Dinasig nga Sumbanan sa Buluhaton sa Kristohanong Misyonaryo

“Mahimong mga maawaton kanako, maingon nga ako nagmaawaton kang Kristo.”​—1 CORINTO 11:1.

1. Unsa ang pila ka paagi nga niana si Jesus mihatag ug talagsaong panig-ingnan aron awaton sa iyang mga sumusunod? (Filipos 2:5-9)

TAGSAON gayod ang panig-ingnan nga gihatag ni Jesus sa iyang mga tinun-an! Malipayon niyang gitalikdan ang iyang kahimayaan sa langit aron sa pagkanaog sa yuta ug pagpuyo taliwala sa mga tawong makasasala. Siya andam nga makaagom sa dakong pag-antos aron sa pagluwas sa katawhan ug, labawng hinungdanon, aron sa pagbalaan sa ngalan sa iyang langitnong Amahan. (Juan 3:16; 17:4) Sa dihang gihusay siya alang sa iyang kinabuhi, sa way-kahadlok si Jesus mipahayag: “Tungod niini ako natawo, ug tungod niini ako mianhi sa kalibotan, aron ako magapamatuod sa kamatuoran.”​—Juan 18:37.

2. Nganong ang nabanhaw nga Jesus makasugo sa iyang mga tinun-an sa pagpadayon sa buluhaton nga iyang gisugdan?

² Una pa sa iyang kamatayon, gitagana ni Jesus ang ekselenteng pagbansay alang sa iyang mga tinun-an aron sila makapadayon sa buluhaton sa pagsaksi sa kamatuoran sa Gingharian. (Mateo 10:5-23; Lucas 10:1-16) Mao nga, tapos sa iyang pagkabanhaw, si Jesus nakahatag sa sugo: “Panlakaw kamo . . . ug paghimog mga tinun-an sa katawhan gikan sa tanang kanasoran, nga magabawtismo kanila diha sa ngalan sa Amahan ug sa Anak ug sa balaang espiritu, nga magatudlo kanila sa pagbantay sa tanang butang nga akong gisugo kaninyo.”​—Mateo 28:19, 20.

3. Sa unsang paagi ang buluhaton sa paghimog tinun-an miuswag, apan unsang mga rehiyon ang gihatagan niinig bug-os nga pagtagad?

³ Sulod sa sunod tulo ug tunga ka tuig, gisunod sa mga tinun-an ni Jesus kining sugoa apan gilimitihan ang ilang paghimog mga tinun-an diha lang sa mga Hudiyo, mga Hudiyong proselita, ug sinirkunsidahang mga Samarianhon. Dayon, niadtong 36 K.P., ang Diyos nagsugo nga ang maayong balita igawali ngadto sa dili-sinirkunsidahang tawo, si Cornelio, ug sa iyang panimalay. Sulod sa sunod napulo ka tuig, ubang mga Hentil nakasulod sa kongregasyon. Bisan pa niana, ang kinadak-an sa buluhaton morag gilimitihan ngadto sa mga rehiyon sa silangang Mediteranyo.​—Buhat 10:24, 44-48; 11:19-21.

4. Unsang dakong kaugmaran ang nahitabo sa mga 47-48 K.P.?

⁴ May butang gikinahanglan aron sa pagdasig o pagpaarang sa mga Kristohanon sa paghimog mga tinun-an gikan sa mga Hudiyo ug sa mga Hentil sa halayo pang mga rehiyon. Busa, sa mga 47-48 K.P., ang mga ansiano sa kongregasyon sa Antioquia sa Sirya nakadawat niining balaang mensahe: “Sa tanang mga tawo igahin kanako si Bernabe ug si Saulo alang sa buluhaton nga niini gitawag ko sila.” (Buhat 13:2) Matikdi nga si Pablo niadto nailhan pinaagi sa iyang orihinal nga ngalan, si Saulo. Matikdi, usab, nga ang Diyos nagngalan kang Bernabe nga una kang Pablo, tingali tungod kay niadtong panahona si Bernabe giisip nga mao ang senyor sa duha.

