‘Pagabayawon sa Pagsugat sa Ginoo’​—Sa Unsang Paagi?

ANG paatras nga pag-ihap paingon sa kataposan niining daotang sistema karon dili na gayod mapugngan. Uban sa paglabay sa matag takna, matag minuto, matag segundo, kita nagakahiduol na sa talagsaong mga hitabo nga gitagna sa dugay nang panahon. Ang pagbayaw sa himaya usa ba niini? Kon mao, kanus-a ug sa unsang paagi kini mahitabo?

Ang pulong “rapture” dili makita sa Bibliya. Apan kadtong nagtuo niini mokutlo sa mga pulong ni apostol Pablo diha sa 1 Tesalonica 4:17 ingong basehanan sa ilang pagtuo. Atong susihon kining tekstoha sa konteksto niini. Si Pablo misulat:

“Mga igsoon, dili namo buot nga kamo dili mahibalo mahitungod kanila nga mga nangamatay; aron dili kamo managsubo ingon sa uban nga walay paglaom. Kay kon kita nagtuo nga si Jesus namatay ug nabanhaw, sa mao nga paagi, silang nangatulog sa kamatayon pinaagi ni Jesus pagadad-on ra unya sa Diyos uban kaniya. Kay kini among igapahayag kaninyo pinaagi sa pulong ni Jehova, nga kitang mga buhi nga magapabilin pa hangtod sa presensiya sa Ginoo dili mag-una kanila nga mga nangamatay; kay ang Ginoo mismo manaog gikan sa langit uban sa usa ka singgit sa pagsugo, uban sa tawag sa arkanghel ug sa tingog sa trompeta sa Diyos, ug ang nangamatay diha kang Kristo mouna sa pagbangon. Dayon kita nga mga buhi nga nangabilin, uban kanila, pagabayawon sa mga panganod sa pagsugat sa Ginoo sa kahanginan; ug sa ingon niana kita mahiuban kanunay sa Ginoo. Busa paglipayay kamo sa usag usa niining mga pulonga.”​—1 Tesalonica 4:13-18.

Ang kongregasyon sa Tesalonica bag-o pa sa dihang gisulat ni Pablo kining iyang unang sulat alang sa mga Kristohanon didto sa mga 50 K.P. Ang mga membro sa kongregasyon nasubo nga ang pipila sa ilang taliwala “nangatulog sa kamatayon.” Apan, ang gisulat ni Pablo nakahatag kalipay sa mga taga-Tesalonica nga may paglaom sa pagkabanhaw.

“Presensiya” ni Kristo

Samtang gipamatud-an nga ang matinumanong mga Kristohanon nga nangamatay sa maong panahon pagabanhawon, si Pablo usab miingon: “Ang mga buhi nga magapabilin pa hangtod sa presensiya sa Ginoo dili mag-una kanila nga mga nangamatay.” (Bersikulo 15) Talagsaon, gayod, mao ang paghisgot sa apostol sa “presensiya” sa Ginoo. Dinhi ang teksto sa orihinal nga pinulongan migamit sa Gregong pulong nga pa·rou·siʹan, nga sa literal nagkahulogang “anaa sa tupad.”

Sa dihang moduaw ang langyaw nga pangulo sa Estado sa usa ka nasod, ang petsa sa iyang presensiya didto kasagarang ipahibalo. Kini tinuod usab sa presensiya ni Ginoong Jesu-Kristo. Ang Bantayanang Torre padayong nagapresentar ug ebidensiya sa tim-os ug kasingkasing nga mga estudyante sa tagna sa Bibliya nga ang presensiya ni Jesus sa paggahom sa langitnong Gingharian nagsugod sa 1914. Ang mga hitabo sukad niadtong tuiga nagpamatuod sa dili-makitang presensiya ni Jesus. (Mateo 24:3-14) Busa sa pag-ingon nga ang pipila ka Kristohanon nga buhi sa presensiya sa Ginoo “pagabayawon uban kanila sa mga panganod sa pagsugat sa Ginoo sa kahanginan,” gipasabot ni Pablo nga kadtong buhi pa mosugat kang Kristo, dili sa atmospera sa yuta, kondili sa dili-makita nga langitnong dapit diin si Jesus nagalingkod sa tuong kamot sa Diyos. (Hebreohanon 1:1-3) Apan kinsa sila?

