“Ang Kamot ni Jehova Nag-uban Kanila”
“Busa sa gamhanang paagi ang pulong ni Jehova nagpadayon sa pag-uswag ug nagmadaogon.”—BUHAT 19:20.
1. (a) Unsay gireklamo sa mga kaaway sa Kristiyanidad sa unang siglo K.P.? (b) Unsay misangpot sa bisan diin nga ang misyonaryong Pablo nagwali sa maayong balita sa Gingharian sa Diyos, ug unsay nag-uban kanunay sa unang mga Kristohanon?
KAPIG 1,900 ka tuig kanhi, ang mga kaaway sa Kristohanong mensahe ug ang mga magsusupak sa misyonaryong si apostol Pablo mireklamo: “Kining mga tawhana nga nakapagubot sa gipuy-ang yuta nanganhi na usab, . . . ug [sila] nagasupak sa mga sugo ni Cesar, nga nagaingon nga aduna konoy laing hari, si Jesus.” (Buhat 17:6, 7) Sa bisan diin nga gisangyaw sa Kristohanong misyonaryo si Pablo ang maayong balita sa Gingharian ni Jehova, may kalihokan ug reaksiyon, ug subsob paglutos. Ang ubang unang mga Kristohanon nakaagom usab ug paglutos. Apan sa kanunay “ang kamot ni Jehova nag-uban kanila.”—Buhat 11:21.
2. Kinsay nagsugod sa Kristohanon misyonaryong kalihokan, ug sa unsang paagi?
2 Kinsay nagsugod niining bililhon Kristohanong misyonaryong kalihokan? Mao si Jesus, usa ka linaing tawo uban sa makapukawng mensahe ug talagsaong paagi sa pagpakaylap niana. Hinumdomi nga si Jesus, ang Anak sa Diyos, miabot sa Hudiyong katawhan uban ang katingalahang pahibalo bahin sa Gingharian sa Diyos. Apan interesado lamang sila sa kaugalingon nilang kaluwasan pinaagi sa mga binuhatan sa Kasugoan.—Mateo 4:17; Lucas 8:1; 11:45, 46.
“Sa Tanang Nasod”
3. Unsang tagna ni Jesus ang nakapatingala gayod sa iyang Hudiyong mga tinun-an, ug ngano?
3 Busa, mahanduraw nato ang katingala sa Hudiyong mga tinun-an ni Jesus sa gisultihan niya sila tulo ka adlaw una siya mamatay: “Ug kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang nasod; ug unya ang kataposan moabot.” Seguradong nahibulong ang iyang mga tinun-an kon unsaon nila sa pagwali sa maayong balita “sa tanang nasod.” Sa unsang paagi mahimo sa maong gamayng pundok sa mga magtutuo ang maong makalilisang nga buluhaton?—Mateo 24:14; Marcos 13:10.
4. Unsang sugo ang gihatag sa nabanhawng Jesus ngadto sa iyang mga tinun-an?
4 Sa ulahi, ang nabanhawng Jesus nagdugang sa usa ka sugo, nga miingon: “Ang tanang pagbulot-an gihatag kanako sa langit ug sa yuta. Busa panglakaw kamo ug himoang mga tinun-an ang katawhan sa tanang nasod, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagbantay sa tanang butang akong gisugo kaninyo.” Sa ingon sila gisugo sa pagdala sa mensahe sa ilang Agalon ngadto sa “katawhan sa tanang nasod.”—Mateo 28:18-20.
5, 6. (a) Sa unsang paagi ang pagsangyaw sa maayong balita sa Gingharian sa Diyos nakaabot sa mga Hentil, ug unsay misangpot? (b) Unsay sanong sa mga ansiano sa Jerusalem sa dihang giasoy ni Pedro kanila ang iyang kasinatian uban sa Hentil nga Cornelio?
