LEKSIYON 53
Pagpilig Kalingawan nga Makapalipay Kang Jehova
Si Jehova “malipayong Diyos.” (1 Timoteo 1:11) Gusto niya nga magmalipayon ta ug mag-enjoy sa kinabuhi. Malipay siya kon mopahulay ta sa trabaho ug magrelaks. Niini nga leksiyon, atong masayran kon unsaon nato paggamit kana nga panahon sa paagi nga mag-enjoy ta—ug malipay pod si Jehova.
1. Unsay angay natong hinumdoman dihang magpili tag kalingawan?
Unsay ganahan nimong himoon dihang magrelaks ka? Ang uban gusto nga magpuyo lang sa balay—magbasag libro, maminawg musika, magtan-awg salida, o mag-Internet. Ang uban mas gusto nga naay himoon uban sa mga higala—mag-hiking, mangaligog dagat, o magdula. Bisan unsa may atong gusto, kinahanglang seguroon nato nga ang atong piliong kalingawan “dalawaton sa Ginoo.” (Efeso 5:10) Importanteng masabtan nato ni kay daghang kalingawan karon nasagolag mga butang nga gidumtan ni Jehova, sama sa kapintasan, seksuwal nga imoralidad, o espiritismo. (Basaha ang Salmo 11:5.) Unsay makatabang nato sa paghimog maalamong mga desisyon bahin sa atong kalingawan?
Kon mopili tag mga higala nga nahigugma kang Jehova, mahimo silang maayong impluwensiya nato ug sa atong pagpilig kalingawan. Sa milabayng leksiyon, atong nakat-onan nga “ang naglakaw uban sa mga maalamon mahimong maalamon.” Pero kon kanunay tang makig-uban sa mga tawo nga wala mahigugma sa mga sukdanan sa Diyos, kita “masugamak sa kadaot.”—Proverbio 13:20.
2. Nganong importante nga kontrolon nato kon unsa ka daghan ang atong panahon sa kalingawan?
Bisan pag maayo ang kalingawan nga atong gipili, kinahanglang mag-amping ta nga dili sobra ang atong panahon niana. Kay kon dili ta mag-amping, basin wala na kaayo tay panahon sa mas importanteng mga buluhaton. Gidasig ta sa Bibliya nga “gamiton ang [atong] panahon sa kinamaayohang paagi.”—Basaha ang Efeso 5:15, 16.
TUN-IG DUGANG
Sayra kon unsaon paghimog maayong mga desisyon bahin sa imong kalingawan.
3. Likayi ang dili maayong kalingawan
Nganong angay natong piliog maayo ang atong kalingawan? I-play ang VIDEO, ug dayon hisgoti ang mosunod nga mga pangutana:
Nganong ang mga dula sa karaang Roma parehas sa ubang kalingawan karon?
Sa video, unsay nakat-onan ni Danny bahin sa kalingawan?
Basaha ang Roma 12:9, ug dayon hisgoti kini nga pangutana:
Unsay angayng epekto niini nga teksto sa imong pagpilig kalingawan?
Unsa ang mga butang nga gidumtan ni Jehova? Basaha ang Proverbio 6:16, 17 ug Galacia 5:19-21. Human mabasa ang matag teksto, hisgoti kini nga pangutana:
Unsay gihisgotan niini nga teksto nga makita diha sa daghang kalingawan karon?
Kon unsaon pagpilig kalingawan sa maalamong paagi
Pangutan-a ang imong kaugalingon:
Unsa? Naa ba ani nga kalingawan ang mga gidumtan ni Jehova?
Kanus-a? Makakuha ba ni sa panahon nga angay untang gamiton sa mas importanteng mga buluhaton?
Kinsa? Tungod niini, kanunay ba nakong makauban ang mga tawo nga wala mahigugma kang Jehova?
Mas maayo nga likayan nato ang kapeligrohan kutob sa mahimo. Kanay hinungdan nga angay natong likayan ang bisan unsang kalingawan nga atong gidudahan nga dili makahatag natog kaayohan
4. Gamita ang imong panahon sa maalamong paagi
I-play ang VIDEO, ug dayon hisgoti ang mosunod nga pangutana:
Ang brader sa video wala magtan-aw ug bisan unsa nga daotan. Pero unsay nahimo niyang problema?
Basaha ang Filipos 1:10, ug dayon hisgoti kini nga pangutana:
Sa unsang paagi makatabang ni nga teksto sa pagdesisyon kon unsa ka daghan ang atong panahon sa kalingawan?
5. Pagpilig maayo nga kalingawan
Bisan pag ang ubang kalingawan dili makapalipay kang Jehova, naay daghang makalingaw nga butang nga dili makapasuko niya. Basaha ang Ecclesiastes 8:15 ug Filipos 4:8, ug dayon hisgoti kini nga pangutana:
Unsang maayong kalingawan ang imong ganahan?
Puwede kang mag-enjoy sa maayong kalingawan
ANG UBAN MOINGON: “Wala may daotan sa kalingawan nga naay kapintasan, imoralidad, o espiritismo, basta dili lang nimo na himoon.”
Unsay imong isulti?
SUMARYO
Gusto ni Jehova nga mopili tag maayong kalingawan ug mag-enjoy niana.
Review
Unsa nga kalingawan ang angayng likayan sa mga Kristohanon?
Nganong angay tang mag-amping kon unsa ka daghan ang atong panahon sa kalingawan?
Nganong gusto nimong mopili ug kalingawan nga makapalipay kang Jehova?
SUSIHA
Konsideraha kon kang kinsang responsibilidad ang pagpili sa atong kalingawan.
“Gidili ba sa mga Saksi ni Jehova ang Pipila ka Salida, Basahon, o Awit?” (Web article)
Sayra kon unsaon nimo paghimog maayong mga desisyon bahin sa kalingawan.
“Mapuslanon ba ang Imong Kalingawan?” (Ang Bantayanang Torre, Oktubre 15, 2011)
Sa estorya nga “Nabuntog pa Gani Nako ang Akong Pagkamapihigon,” tan-awa kon nganong ang usa ka lalaki naghimog kausaban sa pagpilig kalingawan.
“Ang Bibliya Makabag-o sa Kinabuhi” (Ang Bantayanang Torre, Pebrero 1, 2010)
Tan-awa kon sa unsang paagi ang usa ka inahan mihimog maalamong desisyon bahin sa kalingawan nga naay espiritismo.