-
Unsa ang Gingharian sa Diyos?Mabuhi Ka Hangtod sa Hangtod!—Interactive nga Pagtuon sa Bibliya
-
-
7. Ang Gingharian sa Diyos mas maayog mga balaod
Ang mga gobyerno maghimog mga balaod nga para nila makahatag ug kaayohan ug proteksiyon sa ilang mga sakop. Ang Gingharian sa Diyos naa poy mga balaod nga kinahanglang sundon sa mga sakop niini. Basaha ang 1 Corinto 6:9-11, ug dayon hisgoti kini nga mga pangutana:
Unsa kahay kahimtang sa kalibotan kon ang tanan mosunod sa mga balaod sa Diyos?a
Rasonable ba nga dahomon ni Jehova nga sundon sa mga sakop sa Gingharian kini nga mga balaod? Ngano?
Unsay nagpakita nga kadtong wala magsunod niini nga mga balaod puwedeng magbag-o?—Tan-awa ang bersikulo 11.
Ang mga gobyerno maghimog mga balaod nga makahatag ug proteksiyon ug kaayohan sa ilang mga sakop. Ang Gingharian sa Diyos mas maayog mga balaod nga makahatag ug proteksiyon ug kaayohan sa mga sakop niini
-
-
Unsay Giingon sa Bibliya Bahin sa Sekso?Mabuhi Ka Hangtod sa Hangtod!—Interactive nga Pagtuon sa Bibliya
-
-
LEKSIYON 41
Unsay Giingon sa Bibliya Bahin sa Sekso?
Daghan ang dili komportableng estoryahan ang bahin sa sekso. Pero dihang hisgotan sa Bibliya ang bahin sa sekso, kini prangka pero sa matinahorong paagi. Ang giingon niini makahatag natog kaayohan. Ug mao gyod nay atong madahom, kay ang Bibliya naggikan kang Jehova, ang atong Maglalalang. Nahibalo siya kon unsay pinakamaayo para nato. Iyang gipakita kon unsay atong himoon aron mapalipay siya ug kon unsay makatabang aron mabuhi ta hangtod sa hangtod.
1. Unsay panghunahuna ni Jehova bahin sa sekso?
Ang sekso regalo gikan kang Jehova. Gusto niya nga makahatag nig kalipay sa lalaki ug babaye nga kasado. Kini nga regalo dili lang makahatag sa magtiayon ug mga anak kondili paagi pod ni nga mapakita nila ang ilang gugma sa usag usa sa normal ug makapalipay nga paagi. Kanay hinungdan nga ang Pulong sa Diyos nag-ingon: “Maglipay unta ka sa imong asawa nga imong gipangasawa dihang batan-on pa ka.” (Proverbio 5:18, 19) Gidahom ni Jehova nga ang minyong mga Kristohanon magmaunongon sa ilang kapikas aron dili sila makapanapaw.—Basaha ang Hebreohanon 13:4.
2. Unsa ang seksuwal nga imoralidad?
Ang Bibliya nag-ingon nga “kadtong mga nagahimog seksuwal nga imoralidad . . . dili makapanunod sa Gingharian sa Diyos.” (1 Corinto 6:9, 10) Ang mga magsusulat sa Bibliya nga nagsulat niini sa Grego naggamit sa pulong nga por·neiʹa sa paghisgot sa seksuwal nga imoralidad. Apil ana ang (1) pagseksoa sa duha ka tawo nga dili kasado, (2) homoseksuwalidad, ug (3) pagpakigsekso sa hayop. Atong mapalipay si Jehova ug makabenepisyo pod ta dihang atong ‘likayan ang seksuwal nga imoralidad.’—1 Tesalonica 4:3.
TUN-IG DUGANG
Sayra kon unsay imong himoon aron malikayan ang seksuwal nga imoralidad ug kon unsang kaayohan ang imong makuha kon magpabilin kang hinlo sa moral.
3. Pahilayo sa seksuwal nga imoralidad
Ang matinumanong tawo nga si Jose nakigbisog sa pagpabiling hinlo sa moral. Basaha ang Genesis 39:1-12, ug dayon hisgoti kini nga mga pangutana:
Unsay nakapalihok kang Jose sa pagkalagiw, o pagpahilayo, sa seksuwal nga imoralidad?—Tan-awa ang bersikulo 9.
