Mga Batan-on Nangutana . . .

Homoseksuwalidad—Daotan ba Gayod Kaayo Kini?

“Sukad pa sa akong pagkabata, duna na akoy homoseksuwal nga mga kiling. Tungod kay wala nako kini masabti, wala ako magbantay. Kini miagak kanako sa paghimog daotan kaayong buhat uban sa usa ka higala. Dulot kaayo ang akong pagbati sa pagkasad-an, ug nagtuo ako nga dili na gayod ako pasayloon ni Jehova.”

“GISULAYAN sa TV Pag-impluwensiya ang Atong Kabataan sa Homoseksuwalidad.” Mao kini ang ulohan sa usa ka artikulong gisulat sa usa ka kolumnista sa kapunongan sa mantalaan. Matud sa magsusulat: “Ang mga tumatan-aw sa telebisyon gipailalom sa naghinobrang mga programa nga mauyonong naglarawan sa paagi sa kinabuhi sa homoseksuwal.” Hinunoa, ang TV maoy usa lamang sa daghang paagi nga gigamit karon sa pagpasiugdag homoseksuwalidad taliwala sa mga batan-on. Ang propagandang uyon sa homoseksuwalidad gipasiugda usab sa mga magtutudlo, mga katalirongan, mga sine, mga libro, ug mga magasin.

Ang medikal nga propesyon mipaluyo usab niadtong nagpasiugda sa homoseksuwalidad. Kasagaran, gilantaw sa mga doktor ang homoseksuwalidad ingong usa ka sakit. Apan niadtong 1973, ang American Psychiatric Association mipahayag nga ang homoseksuwalidad dili na pagaisipon ingong usa ka sakit sa hunahuna. Sukad niadto, daghan sa medikal nga propesyon ang nagpaluyo sa kinabuhing homoseksuwal. Ang psychotherapist nga si Albert Ellis, pananglitan, mideklarar nga ang homoseksuwal nga mga pakigsekso “dili diay daotan kondili gilangkoban ug maayong tawhanong paggawi sa sekso. . . . Buhata kana kon gusto mo, ug ayawg paimpluwensiya kang bisan kinsa sa pagpatuo kanimo nga kana ‘sayop’ o usa ka ‘sakit sa emosyon.’”

Ang maong panghunahuna malukpanon kaayo nga tungod niana mitaho ang magasing Newsweek: “Tungod sa mga pasundayag diha sa palaumagian sa balita ug sa bag-ong madinawatong kahimtang, ang mga tin-edyer mas dayag nga nagsulaysulay uban sa bayot ug sa kaatbang usab nga sekso.” Samtang sa nangagi supak kaayo ang mga tin-edyer sa samang-sekso nga relasyon, dili paghingapin ang pag-ingon nga gilantaw kini sa nagkadaghang mga batan-on karon ingong “uso.” Bisan ang mga batan-ong wala makigbahin sa homoseksuwal nga mga buhat sagad daw matugoton sa uban nga nagbuhat sa ingon. “Seguro kon sultihan ako sa akong higala nga siya bayot, higala ko gihapon siya,” matud sa usa ka batan-ong si Darren. Usa ka batan-ong estudyante sa kolehiyo mipahayag pa gani ug kabalaka nga basin dili na siya normal sanglit ang iyang “naibgan pulos babaye lamang”!

Ang matugoton nga kahimtang karon sa ingon makapalibog sa Kristohanong mga batan-on​—ilabina niadtong kinsa sa pila ka wala mahibaloing katarongan naibog sa sama kaniya ug sekso.a Nasayod sila nga ang homoseksuwalidad dili makapahimuot sa Diyos, ug buot gayod nila nga maglikay niana. Apan, usahay ang pakigbugno sa pagkontrolar sa ilang mga pagbati mahimong makapaluya nga basin mosugod sila pagduhaduha kon ang baroganan sa Bibliya bahin sa homoseksuwalidad timbang ba o makataronganon. ‘Ingon ba gayod niana ka daotan ang homoseksuwalidad?’ hayan sila mangutana.