“Ang Israel sa Diyos”

Daghan ang giingon sa Kasulatan mahitungod sa unodnong mga Israelinhon ug naghisgot usab bahin sa espirituwal nga “Israel sa Diyos.” Ang magtutuong mga Hudiyo ug Hentil ang maglangkob sa bug-os nga gidaghanon niining grupoha nga gidihogan sa balaang espiritu sa Diyos, o aktibong puwersa. (Galacia 6:16; Roma 11:25, 26; 1 Juan 2:20, 27) Ang basahon sa Pinadayag nagpakita nga ang bug-os nga gidaghanon sa espirituwal nga Israel maoy 144,000, ang tanan gihulagway uban sa Kordero, si Jesu-Kristo, diha sa langitnong Bukid sa Sion. Uban kang Kristo, sila mahimong mga hari ug mga saserdote sa langit. (Pinadayag 7:1-8; 14:1-4; 20:6) Lakip kanila mao ang mga indibiduwal nga nakig-uban sa mga kongregasyon sa Tesalonica ug sa ubang dapit, bisag unsa pay ilang rasanhon ug nasodnong kagikan.​—Buhat 10:34, 35.

Una pa madawat sa tanang matinumanong mga membro sa espirituwal nga Israel ang langitnong ganti, ilang pagaambitan ang usa ka kasinatian. Sama nga ang kamatayon ni Jesus sa kahoy sa pagsakit nauna sa iyang pagkabanhaw ngadto sa kinabuhi sa mga langit, sa ingon usab ang mga Kristohanon nga may langitnong paglaom kinahanglang mamatay una pa makadawat sa ilang ganti. (1 Corinto 15:35, 36) Tinuod kana alang sa mga membro sa espirituwal nga Israel nga buhi sa unang siglo K.P. ug sa mga indibiduwal nga buhi pa karon.

Human hisgoti “ang presensiya sa Ginoo,” naghisgot si Pablo ug panahon dihang ang matinumanong mga membro sa espirituwal nga Israel nga nangamatay makadawat sa ilang langitnong ganti. Siya misulat: “Ang Ginoo mismo manaog gikan sa langit uban sa usa ka singgit sa pagsugo, uban sa tawag sa arkanghel ug sa tingog sa trompeta sa Diyos, ug ang nangamatay diha kang Kristo mouna sa pagbangon.” (Bersikulo 16) Busa, sa dihang magsugod na ang presensiya ni Jesus ingong Hari, atong dahomon nga magsugod ang langitnong pagkabanhaw, nga sugdan niadtong sakop sa espirituwal nga Israel kinsa nangamatay na ingong mga maghuhupot sa integridad. (1 Corinto 15:23) Sila karon nagaalagad tupad kang Jesus sa langit. Apan unsay ikasulti bahin sa pipila ka dinihogang mga Kristohanon nga buhi pa sa yuta? Sila ba nagapaabot sa pagbayaw sa himaya?

“Pagabayawon”​—Sa Unsang Paagi?

Human nga mihisgot sa dinihogang mga Kristohanon nga nangamatay, si Pablo midugang: “Dayon kita nga mga buhi nga nangabilin, uban kanila, pagabayawon sa mga panganod sa pagsugat sa Ginoo sa kahanginan; ug sa ingon niana kita mahiuban kanunay sa Ginoo.” (Bersikulo 17) Ang “mga buhi” mao kadtong mga buhi sa panahon sa presensiya ni Kristo. Sila unya “pagabayawon” sa pagsugat kang Ginoong Jesus. Sama sa kahimtang sa unang matinumanong mga Kristohanon, kinahanglan silang mamatay ingong tawo aron mahiusa uban kang Kristo sa langit.​—Roma 8:17, 35-39.

Nagsulat sa mga Kristohanon sa Corinto, si Pablo miingon: “Isulti ko kini kaninyo, mga igsoon, ang unod ug dugo dili makapanunod sa gingharian sa Diyos, ni ang madunot makapanunod sa pagkadili-madunot. Tan-awa! Isulti ko kaninyo ang usa ka balaang tinagoan: Dili kitang tanan mangatulog sa kamatayon, apan kitang tanan mangausab, sa kalit, sa pagpamilok sa mata, sa kataposang pagbudyong sa trompeta. Kay ang trompeta molanog, ug ang mga patay pagabanhawon ngadto sa mga lawas nga dili-madunot, ug kita mangausab.” (1 Corinto 15:50-52) Inigkamatay nga matinumanon sa panahon sa presensiya ni Kristo, ang matag usa sa nanghibilin sa espirituwal nga Israel dihadiha makadawat sa iyang langitnong ganti. “Sa pagpamilok sa mata,” siya pagabanhawon ingong usa ka espiritung linalang ug “pagabayawon” sa pagsugat kang Jesus ug mag-alagad ingong kaubang magmamando diha sa Gingharian sa mga langit. Apan unsay ikasulti bahin sa tanang ubang nagasimba kang Jehova? Samtang nagakahiduol na ang kataposan niining daotang sistema, sila ba usab pagabayawon sa langit?

