Sa Unsang Paagi Makasanong Kita nga Di-Mahakogon sa Gugma sa Diyos?
“Kon ang Diyos nahigugma kanato sa ingon niana, nan kita mismo kinahanglang maghigugmaay sa usag usa.”—1 Juan 4:11.
1, 2. Unsay gikinahanglan aron kita mosanong nga di-mahakogon sa mga pasundayag sa gugma sa Diyos?
SI Jehova mao ang personipikasyon mismo sa gugma. Sa pagkamatuod, sa miaging artikulo, atong nakita nga daghan kaayo ang mga pagpadayag sa iyang gugma. Nasayran usab nato sa unsang paagi si Moises, David, ug si Jesu-Kristo misanong nga di-mahakogon sa maong mga pasundayag sa gugma. Dili ba angay ang matag usa sa mga Saksi ni Jehova magtinguha sa pagbuhat sa sama? Segurado!
2 Unsay gikinahanglan aron kita mosanong nga di-mahakogon sa mga ekspresyon sa gugma sa Diyos? Sa usa ka butang, kinahanglang ihatag nato kaniya ang unang dapit diha sa atong mga kinabuhi, nga maghigugma kaniya uban sa bug-os natong kasingkasing, kalag, hunahuna, ug kusog. (Marcos 12:29, 30) Kana nagkahulogan sa pagkahimong mahiligon sa Diyos, sa pagbatog mainiton personal nga relasyon uban kang Jehova. Gusto ba natong makigsulti sa atong langitnong Amahan diha sa pag-ampo? Kita ba nagaampo sa walay-hunong ug makanunayon sa pag-ampo? O gidalidali ba nato ang atong mga pag-ampo, nga may panahong puliki kaayo nga dili na makaampo? (Roma 12:12; 1 Tesalonica 5:17) Gitumong ba nato ang pagtagad kang Jehova, nga ginahatag kaniya ug sa iyang organisasyon ang dungog alang sa ato tingaling nalampos? (1 Corinto 3:7; 4:7) Sa pagkamatuod, gibati ba nato ang sama sa salmista? Mahitungod sa Diyos, siya miingon: “Makapito sa adlaw gidayeg ko ikaw.”—Salmo 119:164.
3. Sa dihang kita magtapoktapok sa sosyal nga paagi, sa unsang paagi ikapakita nato nga kita nagasanong nga di-mahakogon sa gugma sa Diyos?
3 Kon kaha kita nagasanong nga di-mahakogon sa gugma sa Diyos o wala mahimong ipadayag sa dihang kita magkatapok alang sa paglipaylipay sa sosyal nga paagi. Ang ato bang panagkabildo masentro sa sekular nga mga butang o sa espirituwal nga mga butang? Dili hinuon nga kinahanglang magbatog kitag seryosong pagtuon sa Bibliya kada panahong kita magkatapok uban sa isigka-Kristohanon. Apan tinong makakaplag kitag pila ka makaiikag nga mga butang sa espirituwal nga kinaiya nga ikaapil sa atong kabildohay. Unsa man ang bahin sa pag-asoy sa mga kasinatian sa kanataran, paghisgot sa atong paboritong teksto sa Bibliya, pagsugid sa unsang paagi atong nasayran ang kamatuoran, o paghisgot sa mga ebidensiya bahin sa mahigugmaong pag-atiman ug panalangin sa Diyos?
