Usa ka Bag-ong Bahin sa Kaalam sa Diyos

“UG MIINGON ang Giyos kang Moises: ‘AKO MAN ANG MAO AKO.’ Ug siya midugang: ‘Mao kini ang imong igaingon sa mga anak sa Israel, “AKO MAN mao ang nagpadala kanako nganha kaninyo.”’” (Exodo 3:14) Gipatin-aw ni Jehova ngadto kang Moises nga una pa niini bisan ang Iyang mga alagad wala makasabot sa bug-os nga kahulogan sa Iyang ngalan. Siya maoy Diyos sa katuyoan ug nagatuman gayod kanunay sa iyang kabubut-on. Kon gikinahanglan man gani sa panahon, makabag-o siya sa iyang paagi aron makab-ot ang iyang katuyoan. Ingon niana siya ka maalamon!

Si Satanas wala makasabot sa kahulogan sa ngalan sa Diyos. Tingali, nahibalo siya sa kahoy sa kinabuhi diha sa tanaman sa Eden. Kon iyang giagak si Adan ug Eva ngadto niana, mopatim-aw nga nakahatag kana ug duha ka malisod nga kapilian ni Jehova: tumanon ba ang iyang pulong nga ang kasal-anan magkahulogan sa ilang kamatayon o tumanon ba ang iyang pulong maylabot sa kahoy sa kinabuhi. (Genesis 2:9; 3:1-6) Apan, nabalo si Satanas.

Karon misugod ang Diyos sa pagpakitag kaalam nga wala dahoma sa iyang espiritu nga mga anak ug wala ibutyag kanhi ngadto kanila. (Itandi sa Efeso 3:10.) Siya misugod sa paghatag ug sunodsunod nga mga pahayag ug mga hitabo nga sa hataas nga panahon sa katingalahang paagi nagapasundayag sa iyang dakong kaalam ug sa iyang katakos sa pagtuman sa iyang walay kataposang katuyoan, nga mao ang pagpuno sa yuta ug malipayon, maunongong mga tawo nga mahimong mabuhi sa walay kataposan sa Paraiso. (Genesis 1:27, 28) Sa tanang panahon gipukgo sa Diyos ang mga paningkamot ni Satanas sa pagpangilabot.

Ang Balaang Tinago Gibuksan

Dihadiha tapos sa unang pag-alsa, milihok ang Diyos. Iyang gihukman ang sad-ang magtiayon ug gilabanan ang iyang silot nga kamatayon tungod sa pagsupak. Unsay iksulti bahin sa pagkaon ni Adan ug Eva gikan sa kahoy sa kinabuhi? “Si Jehova mipadayon sa pag-ingon: ‘Ang tawo nahimo nga ingon nga usa kanato sa pagkahibalo sa maayo ug sa daotan, ug karon tingali unya ituy-od niya ang iyang kamot ug mokuha usab sa kahoy sa kinabuhi ug mokaon ug mabuhi gihapon sa walay kataposan,​—’ Tungod niini gihinginlan siya ni Jehova nga Diyos gikan sa tanaman sa Eden.”—Genesis 3:17-23.

Niining panahona milihok usab si Jehova ingong Ebanghelisador, kun Magwawali sa maayong balita. Iyang gipahayag ang unang tagna: “Si Jehova nga Diyos mipadayon sa pag-ingon ngadto sa bitin: . . . ‘Ibutang ko ang panagkaaway sa taliwala mo ug sa babaye ug sa taliwala sa imong binhi ug sa iyang binhi. Siya magasamad sa imong ulo ug ikaw magasamad sa iyang tikod.’” (Genesis 3:14, 15) Sa milabay ang mga siglo si apotol Pablo miingon: “Ang [tawhanong] kalalangan nailalom sa kakawangan, dili tungod sa kaugalingong pagbuot niini kondili tungod sa pagbuot niya nga mao ang nagpahimutang niini, tungod sa pasukaranan sa paglaom.”​—Roma 8:20.

Oo, tapos niadto ang tawo walay mahimo kon nagapos sa kamatayon nga napanunod gikan kang Adan, apan gipadayag sa Diyos ang iyang katuyoan sa pagluwas sa masinundanong mga anak ni Adan. Bisan pa, unsa ang “pasukaranan sa paglaom”? Sa unsang paagi iyang maluwas ang mga tawo ug sa gihapon nagalaban sa iyang silot nga kamatayon tungod sa sala? Mao kini ang natagong kaalam sa Diyos; kini nalangkit sa “balaang tinago nga nalilong gikan sa nangaging sistema sa mga butang ug gikan sa nanglabayng mga kaliwatan.” (Colosas 1:26; 1 Corinto 2:7, 8) Bisag ang mga maunongon sa karaan wala makasabot sa tinago, sila may paglaom nga sa usa ka paagi luwason sila sa Diyos. Gani, bisan ang mga manulonda naghinamhinam nga mahibalo kon unsaon sa pagtuman ni Jehova sa iyang katuyoan! (1 Pedro 1:10-12) Nakasabot ka ba niining balaang tinago?

