Roma 12:12—“Paglipay Kamo Diha sa Paglaom, Pailob Diha sa Kasakitan, Pag-ampo Kanunay”

“Paglipay tungod sa paglaom. Lahutay sa kasakitan. Ayawg hunong sa pag-ampo.”—Roma 12:12, Bag-ong Kalibotang Hubad.

“Paglipay kamo diha sa paglaom, pailob diha sa kasakitan, pag-ampo kanunay.”—Roma 12:12, Ang Biblia, 2011.

Kahulogan sa Roma 12:12

Niini nga teksto, gidasig ni apostol Pablo ang mga Kristohanon sa Roma nga himoon ang tulo ka butang nga makatabang nila nga magpabiling matinumanon bisan pa sa paglutos ug ubang kalisdanan.

“Paglipay tungod sa paglaom.” Ang mga Kristohanon dunay nindot kaayong paglaom nga mabuhi sa walay kataposan—ang uban didto sa langit ug ang kadaghanan sa paraisong yuta. (Salmo 37:29; Juan 3:16; Pinadayag 14:1-4; 21:3, 4) Apil niini nga paglaom ang pagkakita nga sulbaron sa Gingharian sa Diyosa ang tanang problema nga giantos sa mga tawo. (Daniel 2:44; Mateo 6:10) Ang mga magsisimba sa Diyos puwedeng maglipay bisan pa sa mga kalisdanan, kay kombinsido sila nga segurado ang ilang paglaom ug uyonan sila sa Diyos kon molahutay sila.—Mateo 5:11, 12; Roma 5:3-5.

“Lahutay sa kasakitan.” Sa Bibliya, ang Gregong pulong nga gihubad ug “lahutay” sagad nagkahulogang “magpabilin imbes moikyas; magpadayon; magpabiling lig-on.” Ang mga sumusunod sa Kristo ‘dili bahin sa kalibotan,’b busa nahibalo sila nga lutoson sila ug kinahanglang molahutay. (Juan 15:18-20; 2 Timoteo 3:12) Kon ang usa ka Kristohanon magmatinumanon sa Diyos bisan pag kinahanglan siyang molahutay sa mga pagsulay, mas molig-on ang iyang pagtuo nga gantihan siya sa Diyos. (Mateo 24:13) Tungod sa iyang lig-ong pagtuo, malahutay niya ang mga kalisdanan uban ang pailob ug kalipay.—Colosas 1:11.

“Ayawg hunong sa pag-ampo.” Aron makapabiling matinumanon sa Diyos, ang mga Kristohanon kanunayng gidasig nga magpadayon sa pag-ampo. (Lucas 11:9; 18:1) Kanunay silang nagpagiya sa Diyos ug nagsalig kaniya sa tanan nilang ginahimo. (Colosas 4:2; 1 Tesalonica 5:17) Kombinsido sila nga tubagon sa Diyos ang ilang mga hangyo kay gituman nila ang iyang mga sugo ug gibuhat ang ilang maarangan aron mapalipay siya. (1 Juan 3:22; 5:14) Nahibalo sab sila nga kon dili sila mohunong sa pag-ampo, hatagan sila sa Diyos ug kusog nga ilang gikinahanglan aron makapabiling matinumanon bisan unsa mang pagsulay ang ilang maatubang.—Filipos 4:13.

Konteksto sa Roma 12:12

Gihimo ni Pablo ang iyang sulat ngadto sa mga Kristohanon nga nagpuyo sa Roma niadtong mga 56 C.E. Sa kapitulo 12 niini nga sulat, naghatag siyag praktikal nga tambag kon unsaon pagpakitag Kristohanong mga hiyas, kon unsaon pagpakiglabot sa mga isigkamagtutuo ug sa uban, ug kon sa unsang paagi makapabiling makigdaiton dihang lutoson. (Roma 12:9-21) Gikinahanglan gyod ni nga tambag sa mga Kristohanon sa Roma kay sa dili madugay makasinati silag grabeng pagsupak.

Mga pipila ka tuig sa ulahi, niadtong 64 C.E., dihay nahitabong dakong sunog sa siyudad sa Roma. Daghan ang nag-ingon nga si Emperador Nero ang hinungdan niini. Sumala kang Tacitus, usa ka Romanong historyano, gipasanginlan ni Nero ang mga Kristohanon nga silay hinungdan sa sunog aron maprotektahan ang iyang kaugalingon. Tungod niini, grabeng gilutos ang mga Kristohanon. Ang tambag ni Pablo kon unsaon paglahutay sa paglutos nakatabang nila sa pag-atubang sa maong lisod nga panahon nga may pagtuo ug dignidad. (1 Tesalonica 5:15; 1 Pedro 3:9) Daghag makat-onan ang mga magsisimba sa Diyos karon sa ilang maayong ehemplo.

Tan-awa kining mubo nga video nga nagsumaryo sa basahon sa Roma.