5 Kini nag-apil sa pagwali ngadto sa mga Hentil, nga napamatud-ang usa ka hagit. Ang tinamdan ni Pedro latas sa tulo ka tuig sa ulahi maoy pamatuod niana. Pinaagi sa usa ka panan-awon, gisugo si Pedro sa pagkaon sa mahugawng mga linalang. Sa gipaila sa Diyos kaniya nga ang mga butang nga sa nangagi giisip nga mahugaw niadto pagaisipong hinlo, si Pedro nalibog. Dayon si Pedro giagak sa espiritu sa Diyos nga moduaw sa balay sa Hentil nga si Cornelio, usa ka Romanong senturyon. Didto, naila niya nga kabubut-on sa Diyos nga siya magwali kang Cornelio, bisan pag sa nangagi giisip niyang dili angay nga makigkontak sa mga tawo sa ubang mga rasa. Samtang nagsulti si Pedro, ang balaang espiritu mikunsad niadtong Hentil nga pamilya, ug kadto nagpaila, sa pagkamatuod, nga ang kanataran sa Kristohanong misyonaryong kalihokan kinahanglang karon mouswag nga maapil ang dili-Hudiyong kalibotan.—Buhat 10:9-16, 28, 34, 35, 44.
6 Sa gisaysay ni Pedro ang maong hitabo ngadto sa mga ansiano sa Jerusalem, “sila miuyon, ug sila naghimaya sa Diyos, nga nag-ingon: ‘Busa, ang Diyos nagtugot sa paghinulsol alang sa kinabuhi sa mga tawo sa kanasoran usab.’” (Buhat 11:18) Niadtong panahona ang Hentil nga kanasoran libreng makadawat sa maayong balita ni Kristo ug sa iyang Gingharian!
Mga Misyonaryo Ngadto sa Kanasoran
7. Sa unsang paagi ang Kristohanon misyonaryong kalihokan misugod sa pagkaylap sa kayutaan palibot sa Mediteranyo, ug unsay pag-isip ni Jehova niadto?
7 Ang buluhaton sa pagwali, nga mikusog sa pagkamatay ni Esteban ingong sinakit, nakabaton niadto ug laing natad. Gawas sa mga apostoles, ang kongregasyon sa Jerusalem natibulaag. Sa sinugdan, kadtong gilutos Hudiyong mga magtutuo nagwali lamang ngadto sa mga Hudiyo sa Penisya, Sipro, ug Antioquia. “Bisan pa niana, . . . ang pila ka tawo sa Sipro ug Cirene . . . misugod sa pagpakigsulti sa mga tawong nagsultig Grego, nga nagpahayag sa maayong balita sa Ginoong Jesus.” Giunsa pag-isip ni Jehova ang maong misyonaryong kalihokan
8. Giunsa sa pagpaila sa Diyos ang usa ka tinong lakang alang sa pagpauswag sa misyonaryong buluhaton?
8 Mga 47-48 K.P., ang Diyos, pinaagi sa balaang espiritu, nagpaila sa usa ka tinong lakang aron mouswag ang misyonaryong buluhaton. Ang rekord sa Buhat 13:2-4 nagasulti kanato: “Ang balaang espiritu miingon: ‘Sa tanang tawo igahin alang kanako si Bernabe ug Saulo alang sa buluhaton nga niini gitawag ko sila.’ . . . Busa ang maong mga tawo, nga gipadala sa balaang espiritu, milugsong ngadto sa Seleucia [ang dunggoanan sa Siryanhong Antioquia], sa Sipro.” Pagkamakapaukyab kadto alang kang Pablo ug Bernabe—ang pagsakayg sakayan padulong sa ilang unang langyawng asaynment! Si apostol Pablo maoy nanguna sa Kristohanon misyonaryong kalihokan. Gipahimutang usab niya ang patukoranan sa buluhaton nga taposon sa atong ika-20ng siglo.
9. Unsay nalampos ni apostol Pablo pinaagi sa iyang misyonaryong mga paglibot?
9 Si Pablo nagpadayon sa paghimo sa tulo ka nahitalang misyonaryong paglibot gawas pa sa iyang panaw paingon sa Roma ingong binilanggo. Sa lakaw niini, gibuksan niya ang buluhaton diha sa ubay-ubayng siyudad sa Uropa ng nagwali sa mensahe sa Gingharian sa kanasoran ug kaislahan nga karon nailhang Sirya, Cipro, Creta, Turkiya, Gresya, Malta, ug Sicily. Mahimong nakaabot pa siya sa Espanya. Mitabang siya sa pagtukod ug mga kongregasyon diha sa daghang siyudad. Unsa ang sekreto sa iyang epektibong misyonaryong kalihokan?
