Mga Pangutana Gikan sa mga Magbabasa
Diha sa Roma 9:3, si apostol Pablo misulat: “Kay palabihon ko pa nga ako mahibulag ingong usa nga tinunglo gikan kang Kristo alang sa akong mga igsoon, sa akong mga paryente sumala sa unod.” Ang iya bang gipasabot nga iyang isakripisyo ang iyang kinabuhi aron luwason ang isigka-Hudiyo?
Gipakita ni Jesus ang kinalabwang panig-ingnan sa gugma. Siya andam sa pagtugyan sa iyang kalag, o kinabuhi, alang sa makasasalang katawhan. Sa panahon sa iyang publikong ministeryo, iyang gisakripisyo ang iyang kaugalingon tungod ug alang sa iyang isigkalungsoranon—mga Hudiyo—aron kutob sa mahimo daghan ang makabatog kaayohan gikan sa iyang halad lukat. (Marcos 6:30-34) Ang ilang di-pagsanong ug pagsupak sa mensahe sa kaluwasan wala magpabugnaw sa mahigugmaong kabalaka ni Jesus alang sa Hudiyohanong katawhan. (Mateo 23:37) Ug siya nagbilin ug ‘usa ka panig-ingnan aron atong sundon ang iyang mga lakang.’—1 Pedro 2:21.
Posible ba nga masundog sa dili-hingpit nga katawhan ang panig-ingnan ni Jesus sa gugma? Oo, ug kita makakita ug usa ka ilustrasyon niini diha kang apostol Pablo. Siya nabalaka kaayo sa mga isigka-Hudiyo nga, tungod sa gugma alang kanila, siya miingon nga palabihon pa niya nga siya “nahibulag ingong usa nga tinunglo gikan kang Kristo” alang kanila.
Didto si Pablo migamit sa pormang hyperbole, o paghingapin, aron masabtan ang iyang punto. Si Jesus migamit ug samang paghingapin diha sa Mateo 5:18, sa dihang siya miingon: “Mahanaw pa ang langit ug ang yuta kay sa mahanaw ang labing gamay nga letra o kudlit sa Kasugoan sa bisan unsang paagi hangtod ang tanan matuman.” Si Jesus nahibalo nga ang langit ug yuta dili mahanaw. Ni mahimong tinunglo si Pablo, ni modawat ang tanang mga Hudiyo sa Kristiyanidad. Apan ang punto ni Pablo mao nga iyang buhaton ang tanan sa pagtabang sa mga Hudiyo nga mapahimuslan nila ang paagi sa Diyos alang sa kaluwasan pinaagi ni Jesu-Kristo. Dili ikahibulong nga si apostol Pablo nakadasig sa mga isigka-Kristohanon: “Magmaawaton kamo kanako, maingon nga ako nagmaawaton kang Kristo”!—1 Corinto 11:1.
Karong adlawa, ang mga Kristohanon angay nga may samang kabalaka alang sa mga dili-magtutuo sama kang Jesus ug Pablo. Dili gayod nato tugotan nga ang kakulang sa interes o pagsupak gikan sa mga tawo diha sa teritoryo nga atong ginasangyawan magpabugnaw sa atong gugma alang sa atong mga silingan ug sa atong kadasig sa pagtabang kanila nga makakat-on sa dalan sa kaluwasan.—Mateo 22:39.