ingon, siya maoy usa ka ministro sa panalapi. Kini nga opisyal nagbasa sa Pulong sa Diyos aron makabatog kahibalo.—Buhat 8:27, 28.
Sa duol mao ang ebanghelisador nga si Felipe. Usa ka manulonda nagtultol kaniya niining dapita, ug karon siya gisultihan: “Duol ug kumuyog ka niini nga karwahe.” (Buhat 8:26, 29) Atong mahanduraw nga si Felipe nangutana sa iyang kaugalingon, ‘Kinsa kining tawhana? Unsay iyang ginabasa? Nganong gisugo ako sa pagduol kaniya?’
Samtang nagdagan si Felipe abay sa karwahe, iyang nadungog ang Etiopianhon nga nagbasa niining mga pulonga: “Ingon sa usa ka karnero siya gidala aron ihawon, ug ingon sa usa ka kordero nga walay-tingog atubangan sa tigtupi niini, maingon man siya wala magabuka sa iyang baba. Panahon sa iyang pagkanapaubos gikuha ang paghukom gikan kaniya. Kinsa man ang mosaysay sa mga detalye sa iyang kaliwatan? Tungod kay ang iyang kinabuhi gikuha man gikan sa yuta.”—Buhat 8:32, 33.
Nakasabot dayon si Felipe sa teksto. Kini maoy gikan sa sinulat ni Isaias. (Isaias 53:7, 8) Naglibog ang Etiopianhon sa iyang gibasa. Gisugdan dayon ni Felipe ang pakig-estorya pinaagi sa pagpangutana: “Ikaw tinuod bang nahibalo kon unsay imong ginabasa?” Ang Etiopianhon mitubag: “Sa pagkatinuod, unsaon ko man paghimo sa ingon, gawas kon may usa nga magtudlo kanako?” Dayon siya nangaliyupo kang Felipe nga mosakay sa iyang karwahe.—Buhat 8:30, 31.
“Unsay Nakapugong Kanako nga Mabawtismohan?”
“Ako nagapakiluoy kanimo,” miingon ang Etiopianhon kang Felipe, “bahin kang kinsa nagsulti ang propeta niini? Bahin ba sa iyang kaugalingon o bahin sa lain pang tawo?” (Buhat 8:34) Dili ikahibulong ang kalibog sa Etiopianhon, kay ang timailhan sa “karnero,” o “alagad,” sa tagna ni Isaias dugay na nga usa ka misteryo. (Isaias 53:11) Pagkatin-aw gayod tingali niini sa dihang gimantala ni Felipe ngadto sa Etiopianhon “ang maayong balita bahin kang Jesus”! Dayon ang Etiopianhon miingon: “Tan-awa! Usa ka luna sa tubig; unsay nakapugong kanako nga mabawtismohan?” Busa gibawtismohan siya ni Felipe dihadiha.—Buhat 8:35-38.
Kini ba dinalidali nga buhat? Dili gayod! Ang Etiopianhon maoy usa ka Hudiyohanong proselita.b Busa siya magsisimba na kang Jehova nga may kahibalo sa Kasulatan, lakip sa mga tagna bahin sa Mesiyas. Ugaling, dili pa kompleto ang iyang kahibalo. Karon nga nadawat na niya kining hinungdanong impormasyon mahitungod sa papel ni Jesu-Kristo, nasabtan sa Etiopianhon kon unsay gikinahanglan sa Diyos kaniya ug andam sa pagsunod. Ang bawtismo nahiangay.—Mateo 28:18-20; 1 Pedro 3:21.
Human niadto, “ang espiritu ni Jehova midali pagdala kang Felipe palayo.” Siya nagpadayon ngadto sa laing tinudlong buluhaton. Ang Etiopianhon “padayon mang nagpanaw nga nagmaya.”—Buhat 8:39, 40.
Pagtulon-an Alang Kanato
Ingong modernong mga alagad ni Jehova, kita adunay obligasyon nga tabangan ang matinud-anog kasingkasing nga mga indibiduwal nga makakat-on sa kamatuoran sa Pulong sa Diyos. Daghan ang nagmalamposon sa pagtanyag sa maayong balita sa uban samtang nagabiyahe o diha sa ubang dili-pormal nga mga kahimtang. Ingong resulta sa buluhatong pagsangyaw sa Gingharian, matag tuig gatosan ka linibo ang nagpasimbolo sa ilang dedikasyon kang Jehova nga Diyos pinaagig bawtismo.
Siyempre, ang mga bag-ohan dili angayng magdalidali sa pagpabawtismo. Una kinahanglan silang magbaton ug tukmang kahibalo bahin kang Jehova nga Diyos ug bahin sa iyang Anak, si Jesu-Kristo. (Juan 17:3) Unya sila kinahanglang maghinulsol, nga magabiya sa sayop nga paggawi ug bug-os nga magbag-o aron makapahiuyon sa mga sukdanan sa Diyos. (Buhat 3:19) Kini nagkinahanglan ug panahon, ilabina kon ang sayop nga panghunahuna ug paggawi nakagamot pag-ayo. Samtang palandongon ug maayo sa mga bag-ohan ang sakripisyo nga nalangkit sa Kristohanong pagkatinun-an, dagkong mga panalangin ang mosangpot sa pagsulod sa dedikadong relasyon kang Jehova nga Diyos. (Itandi ang Lucas 9:23; 14:25-33.) Kadtong kinsa mga Saksi ni Jehova sa kamadasigon nagatultol sa mga bag-ohan ngadto sa organisasyon nga gigamit sa Diyos sa pagpalampos sa iyang kabubut-on. (Mateo 24:45-47) Sama sa Etiopianhon, sila malipay sa pagkakat-on ug sa pagtuman sa gikinahanglan sa Diyos kanila.
[Mga footnote]
a Ang “Candace” dili usa ka ngalan kondili usa ka titulo (sama sa “Paraon” ug “Cesar”) nga ikapadapat sa sunodsunod nga mga rayna sa Etiopia
b Ang mga proselita maoy mga dili-Israelinhon nga mipili sa pagsunod sa Kasugoan ni Moises.—Levitico 24:22.
[Kahon sa panid 8]
Nganong Gitawag ug Yunuko?
Sa tibuok asoy sa Buhat kapitulo 8, ang Etiopianhon gihisgotan ingong usa ka “yunuko.” Bisan pa, sanglit ang Kasugoan ni Moises nagdili sa kinapon nga lalaki sa pagsulod sa kongregasyon, kining tawhana dayag nga dili usa ka yunuko sa literal nga diwa. (Deuteronomio 23:1) Ang Gregong pulong sa “yunuko” mahimong magpunting sa usa ka tawo nga hataas ug katungdanan. Busa, ang Etiopianhon maoy usa ka opisyal ubos sa rayna sa Etiopia.