Epektibong Pagpanudlo
10. Nganong si Pablo epektibo kaayo sa iyang misyonaryong kalihokan?
10 Gisundog ni Pablo ang paagi sa pagpanudlo ni Kristo. Mao nga nahibalo siya kon sa unsang paagi makiglangkit sa mga tawo. Nasayod siya kong unsaon sa pagtudlo ug pagbansay sa uban ingong mga magtutudlo. Gipasukad niya ang iyang pagpanudlo sa Kasulatan. Wala siya mosulay sa pagpadayeg sa uban pinaagi sa iyang kaugalingong kaalam kondili, hinunoa, nangatarongan pinasukad sa Kasulatan. (Buhat 17:2, 3) Nasayod usab si Pablo kon sa pagpahiuyon sa iyang mamiminaw ug kon unsaon paggamit ang lokal nga kahimtang ingong sukaranan sa iyang mensahe. Sumala sa giingon niya: “Gihimo ko ang akong kaugalingon nga ulipon sa tanan, aron makabig ko unta ang kinadaghanang tawo. Ug sa mga Hudiyo ako nahimong sama sa Hudiyo . . .Niadtong walay kasugoan ako nahimong sama sa walay kasugoan . . . Sa mga mahuyang ako nahimong mahuyang, aron makabig ko unta ang mga mahuyang. Ako nahimong tanan nga butang sa mga tawo sa tanang matang, aron ako makaluwas unta sa pipila.”—1 Corinto 9:19-23; Buhat 17:22, 23.
11. Unsay nagapaila nga si Pablo ug iyang mga kauban maoy epektibong mga misyonaryo, ug unsa ka kaylap ang Kristohanong ministeryo?
11 Si Pablo ug iyang mga kauban maoy epektibong mga misyonaryo. Pinaagi sa pagkamalahutayon ug pagkamainantoson, sila nagtukod ug naglig-on sa Kristohanong mga kongregasyon sa bisan diin sila nangadto. (Buhat 13:14, 43, 48, 49; 14:19-28) Ang sayong Kristohanong ministeryo kaylap kaayo nga sa kadugayan si Pablo nakasulat mahitungod sa “kamatuoran nianang maayong balita nga napahayag mismo kaninyo, maingon nga kini nagapahayag mismo kaninyo, maingon nga kini nagapamunga ug nagauswag sa tibuok kalibotan . . . , ug gikawali sa tanang kalalangan sa silong sa langit.” Sa pagkamatuod, naapektahan ang mga tawo sa unang Kristohanong misyonaryong kalihokan.—Colosas 1:5, 6, 23.
12. Unsay nakapahunong sa matuod Kristohanon misyonaryong buluhaton sa usa ka panahon?
12 Ugaling, sa sinugdan sa ikaduhang siglo K.P., ang apostasiya miyuhot sa Kristohanong kongregasyon, sumala sa gipasidaan ni Jesus ug sa mga apostol. (Mateo 7:15, 21-23; Buhat 20:29, 30; 1 Juan 2:18, 19) Sa kasiglohan nga misunod, ang teolohiya ug ang paganong doktrina naglumos sa mensahe sa Gingharian. Ang Kakristiyanohan nagpadalag mga misyonaryo, dili sa pagwali sa matuod nga Gingharian sa Diyos, kondili sa pagpatuman diha sa walay-depensang mga lumad—kadaghanan pinaagi sa pinuti—sa gingharian sa ilang politikanhong mga agalon ug mga tigpasiugda. Nahunong ang matuod Kristohanong misyonaryong buluhaton apan dili sa walay kataposan.
13. Sa unsang paagi nagsugod ang usa ka misyonaryong kampanya sa modernong panahon, ug unsay nalampos sa pagkatapos sa 1916?
13 Sa hinapos sa ika-19ng siglo, si Charles T. Russell, ang unang presidente sa Watch Tower Society, nakasabot sa panginahanglan sa misyonaryong kalihokan. Sa ingon giorganisar niya ang dakong kampanya sa pagsangyaw, ug siya mismo nagduaw ug daghang siyudad sa Tinipong Bansa, ingon man milibot sa kalibotan pinaagi sa barko aron duawon ang labing daghang nasod kutob sa mahimo. Ang iyang mga sinulat nga gipasukad sa Bibliya gipatik sa 35 ka pinulongan. Giingon nga siya mibiyaheg kapin sa usa ka milyong milya ingong mamumulong sa publiko ug miwali sa kapig 30,000 ka sermon una siya mamatay niadtong 1916.