4. Sa unsang paagi pagaisipon nato ang mga butang kon kita mahiubos kon bahin sa usa ka pribilehiyo sa pag-alagad?
4 Ang laing sirkumstansiya nga tingali magbutyag sa gidak-on sa atong pagpabili sa gugma sa Diyos maoy sa dihang kita masayloan kon bahin sa usa ka pribilehiyo sa pag-alagad diha sa organisasyon ni Jehova. Unsay atong sanong? Kon kita sa panguna mabalak-on sa pagpasidungog kang Jehova, mouyon kita nga lagmit kaayong ang Diyos samang mapasidunggan nga maayo ni bisan kinsa nga nagbaton sa linaing pribilehiyo sa pag-alagad. (Itandi ang Lucas 9:48.) Apan kon kita sobra ka mabalak-on sa atong kaugalingong kaayohan o ngalan, kita maguol nga kita nasayloan, sumala sa ato tingaling gihunahuna. Hinumdoman nato nga si Jehova nahigugma kanato ug tingali nahibalo gani nga sa pagkakaron dili kita makapas-an sa gibug-aton sa usa ka teokratikanhong responsabilidad. Mahimong siya tingali nagapanalangin kanato sa tugob sa ubang mga paagi, ug ang maong mga pagpadayag sa iyang gugma angay magtabang nato sa paghupot sa atong espirituwal nga panimbang.—Proverbio 10:22.
Paghigugma sa Pagkamatarong, Pagdumot sa Pagkadaotan
5. Ang mga pasundayag sa gugma sa Diyos angay magbaton sa unsang epekto diha sa atong kagawian?
5 Ang mga pagpadayag sa gugma sa Diyos nganhi kanato angay magtukmod kanato sa pagsundog kang Kristo sa paghigugma sa pagkamatarong ug pagdumot sa pagkadaotan. (Hebreohanon 1:9) Tinuod, kita dili makahimo niini sa hingpit, sama sa gihimo ni Jesus. Bisan pa niana, mahimong himoon natong tumong nga mahimong balaan, matinud-anon, ug masundanon-sa-balaod kutob sa mahimo diha sa atong dili-hingpit nga kahimtang. Sa paghimo niini, kinahanglang dili lang nato ugmaron ang gugma sa pagkamatarong ug maayong mga butang kondili ugmaron usab ang pagdumot, pag-ayad, pagkagingil-aran, alang sa butang daotan. Sumala sa gipahayag kini ni apostol Pablo: “Kasilagi ninyo ang daotan, gumakos kamo sa maayo.” (Roma 12:9) Ang “kasilagi” maoy grabe kaayong pulong, nga nagkahulogang “pag-isip uban ang labihang pag-ayad.”—Webster’s New Collegiate Dictionary.
6. Unsay motabang kanato sa pagbantay batok sa mga tentasyon nga ihandos sa atong dalan pinaagi sa kalibotan, sa atong makasasalang unod, ug sa Yawa?
6 Unsay motabang kanato sa pagbantay batok sa mga tentasyon nga ihandos sa atong dalan pinaagi sa kalibotan, sa atong makasasalang unod, ug sa Yawa? Pagkamaunongon kang Jehova nga Diyos. Siya nagahangyo kanato: “Magmaalamon ka, anak ko, ug lipaya ang akong kasingkasing, aron matubag ko siya nga nagatamay kanako.” (Proverbio 27:11) Oo, ang pagkamaunongon kang Jehova modasig kanato sa pagsubay sa maalamong dalan sa pagdumot sa iyang gidumtan. Dugang pa, bisan unsa ka makapahimuot o makapaukyab tingali ang paglapas sa usa sa mga kasugoan sa Diyos, kinahanglang padayon natong sultihan ang atong kaugalingon nga ang pagbuhat niana dili gayod takos. (Galacia 6:7, 8) Ang kasingkasing sa tawo maluibon, malalangon, malimbongon, sumala sa gipahinumdoman kanato sa Jeremias 17:9. Ang Kristohanong kasingkasing gustog maayo, matahom, maputling mga butang. Apan usahay ang makasasalang mga hilig mopakiling niini sa pagtinguha usab sa daotan. Sama sa mga kasingkasing sa mga Israelinhon nga nagsimba kang Jehova ug bisan pa niana naghawid sa ilang idolatrosong “hatag-as nga mga dapit,” sa ingon usab ang atong kaugalingong kasingkasing basin hakog ug tuso. (1 Hari 22:43; Deuteronomio 12:2) Ang atong dili-hingpit nga kasingkasing basin mosulay sa pagpangitag mga katarongan sa pagbutang kanato sa dalan sa tentasyon. Basin mosulay kini sa pagpamenos sa kagrabe sa buhat nga daotan nga pinaagi niana gitental kita. O ang atong kasingkasing basin mosulay sa pagkombinsir kanato nga ang bisan unsang silot mao lamay temporaryo.