Para nimo, husto ba ang desisyon ni Jose? Ngano?
Sa unsang paagi masundog sa mga batan-on karon si Jose ug makapahilayo sa seksuwal nga imoralidad? I-play ang VIDEO.
Gusto ni Jehova nga isalikway natong tanan ang imoralidad. Basaha ang 1 Corinto 6:18, ug dayon hisgoti kini nga mga pangutana:
Unsang mga situwasyon ang posibleng mahimong hinungdan nga makahimog seksuwal nga imoralidad ang usa?
Unsay imong himoon aron makapahilayo ka gikan sa imoralidad?
4. Kaya nimong suklan ang tentasyon
Nganong lisod usahay suklan ang tentasyon sa paghimog seksuwal nga imoralidad? I-play ang VIDEO, ug dayon hisgoti ang mosunod nga pangutana:
Sa video, dihang nakita sa brader nga ang iyang hunahuna ug binuhatan posibleng mahimong hinungdan nga luiban niya ang iyang asawa, unsay iyang gihimo?
Bisan ang matinumanong mga Kristohanon makigbisog usahay aron magpabiling hinlo ang ilang hunahuna. Unsay imong himoon aron dili ka mag-imadyin ug imoral nga mga butang? Basaha ang Filipos 4:8, ug dayon hisgoti kini nga mga pangutana:
Unsang mga butanga ang angay natong hunahunaon?
Nganong ang pagbasag Bibliya ug ang pagkahimong busy sa pag-alagad kang Jehova makatabang nga masuklan nato ang tentasyon sa paghimog sala?
5. Ang mga sukdanan ni Jehova makahatag natog kaayohan
Si Jehova nahibalo kon unsay pinakamaayo para nato. Iya tang gisultihan kon unsay atong himoon aron magpabiling hinlo sa moral ug kon unsay mga kaayohan sa paghimo niana. Basaha ang Proverbio 7:7-27 o i-play ang VIDEO, ug dayon hisgoti ang mosunod nga mga pangutana:
Sa unsang paagi gibutang sa usa ka batan-on ang iyang kaugalingon sa makapatental nga situwasyon?—Tan-awa ang Proverbio 7:8, 9.
Sumala sa Proverbio 7:23, 26, ang seksuwal nga imoralidad naay grabeng mga resulta. Kon magpabilin tang hinlo sa moral, unsang mga problema ang atong malikayan?
Nganong ang moral nga kahinlo motabang nato nga mabuhi hangtod sa hangtod?
Ang uban naghunahuna nga dili mahigugmaon ang giingon sa Bibliya bahin sa homoseksuwalidad. Pero gusto ni Jehova, ang Diyos sa gugma, nga ang tanan mabuhi hangtod sa hangtod. Aron mokuwalipikar ta ana, kinahanglang magkinabuhi ta subay sa iyang mga sukdanan. Basaha ang 1 Corinto 6:9-11, ug dayon hisgoti kini nga pangutana:
Ang homoseksuwal lang ba nga mga tinguha ang dili maayo sa panan-aw sa Diyos?
Aron mapalipay ang Diyos, kitang tanan kinahanglang mohimog mga kausaban. Naa bay kaayohan kon ato nang paningkamotan? Basaha ang Salmo 19:8, 11, ug dayon hisgoti kini nga mga pangutana:
Para nimo, rasonable ba ang moral nga mga sukdanan ni Jehova? Nganong nakaingon ka ana?
Daghag natabangan si Jehova nga mosunod sa iyang moral nga mga sukdanan. Matabangan pod ka niya
ANG UBAN MOINGON: “Dili man sayop nga magsekso ang duha ka tawo, basta nagkahigugmaay sila.”
Unsay imong isulti?
SUMARYO
Ang sekso regalo ni Jehova nga makapalipay sa bana ug asawa.
Review
Unsay apil sa seksuwal nga imoralidad?
Unsay makatabang nato aron malikayan ang seksuwal nga imoralidad?
Unsay kaayohan kon sundon nato ang moral nga mga sukdanan ni Jehova?
SUSIHA
Susiha kon nganong importante sa Diyos nga ang lalaki ug babaye magpakasal.
“Unsay Giingon sa Bibliya Bahin sa Pag-ipon nga Walay Kasal?” (Web article)
Sayra kon nganong ang sukdanan sa Bibliya bahin sa homoseksuwalidad wala magpasabot nga dumtan nato ang mga homoseksuwal.
