ICONIO

Usa ka karaang siyudad sa Asia Minor nga nahimutang mga 1,027 m (3,370 p) ibabaw sa lebel sa dagat. Sa pagkakaron ang Iconio nailhan nga Konya (Konia), nga nahimutang mga 240 km (150 mi) sa H sa Ankara diha sa HK nga tumoy sa sentral nga patag ibabaw sa bukid sa Turkey. Sa unang siglo K.P., ang Iconio maoy usa sa pangunang mga siyudad sa Romanhong lalawigan sa Galacia ug nahimutang sa taliwala niini ang pangunang ruta sa negosyo gikan sa Efeso ngadto sa Sirya.

Ang siyudad adunay impluwensiyadong mga molupyo nga Hudiyo. Si Pablo ug Bernabe, human pugsa nga mobiya sa Antioquia sa Pisidia, misangyaw sa siyudad sa Iconio ug sa sinagoga niini, ug didto ilang natabangan ang daghang Hudiyo ug mga Grego nga mahimong mga magtutuo. Apan sa dihang may lakang nga gihimo aron sa pagbato kanila, sila mikalagiw gikan sa Iconio paingon sa Listra. Apan, sa wala madugay ang mga Hudiyo gikan sa Antioquia ug Iconio nangabot sa Listra ug nagsulsol sa panon sa katawhan didto mao nga sila nagbato kang Pablo. Human niadto si Pablo ug Bernabe miadto sa Derbe ug dayon maisogong mibalik sa Listra, Iconio, ug Antioquia, nga nagpalig-on sa mga igsoon ug nagtudlo ug “mga ansiyano” aron sa paghupot ug mga katungdanan diha sa mga kongregasyon nga natukod niining mga siyudara.​—Buh 13:​50, 51; 14:1-7, 19-23.

Sa ulahi, human motungha ang isyu bahin sa pagtuli ug human kini mahusay sa mga apostoles ug sa mga ansiyano sa kongregasyon sa Jerusalem, si Pablo lagmit miduaw pag-usab sa Iconio. Niining ikaduhang misyonaryong panaw nga gidala ni Pablo si Timoteo, usa ka batan-ong lalaki nga may maayong dungog taliwala sa mga igsoon didto sa Listra ug Iconio.​—Buh 16:1-5; 2Ti 3:​10, 11.

Ang Iconio nahimutang diha sa utlanan taliwala sa Frigia ug Licaonia. Lagmit kini ang hinungdan kon nganong ang pipila sa karaang mga magsusulat, lakip kang Strabo ug Cicero, nag-ingon nga sakop kini sa Licaonia, samtang si Xenophon nagtawag niini nga kataposang siyudad sa Frigia. Pinasukad sa geograpiya, ang Iconio maoy sakop sa Licaonia, apan sumala sa gipaila sa arkeolohikanhong mga kaplag, ang kultura ug sinultihan niini maoy Frigiahanon. Ang mga inskripsiyon nga nakaplagan sa maong dapit niadtong 1910 nagpakita nga Frigiahanon ang pinulongan nga gigamit didto sulod sa duha ka siglo human sa panahon ni Pablo. Busa, tukma nga ang magsusulat sa Mga Buhat wala maglakip sa Iconio ingong bahin sa Licaonia, diin ang “pinulongang Licaonianhon” maoy gigamit.​—Buh 14:​6, 11.