Magbaton ug Nagasakripisyo-sa-Kaugalingon nga Espiritu!

SI Rolfa usa ka bililhong empleyado. Sa dihang siya mihukom sa pagkuhag bahin-panahon nga trabaho aron mapauswag niya ang iyang pagpakig-ambit diha sa Kristohanong ministeryo, ang iyang agalon mikooperar dayon. Sa mga katuigan si Rolf nakaarang sa pagtagamtam sa pag-alagad ingong payunir. Usa ka adlaw, hinuon, ang kahimtang sa trabaho nausab. Si Rolf nakapakita sa iyang kaugalingon nga may katakos gayod sa iyang trabaho nga siya gihanyagan ug posisyon ingong marketing manager sa maong kompaniya. Ang trabaho naglakip sa madanihong suweldo ug maayong kalaoman alang sa dugang pag-uswag. Ugaling, ang bahin-panahon nga trabaho dili na posible.

Si Rolf dunay asawa ug duha ka mga anak nga atimanon, ug ang sobra nga salapi mapuslanon gayod. Bisan pa niana, siya wala modawat sa hanyag ug miaplay alang sa laing trabaho, usa nga motugot kaniya sa pagkab-ot pareho sa iyang espirituwal ug iyang pinansiyal nga mga kaakohan. Ang agalon ni Rolf nahingangha sa iyang desisyon. Nakaamgo nga bisag ang tanyag sa labaw pang suweldo kawang, ang iyang amo nakahinapos: “Nakita ko nga ako dili makadaog sa imong pagtuo.”

Oo, si Rolf dunay pagtuo. Apan siya duna pay laing hiyas​—ang espiritu sa pagsakripisyo-sa-kaugalingon. Ang samang espiritu tagsaon kaayo dinhi sa atong nagatagbaw-sa-kaugalingon nga kalibotan. Apan kini makatultol ngadto sa dalan sa panginabuhi nga makaayo ug makatagbaw. Unsa man ang espiritu sa pagsakripisyo-sa-kaugalingon? Unsa may nalangkit niini? Ug unsay angay natong buhaton sa paghupot niini?

Kinahanglanon sa Bibliya

Ang pagsakripisyo nagkahulogan sa pagdumili o paghatag sa usa ka butang bililhon. Ang sakripisyo nahimong bahin sa putli nga pagsimba sukad ang unang matinud-anong saksi, si Abel, nagtanyag “sa pila ka panganay sa iyang panon” aron ihalad sa Diyos. (Genesis 4:4) Ang mga tawo sa pagtuo, sama nila Noe ug Jacob, mingsunod. (Genesis 8:20; 31:54) Ang paghalad sa hayop usab hinungdanon nga bahin sa Moisesnong Kasugoan. (Levitico 1:2-4) Ubos sa maong Kasugoan, hinuon, ang mga magsisimba giawhag sa pagtanyag sa ilang kinamaayohan. Wala sila tugoti sa pagtanyag ug may-depektong hayop ingong halad. (Levitico 22:19, 20; Deuteronomio 15:21) Sa dihang ang apostatang mga Israelinhon minglapas niining balaora, ang Diyos nagbadlong kanila, nga nag-ingon: “Sa diha nga kamo magatanyag ug piang nga hayop [aron ihalad, kamo moingon]: ‘Kana dili daotan.’ Dalha kana, palihog, sa inyong gobernador. Mahimuot ba siya kaninyo, o kon maayo ba ang pagdawat niya kaninyo? . . . Ako ba mahimuot niana diha sa inyong kamot?”​—Malakias 1:8, 13.

Ang prinsipyo sa halad gidala hangtod sa Kristohanong pagsimba. Ugaling, sanglit kay si Kristo nakabayad sa bug-os nga bili sa lukat, ang mga halad sa hayop dili na dalawaton sa Diyos. Busa, unsa man ang dalawatong halad nga mahimo sa mga Kristohanon? Si Pablo nagsulat diha sa Roma 12:1: “Busa hangyoon ko kamo, mga igsoon, tungod sa mga kaluoy sa Diyos, sa pagtugyan sa inyong mga lawas ingon nga halad nga buhi, balaan ug hinangponon sa Diyos, ang sagradong pag-alagad uban sa inyong gahom sa pangatarongan.” Katingad-anang kausaban! Inay kay mosakripisyog patayng mga lawas, ang mga Kristohanon mohimog usa ka buhing paghalad o sakripisyo sa ilang kaugalingon​—ilang kusog, kahinguhaan, ug mga katakos. Ug susama sa Israel, si Jehova dili modawat ug “piang,” o dili-bug-os-kasingkasing, nga mga halad o sakripisyo. Siya nagabaod nga ang iyang mga magsisimba mohatag kaniyag ilang kinamaayohan, nga sila moalagad kaniya uban sa ilang tibuok kasingkasing, kalag, hunahuna, ug kusog.​—Marcos 12:30.

