Mga Batan-on Nangutana . . 

Sa Unsang Paagi Ako Mahimong Higala sa Diyos?

“PAGKAMAUNONGON.” “Personal nga pagkamahinalaron.” Mao kini ang mga pulong nga subsob gigamit sa pagbatbat sa ilang relasyon ngadto sa ilang labing suod nga mga higala. Nasayod ka ba nga kining mga pulonga mahimong maghubit usab sa usa ka relasyon ngadto sa Dakong Maglalalang niining makalilisang nga uniberso​—nga ang Diyos mismo mahimong imong personal nga higala? Oo, ang Bibliya naghisgot bahin sa pagbaton ug diyosnong pagkamahinalaron, ug kana nga ekspresyon naglakip dili lamang sa pagkamasinundanon kondili sa personal nga relasyon sa Diyos, usa ka panagsuod nga nagsumikad sa usa ka mapabilhong kasingkasing.

Ang unang mga artikulo niining maong serye nagpakita nga ang maong relasyon parehong posible ug makaayo.a Apan sa unsang paagi ba nga makab-ot nimo kining personal nga pakighigala sa Diyos? Dili kini dala sa pagkatawo o awtomatikong mapanunod nimo gikan sa diyosnong mga ginikanan. Hinunoa, kini usa ka relasyon nga mosangpot lamang pinaagi sa tiunay nga paningkamot. Giingnan ni apostol Pablo ang batan-ong si Timoteo nga ‘bansayon ang kaugalingon nga maoy tumong ang diyosnong pagkamahinalaron.’ Oo, kinahanglan siyang maningkamot sama sa pagpaningkamot sa usa ka atleta diha sa pagbansay! (1 Timoteo 4:7, 8, 10) Kinahanglang buhaton nimo ang susama aron mahimo nimong higala ang Diyos. Apan sa unsang paagi makasugod ka sa pagbansay niining bahina?

Personal nga Kahibalo sa Diyos

Sanglit ang diyosnong pagkamahinalaron nagsumikad sa kasingkasing, kinahanglang pun-on nimo ang imong kasingkasing sa kahibalo sa Diyos. Ikasubo, sa dihang kapin sa 500 ka batan-on ang gipangutana nga “Unsa ka subsob nga ikaw nagbasa sa Bibliya nga nag-inusara?” 87 porsiyento ang miingon nga “usahay,” “panagsa ra,” o “wala gayod.” Kadaghanang batan-on dayag nga naghunahuna nga ang pagbasa sa Bibliya dili-makaiikag ug makalaay. Apan dili kinahanglang maingon niana! Hunahunaa: Nganong ang pipila ka batan-on nagmemorya sa tanang matang sa estadistika sa esports o nakahibalo sa mga liriko sa ilang paboritong mga awit? Tungod kay sila interesado sa maong mga butang. Sa susama, ang pagtuon sa Bibliya mahimong makaiikag kon ikaw malingaw niana. (1 Timoteo 4:15) Si apostol Pedro nag-awhag: “Ugmara ang pagpangandoy sa walay-sambog nga gatas nga iya sa pulong.” (1 Pedro 2:2) Oo, kinahanglang ugmaron nimo, o palamboon, ang maong interes sa Kasulatan. Tingali nagkinahanglan kini ug paningkamot, apan ang mga ganti takos niana.b

Sa usa ka bahin, ang pagbasa ug pagtuon sa Pulong sa Diyos ug sa binase-sa-Bibliya nga mga publikasyon magpadayag “sa katahom ni Jehova.” (Salmo 27:4) Usa ka batan-ong Kristohanon nga ginganlag Amber naghimong iyang tumong nga mabasa ang tibuok Bibliya. Kini gidangtag duolan sa usa ka tuig. “Walay daghang butang sa akong kinabuhi nga nagkinahanglan ug daghan kaayong panahon ug paningkamot apan nagdala ug daghan kaayong ganti,” misaysay ni Amber. “Sa dihang nagbasa ako niana, akong gibati nga daw si Jehova nagsabak kanako sama sa usa ka amahan ug nagtudlo kanako. Daghan kaayo akog nakat-onan mahitungod kang Jehova​—mga butang nga mas nagpasuod nako kaniya ug nagtukmod kanako sa pagkahadlok kaniya sa akong tibuok kinabuhi.”