5. Nganong ang rekord sa misyonaryong panaw ni Pablo ug Bernabe dako ug bili alang sa mga Kristohanon karong adlawa?

⁵ Ang detalyadong talaan sa misyonaryong paglibot ni Pablo ug Bernabe makapadasig ug dako sa mga Saksi ni Jehova, ilabina alang sa mga misyonaryo ug mga payunir nga nagbiya sa ilang mga lungsod aron sa pag-alagad sa Diyos diha sa usa ka langyaw nga dapit. Dugang pa, ang pagsubli sa Mga Buhat kapitulo 13 ug 14 sa tino modasig sa dugang pa sa pag-awat kang Pablo ug Bernabe ug pagpadako sa ilang bahin sa hinungdanon-sa-tanang buluhaton sa paghimog mga tinun-an.

Ang Pulo sa Cipro

6. Unsang panig-ingnan ang gihatag sa mga misyonaryo sa Cipro?

⁶ Sa walay langan ang mga misyonaryo misakay ug sakayan sa Siryanhong dunggoanan sa Seleucia padulong sa pulo sa Cipro. Tapos makadunggo sa Salamina, sila wala magpalinga apan “misugod sa pagmantala sa pulong sa Diyos sulod sa mga sinagoga sa mga Hudiyo.” Sa pagsunod sa sumbanan ni Kristo, sila wala makontento sa pagpuyo niadtong siyudara ug maghulat sa mga tagapulo nga moanha kanila. Hinunoa, ilang gisiksik “ang tibuok pulo.” Sa walay duhaduha kadto naglangkit ug daghang pagbaktas ug daghang pagbalhin ug sak-anan, sanglit ang Cipro usa ka dakong pulo, ug ang ilang paglibot nagdala kanila sa tibuok gitas-on sa kinadak-ang bahin niana.​—Buhat 13:5, 6.

7. (a) Unsay talagsaon nga nahitabo sa Pafos? (b) Kini nga rekord nagadasig kanato sa pagbaton sa unsang tinamdan?

⁷ Sa pagkatapos sa ilang pag-estar, ang duha ka lalaki gigantihan ug usa ka talagsaong kasinatian sa siyudad sa Pafos. Ang magmamando sa pulo, si Sergio Paulo, namati sa ilang mensahe ug “nahimong magtutuo.” (Buhat 13:7, 12) Si Pablo sa ulahi misulat: “Inyong nakita ang iyang pagtawag kaninyo, mga igsoon, nga dili daghan ang makinaadmanon sa unodnong paagi ang gitawag, dili daghan ang gamhanan, dili daghan ang may hamiling pagkatawo.” (1 Corinto 1:26) Bisan pa niana, taliwala sa mga gamhanan nga misanong mao si Sergio Paulo. Kining kasinatiana angay magdasig sa tanan, ilabina sa mga misyonaryo, sa pagbatog positibong tinamdan mahitungod sa pagsangyaw ngadto sa mga opisyales sa gobyerno, sama nga kita gidasig sa pagbuhat diha sa 1 Timoteo 2:1-4. Ang mga tawong may awtoridad may panahong mihatag ug dakong tabang ngadto sa mga alagad sa Diyos.​—Nehemias 2:4-8.

8. (a) Unsang nausab nga relasyon tali kang Bernabe ug Pablo ang mipatim-aw sukad sa maong panahon paunahan? (b) Sa unsang paagi si Bernabe usa ka maayong panig-ingnan?