Gitubos Pinaagi sa Lukat

Sa anam-anam sa kasiglohan, midugang si Jehova ug impormasyon sa iyang orihinal nga saad. Ngadto sa matinumanong Abraham siya misaad ug usa ka binhi nga pinaagi kaniya modangat ang mga panalangin alang sa tanang tawong matinumanon. (Genesis 22:15-18) Pinaagi kang Jacob mipadayag siya nga ang binhi maoy usa ka hari gikan sa banay ni Juda. (Genesis 49:10) Niadtong panahona nanagpanuo ang diyosnong mga tawo sa pagkabanhaw sa mga patay, apan wala gayod sila sa bug-os makasabot kon unsaon kini sa paghimo. (Job 14:14, 15; Hebreohanon 11:19) Sa kataposan, misaad ang Diyos kang David nga ang umaabot nga Hari, kun Mesiyas, maoy kaliwat ni David ug nga mohari sa walay kataposan.​—2 Samuel 7:16.

Nadugangan ang pagsabot sa tanang mga propeta mahitungod sa balaang tinago, apan dili gayod kini bug-os nga masabtan sa mga tawo. Sa ulahi, ang panahon miabot sa pagtungha sa Mesiyas, ug dayon, sa kataposan, kining hilabihan ka dakong kaalam sa Diyos mas mitin-aw. Kini nagsentro kang Jesu-Kristo ug sa tagana sa iyang hingpit tawhanong kinabuhi ingong katugbang nga lukat alang sa katawhan. Pinaagi niana ingong pasukaranan, ang nanghibilin sa mahimayaong katuyoan ni Jehova pinaagi sa Gingharian mopadayon. Nakasabot ka ba sa lukat?

Diha sa Roma kapitulo 5 ug 6, mihatag si Pablo ug maayong katin-awan mahitungod niana. Diha sa Roma 5:12 iyang gipatin-aw ang atong napanunod nga sala ug kamatayon. Siya mipadayon sa pagpakita kon sa unsang paagi ang epekto sa usa lamang ka sala pinaagi sa hingpit nga Adan ug ang pagkawala sa kinabuhi alang sa iyang mga anak matimbangan, pinaagi sa laing hingpit nga tawhanong kinabuhi. Kana nakita nga mao ang kinabuhi sa “tawo si Jesu-Kristo.” (Bersikulo 15-21; tan-awa usab ang 1 Timoteo 2:5, 6.) Nganong makatagana si Jesus niini nga lukat? Sanglit usa man siya ka Anak sa Diyos, si Jesus “maunongon, walay sala, walay buling, linain gikan sa mga makasasala.” (Hebreohanon 7:26; Lucas 1:32, 33) Dili kinahanglang sulayan natong ipatin-aw ang mga detalye sa pagkatawo ni Jesus sa genetikanhong paagi. Gipasaligan sa manulondang si Gabriel ang inahan ni Jesus, si Maria, ug kita, nga walay butang nga imposible sa Diyos. (Lucas 1:37) Busa, si Jesus, bisan ug natawo gikan sa usa ka babaye nga kaliwat ni Adan, mao ang Anak sa Diyos​—sa aktuwal usa ka hingpit nga tawo. Ang iyang dugo, kun kinabuhi, mas bililhon kay sa dugo sa dili-maisip nga mga mananap nga gisakripisyo pinaagi sa mga saserdote sa Israel sa linya ni Aaron diha sa templo sa Jerusalem. Siya mao ang “Kordero sa Diyos nga magakuha sa sala sa kalibotan.”​—Juan 1:29; 3:16.

Ang Diyos ba nakahimog kahikayan pinaagi ni Jesus ug sa gihapon matarong? Kon gibanhaw sa Diyos ang iyang Anak ngadto sa kinabuhi sa ikatulong adlaw, unsay nahitabo sa lukat? Gipasaligan kita ni Pablo nga matarong ang Diyos. Sunda ang iyang pangatarongan: “Sila pagamatarongon pinaagi sa iyang kaluoy ingon nga gasa [sanglit kini libre], pinasikad sa pagkatinubos tungod kang Kristo Jesus. Kay gipadayag siya sa Diyos atubangan sa katilingban nga namatay ingong halad pasig-uli pinaagi sa iyang dugo nga pagadawaton pinaagi sa pagtuo. Kini maoy sa pagpakita sa iyang katarongan (kay sa iyang pagkamainantuson, gisayloan man lamang niya ang kasal-anan nga nangahimo kaniadto)​—sa pagpakita sa iyang katarongan karong panahona, ug sa pagpasundayag nga siya matarong, ug nga siya magamatarong sa mga tawo nga may pagtuo kang Jesus.” (Roma 3:24-26, An American Translation) Karon, unsay kahulogan niana? Sa yano si Jesus, ingong hingpit, unod ug dugo nga tawo, sa tinuod namatay ingong usa ka tawo ug nagpabiling patay ingong tawo sa walay kataposan. Siya namatay “sa makausa ra dihang iyang gihalad ang iyang kaugalingon.” (Hebreohanon 7:27) Busa balido ang lukat. Si Jesus namatay diha sa unod; ug sa ikatulong adlaw siya “gibuhi diha sa espiritu.”​—1 Pedro 3:18.