Ang sakripisyo-sa-kaugalingon nga espiritu sa ingon nagalakip ug labaw pa kay sa yanong pagtahas sa kaugalingon sa eskedyul sa mga tigom ug kalihokan diha sa Kristohanong ministeryo. Kini nagkahulogan sa determinasyon sa pagbuhat sa kabubut-on sa Diyos bisag unsay mahimong bili. Kini nagkahulogan sa pagkahimong andam sa pag-antos sa mga kalisod ug mga kahasol. “Kon ang usa buot mosunod kanako,” matud ni Jesus, “kinahanglan magdumili siya sa iyang kaugalingon ug mopas-an sa iyang kahoy sa pagsakit ug magasunod kanako.” (Mateo 16:24) Ang Kristohanon wala magahimo sa personal nga ambisyon o materyalistikong tumong ingong iyang pangunang interes. Ang iyang kinabuhi nasentro diha sa pagpangita pag-una sa Gingharian sa Diyos ug Iyang pagkamatarong. (Mateo 6:33) Kon kinahanglanon, siya andam sa “pagpas-an sa iyang kahoy sa pagsakit,” moantos sa paglutos, pakaulaw, o bisan kamatayon!

Ang mga Panalangin nga Moabot Gikan sa Pagsakripisyo-sa-Kaugalingon

Kay nagaatubang sa mao ka seryosong mga kalagmitan, ang usa tingali kinaiyanhong maghunahuna kon ang pagsakripisyo-sa-kaugalingon takos ba. Alang nilang nahigugma kang Jehova nga Diyos ug nangandoy sa pagkakita sa iyang ngalan nga gitahod, kini tino gayod. (Mateo 22:37) Hunahunaa ang hingpit nga panig-ingnan nga gibilin ni Jesu-Kristo. Una pa sa pag-anhi sa yuta, siya nagtagamtam ug hataas nga posisyon sa langit ingong usa ka espirituhanong linalang. Ugaling, sama sa iyang giingon sa iyang mga tinun-an, iyang gitinguha ‘dili ang iyang kaugalingon nga kabubut-on, kondili ang kabubut-on sa Diyos, kinsa nagpadala kaniya.’ (Juan 5:30) Busa siya kinabubut-ong “naghaw-as sa iyang kaugalingon ug nagbaton sa kinaiya sa ulipon ug nahisama sa mga tawo. Labaw pa niana, sa dihang iyang nakaplagan nga siya nahisama sa usa ka tawo, siya nagpaubos sa iyang kaugalingon ug nahimong masinugtanon hangtod sa kamatayon, oo, kamatayon diha sa kahoy sa pagsakit.”​—Filipos 2:7, 8.

Ang ingong mga pagsakripisyo wala mapamatud-ing dili mabungahon. Tungod kay si Jesus andam sa “paghatag sa iyang kalag alang sa iyang mga higala,” siya arang makabayad sa bili sa lukat, nga makapaarang sa dili hingpit nga mga tawo sa pagbaton ug imortal nga kinabuhi sa mga langit, o walay kataposang kinabuhi sa yuta. (Juan 3:16; 15:13; 1 Juan 2:2) Pinaagi sa hingpit nga paghupot sa iyang integridad, siya nakapahinabo sa dakong pagdayeg sa ngalan ni Jehova. (Proverbio 27:11) Dili katingad-an nga si Jehova nagpanalangin kaniya tungod sa iyang nagasakripisyo-sa-kaugalingon nga kurso! “Ang Diyos nagbayaw kaniya sa hataas nga katungdanan ug naghatag kaniyag ngalan nga labaw sa tanang ubang ngalan.”​—Filipos 2:9.