⁸ Ubos sa impluwensiya sa espiritu ni Jehova, si Pablo midula ug dakong bahin sa pagkakabig ni Sergio Paulo. (Buhat 13:8-12) Usab, sukad sa maong panahon paunahan, mopatim-aw nga si Pablo maoy nanguna. (Itandi ang Buhat 13:7 sa Buhat 13:15, 16, 43.) Kadto nahiuyon sa balaang komisyon o sugo nga nadawat ni Pablo sa panahon sa pagkakabig niya. (Buhat 9:15) Tingali ang maong panghitabo misulay sa pagpaubos ni Bernabe. Hinunoa, inay isipon ang maong kausaban ingong personal nga insulto, si Bernabe lagmit nagtuman sa kahulogan sa iyang ngalan, “Anak sa Paglipay,” ug sa kamaunongon mipaluyo kang Pablo sa tibuok nga misyonaryong panaw ug human niadto sa dihang ang pila ka Hudiyong Kristohanon mihagit sa ilang pagsangyaw sa dili-sinirkunsidahang mga Hentil. (Buhat 15:1, 2) Pagkamaayong panig-ingnan kini alang kanatong tanan, apil ang mga nagpuyo sa mga balayng misyonaryo ug Bethel! Kinahanglang kita sa kanunay andam modawat sa teokratikanhong mga pagpasibo ug mohatag sa bug-os natong pagpaluyo ngadto niadtong gitudlo sa pagpanguna sa atong taliwala.​—Hebreohanon 13:17.

Ang Patag sa Ibabaw sa Asia Minor

9. Unsay atong makat-onan gikan sa kaandam ni Pablo ug Bernabe sa pagpanaw abot sa Antioquia sa Pisidia?

⁹ Gikan sa Cipro, si Pablo ug Bernabe milayag paamihanan ngadto sa kontinente sa Asia. Tungod sa wala-ibutyag nga hinungdan, ang mga misyonaryo wala magpabilin sa rehiyon sa kabaybayonan apan mihimo sa dugay ug kuyaw nga biyahe sa mga 180 kilometros padulong sa Antioquia sa Pisidia, nga nahimutang sa sentral nga patag sa ibabaw sa Asia Minor. Kadto naglangkit sa pagtungas sa usa ka agianan sa bukid ug paglugsong sa patag nga mga 1,100 metros ibabaw sa lebel sa dagat. Ang eskolar sa Bibliya nga si J. S. Howson nag-ingon: “Ang kamalinapason ug pagpanulis sa katawhan nianang mga bukira nga nagabahin sa patag sa ibabaw . . . gikan sa kapatagan sa habagatang baybayon, ilado sa tanang bahin sa karaang kasaysayan.” Dugang pa, ang mga misyonaryo miatubang sa kapeligrohan gikan sa kinaiyahan. “Walay distrito sa Asia Minor,” midugang si Howson, “labaw pang natiman-an ilabina sa iyang ‘mga tubig sa baha’ kay sa bukirong dapit sa Pisidia, diin ang mga suba mobanaw diha sa mga tiilan sa dagko kaayong mga pangpang, o mobul-og agi sa pig-ot nga mga lugot.” Kini nga mga detalye motabang nato sa paghanduraw sa matang sa mga biyahe nga andam sagubangon sa mga misyonaryo tungod sa pagsabwag sa maayong balita. (2 Corinto 11:26) Susama karong adlawa, daghan sa mga alagad ni Jehova mosagubang sa tanang matang sa kababagan aron maabot ang katawhan ug ipaambit kanila ang maayong balita.

10, 11. (a) Giunsa ni Pablo pagpatunhay ang panag-uyonay sa pagtuo uban sa iyang mamiminaw? (b) Nganong daghang Hudiyo lagmit nakurat sa pagkadungog sa mga pag-antos sa Mesiyas? (c) Unsang matang sa kaluwasan ang gipadayag ni Pablo sa atubangan sa iyang mga mamiminaw?

