Si Pablo—“Ubos” ug “Tinugyanan”

4. Unsang talagsaong mga pribilehiyo ang napahimuslan ni Pablo?

⁴ Si Pablo usa ka inilang tawo taliwala sa unang mga Kristohanon, ug masabtan kon ngano. Sa dagan sa iyang ministeryo, mipanaw siya ug linibo ka kilometro sa dagat ug mamala, ug siya nagtukod ug daghang kongregasyon. Dugang pa, gipanalanginan ni Jehova si Pablo ug mga panan-awon ug gasa sa pagsulti ug langyawng mga pinulongan. (1 Corinto 14:18; 2 Corinto 12:1-5) Gidasig usab niya si Pablo sa pagsulat ug 14 ka sulat nga karon maoy bahin sa Kristohanon Gregong Kasulatan. Tataw nga ikaingong ang mga paghago ni Pablo milabaw niadtong sa tanang ubang mga apostol.—1 Corinto 15:10.

5. Sa unsang paagi gipakita ni Pablo nga siya dunay makasaranganong panglantaw sa iyang kaugalingon?

⁵ Sanglit si Pablo maoy nanguna sa Kristohanong kalihokan, ang uban magdahom tingali nga makita siyang nalipay nga siya maoy sentro sa pagtagad, nagpagawal pa gani sa iyang awtoridad. Apan, dili ingon niana ang nahitabo, kay si Pablo makasaranganon. Gitawag niya ang iyang kaugalingon nga “ang labing ubos sa mga apostol,” nga midugang: “Ako dili angay tawgon nga usa ka apostol, tungod kay akong gilutos ang kongregasyon sa Diyos.” (1 Corinto 15:9) Ingong kanhing maglulutos sa mga Kristohanon, wala gayod malimot si Pablo nga pinaagi lamang sa dili-takos nga kalulot nga mahuptan niya ang usa ka relasyon uban sa Diyos, ilabina gayod ang pagtagamtam ug linaing mga pribilehiyo sa pag-alagad. (Juan 6:44; Efeso 2:8) Busa, wala batia ni Pablo nga ang iyang talagsaong mga kalamposan diha sa ministeryo naghimo kaniyang labaw sa uban.—1 Corinto 9:16.

6. Sa unsang paagi si Pablo nagpakita ug pagkamakasaranganon sa iyang mga pakiglabot sa mga taga-Corinto?

⁶ Ang pagkamakasaranganon ni Pablo sa linaing paagi nadayag diha sa iyang mga pakiglabot sa mga taga-Corinto. Dayag nga ang pipila kanila nakadayeg niadtong ilang gihunahuna nga inilang mga magtatan-aw, lakip kang Apolos, Cefas, ug kang Pablo mismo. (1 Corinto 1:11-15) Apan si Pablo wala mangayo sa pagdayeg sa mga taga-Corinto ni nagpahimulos sa ilang pagdayeg kaniya. Sa dihang miduaw kanila, wala niya itanyag ang iyang kaugalingon “uban ang paghinobra sa sinultihan o sa kaalam.” Hinunoa, miingon si Pablo bahin sa iyang kaugalingon ug sa iyang mga kauban: “Ipaisip kami sa usa ka tawo ingon nga mga ubos ni Kristo ug mga tinugyanan sa sagradong mga tinago sa Diyos.”a—1 Corinto 2:1-5; 4:1.

7. Sa unsang paagi si Pablo nagpasundayag ug pagkamakasaranganon bisan sa dihang naghatag ug tambag?

⁷ Si Pablo nagpasundayag gani ug pagkamakasaranganon sa dihang kinahanglan siyang mohatag ug bug-at nga tambag ug pagtultol. Gihangyo niya ang iyang mga isigka-Kristohanon “pinaagi sa kamabination sa Diyos” ug “pinasukad sa gugma” inay kay sa kabug-at sa iyang apostolikong awtoridad. (Roma 12:1, 2; Filemon 8, 9) Nganong gibuhat man kini ni Pablo? Tungod kay giisip gayod niya ang iyang kaugalingon ingong “isigkamagbubuhat” sa iyang mga igsoon, dili ingong usa ka ‘agalon sa ilang pagtuo.’ (2 Corinto 1:24) Sa walay duhaduha ang pagkamakasaranganon ni Pablo maoy nakatabang nga gimahal siya pag-ayo sa unang-siglong Kristohanong mga kongregasyon.—Buhat 20:36-38.