Sayra kon nganong ang mga balaod sa Diyos bahin sa tanang buhat sa pagpakigsekso makahatag natog proteksiyon.
Sa eksperyensiya nga “Sila Naghatag Kanakog Dignidad,” tan-awa kon unsay nakapalihok sa usa ka homoseksuwal nga magbag-o aron mapalipay niya ang Diyos.
“Ang Bibliya Makabag-o sa Kinabuhi” (Ang Bantayanang Torre, Abril 1, 2011)
a Kini nga mga buhat nga wala uyoni sa Diyos naglakip sa daghang buhat sama sa pagpakigsekso, pagpakigsekso pinaagi sa baba o sa lubot, ug paghikap sa kinatawo sa uban sa seksuwal nga paagi.
-
-
Unsay Angayng Panghunahuna sa mga Kristohanon sa Alkoholikong Ilimnon?Mabuhi Ka Hangtod sa Hangtod!—Interactive nga Pagtuon sa Bibliya
-
-
LEKSIYON 43
Unsay Angayng Panghunahuna sa mga Kristohanon sa Alkoholikong Ilimnon?
Sa tibuok kalibotan, ang mga tawo lainlaig opinyon bahin sa alkoholikong ilimnon. Ang uban moinom usahay dihang kauban nila ang ilang mga higala. Ang uban modesisyon nga di gyod moinom. Ang uban pod magpalabig inom maong mahubog sila. Unsay panghunahuna sa Bibliya sa alkoholikong ilimnon?
1. Sayop ba nga moinom ug alkoholikong ilimnon?
Wala idili sa Bibliya ang pag-inom ug alkoholikong ilimnon. Gani, dihang gihisgotan sa Bibliya ang daghang regalo nga gihatag sa Diyos kanato, giapil niini ang “bino nga makapalipay sa kasingkasing sa tawo.” (Salmo 104:14, 15) Sa Bibliya, naay matinumanong mga lalaki ug babaye nga miinom ug alkoholikong ilimnon.—1 Timoteo 5:23.
2. Unsay tambag sa Bibliya para niadtong moinom?
Gidili ni Jehova ang sobrang pag-inom ug ang paghuboghubog. (Galacia 5:21) Ang iyang Pulong nag-ingon: “Likayi nga maapil ka niadtong sobrang moinom ug bino.” (Proverbio 23:20) Busa kon modesisyon ta nga moinom—bisan dihang wala tay kauban—dili ta angayng moinom ug sobra nga dili na ta makahunahunag sakto, dili na nato makontrol ang atong isulti ug buhaton, o madaot na ang atong panglawas. Kon dili nato makontrol ang atong pag-inom, angay tang modesisyon nga dili na lang moinom.
3. Unsaon nato pagpakita nga gitahod nato ang desisyon sa uban bahin sa alkoholikong ilimnon?
Ang kada usa maoy modesisyon kon moinom ba siya o dili. Dili nato angayng hukman ang uban kon modesisyon sila nga moinom ug gamay, ug dili pod nato angayng pugson ang uban nga moinom kon dili nila gusto. (Roma 14:10) Modesisyon ta nga dili moinom kon moresulta nig problema ngadto sa uban. (Basaha ang Roma 14:21.) Atong ‘tinguhaon, dili ang atong kaugalingong kaayohan, kondili nianang sa laing tawo.’—Basaha ang 1 Corinto 10:23, 24.
TUN-IG DUGANG
Konsideraha ang mga prinsipyo sa Bibliya nga makatabang nimo sa pagdesisyon kon moinom ba ka ug kon unsa ka daghan ang imong imnon. Dugang pa, sayra kon unsay imong himoon kon naa kay problema sa pag-inom.
4. Pagdesisyon kon moinom ba ka
Unsay panghunahuna ni Jesus sa pag-inom ug alkoholikong ilimnon? Aron mahibaloan ang tubag, konsideraha ang unang milagro nga iyang gihimo. Basaha ang Juan 2:1-11, ug dayon hisgoti kini nga mga pangutana:
Base niini nga milagro, unsay panghunahuna ni Jesus sa alkoholikong ilimnon ug niadtong moinom?