14. Unsay gihimo ni Joseph F. Rutherford sa pagpauswag sa misyonaryong kalihokan?
14 Ang mipuli kaniya, si Joseph F. Rutherford, nakaila usab sa bililhong panginahanglan sa misyonaryong kalihokan. Sa sinugdan sa katuigang 1920, gipadala niya ang may-katakos nga mga tawo ngadto sa lainlaing mga nasod aron motabang sa pagtukod sa buluhaton sa pagsangyaw. Ang mga misyonaryo nanguna niining buluhaton sa Gingharian sa Espanya, Amerika del Sur, ug Kasadpang Aprika. Niadtong 1931 ang usa ka hangyo gihimo alang sa mga boluntaryo aron lig-onon ang buluhaton sa Espanya. Tulo ka batan-ong lalaki gikan sa Inglaterra mitubag ug nag-alagad didto ubos sa labing lisod ug budlayng mga kahimtang sa upat ka tuig hangtod sa pagsilaob sa Gubat Sibil sa Espanya niadtong 1936. Unya sila nangalagiw alang sa ilang mga kinabuhi.
15. Unsay nahitabo sa katuigang 1940 sa pagpauswag ug dako sa misyonaryong buluhaton?
15 Panahon sa dekada sa 1940, umaabot ang mas maayong mga butang sa misyonaryong kalihokan. Ang ikatulong presidente sa Watch Tower Society, si Nathan H. Knorr, may usa ka tem sa masibotong mga lalaki nga nagbuhat kauban niya. Lagmit ubos sa pagtultol sa balaang espiritu, niadtong 1942 nasabtan niya ang panginahanglan sa pag-abli sa usa ka misyonaryong tunghaan sa pagpangandam sa tapos-Gubat sa Kalibotan II nga hagit. Sa taliwala sa maong gubat sa kalibotan, siya nangunay, ug ang Watchtower School of Gilead nainagurahan sa amihanang New York State niadtong Pebrero 1943. Uban sa upat ka instruktor, kana mihatag ug gipasukad-sa-Bibliya nga pagbansay alang sa misyonaryong pag-alagad sa kapig usa ka gatos madasigong payunir nga ministro, lalaki ug babaye, matag unom ka bulan. Epektibo ba ang misangpot nilang kalihokan?
16. (a) Pila ka Saksi ang nagsangyaw sa 1943, ug unsa na man kon itandi kana karong adlawa? (b) Unsa ang bahin sa mga misyonaryo sa maong pag-uswag? Ipatin-aw.
16 Sa 1943 diha lamay 126,329 ka Saksing nagsangyaw sa 54 ka nasod. Unsa ang kahimtang karong adlawa? Karon, 45 ka tuig sa ulahi, adunay 28 ka pilo, kapin sa tulo ug tunga sa milyong aktibong ministro diha sa 212 ka nasod ug isla sa dagat. Ang usa ka dakong bahin niining pag-uswaga maoy tungod sa maayong patukoranan nga gipahimutang sa kapig 6,000 ka misyonaryo nga nakagraduwar sa Tunghaang Gilead. Kini sila naggikan sa 59 ka nasod ug gipadala ngadto sa 148 lainlaing yuta sa lakat sa miaging kalim-an ka tuig. Uban sa ilang tabang, inay sa kapin lamag usa ka gatos ka libong Saksi sa tibuok kalibotan, ingon nga kana ang gidaghanon 45 ka tuig kanhi, karon adunay napulo ka nasod nga sa matag usa may kapig usa ka gatos ka libong ministro nga nagasangyaw ug nagatudlo sa maayong balita. Sa kadaghanan sa maong mga nasod, ang Gilead nga mga misyonaryo anaa sa unahan sa buluhatong pag-ebanghelyo.
17. Unsa ang tulo ka paninugdang hinungdan nga naghimong epektibo sa sayo ug modernong Kristohanong misyonaryong buluhaton?