¹⁰ Sanglit dihay usa ka Hudiyong sinagoga sa Antioquia sa Pisidia, ang mga misyonaryo unang miadto didto aron sa paghatag niadtong labing sinati sa Pulong sa Diyos ug higayon sa pagdawat sa maayong balita. Sa gidapit nga mamulong, si Pablo mitindog ug mihatag sa hanas nga pakigpulong publiko. Sa tibuok nga pakigpulong, iyang gipatunhay ang panag-uyon sa pagtuo uban sa mga Hudiyo ug mga proselita diha sa mamiminaw. (Buhat 13:13-16, 26) Human sa iyang introduksiyon, gisubli ni Pablo ang masilakong kasaysayan sa mga Hudiyo, nga nagpahinumdom kanila nga si Jehova nagpili sa ilang mga katigulangan ug dayon nagluwas kanila gikan sa Ehipto, ingon man kon giunsa niya pagtabang sila sa pagpukan sa mga molupyo sa Yutang Saad. Dayon gipasiugda ni Pablo ang mga pakiglabot ni Jehova kang David. Ang maong kasayoran duol sa mga kasingkasing sa mga Hudiyo sa unang siglo kay sila nagpaabot man nga ang Diyos magpatungha ug usa ka kaliwat ni David ingong manluluwas ug walay-kataposang magmamando. Sa maong punto, si Pablo maisogong nagpahibalo: “Gikan sa mga kaliwat niining tawhana [David] sumala sa iyang saad ang Diyos nagpatungha sa usa ka manluluwas alang sa Israel, si Jesus.”​—Buhat 13:17-23.

¹¹ Ugaling lang, ang matang sa manluluwas nga gipaabot sa daghang Hudiyo maoy usa ka militaryong bayani nga magluwas kanila gikan sa Romanhong paggahom ug magbayaw sa Hudiyonhong nasod labaw sa tanan nga uban. Busa, sila sa walay duhaduha nakuratan sa pagkadungog nga si Pablo miingon nga ang Mesiyas igatugyan aron patyon sa ilang kaugalingong relihiyosong mga pangulo. “Apan ang Diyos nagbanhaw kaniya gikan sa mga patay,” si Pablo maisogong nagpahayag. Sa hinapos sa iyang pakigpulong, iyang gipakita sa iyang mamiminaw nga sila makadangat sa kahibulongang matang sa kaluwasan. “Pasagdi . . . nga inyong masayran,” matud niya, “nga pinaagi Kaniya ang usa ka pagpasaylo sa mga sala ginamantala nganha kaninyo; ug kana gikan sa tanang butang nga gikan niana kamo dili ikapahayag nga walay sala pinaagi sa kasugoan ni Moises, ang matag usa nga motuo igapahayag nga walay sala pinaagi niini Kaniya.” Gitapos ni Pablo ang iyang pakigpulong pinaagi sa pag-awhag sa iyang mamiminaw nga dili maklasipikar nga maapil sa daghan si kinsa gitagna sa Diyos nga dili manumbaling niining kahibulongang tagna sa kaluwasan.​—Buhat 13:30-41.

12. Unsa ang sangpotanan sa pakigpulong ni Pablo, ug sa unsang paagi kini magadasig kanato?

¹² Pagkamaayo-nga-pagkapahayag ug pinasukad-sa-Kasulatan nga pakigpulong! Unsa ang sanong sa mamiminaw? “Daghan sa mga Hudiyo ug sa mga proselita nga nagsimba sa Diyos misunod kang Pablo ug Bernabe.” (Buhat 13:43) Pagkamakapadasig kanato karong adlawa! Hinaot nga kita samang mobuhat sa atong labing maayo sa pagtanyag sa kamatuoran sa epektibong paagi, kon kaha diha sa atong pagsangyaw sa publiko o sa mga komento ug sa mga pakigpulong sa panahon sa atong mga tigom sa kongregasyon.​—1 Timoteo 4:13-16.

13. Nganong ang mga misyonaryo kinahanglang mobiya sa Antioquia sa Pisidia, ug unsang mga pangutana ang motungha mahitungod sa bag-ong mga tinun-an?