Kay wala man idili ni Jesus ang pag-inom ug alkoholikong ilimnon, unsay angayng panghunahuna sa usa ka Kristohanon niadtong modesisyon nga moinom?
Pero bisan tuod ang usa ka Kristohanon naay kagawasang moinom, naay mga kahimtang nga dili maalamong moinom siya. Basaha ang Proverbio 22:3, ug dayon konsideraha kon sa mosunod nga mga kahimtang moinom ba ka o dili:
Magdrayb ka o mag-operate ug makina.
Buntis ka.
Giingnan ka sa doktor nga dili moinom ug alkoholikong ilimnon.
Maglisod kag kontrol kon unsa ka daghan ang imong imnon.
Gidili sa balaod nga moinom kag alkoholikong ilimnon.
Naa kay kauban nga midesisyon nga dili na moinom kay sa una naglisod siyag kontrol sa iyang pag-inom.
Angay ba kang mag-serve ug alkoholikong ilimnon sa reception sa kasal o sa ubang tapoktapok? Aron matabangan ka sa pagdesisyon, i-play ang VIDEO.
Basaha ang Roma 13:13 ug 1 Corinto 10:31, 32. Human mabasa ang matag teksto, hisgoti kini nga pangutana:
Nganong ang pagpadapat niini nga prinsipyo makatabang nimo sa paghimog desisyon nga makapalipay kang Jehova?
Ang matag Kristohanon maoy modesisyon kon moinom ba siyag alkoholikong ilimnon o dili. Bisan pag usahay moinom siya, tingali sa ubang higayon modesisyon siya nga dili moinom
5. Pagdesisyon kon unsa ka daghan ang imong imnon
Kon modesisyon ka nga moinom ug alkoholikong ilimnon, hinumdomi ni: Bisag wala idili ni Jehova ang pag-inom ug alkoholikong ilimnon, iyang gidili ang sobrang pag-inom. Ngano? Basaha ang Oseas 4:11, 18, ug dayon hisgoti kini nga pangutana:
Unsay mahitabo kon ang usa ka tawo magpalabig inom?
Unsay atong himoon aron dili masobrahan ang atong pag-inom? Kinahanglang nahibalo ta sa atong limitasyon. Basaha ang Proverbio 11:2, ug dayon hisgoti kini nga pangutana:
Nganong maayo nga magbutang kag limitasyon kon unsa ka daghan ang imong imnon?
6. Kon unsay makatabang nga mahunong ang pagpalabig inom
Tan-awa kon unsay nakatabang sa usa ka tawo nga mahunong niya ang sobrang pag-inom. I-play ang VIDEO, ug dayon hisgoti ang mosunod nga mga pangutana:
Sa video, unsay epekto kang Dmitry kon makainom siya?
Nahunong ba dayon niya ang iyang bisyo?
Sa unsang paagi niya nahunong ang iyang bisyo?
Basaha ang 1 Corinto 6:10, 11, ug dayon hisgoti kini nga mga pangutana:
Unsa ka seryoso ang paghuboghubog?
Unsay nagpakita nga puwedeng magbag-o ang usa nga palainom o palahubog?
Basaha ang Mateo 5:30, ug dayon hisgoti kini nga pangutana:
Ang ilustrasyon sa pagputol ug kamot nagpakita nga kinahanglan tang magsakripisyo aron mapalipay si Jehova. Unsay imong himoon kon nalisdan ka sa paghunong sa bisyo nga pag-inom?a
Basaha ang 1 Corinto 15:33, ug dayon hisgoti kini nga pangutana:
Sa unsang paagi ang imong mga higala makaimpluwensiya kon unsa ka daghan ang imong imnon?
KON NAAY MANGUTANA: “Sayop bang moinom?”
Unsay imong itubag?
SUMARYO
Gitagana ni Jehova ang alkoholikong ilimnon para malipay ta, pero gidili niya ang sobrang pag-inom ug ang paghuboghubog.
Review
Unsay panghunahuna sa Bibliya sa alkoholikong ilimnon?
Nganong peligroso ang sobrang pag-inom?
Unsaon nato pagpakita nga gitahod nato ang desisyon sa uban bahin sa pag-inom?
SUSIHA
Sa unsang paagi ang mga teenager makahimog hustong mga desisyon bahin sa pag-inom ug alkoholikong ilimnon?