7. Nganong kinahanglang kita magbantay batok sa pagpangandoy sa daotan?
7 Tungod sa pagpabili sa gugma sa Diyos, kinahanglang magbantay kita batok sa pagpangandoy nianang daotan, sama sa pagkiling ngadto sa seksuwal nga imoralidad, kon kaha kita tagsaanon o minyo. Matag karon ug unya, ang butang nagsugod nga maorag di-makadaot nga pagpaibog misangpot nga ang duha ka Kristohanon nalangkit nga mabination kaayo sa usag usa nga sila nakasala ug napalagpot. Bisan ang mga ansiano, kinsa angay nga mahimong dili-salawayong mga panig-ingnan sa panon, nahidangat sa kasub-anan niining mga butanga!—Itandi ang 1 Hari 15:4, 5.
8. Unsang pasidaan ang ginahatag kanato ni apostol Pablo, ug sa unsang paagi ikailustrar ang maong suliran?
8 Palandonga si apostol Pablo, kinsa gibulahan sa labaw-tawhanong mga panan-awon ug mga gahom ug sa gasa sa balaang inspirasyon. Aron molampos sa iyang pakigbisog batok sa makasasalang mga hilig, kinahanglang iyang pantonon—oo, grabeng pitolon—ang iyang lawas. Mangahas ba kita nga matagbaw sa pagbuhat ug menos niana? (Roma 7:15-25; 1 Corinto 9:27) Kini nahisamag kita anaa sa gamayng baroto diha sa kusog-agos nga suba ug giganoy paingon sa ambakanan niini. Aron masanta ang katalagman, kinahanglang maghago kita sa pagbugsay paibabaw nga sungsongon ang kusog nga sulog. Mahimong dili kita makaabanteg dako, apan samtang magpadayon kita sa pagpanlimbasog, kita dili mahulog sa ambakanan sa tubig ngadto sa atong kalaglagan. Sa pagkamatuod, ang mga pagpadayag sa gugma ni Jehova nga Diyos nganhi kanato angay magpahinabo nga kita manlimbasog pag-ayo nga magmaunongon kaniya pinaagi sa pagdumot sa pagkamalapason ug paghigugma sa pagkamatarong.
Ipasundayag ang Inigsoong Gugma
9. Unsang tambag ang gihatag ni apostol Juan kon bahin sa paghigugma sa atong mga igsoon?
9 Ang mga pagpadayag sa gugma sa Diyos angay magtukmod kanato sa paghigugma sa atong mga igsoon sama nga gihigugma ni Jesu-Kristo ang iyang mga tinun-an. (Juan 13:1) Labing haom, si apostol Juan miingon: “Ang gugma maoy niining bahina, dili nga kita nahigugma sa Diyos, kondili nga siya nahigugma kanato ug nagpadala sa iyang Anak nga halad-pasig-uli alang sa atong mga sala. Mga hinigugma, kon ang Diyos nahigugma kanato sa ingon niana, nan kinahanglang kita maghigugmaay sa usag usa.” (1 Juan 4:10, 11) Sa pagkamatuod, si Jesus miingon nga ang paagi nga mailhan ang iyang matuod nga mga sumusunod maoy pinaagi sa gugmang ilang nabatonan sa ilang taliwala.—Juan 13:34, 35.
10, 11. Unsa ang pipila sa mga paagi diin kita makapasundayag sa inigsoong gugma?
10 Kita nahibalo nga ang mga Kristohanon angay magpakitag inigsoong gugma. Apan dili sayop ang pagpahinumdom sa atong kaugalingon sa lainlaing mga paagi diin kita makapakita niining samag-Kristong gugma sa usag usa. Ang maong gugma motabang nato sa dili pagtagad sa mga kalainan kon bahin sa rasa, nasyonalidad, edukasyon, kultura, ug kahimtang sa pangabuhi. Dugang pa, ang inigsoong gugma motukmod kanato sa pagpakigtigom. Kon tinuod natong gihigugma ang atong mga igsoon, dili nato itugot nga ang ngil-ad nga panahon o ginagmayng mga sakitsakit maghikaw kanato sa kalipay sa pagpakig-uban kanila ug pag-ambit sa bayloanay sa pagdasig. (Roma 1:11, 12) Labaw pa niana, ang inigsoong gugma mohimo kanato nga mangandam pag-ayo alang sa atong mga tigom ug magbatog aktibong bahin diha niana aron kita makadinasigay sa usag usa ngadto sa gugma ug maayong mga buhat.—Hebreohanon 10:23-25.