Tinuod, si Jesus maoy bugtong Anak sa Diyos. Ang Diyos ba usab magaganti sa uban kinsa magahimog mga sakripisyo alang kaniya? Oo, ug kini gipakita sa daghang mga pananglitan sa karaan ug modernong mga panahon. Hunahunaa ang asoy sa Bibliya mahitungod ni Ruth ang Moabihanon. Siya sa dayag nakakat-on bahin ni Jehova pinaagi sa iyang Israelinhong bana. Pagkatapos sa iyang kamatayon, siya kinahanglan mohimog desisyon. Siya ba magpabilin diha sa paganong yuta nga iyang natawhan, o siya ba mopanaw ngadto sa Yutang Saad uban ang iyang tigulang nga ugangan, si Noemi? Si Ruth nagpili sa ulahi, bisan tuod kadto nagkahulogan sa pagsakripisyo sa panagkauban sa iyang mga ginikanan ug tingali bisan sa kalaoman sa pagminyo pag-usab. Bisan pa niana, si Ruth nakaila kang Jehova, ug ang tinguha sa pagsimba kaniya kauban sa iyang piniling katawhan nakatukmod kaniya sa pagkuyog ni Noemi.

Si Ruth ba gigantihan tungod sa maong pagsakripisyo-sa-kaugalingon? Sa pagkatinuod siya gigantihan! Sa lakaw sa panahon, usa ka yutaan nga ginganlag Boaz nagkuha niya ingong iyang asawa, ug si Ruth nahimong inahan sa usa ka anak lalaki nga ginganlan ug Obed, nga naghimo kaniyang apohan ni Jesu-Kristo.​—Mateo 1:5, 16.

Ang mga panalangin gitagamtam usab sa nagasakripisyo-sa-kaugalingong mga alagad sa Diyos sa modernong panahon. Pananglitan, sa 1923, si William R. Brown, nga mas nailhang “Bible” Brown, mingbiya sa iyang puloy-anan sa West Indies aron pagpanguna sa buluhatong pagwali sa Kasadpang Aprika. Kuyog kaniya ang iyang asawa ug anak babaye. Ngadtongadto siya mibalhin sa Nigeria, diin ang buluhatong pagsangyaw nagsugod pa lamang sa pagpamunga. Kauban sa usa ka itom nga Amerikano nga ginganlan ug Vincent Samuels ug laing Saksi nga taga West Indies nga si Claude Brown, si “Bible” Brown nagdulag importanteng papel sa sayo nga mga yugto sa buluhaton diha sa Kasadpang Aprika.

Karon kapig 187,000 ka mga magmamantala ang nagaalagad sa Sierra Leone, Liberia, Ghana, ug Nigeria, nga mga teritoryong gibuksan ni “Bible” Brown ug sa iyang mga kaubanan. Sa wala pa ang iyang kamatayon niadtong 1967, si “Bible” Brown nag-ingon: “Pagkadakong kalipay sa pagtan-aw sa mga lalaki ug babaye nga mahimong masinugtanon sa maayong balita sa Gingharian sa Diyos!” Oo, siya dagayang gipanalanginan tungod sa iyang kurso sa pagsakripisyo-sa-kaugalingon.

Mga Paagi Aron Magmasakripisyohon-sa-Kaugalingon

Unsa ang pila ka mga paagi nga kita makapakita sa samang espiritu karong adlawa? Ang usa mao ang paghimog regular senemana nga pakig-ambit diha sa balay-ngadto-balay nga ministeryo. (Buhat 20:20) Ang pagbuhat sa ingon, ilabina pagkatapos sa usa ka kapoy nga semana diha sa sekular nga trabaho, lagmit dili sayon. Kini tingali magkinahanglag disiplina ug maayong pag-eskedyul. Apan ang mga kangaya molabaw sa bisag unsang kahasol nga maagoman. Oo, ikaw makapribilehyo sa pagtabang sa uban aron mahimong “usa ka sulat ni Kristo . . . sinulat dili sa tinta apan pinaagi sa espiritu sa buhing Diyos, dili sa mga papan nga bato, kondili diha sa unodnong mga papan, sa mga kasingkasing.”​—2 Corinto 3:3.

Pinaagig maampingong “pagpalit sa kahigayonan,” tingali gikan sa sekular nga trabaho o lulinghayaw, ang pila nakapalambo sa ilang bahin diha sa pagwaling buluhaton. (Efeso 5:16) Daghan naghikay sa ilang mga eskedyul aron makapahimulos sa oksilyare payunir nga pag-alagad sa labing menos makausa sa usa ka tuig. Ang uban nakaarang sa pag-oksilyare payunir nga padayon o pag-alagad ingong regular nga mga payunir. Laing sakripisyo nga pagahunahunaon mao ang pagbalhin ngadto sa mga dapit nga may panginahanglan sa dugang mga magmamantala sa Gingharian. Kini subsob nagalangkit sa dakong mga kausaban sa paagi-sa-pagkinabuhi, pagsagubang sa mga kahasol, pagpahiangay sa bag-ong mga kultura ug kostumbre. Apan ang mga panalangin sa pagbaton ug bug-os nga bahin sa pagtabang sa uban nga makabaton ug kinabuhi nagahimo sa maong mga pagsakripisyo nga takos.