¹³ Ang mga bag-ong interesado sa Antioquia sa Pisidia dili makatago sa maong maayong balita. Ingong sangpotanan, “sa sunod nga igpapahulay halos ang tibuok siyudad nagtigom aron sa pagpamati sa pulong ni Jehova.” Ug sa wala madugay ang mensahe mikaylap sa gawas sa siyudad. Sa pagkamatuod, “ang pulong ni Jehova padayon nga gipakaylap sa tibuok kayutaan.” (Buhat 13:44, 49) Inay sa pagkahinangop niining panghitaboa, ang masinahong mga Hudiyo milampos sa pagpalagpot sa mga misyonaryo sa gawas sa siyudad. (Buhat 13:45, 50) Unsay epekto niana sa bag-ong mga tinun-an? Sila ba nangaluya ug nanghunong?

14. Nganong ang mga magsusupak dili makapahunong sa buluhaton nga gisugdan sa mga misyonaryo, ug unsay atong makat-onan gikan niini?

¹⁴ Wala, tungod kay kadto buluhaton sa Diyos. Usab, ang mga misyonaryo nakapahimutang ug lig-ong patukoranan sa pagtuo diha sa nabanhawng Ginoong Jesu-Kristo. Dayag, diay, ang bag-ong mga tinun-an nag-isip kang Kristo, ug dili sa mga misyonaryo, ingong ilang Pangulo. Busa, atong mabasa nga sila “nagpadayon nga nahupong sa kalipay ug sa balaang espiritu.” (Buhat 13:52) Pagkamakapadasig kini alang sa mga misyonaryo ug sa ubang tighimog mga tinun-an karong adlawa! Kon sa mapaubsanon ug madasigon buhaton nato ang atong bahin, panalanginan ni Jehova nga Diyos ug ni Jesu-Kristo ang atong ministeryo.​—1 Corinto 3:9.

Iconio, Listra, ug Derbe

15. Unsang paagi ang gisunod sa mga misyonaryo sa Iconio, uban sa unsang sangpotanan?

¹⁵ Si Pablo ug Bernabe karon mibiyahe ug mga 140 kilometros habagatan-silangan padulong sa sunod nga siyudad, ang Iconio. Ang kahadlok sa paglutos wala makapugong kanila sa pagsunod sa samang paagi sama didto sa Antioquia. Ingong sangpotanan, ang Bibliya nagaingon: “Ang dakong panon sa mga Hudiyo ug mga Grego nahimong mga magtutuo.” (Buhat 14:1) Dayon, ang mga Hudiyo nga wala modawat sa maayong balita miukay na usab ug pagsupak. Apan ang mga misyonaryo nag-antos ug migugol sa dakong panahon sa Iconio aron sa pagtabang sa bag-ong mga tinun-an. Unya, tapos mahibalo nga ang ilang mga Hudiyong magsusupak buot mobato kanila, si Pablo ug Bernabe sa kamaalamon mikalagiw ngadto sa sunod teritoryo, “sa Listra ug Derbe ug sa kayutaan sa palibot.”​—Buhat 14:2-6.

16, 17. (a) Unsay nahitabo kang Pablo sa Listra? (b) Sa unsang paagi ang mga pakiglabot sa Diyos uban sa apostol nakaapektar sa usa ka batan-ong lalaki nga taga-Listra?

¹⁶ Sa maisogon “sila nagpadayon sa pagmantala sa maayong balita” didto sa bag-o, niadto pa nasangyawan nga teritoryo. (Buhat 14:7) Sa diha nga nakadungog niini ang mga Hudiyo sa Antioquia sa Pisidia ug sa Iconio, sila nangadto gayod sa Listra ug midani sa mga panon sa katawhan sa pagbato kang Pablo. Kay walay panahon sa pag-ikyas, si Pablo gipaulanan ug mga bato, mao nga ang iyang mga magsusupak nagtuo nga siya patay na. Ilang giguyod siya sa gawas sa siyudad.​—Buhat 14:19.