Sayra kon unsay himoon aron mahunong ang problema sa pag-inom.
“Ibutang sa Lugar ang Alkoholikong Ilimnon” (Ang Bantayanang Torre, Enero 1, 2010)
Angay bang moapil ang usa ka Kristohanon sa pag-toast?
“Mga Pangutana Gikan sa mga Magbabasa” (Ang Bantayanang Torre, Pebrero 15, 2007)
Sa estorya nga “Mora Kog Baril nga di Mapuno,” basaha kon sa unsang paagi nahunong sa usa ka lalaki ang sobrang pag-inom.
“Ang Bibliya Makabag-o sa Kinabuhi” (Ang Bantayanang Torre, Mayo 1, 2012)
a Kadtong naadik sa alkoholikong ilimnon nagkinahanglan tingalig tabang sa doktor aron mahunong niya ang iyang bisyo. Daghang doktor nag-ingon nga kadtong naay problema sa pag-inom angayng dili na gyod moinom.
-
-
Komosta Kon Makahimo Kag Seryosong Sala?Mabuhi Ka Hangtod sa Hangtod!—Interactive nga Pagtuon sa Bibliya
-
-
Bisag gihigugma nimo pag-ayo si Jehova ug naningkamot kang dili mobuhat ug bisan unsa nga makapasakit sa iyang kasingkasing, usahay masayop gyod ka. Pero naay mga sala nga mas seryoso. (1 Corinto 6:9, 10) Kon makahimo kag seryosong sala, hinumdomi nga gihigugma gihapon ka ni Jehova; andam siyang mopasaylo ug motabang nimo.
1. Unsay kinahanglan natong himoon aron pasayloon ta ni Jehova?
Kadtong nahigugma kang Jehova maguol pag-ayo dihang ilang makita nga nakahimo silag seryosong sala. Pero mahupay sila sa gisaad ni Jehova sa iyang katawhan: “Bisan tuod ang inyong mga sala hayag-pula, kini papution sama sa niyebe.” (Isaias 1:18) Kon sinsero tang maghinulsol, bug-os tang pasayloon ni Jehova. Unsaon nato paghinulsol? Basolan nato pag-ayo ang atong nahimo mao nga hunongon na nato ang pagbuhat ug daotan ug hangyoon nato si Jehova nga pasayloon ta. Dayon maningkamot tang bag-ohon ang sayop nga panghunahuna o binuhatan nga maoy hinungdan nga nakahimo tag sala, ug maningkamot pod ta nga magkinabuhi subay sa hinlo nga mga sukdanan ni Jehova.—Basaha ang Isaias 55:6, 7.
2. Sa unsang paagi gamiton ni Jehova ang mga ansiyano sa pagtabang nato dihang makasala ta?
Kon makahimo tag seryosong sala, si Jehova miingon nga “magtawag [tag] mga ansiyano sa kongregasyon.” (Basaha ang Santiago 5:14, 15.) Kining tinudlo nga mga lalaki nahigugma kang Jehova ug sa iyang mga karnero. Gitudloan sila kon unsaon ta pagtabang aron mabalik ang atong maayong relasyon kang Jehova.—Galacia 6:1.
Unsaon ta pagtabang sa mga ansiyano kon makahimo tag seryosong sala? Gamiton sa duha o tulo ka ansiyano ang mga teksto sa Bibliya aron ipakita kon nganong sayop ang atong nahimo. Hatagan pod ta nilag praktikal nga mga sugyot ug tambag aron dili na nato mabuhat ang maong sala. Aron maproteksiyonan ang kongregasyon sa makadaot nga mga impluwensiya, tangtangon sa mga ansiyano gikan sa kongregasyon si bisan kinsa nga nakahimog seryosong sala nga dili mahinulsolon.
TUN-IG DUGANG
Palaloma ang imong apresasyon sa paagi ni Jehova sa pagtabang kanato dihang makahimo tag seryosong sala.
3. Ang pagtug-an makatabang nga mabalik ang atong maayong relasyon kang Jehova
Masakitan si Jehova sa bisan unsang sala nga atong mahimo, mao nga angay lang nga ato ning itug-an kaniya. Basaha ang Salmo 32:1-5, ug dayon hisgoti kini nga pangutana:
Nganong maayo nga atong itug-an kang Jehova ang atong mga sala imbes itago kini?