Ang natawo-sa-Canada nga si John Cutforth nakakaplag niini sa personal. Pagkatapos sa iyang graduwasyon gikan sa Watchtower Bible School of Gilead, siya giasayn ingong misyonero sa Australia. “Pagkalayo niana gikan sa balay!” hinumdom ni Brader Cutforth. “Makabalik pa kaha ako sa Canada aron makit-an ang akong ginikanan ug mga higala pag-usab sa dili pa ang Armagedon? Ang paagi lamang sa pagtino niini mao ang pag-adto.” Si Brader Cutforth miadto, ug siya wala magbasol sa mga pagsakripisyo nga iyang gihimo. Sa ulahing mga katuigan siya nagpanguna sa pagpanaksi nga buluhaton sa Papua New Guinea, diin sa gihapon siya nagaalagad nga masiboton, nga nakakompletog 50 ka mga tuig diha sa bug-os-panahong pag-alagad. Makausa siya miingon: “Ang kanunay nga pagtinguha sa pagsunod sa giya ni Jehova, pagdawat bisag unsang asaynment sa iyang panan-aw haom nga ihatag, nagdalag kangaya, kalipay, katagbawan, ug dili-maihap nga mga higala.”

Tinuod, ang mga kahimtang sama sa panglawas, panalapi, ug obligasyon sa pamilya tingali mokuto sa kon unsay imong mahimo; dili tanan makaalagad ingong mga payunir ug misyonero. Bisan pa niana, magmatinguhaon sa pagbaton ug bug-os nga bahin diha sa mga tigom ug diha sa pag-alagad sa kanataran kutob sa maarangan, nga dili motugot sa gagmayng mga kababagan, sama sa dili maayong klima, sa pagpugong kanimo. (Hebreohanon 10:24, 25) Tingali ikaw usab makasakripisyo ug dugang panahon alang sa personal nga pagtuon sa Pulong sa Diyos. Ang pila ka mga pamilya nagbuhat sa ingon pinaagig pagpakunhod sa panahon nga magugol sa pagtan-aw sa mga programa sa TV, tingali sa paghimog usa ka “walay TV” nga gabii matag semana o wala na gayoy TV. Pinaagi sa pagkaplag panahon alang sa personal nga pagtuon, ang “halad sa pagdayeg” diin ikaw “nagahimog publikong pagpahayag sa iyang ngalan” diha sa mga tigom ug pag-alagad sa kanataran maoy labaw tingali nga mahimong usa ka halad o sakripisyo nga taas ug kalidad.​—Hebreohanon 13:15.

Hinumdomi, ang buluhatong pagsangyaw naa na karon sa kataposang ang-ang. Sa dili madugay ang Diyos mopaabot sa iyang paghukom ibabaw niining hakog ug nagatagbaw-sa-kaugalingon nga kalibotan. (Sofonias 2:3) Aron mahuptan ang pag-uyon sa Diyos, kita dili mahimong magpasayon sa atong kaugalingon. Kinahanglang ‘itanyag nato ang atong mga lawas nga usa ka buhing halad, balaan, dalawaton sa Diyos.’ (Roma 12:1) Ang maong espiritu modala ug dakong kalipay ug katagbawan. Kini motabang kanato sa pagkab-ot ug mas dakong kangaya diha sa atong ministeryo. Ug kini makapalipay sa kasingkasing ni Jehova nga Diyos!​—Proverbio 27:11.

Busa hupti ang espiritu sa pagsakripisyo-sa-kaugalingon! Ayaw pag-ukon-ukon sa paghatag sa imong kaugalingon alang sa uban ug sa pagpaluyo sa intereses sa Gingharian. Si Pablo nagtambag: “Ayawg kalimti ang pagbuhat ug maayo ug ang pagpakig-ambit sa mga butang sa uban, tungod sa maong mga halad ang Diyos nahimuot pag-ayo.”​—Hebreohanon 13:16.

[Footnote]

[Hulagway sa panid 26]

Ang pagkaplag ug panahon alang sa personal nga pagtuon ug pag-alagad sa kanataran malagmit molangkit ug pagsakripisyo, apan kini magantihon

[Hulagway sa panid 28]

Si W. R. Brown ug John Cutforth dagayang gipanalanginan tungod sa ilang nagasakripisyo-sa-kaugalingon nga kurso