17 Kon kaha nagatumong sa sayo o sa modernong Kristohanong misyonaryong buluhaton, adunay paninugdang mga hinungdan nga naghimo niining epektibo. Ang usa mao ang direktang pakigkontak sa mga tawo nga sangpotanan sa balay-balay nga ministeryo ug sa dili-pormal nga pagsangyaw, ingon man ang kahikayan sa pagtuon sa Bibliya sa balay. (Juan 4:7-26; Buhat 20:20) Ang laing hinungdan mao ang direkta ug yano gipasukad-sa-Bibliya nga mensahe nga nagapasiugda sa Gingharian sa Diyos ingong ang bugtong permanenteng solusyon sa mga suliran sa katawhan. (Buhat 19:8; 28:16, 23, 30, 31)
Ug daghan sa atong mga misyonaryo nagaalagad sa dilikaayo-abanteng kanasoran diin dayag kaayo ang panginahanglan sa matarong nga pagmando sa Diyos. Ang ikatulong hinungdan mao ang gugma nga gitudlo ni Kristo ug nga gipadayag sa atong modernong mga misyonaryo diha sa ilang matag-udlan mga pakiglabot sa katawhan sa tanang mga matang ug mga kagikan. Walay pagduhaduha nga, latas sa miaging 45 ka tuig, ang mga misyonaryo sa Watch Tower nakahimog dakong amot sa tibuok-yutang kauswagan sa organisasyon ni Jehova.—Roma 1:14-17; 1 Corinto 3:5, 6.
Espiritu sa Pagpayunir Nakahawid
18 Kinsa pa ang natuhopan sa samang espiritu sa misyonaryong kadasig sama sa mga graduwado sa Gilead?
18 Pihong ang madasigong panig-ingnan sa mga graduwado sa Gilead nagdasig sa uban nga may tinguhang mahimong bug-os-panahong mga ministro. Karong adlawa, adunay ginatos ka libong ubang saksi ni Jehova nga natuphan sa samang espiritu sa misyonaryong kasibot. Kini sila usab maoy mga payunir sa tinuod nga diwa, nga nagasunod sa mga lakang ni Jesus, “ang Mag-uuna sa ilang kaluwasan.”—Hebreohanon 2:10; 12:2, Moadto.
19. Ang daghang Saksi nga may espiritu sa pagpayunir miboluntaryo sa pagbuhat sa unsa, ug unsay ilang gibati kong bahin sa pagkagigantihan?
19 Sukad sa katuigang 1960 nahimong lisod kaayo ang pagpadalag mga misyonaryo sa ubay-ubayng kanasoran. Ang Watchtower Bible School of Gilead nagapadayon sa pagsuplay ug mga misyonaryo, sa gilapdon nga posible, sumala sa panginahanglan sa langyawng kanasoran. Bisan pa niana, adunay dako kaayong natad sa tibuok kalibotan alang niadtong mga Saksi nga dunay matuod payunir nga espiritu. Daghan ang nagboluntaryo sa paghimo sa ilang kaugalingong mga kahikayan sa pag-alagad sa kayutaan diin mas dako ang panginahanglan. Ikaw ba makaduyog kanila? Kana sila subsob nagakomento nga ang mga kalisod ug mga sakripisyo mabakwi ra nga pinilo sa dakong kalipay sa pagpakaon sa mga kamatuoran sa Gingharian ngadto sa mga karnerohon diha sa nagakaugmad nga kanasoran. Sila gibaslan sa usa ka gatos ka pilo sa pagkakaplag ug bag-ong “mga igsoong lalaki ug mga igsoong babaye ug mga inahan ug mga anak” ug sa pagpakig-ambit kanila sa kahibulongang paglaom sa kinabuhing walay kataposan sa “umaabot nga sistema sa mga butang.”—Marcos 10:28-30.
20. (a) Kinsa ang nagabuhat sa mas dakong bahin sa pagsangyaw diha sa daghang nasod? (b) Nganong ang Hapon nagataho sa katibuk-ang mas daghang oras sa pagsangyaw sa matag tuig kay sa halos tanan ubang nasod? (c) Unsang pangutana ang maayong atong palandongon?
20 Dugang pa, adunay ginatos ka libong alagad ni Jehova karong adlawa nga nagatahog sagradong pag-alagad kada bulan ingong regular o auxiliary nga mga payunir. Kadaghanan kanila nagakugi sa ilang kaugalingong mga teritoryo. Sa daghang nasod, kini sila nagahimo sa mas dakong bahin sa pagsangyaw, ug sila kadaghanan nagaduaw sa samang mga balay sa sunodsunod nga semana. Ang ilang paglaom sa Gingharian gibanaag diha sa ilang sayag nga panagway ug malipayong tinamdan samtang ginahimo nila ang bag-ong mga higala ug ginaugmad ang dakong interes diha sa ilang mga teritoryo. Ang dugang mga payunir nagkahulogan sa daghan pa kaayong oras nga magugol sa pagdayeg sa Diyos. Sulod sa kapin sa pulo ka tuig, ang Hapon, diin ang kinabag-an sa mga Saksi ni Jehova sa nangagi mga Buddhista, nagtaho sa katibuk-ang mas daghang oras sa pagsangyaw sa kanataran sa matag tuig kay sa ubang nasod gawas sa Tinipong Bansa. Kana tungod kay hapit katunga sa mga magmamantala sa Gingharian niini nagapayunir. Mahikay ba usab nimo ang imong kahimtang aron makaambit niining labing dakong pribilehiyo, ang payunir nga pag-alagad?