Gawas nga itug-an nato kang Jehova ang atong mga sala, mahupayan pod ta dihang mangayo tag tabang sa mga ansiyano. I-play ang VIDEO, ug dayon hisgoti ang mosunod nga pangutana:
Sa video, giunsa pagtabang sa mga ansiyano si Canon aron makabalik siya kang Jehova?
Kinahanglang magmatinud-anon ta sa mga ansiyano. Andam silang motabang nato. Basaha ang Santiago 5:16, ug dayon hisgoti kini nga pangutana:
Nganong mas sayon para sa mga ansiyano ang pagtabang kanato kon matinud-anon ta nila?
Itug-an ang imong sala, magmatinud-anon sa mga ansiyano, ug dawata ang mahigugmaong tabang ni Jehova
4. Si Jehova magpakitag kaluoy sa mga makasasala
Kon ang usa nga nakahimog seryosong sala dili mosunod sa mga sukdanan ni Jehova, siya tangtangon gikan sa kongregasyon, ug dili na ta makig-uban niya. Basaha ang 1 Corinto 5:6, 11, ug dayon hisgoti kini nga pangutana:
Sama nga ang lebadura makapatubo sa minasa, sa unsang paagi ang pagpakig-uban sa dili mahinulsolong nakasala makaapektar sa kongregasyon?
Ingong pagsundog sa kaluoy ni Jehova sa dili hingpit nga mga makasasala, ang mga ansiyano maningkamot sa pagtabang niadtong mga natangtang gikan sa kongregasyon. Daghan ang mibalik sa kongregasyon kay ang disiplina, bisag sakit, nakatabang nilang makita nga sayop ang ilang nahimo.—Salmo 141:5.
Sa unsang paagi ang pagpakiglabot ni Jehova sa mga makasasala nagpakita nga siya rasonable, maluluy-on, ug mahigugmaon?
5. Pasayloon ta ni Jehova kon maghinulsol ta
Si Jesus migamit ug ilustrasyon nga motabang natong masabtan kon unsay bation ni Jehova dihang maghinulsol ang usa ka tawo. Basaha ang Lucas 15:1-7, ug dayon hisgoti kini nga pangutana:
Unsay gitudlo niini kanimo bahin kang Jehova?
Basaha ang Ezequiel 33:11, ug dayon hisgoti kini nga pangutana:
Unsay importanteng himoon aron mapamatud-an nato nga tinuod gyod tang naghinulsol?
Samag magbalantay, gimahal pag-ayo ni Jehova ang iyang mga karnero
ANG UBAN MOINGON: “Nahadlok ko nga kon itug-an nako sa mga ansiyano ang akong sala, tangtangon ko nila gikan sa kongregasyon.”
Unsay imong isulti sa usa ka tawo nga mibati ana?
SUMARYO
Kon nakahimo tag seryosong sala pero nagbasol ta pag-ayo ug determinado nga hunongon ang pagbuhat ug daotan, pasayloon ta ni Jehova.
Review
Nganong maayo nga itug-an nato kang Jehova ang atong mga sala?
Unsay kinahanglan natong himoon aron mapasaylo ang atong mga sala?
Kon nakahimo tag seryosong sala, nganong angay tang mangayog tabang sa mga ansiyano?
SUSIHA
Tan-awa kon sa unsang paagi naeksperyensiyahan sa usa ka lalaki ang kaluoy ni Jehova nga gihisgotan sa Isaias 1:18.
Sa unsang paagi matabangan sa mga ansiyano kadtong mga nakahimog seryosong sala?
“Ipakita ang Gugma ug Kaluoy sa mga Nakasala” (Ang Bantayanang Torre, Agosto 2024)
Sayra kon sa unsang paagi ang gugma ug kaluoy mapakita ngadto sa dili mahinulsolong mga makasasala.
“Tabang Alang Niadtong Natangtang Gikan sa Kongregasyon” (Ang Bantayanang Torre, Agosto 2024)
Sa estorya nga “Kinahanglan Kong Mobalik Kang Jehova,” sayra kon nganong ang usa ka lalaki nga mibiya sa kamatuoran mibati nga gikabig siyag balik ni Jehova.
“Ang Bibliya Makabag-o sa Kinabuhi” (Ang Bantayanang Torre, Abril 1, 2012)
-