Kon Unsay Gisulti sa Pulong sa Diyos

Sa pagtubag, basaha sa imong kaugalingon kon unsay giingon ni apostol Pablo sa 1 Corinto 6:​9, 10: “Unsa! Wala ba kamo mahibalo nga ang mga tawong dili-matarong dili makapanunod sa gingharian sa Diyos? Ayaw pagpahisalaag. Walay mga makihilawason, ni mga tigsimbag diyosdiyos, ni mga mananapaw, ni mga lalaking gihuptan alang sa dili-kinaiyanhong mga katuyoan [“mga lalaking bigaon,” New International Version; “mga bayot,” King James Version], ni mga lalaking nakigdulog sa mga lalaki [“mga sodomanhon,” Jerusalem Bible; “makihilawasong mga homoseksuwal,” Today’s English Version], ni mga kawatan, ni mga tawong dalo, ni mga palahubog, ni mga tigsultig pasipala, ni mga mangingilad ang makapanunod sa gingharian sa Diyos.” Matikdi nga espisipikong gihisgotan ni Pablo kadtong dayag nga mosugot lamang nga makigsekso ug kadtong maoy modula sa mas aktibong papel sa “lalaki” diha sa ilang imoral nga mga relasyon. Mao nga iyang gitin-aw nga ang Diyos supak sa tanang homoseksuwal nga mga buhat.

Dayag usab kini gikan sa mga pulong ni Pablo sa Roma 1:​18-27: “Ang kapungot sa Diyos ginapadayag gikan sa langit batok sa tanang pagkadili-diyosnon ug pagkadili-matarong sa mga tawo kinsa nagasugpo sa kamatuoran sa dili-matarong nga paagi . . . ang Diyos, sa pagpahinunot sa mga tinguha sa ilang mga kasingkasing, nagtugyan kanila ngadto sa pagkadili-hinlo, aron ang ilang mga lawas mapakaulawan taliwala kanila . . . Mao kana kon nganong ang Diyos nagtugyan kanila ngadto sa makauulawng seksuwal nga mga gana, kay ang ilang mga babaye nag-usab sa kaugalingon nilang kinaiyanhong gamit ngadto sa usa nga sukwahi sa kinaiyahan; ug sama usab bisan gani ang mga lalaki mibiya sa kinaiyanhong paggamit sa babaye ug nanag-uros-uros diha sa ilang kaulag sa usag usa, mga lalaki sa mga lalaki, nga nagabuhat sa kon unsay law-ay.” Dinhi sa espisipiko parehong gisaway ni Pablo ang homoseksuwalidad sa lalaki ug sa babaye. Iyang gisaway ang homoseksuwal nga mga buhat ingong dili-kinaiyanhon ug “malaw-ay.”

Daotan o Maayo?

Tingali daghan ang motubag niini pinaagi sa pag-ingon nga ang hunahuna sa Bibliya maoy kinaraan na, wala na sa panahon. Apan sa dihang imong hinuktokan kini, kinsa man ang mas nahibalo sa atong pisikal, mental, emosyonal, ug espirituwal nga pagkagama kay sa atong Maglalalang? Gilalang sa Diyos ang lalaki ug babaye, ug iyang gibutang sa ilang kahiladman ang dakong pagkamadanihon nga ilang nabatonan sa usag usa. (Genesis 1:​27, 28) Wala niya sila lalanga nga magbaton ug kaibog alang sa usa nga ilang kasekso. Dugang pa, gitino sa Diyos nga ang seksuwal nga mga relasyon tali sa lalaki ug sa babaye mahitabo lamang sulod sa kahikayan sa kaminyoon.​—Hebreohanon 13:4.

Kini dili makahatag kalisod kanato. Sa Isaias 48:​17, si Jehova nga Diyos miingon nga siya mao “ang Usa nga nagatudlo kaninyo aron kamo makabaton ug kaayohan.” Oo, nasayod siya kon unsay makatabang kanato ug kon unsay makadaot kanato. Bisan tuod alang sa pipila ang mga pagtulon-an sa Bibliya daw malisod nga sundon, kanunay gayod kini nga ‘mapuslanong pagtulon-an,’ sa ato pa, makaayo sa hunahuna ug sa lawas. (Tito 2:1) Ang homoseksuwalidad, sa laing bahin, makadaot lamang sa pisikal, emosyonal, ug espirituwal nga kaayohan sa tawo.