Ang Bag-ong Pakigtugon ug ang Bag-ong Kalalangan

Karon atong nakita ang pinakapurongpurong sa balaang tinago. Si Jesus sa iyang pagkahimong matinumanon hangtod sa kamatayon nakahimo kaniya nga Labing Hataas nga Saserdote ug Hari ni Jehova. Pinaagi sa iyang giulang dugo iyang nalig-on ang bag-ong pakigtugon. Kining bag-ong pakigtugon maoy sa pagpatunghag langitnong mga kauban nga momando uban ni Jesus ingong mga hari ug mga saserdote. (Pinadayag 5:9, 10; 20:4, 6) Sila nahimong usa ka nasod, “usa ka bag-ong kalalangan,” ug kana tinuod nga hinungdanon!—Galacia 6:15, 16.

Palandonga: Ang Diyos pinaagi ni Kristo Jesus mipili ug mga hawas nga gikan sa katawhan, nga mga lalaki ug mga babaye. Siya sa legal nga paagi makapahayag kanilang matarong ug makatawag kanilang espirituwal nga mga anak. Sa tinudlong panahon sa Diyos inigkamatay nila, iyang banhawon sila ngadto sa langit ug hatagan sila ug imortalidad, sama sa iyang gihatag kang Jesus. (1 Pedro 1:3, 4) Pagkadako sa iyang pagsalig diha sa iyang “bag-ong kalalangan” ug sa ilang pagkamaunongon kaniya! Pagkadako nga tubag kini ngadto sa usa nga bakak nga nagaakusar kanila atubangan kang Jehova! (Pinadayag 12:10) Bisag dili mamatay uban ni Jesu-Kristo, sila dili gayod mahimong di-maunongon kang Jehova. Apan dili lang kana.

Ang Paraisong Yuta

Tinoon ni Kristo Jesus, uban sa iyang kauban langitnong mga hari ug mga saserdote, nga ang katuyoan ni Jehova alang sa tawo ug sa yuta bug-os matuman sa panahon sa iyang Usa ka Libo ka Tuig nga Pagmando. Magapadapat sa mga kaayohan sa lukat, banhawon ni Jesus ang mga patay ug, ug agakon ang mga matinumanon ngadto sa tawhanong kahingpitan uban sa mga makalabang buhi sa kataposan niining daotang sistema. Sa samang panahon, ang yuta himoong paraiso. Ang tanan unya nga mosalikway nianang panahona sa kataposang paningkamot ni Satanas sa pagpadunot kanila hatagan ug hingpit nga tawhanong kinabuhi sa walay kataposan. Si Satanas ug ang iyang daotang mga panon pagalaglagon sa walay kataposan. Ang kalinaw ug panaghiusa molukop sa tanang kalalangan, bug-os nga magabayaw sa pagkasoberano ni Jehova ug sa iyang pagmando pinaagi sa gugma. Ang mga manulonda ug ang mga tawo mopakitag maunongong gugma alang sa ilang Maglalalang ug Diyos.​—Pinadayag, kapitulo 20.

Karon mas nakasabot na kita sa balaang tinago. Karon nakakita na kita sa kaalam sa Diyos nga nagalabaw bisan sa iyang mamugnaong mga desinyo diha sa mga kalibotan sa mga tanom ug sa mga mananap. Kita may maayong katarongan sa pag-ingon: “Oh ang kahilabihan gayod sa kadagaya ug kaalam ug kahibalo sa Diyos! Pagkadili matukib sa iyang mga paghukom . . . Kay gikan kaniya ug pinaagi kaniya ug alang kaniya mao ang tanang mga butang. Kaniya ang himaya hangtod sa kahangtoran. Amen.”—Roma 11:33-36.

[Hulagway sa panid 7]

Ang epekto sa usa ka sala sa hingpit nga Adan ug ang pagkawala sa iyang kinabuhi matimbangan. Sa unsang paagi? Pinaagi sa laing hingpit tawhanong kinabuhi, ang kang Jesus