21. (a) Sa unsang paagi ang ubang Saksi kansang kahimtang dili makapaarang nila sa pagpalista ingong regular nga mga payunir makapakita gihapon sa espiritu sa pagpayunir? (b) Sa unsang paagi ang mga batan-on makapakita sa espiritu sa pagpayunir?
21 Adunay ubang Saksi nga “madasigon sa maayong mga buhat.” (Tito 2:14) Sila nagaapil sa mga tigulang, mga luyahog lawas, sa daghan nga may mga responsibilidad sa pamilya, ug mga batan-on nga nagatungha pa kansang kahimtang tingali dili makatugot nga sila mopalistang mga regular payunir. Kini sila usab makapakita sa espiritu sa pagpayunir pinaagi sa paghatag ug makapadasig nga pagpaluyo sa mga payunir, nga makig-ambit uban kanila sumala sa mahimo sa pag-alagad, ug pagbatog positibong tinamdan bahin sa ilang mga kahigayonan sa pagsangyaw. Ang mga batan-on makahimo sa bug-os-panahong pag-alagad sa Gingharian nga ilang tumong ug, sa dihang sila mabawtismohan na, makaambit sa auxiliary nga pagpayunir matag karon ug unya. Sama sa batan-ong si Timoteo, sila makapalandong niining mga butanga aron sa paghimog espirituwal nga kauswagan duyog sa tanang katawhan sa Diyos.—1 Timoteo 4:15, 16.
22. Bisan unsa ang atong kahimtang sa kinabuhi, unsay atong himoong determinasyon, ug uban ang unsang maayong sangpotanan?
22 Bisan unsa ang atong kahimtang sa kinabuhi, hinaot kitang tanan matandog sa espiritu ni Jehova sa pag-ambit sa bug-os pa sa pag-alagad kaniya. Hinaot “ang kamot ni Jehova” mopadayon sa pag-uban sa matag usa kanato aron kini ikaingon mahitungod sa atong ubos nga paningkamot nga “sa gamhanang paagi ang pulong ni Jehova nagapadayon sa pag-uswag ug nagmadaogon.”—Buhat 11:21; 19:20.
Mga Pangutana Alang sa Pagsubli
▫ Sa unsang paagi nagsugod ang Kristohanon misyonaryong buluhaton, ug nahimo kanang unsa ka dako?
▫ Unsa ang bahin ni apostol Pablo sa pagpauswag sa misyonaryong buluhaton?
▫ Sa unsang paagi ang misyonaryong buluhaton gibuhi pag-usab sa modernong panahon?
▫ Unsang mga hinungdan ang naghimong epektibo sa misyonaryo ug payunir nga pag-alagad?
▫ Sa unsang paagi matuhop kita sa espiritu sa pagpayunir karong adlawa?
[Chart sa panid 13]
Kalihokan sa Gingharian sa Napulo ka Nasod—1988
(Kining tanan nagtaho sa kapig 100,000 ka magmamantala)
Country Peak of Average Hours of Memorial
Publishers Pioneers Preaching Attendance
U.S.A. 797,104 96,947 161,478,732 1,822,607
Mexico 248,822 32,117 58,061,457 1,004,062
Brazil 245,610 22,725 44,218,022 718,414
Italy 160,584 25,477 43,354,687 330,461
Nigeria 134,543 14,022 27,800,623 398,555
Japan 128,817 52,183 60,626,840 297,171
Germany 125,068 8,416 22,020,942 215,385
Britain 113,412 11,927 22,103,713 211,060
Philippines 107,679 21,320 26,337,621 305,087
France 103,734 9,189 21,598,308 205,256
[Hulagway sa pahina 10]
Si Pablo ug Bernabe migikan aron manguna sa misyonaryong buluhaton