Sa dihang basahon nimo ang Bibliya, imong mahibaloan ang daghang panahon nga ang Diyos maunongong nagpaluyo sa iyang mga higala. (Salmo 18:25; 27:10) Imong madiskobrehan nga ang iyang mga sukdanan kanunay nga maoy labing maayo ug alang sa atong dumalayong kaayohan. (Isaias 48:17) Ang pagbasa mahitungod sa walay-ikatanding mga hiyas sa Diyos, sama sa iyang gugma ug kaalam, mag-inspirar kanimo nga magtinguha sa pagsundog kaniya. (Efeso 5:1) Apan aron ang maong impormasyon mopalihok sa imong kasingkasing, kinahanglan usab nimong mamalandong. Samtang ikaw magabasa, pangutan-a ang imong kaugalingon: ‘Unsay gisulti niini kanako mahitungod kang Jehova? Sa unsang paagi ikapadapat nako kini sa akong hunahuna ug mga kalihokan? Sa unsang paagi gipakita niini nga ang Diyos maoy labing maayong higala nga akong mabatonan sukad?’

Ang kahibalo nga imong mabatonan bahin sa Diyos pinaagi sa personal ug kongregasyonal nga pagtuon motabang kanimo sa pagkahimong mas suod kaniya sa laing paagi. Usa ka Pranses nga panultihon nag-ingon: “Sila maoy tinuod nga mga higala kon sila managsamag hunahuna.” Apan sa unsang paagi ikaw mahimong “managsamag hunahuna” sa Diyos? Ang batan-ong si Denise misaysay: “Kon magsige ka ug tuon ug magdukiduki sa usa ka ulohan, labi pa nimong mahibaloan ang panglantaw ni Jehova niana. Makatabang kon ikaw masayod kon unsay iyang pagbati sa usa ka butang.”

Matul-id nga Panggawi Hinungdanon

Ang Diyos nagpili nga iyang mga higala kadto lamang nagtahod sa iyang moral nga mga sukdanan. “Ang iyang pakigsuod maoy uban sa mga tawong matul-id,” nag-ingon ang Proverbio 3:32. Ang usa ka batan-on nga naningkamot nga mahimong matul-id “manglimbasog sa paglakaw diha sa balaod ni Jehova.” (2 Hari 10:31) Mahimong unsa ka suod ngadto sa Diyos ang usa ka tawo nga adunay ingong masinundanong panggawi? Si Jesu-Kristo miingon: “Higugmaon siya sa akong Amahan, ug kita mangadto kaniya ug magapuyo uban kaniya.” (Juan 14:21-24) Pagkamakapadasig nga larawan! Tiaw mo kana, ang duha ka labing bantogang tawo sa uniberso kanunayng naghunahuna ug nag-atiman sa usa ka tawo! Kana mahitabo kanimo kon ikaw manglimbasog sa paglakaw diha sa balaod ni Jehova.

Ang pagkahimong matul-id nagkahulogan ba nga kinahanglang magmahingpit ka? Dili gayod! Ang paghimog sayop tungod sa kahuyangan wala magkahulogan nga imong gibiyaan ‘ang dalan sa mga sugo sa Diyos.’ (Salmo 119:35) Hunahunaa kon unsay giingon sa Bibliya kanato mahitungod kang Haring David. Bisan pag maunongong higala sa Diyos, siya nakahimog seryosong mga sala tungod sa kahuyangan. Bisan pa niana, si Jehova miingon nga siya naglakaw “uban ang integridad sa kasingkasing ug uban sa katul-id.” (1 Hari 9:4) Si Haring David kanunayng nagpakita ug kinasingkasing nga paghinulsol sa bisan unsang kasaypanan nga iyang nahimo ug naningkamot sa pagbuhat kon unsay makapahimuot sa Diyos.​—Salmo 51:1-4.

Bisan tuod si David nahigugma sa Diyos, siya nahibalo kon unsa ka lisod usahay ang paghimo sa hustong butang. Mao nga siya nangaliyupo sa Diyos: “Palakwa ako sa imong kamatuoran.” Oo, siya nakaugmad ug sinserong kalisang, o kahadlok, nga makapasuko sa Diyos. Busa si David makaingon: “Ang pakigsuod ni Jehova anaa kanila nga nahadlok kaniya.” (Salmo 25:5, 14) Dili kini makadaot nga kahadlok kondili usa ka gibati pag-ayong pagtahod sa Maglalalang ug usa ka maayong kalisang nga makapasuko kaniya. Kining diyosnong kahadlok mao ang pasikaranan nga gibasehan sa hustong panggawi. Sa pag-ilustrar, tagda ang pananglitan sa usa ka Kristohanong batan-on nga ginganlag Joshua.

