Mga Magmamantala sa Gingharian Nagtaho
Nagtunghang-Kabataan sa Nigeria Gipanalanginan Tungod sa Pagkamatinumanon
ANG apostol nga si Pablo nagsulat: “Kon mahimo, sumala sa inyong takos maarangan, kinahanglan magdinaitay kamo uban sa tanang tawo.” (Roma 12:18) Ang nagtunghang-kabataan sa mga Saksi ni Jehova sa Nigeria nagpadapat niining tambag, bisan pag gilutos. Ingong sangpotanan, gipanalanginan sila ni Jehova.
◻ Usa ka magtutudlo wala gayod makaangay sa mga Saksi ni Jehova. Sa panahon sa panagtigom usa ka buntag, iyang gitawag ang tanang mga Saksi sa atubangan ug gimandoan sila sa pag-awit sa nasodnong awit. Sila nagdumili, nag-ingon nga buot nilang mohatag ug bug-os nga debosyon sa Diyos. Unya ang magtutudlo nagdala kanilang tanan sa gawas ug gisugo sila sa paglampas ug sagbot. Kasamtangan, ang ubang mga estudyante nagpadayon sa ilang mga klase.
Usa ka hamtong nga Saksi nagdala sa brosyur nga School and Jehovah’s Witnesses sa magtutudlo, nagsaysay sa neyutral nga baroganan sa mga Saksi ni Jehova. Ugaling, ang magtutudlo nagdumili sa paghisgot sa butang o sa pagdawat sa brosyur. Gani, dihadiha iya pang gidugangan ang silot sa mga bata.
Ang batan-ong mga Saksi nagpadayon sa pag-antos niining silot ug naglampas sa mga sagbot bisag wala diha ang magtutudlo. Usa ka adlaw ang magtutudlo nagtago ug gibantayan sila nga wala mamatikdi samtang sila nagpadayon sa pagtrabaho ug pag-awit sa mga awitonon sa Gingharian. Siya nakadayeg pag-ayo nga iya silang gipasulod sa klase, nagpahayag ug kahingangha sa ilang tinamdan. Unsay resulta? Ang magtutudlo karon nagtuon nag Bibliya uban sa mga Saksi ni Jehova!
Sa pagkamatuod kining mga nagtunghang-kabataan gipanalanginan tungod sa ilang pagkamatinumanon kang Jehova ug sa iyang mga prinsipyo.—Proverbio 10:22.
◻ Si Ruth ug iyang mga higala gipanalanginan usab tungod sa ilang pagkamatinumanon sa mga kinahanglanon ni Jehova nga magpabiling “dili bahin sa kalibotan.” (Juan 17:16) Si Ruth, nga 18, nagsugod sa pagpayunir sa dihang siya 12. Siya ug ubang mga Saksi nakasugamak ug pagsupak gikan sa mga sakop sa magtutudlo sa eskuylahan tungod sa pagdumili sa pag-awit sa nasodnong awitonon. Usa ka magtutudlo mihangyo sa pagpakigkita sa mga ginikanan sa mga babaye. Human nila ipatin-aw, ginamit ang School brosyur, ang magtutudlo natagbaw ug wala na magsamok sa dugang.
Usa ka adlaw, hinuon, usa ka magtutudlo gikan sa India nag-insulto ug nagsilot sa usa sa mga batang babaye sa atubangan sa klase sa dihang ang batang babaye wala moawit sa nasodnong awitonon. Ang batang babaye maisogong nagpanalipod sa iyang pagtuo ug ang magtutudlo nagdala kaniya sa atubangan sa prinsipal sa eskuylahan. Sa dihang sila nakaabot didto, ang batan-ong Saksi nakadiskobre nga ang luyoluyong-prinsipal presente usab. Sa iyang tumang kakurat, ang prinsipal ug ang luyoluyong-prinsipal nagsugod ug pangatawa. Miliso sa magtutudlo, ang prinsipal nag-ingon: “Ginang, ayaw pagkabalaka sa imong kaugalingon mahitungod ning mga bataa. Bisan pag patyon nimo na sila, mosugot na silang mamatay kaysa moawit. Wala ka ba makadungog mahitungod nila?” Unya siya ug ang iyang luyo-luyo naghisgot bahin sa pagtuo ug kaisog sa mga Saksi ni Jehova. Nga misulti ngadto sa batang babaye, ang prinsipal miingon nga siya nasubo tungod sa kaulawan nga naagoman. Unya siya midugang: “Padayon sa imong buhat sa pagtuo. Ako nakadayeg sa inyong relihiyon ug sa inyong maisogong baroganan pareho sa gawas ug sa sulod sa eskuylahan.” Sa ulahi, ang magtutudlo nga misupak nangayog pasaylo sa Saksi, nag-ingon nga siya karon nakasabot sa neyutral nga baroganan sa mga Saksi.
Kining mga kabataan nagsunod sa panig-ingnan sa tulo ka Hebreohanon nga wala magbungkag sa ilang integridad sa Diyos pinaagig pagyukbo sa imahen, ug usab kang Daniel, nga wala mohunong sa pag-ampo kang Jehova. Kining mga tawhana gipanalanginan ni Jehova tungod kay sila matinumanon sa matarong nga mga balaod sa Diyos.—Daniel, mga kapitulo 3 ug 6.