11 Komosta ang pagtabang sa atong mga igsoon diha sa ministeryo sa kanataran? Napanid-an nga ang mga ansiano ug ministeryal nga mga alagad kasagarang moambit sa balay-balay nga ministeryo uban sa usag usa o sa ilang kaugalingon sa dihang sila makahimo, uban ang diyutayng pagplano, makaimbitar sa mga magmamantala sa Gingharian nga magkinahanglag tabang sa ministeryo nga mokuyog kanila. Ang pagpakitag gugma niining paagiha mohimo sa pag-alagad sa kanataran sa mga ansiano ug sa ministeryal nga mga alagad nga dobleng magantihon. Ug unsa man ang pagdala sa usa ka bag-ong magmamantala sa usa ka pagtuon sa Bibliya sa balay?—Roma 15:1, 2.
12. Unsaon nato pagsabot ang 1 Juan 3:16-18?
12 Ang gugma mopahinabo usab nga kita motabang sa atong mga igsoon nga tingali anaa sa tinuod materyal nga kawalad-on. Si apostol Juan misulat: “Pinaagi niini kita nakaila sa gugma, tungod kay siya mitugyan sa iyang kalag alang kanato; ug kita kinahanglang magtugyan sa atong mga kalag alang sa atong mga igsoon. Apan si bisan kinsa nga nakabaton sa pangabuhian niining kalibotana ug nakakita sa iyang igsoon nga anaa sa kawalad-on ug bisan pa niana magatak-op sa pultahan sa iyang mga kaluoy diha kaniya, sa unsang paagi ang gugma sa Diyos magpabilin diha kaniya? Gagmay nga mga anak, maghigugma kita, dili sa pulong o sa dila, kondili sa buhat ug sa kamatuoran.” (1 Juan 3:16-18) Kita karon tingali dili hangyoon sa pagtugyan sa atong mga kalag alang kanila, apan usahay kita may kahigayonan sa pagpahayag ug gugma kanila sa ubang mga paagi, dili lamang sa pulong o sa dila kondili sa mga buhat usab. Walay daotan sa paghigugma sa atong mga igsoon sa pulong, apan dili nato buot limitihan ang atong gugma niini sa dihang sila nanginahanglan ug materyal nga mga butang. Ang pamulong ni Jesus nga “adunay labaw nga kalipay sa paghatag kay sa pagdawat” mapadapat usab sa pagtaganag materyal nga tabang.—Buhat 20:35.
13. (a) Unsa ang pipila sa paninugdang mga kamatuoran nga atong nakat-onan sa tabang sa makitang organisasyon ni Jehova? (b) Unsang angay nga punto ang gipahayag ni Charles Taze Russell?