Pagkalabang-buhi​—Apan Dili Pinaagi sa Pagbayaw sa Himaya

Sanglit nagsugod na ang harianong presensiya ni Jesus sa 1914, kita karon haduol na gayod sa “panahon sa kataposan” niining kalibotana. (Daniel 12:4) Si Pablo mipasidaan: “Mahitungod sa mga takna ug mga panahon, mga igsoon, dili na kamo kinahanglang sulatan pa. Kay kamo nasayod nga ang adlaw ni Jehova moabot sama sa kawatan sa kagabhion. Sa dihang sila magaingon: ‘Kalinaw ug kasegurohan!’ unya sa kalit moabot kanila ang kalaglagan sama sa kasakit nga bation sa usa ka babaye nga nagbati; ug dili gayod sila makaikyas.” (1 Tesalonica 5:1-3) Apan ang alerto nga mga Kristohanon makaikyas. Sa unsang paagi?

Ang singgit nga “Kalinaw ug kasegurohan!” mao ang mag-una sa yugto nga gitawag ni Jesus nga “dakong kasakitan.” Naghubit sa “dakong panon” sa mga matinumanon nga adunay paglaom nga mabuhing walay kataposan sa paraiso sa yuta, ang basahon sa Pinadayag nag-ingon: “Kini sila mao ang nakalabang buhi sa dakong kasakitan, ug sila nakalaba sa ilang mga besti ug gipaputi kini diha sa dugo sa Kordero.” (Pinadayag 7:9, 14; Lucas 23:43) Wala, sila walay palaaboton nga pagabayawon sa himaya. Hinunoa, sila adunay paglaom nga makalabang-buhi dinhi mismo sa yuta. Sa pagpangandam alang niana, sila kinahanglang magpabiling nagamata sa espirituwal. Sa unsang paagi mahimo mo kini ug makabalang-buhi sa kataposan niining sistemaha?

Kinahanglan ‘magmahusay ang imong hunahuna ug isul-ob ang kotamaya sa pagtuo ug gugma ug ingong salukot ang paglaom sa kaluwasan.’ (1 Tesalonica 5:6-8) Karon na ang panahon sa pagpatalinghog sa matagnaong Pulong sa Diyos, ang Bibliya. Samtang nagadagan ang panahon hangtod sa kataposan niining sistemaha, pamatia ang tambag ni Pablo: “Ayaw pagtamaya ang mga pagtagna. Tinoa ang tanang butang; hupting malig-on ang maayo.” (1 Tesalonica 5:20, 21) Sa ingon ang mga Saksi ni Jehova malipayong moabiabi kanimo sa ilang mga Kingdom Hall, diin ikaw makaambit uban kanila sa pagtuon sa mga tagna sa Bibliya ug sa ubang mga bahin sa dinasig nga Pulong sa Diyos.

Samtang mouswag ka sa tukmang kahibalo ug pagtuo, imong masabtan ang katumanan sa katuyoan ni Jehova nga Diyos nga wagtangan ang uniberso sa iyang mga kaaway ug ipasig-uli ang yuta nga usa ka paraiso. Pinaagi sa pagbaton ug pagtuo, mahimong malakip ka sa mga makalabang-buhi sa dakong kasakitan, nga makapribilehiyo sa pag-abiabi sa milyonmilyong pagabanhawon sa kinabuhi sa yuta. Ug pagkadakong kalipay unya nga mabuhi ubos sa Gingharian sa Diyos diha sa mga kamot ni Jesu-Kristo ug sa iyang kaubang mga magmamando, nga ‘pagabayawon sa pagsugat sa Ginoo’ pinaagi sa pagkabanhaw sa kinabuhi sa langitnong dapit!

Nan, alang sa masinugtanong katawhan sa katibuk-an, unsa ang tinuod nga Kasulatanhong paglaom? Dili usa ka pagbayaw sa himaya. Kondili, kinabuhing walay kataposan dinhi sa yuta ubos sa pagmando sa Gingharian sa Diyos.

[Hulagway sa panid 7]

Abiabihon sa mga makalabang-buhi sa dakong kasakitan ang mga pagabanhawon sa kinabuhi diha sa usa ka paraisong yuta ubos sa pagmando ni Jesus ug sa “pagabayawon” sa langit