Si Joshua nakadawat ug sulat gikan sa usa ka kauban sa eskuylahan nga nag-ingon nga nakagusto siya kaniya ug buot nga “makighigugmaay” kaniya. Si Joshua, bisan tuod naibog kaniya, nakaamgo nga ang pakig-uban sa usa ka dili-magtutuo mahimong motultol sa imoralidad ug makadaot sa iyang panaghigala kang Jehova. Busa gitin-aw niya kaniya nga siya dili interesado! Sa dihang gisultihan niya sa ulahi ang iyang inahan kon giunsa niya pagdumala ang kahimtang, siya mipatugbaw nga wala maghunahuna: “Oh, Joshua, lagmit nasuko siya kanimo!” Si Joshua mitubag: “Apan, Ma, mas palabihon kong masuko siya kay sa si Jehova ang masuko.” Ang iyang diyosnong kahadlok, ang iyang kalisang nga makapasuko sa iyang langitnong Higala, nagpalihok kaniya sa paghupot ug matul-id nga panggawi.

Pangitaa ang Maayong mga Kauban

Apan, usa ka batan-on nga ginganlag Lynn kanunayng nalangkit sa kasamok. Ang suliran? Nakig-uban siya sa dili maayong pundok. (Exodo 23:2; 1 Corinto 15:33) Ang solusyon? Pagpangitag bag-ong mga higala! “Kon ikaw gipalibotan sa mga higala nga nahigugma kang Jehova,” si Lynn mihinapos, “kini makatabang kanimo sa paghupot ug sensitibong konsensiya ug paglikay sa kasamok. Sa dihang mopahayag sila ug pag-ayad sa sayop nga binuhatan, mopabati kana kanimo ug ingon niana.”

Sa pagkatinuod, ang imong dili-maayong pagpili sa mga higala mahimong maoy kinadak-ang babag sa pagpakighigala sa Diyos. Ang 18-anyos nga si Ann miangkon: “Ang imong kaubanan adunay dakong impluwensiya kanimo. Sa madugay ug madali mahisama ka kanila. Impluwensiyahan ka nila nga maghunahunang sama kanila. Ang mga kabildohay kadaghanan tingaling bahin sa sekso. Makapahimo kini kanimong maukiton. Maghunahuna ka kon sama kana sa unsa.” Nakat-onan kini ni Ann sa lisod nga paagi. Siya miingon: “Nasayod ako nga tinuod kini. Nalangkit ako sa imoralidad ug namabdos sa edad nga 15.”

Sa kataposan si Ann nakasabot sa pagkatinuod sa mga pulong sa Bibliya: “Busa, ang bisan kinsa nga buot mahimong higala sa kalibotan nagahimo sa iyang kaugalingon nga usa ka kaaway sa Diyos.” (Santiago 4:4) Oo, si Ann buot mahimong​—determinadong mahimong​—higala sa kalibotan. Apan misangpot lamang kini sa sunodsunod nga mga kagul-anan. Maayo na lang, si Ann nakaamgo sa iyang sayop. Gibasolan niya pag-ayo ang iyang dalan ug nagpatabang sa iyang mga ginikanan ug sa mga ansiyano sa iyang kongregasyon. Nakakaplag usab siya ug bag-ong pundok sa mga higala. (Salmo 111:1) Uban sa iyang pagpaningkamot pag-ayo, si Ann nahimo na usab nga higala sa Diyos. Karon, daghang katuigan sa ulahi, siya nag-ingon: “Mas suod ang akong relasyon kang Jehova.”

Pinaagi sa personal nga pagtuon sa Bibliya, pagpamalandong, matul-id nga panggawi, ug maayong kaubanan, ikaw usab makaugmad ug suod nga panaghigalaay uban sa Diyos. Apan, ang pagmentinar sa maong panaghigalaay maoy laing butang. Sa unsang paagi maposible ang pagbuhat niana bisan sa mga kalisdanan ug personal nga mga kahuyangan? Ang umaabot nga artikulo niining maong serye maghisgot niining butanga.

[Mga footnote]

[Hulagway sa panid 13]

Makatabang ba kanako ang akong mga kauban nga mahimong higala sa Diyos?