Ang suliran sa AIDS maoy usa ka pananglitan kon unsa ka daotan ang kinabuhing homoseksuwal. Sa Amerika del Norte, ang homoseksuwal nga mga lalaki dakog kalagmitan nga matakdan sa sakit. Apan ang AIDS maoy usa lamang sa daghang sakit​—hepatitis, mga impeksyon sa atay, gonorea, sipilis, ug mga parasito sa tinai ug tiyan—​nga kasagarang maoy sakit nga motakboy sa mga homoseksuwal. Unsay nakapadali sa pagkaylap sa sakit? Si Dr. Joseph Nicolosi misaysay: “Ang mahinaykon, makagiyang mga bahin sa kinabuhi sa bayot gipamatud-an sa daghang magsusulat.” Usa ka matukiong pagtuon nagpadayag nga “28 porsiento sa homoseksuwal nga mga lalaki nakaagi sa pagpakigsekso sa usa ka libo o kapin pang mga kaparis. . . . Halos katunga sa homoseksuwal nga lalaking puti . . . miingon nga sila nakaagig labing menos 500 ka lainlaing kaparis sa pakigsekso.”

Gipatin-aw sa librong Homosexual Behavior nga taliwala sa daghang homoseksuwal “mahadlok sa pagsulod ug seryosong relasyon, pagkasuod, o responsabilidad . . . Ang gana sa pakigsekso kang bisan kinsa usahay kusog kaayo. Ang pipila niining tawhana mahimong nalangkit sa napulo o kapin pang seksuwal nga kasinatian sa usa ka adlaw o gabii.” Ang mao bang dili-kapugngang panggawi maayo? Dili ba kini, hinunoa, daotan ug mangil-ad? Kadtong nagahimo niining walay-pugong nga kahilayan tin-aw nga “mga ulipon sa kadunotan.”​—2 Pedro 2:19.

Gawas pa, daghang homoseksuwal nga pakigsekso maoy makalilisang, mapintas, ug dayag nga sadistiko. Si apostol Pablo miingon: “Ang mga butang nga ilang gipahinabo sa tago maoy makauulaw bisan na lang sa pag-asoy.” (Efeso 5:12) Ang maong kapintasan nagpaila sa kapungot ug kasakit nga nagpahipi sa gikaingong “malipayong” estilo sa kinabuhi. Tinuod, ang pipila ka homoseksuwal nangangkon nga sila dili hilig ug daghang paris. Apan ang “usa-ug-paris” nga mga homoseksuwal dili daghan​—ug ang ilang mga relasyon sa kadaghanan dili-magdugay. Bisan pag ang samag-sekso nga mga paghiusa molungtad ug dugay, kini dili tungod sa gugma nga gihubit sa Bibliya. Ang maong gugma “dili magagawing binastos.”​—1 Corinto 13:4, 5.

Ang mga Sangpotanan

Si Pablo miingon sa Roma 1:27: “Mga lalaki uban sa mga lalaki naghimo niining makauulaw nga mga buhat, nagadawat, sa pagkamatuod, diha sa ilang kaugalingon sa mga sangpotanan sa seksuwal nga kahiwian.” (The New Testament in Modern English, ni J. B. Phillips) Sa unsang mga paagi? Mahitungod sa usa sa mga sangpotanan ang librong Homosexual Behavior nagtaho: “Ang homoseksuwal nga mga babaye mag-antos ug dako gumikan sa hinobrang paggamit ug pag-abuso sa alkohol kay sa heteroseksuwal nga mga babaye.” Ang pipila ka tigdukiduki miangkon usab nga ang mga pagsulay sa paghikog sagad kaayo taliwala sa batan-ong homoseksuwal nga mga lalaki.

Ang labing makadaot sa ngatanan mao ang mga sangpotanan sa espirituwalidad sa usa. Ang mga homoseksuwal nakakaplag sa ilang kaugalingong “anaa sa kangitngit sa kaisipan, ug nahimulag sa kinabuhi nga iya sa Diyos.” (Efeso 4:18) Apan komosta ang mahadlokon-sa-Diyos nga mga batan-on kinsa, bisan pa sa ilang kahibalo sa mga prinsipyo sa Bibliya, nakadiskobre sa ilang kaugalingon nga naibog sa parehas nila ug sekso? Tin-aw, kinahanglan silang makigbugno. Siyempre, ang pagkasayod sa mga hunahuna sa Diyos bahin sa homoseksuwalidad makatabang niining mga tawhana sa ‘pagkasilag sa tuman-kadaotan.’ (Roma 12:9) Adunay daghang praktikal usab nga mga lakang nga ilang mahimo aron malikayan ang sayop nga mga kaibog. Mao kini ang ulohan sa umaabot nga artikulo.

[Footnote]

[Hulagway sa panid 13]

Ang pagkinabuhing homoseksuwal tiniman-an sa pakigsekso sa daghang paris, emosyonal nga kasakit, ug sakit