¹⁷ Mahanduraw mo ba ang kaguol nga gipahinabo niadto sa bag-ong mga tinun-an? Apan katingalahan kaayo, sa gilibotan nila si Pablo, siya mitindog! Ang Bibliya wala mag-ingon kon kaha ang usa ka batan-ong lalaki nga ginganlang si Timoteo maoy usa niadtong bag-ong mga tinun-an. Seguradong ang mga pakiglabot sa Diyos kang Pablo sa usa ka panahon iyang nahibaloan ug dulot nahasilsil sa iyang linghod nga hunahuna. Si Pablo misulat diha sa iyang ikaduhang sulat kang Timoteo: “Ikaw nagsunod pag-ayo sa akong pagpanudlo, sa akong pagkinabuhi, . . . ang matang sa mga butang nga nahitabo kanako sa Antioquia, sa Iconio, sa Listra, ang matang sa mga paglutos nga akong giagoman; ug ngani gikan nianang tanan ang Ginoo nagluwas kanako.” (2 Timoteo 3:10, 11) Mga usa o duha ka tuig tapos sa pagbato kang Pablo, siya mibalik sa Listra ug nakakaplag nga ang batan-ong si Timoteo usa ka sulundang Kristohanon, “nga dinayeg sa mga igsoon sa Listra ug Iconio.” (Buhat 16:1, 2) Busa si Pablo mipili kaniya ingong kauban sa pagpanaw. Kadto nakatabang kang Timoteo sa pagtubo sa espirituwal nga kahimtang, ug sa wala madugay siya nahimong may katakos aron ipadala ni Pablo sa pagduaw sa lainlaing mga kongregasyon. (Filipos 2:19, 20; 1 Timoteo 1:3) Sa susama, karong adlawa, ang madasigong mga alagad sa Diyos maoy kahibulongang impluwensiya sa mga batan-on, nga daghan kanila motubo nga mahimong bililhong mga alagad sa Diyos, sama kang Timoteo.

18. (a) Unsay nahitabo sa mga misyonaryo sa Derbe? (b) Unsang kahigayonan ang karon bukas alang kanila, apan unsang dalan ang ilang gipili?

¹⁸ Sa pagkabuntag tapos sa iyang paglingkawas sa kamatayon sa Listra, si Pablo migikan kuyog ni Bernabe padulong sa Derbe. Sa maong panahon, walay mga magsusupak nga misunod, ug ang Bibliya nag-ingon ‘sila nakahimog ubay-ubay nga mga tinun-an.’ (Buhat 14:20, 21) Kay nakatukod ug usa ka kongregasyon sa Derbe, si Pablo ug Bernabe kinahanglang mohimog usa ka desisyon. Usa ka giagian kanunay nga dalan nga natukod sa mga Romano nagdugtong sa Derbe ngadto sa Tarso. Gikan didto mubo na lang nga biyahe pabalik sa Antioquia sa Sirya. Lagmit kadto ang labing sayong dalan sa pagbalik, ug kadtong mga misyonaryo lagmit mibating sila sa maong panahon angay nang mopahulay. Hinuon, sa pag-awat sa ilang Agalon si Pablo ug Bernabe mibatig labaw nga panginahanglan.​—Marcos 6:31-34.

Bug-os nga Pagtuman sa Buluhaton sa Diyos

19, 20. (a) Giunsa pagpanalangin ni Jehova ang mga misyonaryo nga namalik ngadto sa Listra, Iconio, ug Antioquia? (b) Unsang pagtulon-an ang gihatag niini sa katawhan ni Jehova karong adlawa?

¹⁹ Inay sa pagsubay sa mubong dalan sa pagpauli, ang mga misyonaryo sa maisogon namalik ug miduaw pag-usab sa mga siyudad mismo diin nameligro ang ilang mga kinabuhi. Gipanalanginan ba sila ni Jehova tungod sa maong dili-mahakogong kabalaka alang sa bag-ong mga karnero? Oo, sa pagkatinuod, kay ang asoy nag-ingon nga sila milampos sa “paglig-on sa mga kalag sa mga tinun-an, nga nagdasig kanila sa pagpabilin sa pagtuo.” Sa angay, ilang gisultihan kadtong bag-ong mga tinun-an: “Kinahanglang magasulod kita sa gingharian sa Diyos latas sa daghang kasakitan.” (Buhat 14:21, 22) Si Pablo ug Bernabe nagpahinumdom usab kanila sa ilang pagkatinawag ingong kaubang mga manununod sa umaabot nga Gingharian sa Diyos. Karong adlawa, kinahanglang ihatag nato ang samang pagdasig ngadto sa bag-ong mga tinun-an. Makapalig-on kita kanila sa pag-antos sa mga pagsulay pinaagi sa pagtanyag sa ilang atubangan sa kalaoman sa kinabuhing walay kataposan sa yuta ubos sa pagmando nianang samang Gingharian sa Diyos nga giwali ni Pablo ug ni Bernabe.