13 Kita may higayon sa pagpakitag gugma alang sa atong mga igsoon nga nagapanguna sa kongregasyon o maylabot sa makitang organisasyon ni Jehova sa tibuok kalibotan. Kini nagaapil sa pagkamaunongon ngadto sa “matinumanon ug maalamong ulipon.” (Mateo 24:45-47) Atubangon nato ang kamatuoran nga bisan kon kapila nato basaha ang Bibliya, kita dili gayod makakat-on sa kamatuoran sa atong kaugalingon. Dili unta nato hisayran ang kamatuoran bahin kang Jehova, iyang mga katuyoan ug mga hiyas, kahulogan ug kahinungdanon sa iyang ngalan, sa iyang Gingharian, sa lukat ni Jesus, sa kalainan tali sa organisasyon sa Diyos ug kang Satanas, ni kon nganong gitugotan sa Diyos ang pagkadaotan. Kini sumala gayod sa gisulat sa unang presidente sa Watch Tower Society, si Charles Taze Russell, niadtong 1914: “Dili ba kita bulahan, malipayon nga katawhan? Dili ba matinumanon man ang atong Diyos? Kon adunay usa nga may nahibaloang mas maayo pa, ipadawat kana niya. Kon may si bisan kinsa kaninyo nga nakakaplag ug butang mas maayo, nagalaom kami nga isulti niya kana kanamo. Kami walay butang nga nasayran nga mas maayo ni katunga ang pagkamaayo kay sa among nakaplagan diha sa Pulong sa Diyos. . . . Walay dila o pluma ang makapahayag sa kalinaw, sa kalipay ug panalangin nga gidala sa tin-awng kahibalo sa matuod nga Diyos nganhi sa among kasingkasing ug kinabuhi. Ang Estorya sa Kaalam, Hustisya, Gahom ug Gugma sa Diyos bug-os nagatagbaw sa mga pangandoy sa among ulo ug among kasingkasing. Dili na kami modugang sa pagpangita. Wala nay labaw nga tinguhaon kay sa pagtisok nga mas tin-aw niining kahibulongang Estorya diha sa among alimpatakan.” (The Watch Tower, Disyembre 15, 1914, mga panid 377-8) Pagkatinuod nianang mga pulonga nga maayong pagkasulat!
Pag-alagad sa mga Tagagawas
14. Sa unsang paagi magatukmod kanato sa paglihok ang mga ekspresyon sa gugma sa Diyos kon bahin sa mga tagagawas?
14 Ang mga ekspresyon sa gugma sa Diyos nga atong natagamtam angay magtukmod nato sa pagpakitag sinilingang gugma ngadto sa mga tagagawas sa kongregasyon. Sa unsang paagi atong mahimo kini? Ang mga kahimtang tingali magpaila nga kita makatabang sa atong mga silingan sa materyal nga paagi. Apan labi pang hinungdanon, kita makapakitag gugma sa silingan pinaagi sa pagdala sa uban sa maayong balita sa Gingharian sa Diyos ug pagbulig sa mga nahigugma sa pagkamatarong nga mahimong mga tinun-an ni Jesu-Kristo. Kita ba regular nga nagaapil niining publikong ministeryo, o kita ba nagapabaya niini? Kini ba nahimong naandan o basta lamang nga matang sa pag-alagad? O kita ba gitukmod gayod sa sinilingang gugma? Ginapadayag ba nato ang empatiya? Kita ba mapailobon, nga nagahulat nga mosanong ang mga tawo? Ginadasig ba nato ang mga tagbalay sa pagpahayag sa ilang kaugalingon? Oo, inay sa paghimo sa tanang estorya, itugot nato nga tungod sa gugma sa silingan kita matukmod sa pagpamati ug pagbatog magantihong mga panaghisgot sa Bibliya uban sa mga tawong atong mahibalag sa atong ministeryo.
15. (a) Nganong ang “dili-pormal nga pagsangyaw” usa ka mas maayong termino kay sa “insidental nga pagsangyaw”? (b) Nganong pahimuslan ang kahigayonan sa pagsangyaw sa dili-pormal nga paagi?
15 Kita ba listo nga mopahimulos sa kahigayonan sa pagsangyaw sa dili-pormal nga paagi? Pagamatikdan nga kini dili lang insidental nga pagsangyaw, nga magapasabot sa buluhaton nga wala planoha o dili kaayo hinungdanon. Ang dili-pormal nga pagsangyaw hinungdanon kaayo, ug ang gugma sa isigkatawo magtukmod kanato nga mangitag kahigayonan sa pag-ambit niana. Kasagaran nga mabungahon kaayo ang maong pagsangyaw! Pananglitan, samtang nagtambong sa usa ka kombensiyon sa mga Saksi ni Jehova sa amihanang Italya, ang usa ka igsoon miadto sa usa ka garahe aron magpapuli sa usa ka suga sa kotse sa atubangan. Samtang nagpaabot, siya nagsangyaw ngadto niadtong diha sa duol niya ug gihatagan silag handbills nga nagdapit kanila sa pakigpulong sa publiko sa Bibliya sa Dominggo. Sa usa ka internasyonal nga kombensiyon sa Roma usa ka tuig sa ulahi, ang usa ka igsoon nga wala niya hiilhi mitimbaya kaniyang madasigon. Kinsa ba kadtong igsoona? Ay, siya usa niadtong mga tawo nga iyang gihatagag handbill didto sa garahe usa ka tuig nga miagi! Ang tawo mitambong aron mamati sa pakigpulong publiko ug naghatag sa iyang ngalan alang sa pagtuon sa Bibliya. Karon siya ug ang iyang asawa maoy dedikadong mga Saksi ni Jehova. Walay pagduhaduha nga ang dili-pormal nga pagsangyaw mahimong magantihon kaayo!
Magpadayon sa Pagsanong sa Gugma sa Diyos
16. Unsang mga pangutana ang angay isukna nato sa atong kaugalingon?
16 Si Jehova tinuod nga madagayaon sa pagpadayag sa gugma alang sa iyang mga linalang. Sumala sa ato nang napahayag, ang Kasulatan nagahatag kanatog maayong mga panig-ingnan niadtong misanong nga di-mahakogon sa mga pagpadayag sa gugma sa Diyos. Labing haom, ang dinasig nga salmista mipatugbaw: “Oh magpasalamat unta ang katawhan kang Jehova tungod sa iyang mahigugmaong-kalulot ug tungod sa iyang katingalahang mga buhat alang sa mga anak sa mga tawo.” (Salmo 107:8, 15, 21, 31) Mangahas ba kita sa pagdawat sa dili-takos nga kalulot sa Diyos ug sayloan ang katuyoan niini? Dili gayod unta kana mahitabo! (2 Corinto 6:1) Busa ang matag usa kanato angay mangutana sa atong kaugalingon: ‘Tinuod ko bang gipabilhan ang mga ekspresyon sa gugma sa Diyos nga ako nang gipahimuslan ug masaligong gilaoman nga mapahimuslan sa dugang pa sa umaabot? Kini ba nagatukmod kanako sa paghigugma kang Jehova uban sa tibuok kong kasingkasing, hunahuna, ug kusog? Ako ba tinuod nga mahiligon sa Diyos? Gihigugma ko ba ang pagkamatarong ug gidumtan ang pagkadaotan? Gipakita ko ba ang inigsoong gugma? Ug unsa ka suod ako naningkamot sa pagsunod sa mga lakang ni Jesus kon bahin sa akong ministeryo?’
17. Unsay mosangpot kon kita mosanong nga di-mahakogon sa mga pasundayag sa gugma ni Jehova nga Diyos?
17 Sa pagkamatuod, adunay daghang paagi sa pagpakita sa atong tim-os nga pagpasalamat sa tanang pagpadayag sa gugma sa Diyos nga atong nasinati. Pinaagi sa pagpahimulos sa bug-os sa kahigayonan sa pagpasundayag sa maong pagpabili, kita makalipay sa kasingkasing sa atong langitnong Amahan, mahimong panalangin sa uban, ug makadawat sa kalipay, kalinaw, ug katagbawan sa atong kaugalingon. Busa hinaot kita mopadayon sa pagsanong nga di-mahakogon sa mga pasundayag sa gugma sa Diyos?
Unsay Imong Tubag?
◻ Unsay gikinahanglan sa pagsanong nga di-mahakogon sa gugma sa Diyos?
◻ Sa unsang paagi kita makabantay batok sa mga tentasyon?
◻ Unsa ang pila ka paagi sa pagpakitag inigsoong gugma?
◻ Sa unsang paagi matukmod kita sa paglihok ngadto sa atong mga silingan sa mga pasundayag sa gugma ni Jehova?
[Hulagway sa panid 17]
Kinahanglang manlimbasog kita batok sa makasasalang mga hilig aron malikayan ang katalagman
[Hulagway sa panid 18]
Ang mga ansiano nagapakitag inigsoong gugma pinaagi sa pagkuyog sa uban diha sa ministeryo sa Gingharian
[Hulagway sa panid 19]
Si Charles Taze Russell, ang unang presidente sa Watch Tower Society, miawhag sa pagtagad sa kalinaw, kalipay, ug panalangin nga ikatagana lamang sa Diyos