²⁰ Una pa mopahawa sa matag siyudad, si Pablo ug Bernabe mitabang sa lokal nga kongregasyon nga maorganisar pag-ayo. Dayag, gibansay nila ang mga tawong may katakos ug gitudlo sila sa pagpanguna. (Buhat 14:23) Sa walay duhaduha kadto nakaamot sa dugang pagpahalapad. Sa susama karong adlawa, ang mga misyonaryo ug uban pa, tapos sa pagtabang sa mga walay-kasinatian sa pag-uswag hangtod nga sila makapas-an ug responsabilidad, usahay mobalhin ug mopadayon sa ilang maayong buluhaton diha sa ubang mga dapit diin mas dako ang panginahanglan.

21, 22. (a) Unsay nahitabo human matapos ni Pablo ug Bernabe ang ilang panaw ingong misyonaryo? (b) Unsang mga pangutana ang ipatungha niini?

²¹ Sa dihang sa kataposan ang mga misyonaryo namalik sa Antioquia sa Sirya, sila dulot mibatig katagbawan. Sa pagkatinuod, ang rekord sa Bibliya nagaingon nga sila “bug-os nagtuman” sa buluhaton nga gisalig sa Diyos kanila. (Buhat 14:26) Hisabtan, ang pag-asoy sa ilang mga kasinatian nakahatag ug “dakong kalipay sa tanang kaigsoonan.” (Buhat 15:3) Apan unsa na man ang umaabot? Sila ba karon maghiraghirag na lang ug makontento sa ilang kalamposan, sumala sa panultihon? Dili gayod. Tapos sa pagduaw sa nagamandong lawas sa Jerusalem aron mabatonan ang desisyon mahitungod sa isyu sa sirkumsisyon, ang duha misugod na usab sa misyonaryong mga panaw. Sa maong panahon sila nanglakaw sa lainlaing mga direksiyon. Si Bernabe nagdala kang Juan Marcos ug nangadto sa Cipro, samtang si Pablo nakakaplag ug bag-ong kauban, si Silas, ug mipanaw agi sa Sirya ug Cilicia. (Buhat 15:39-41) Maoy sa maong panaw nga gipili niya ang batan-ong si Timoteo ug giuban siya.

²² Ang Bibliya wala magpadayag sa sangpotanan sa ikaduhang panaw ni Bernabe. Mahitungod kang Pablo, siya mipadayon ngadto sa bag-ong teritoryo ug mitukod ug mga kongregasyon diha sa labing menos lima ka siyudad​—Filipos, Berea, Tesalonica, Corinto, ug Efeso. Unsa ang yawi sa talagsaong kalamposan ni Pablo? Ang sama bang mga prinsipyo molampos alang sa Kristohanong mga tighimog tinun-an karong adlawa?

Nahinumdom Ka Ba?

◻ Nganong si Jesus talagsaong panig-ingnan nga pagaawaton?

◻ Sa unsang paagi si Bernabe usa ka panig-ingnan?

◻ Unsay atong makat-onan gikan sa pakigpulong ni Pablo sa Antioquia sa Pisidia?

◻ Giunsa ni Pablo ug Bernabe pagtuman sa bug-os sa ilang asaynment?

[Hulagway sa panid 15]

Ang pag-antos ni apostol Pablo sa paglutos may malungtarong impresyon sa batan-ong lalaki si Timoteo