Ang Hunahuna sa Bibliya

Kon Unsaon Pagpili ug Kapikas sa Kaminyoon

USA KA DALAGA GISUKNA,NAGHUNAHUNA KA NA BANG MAGMINYO?” NAGHUNAHUNA?” SIYA MITUBAG DAYON. “AKO NABALAKA.”

KINING pintok nga komento sa babaye tin-aw nga nagpahayag kon unsa ka kusganon ang tinguha sa pipila ka tawo sa gugma ug panag-ubanay. Daghan ang nag-isip sa pagpangitag kapikas sa kaminyoon ingong usa sa labing hinungdanong mga butang sa kinabuhi. Busa, sa tibuok kalibotan, nagdaghan ang mga serbisyo nga gidisenyo aron sa pagtabang sa mga tawo nga makakaplag ug kapikas sa kaminyoon. Bisan pa niana, sa daghang bahin sa kalibotan, ang gidaghanon sa napakyas nga mga kaminyoon milabaw sa gidaghanon sa mga nagmalamposon.

Sa mga nasod sa Kasadpan maoy naandan sa mga tawo ang pagpili sa ilang kaugalingong kapikas sa kaminyoon. Sa pipila ka bahin sa Asia ug Aprika, sa laing bahin, ang tinuyo nga mga kaminyoon mao gihapoy naandan. Sa bisan haing kaso, ang proseso kinahanglang dili gayod pakamenoson. Pipila ra sa ubang mga desisyon nga himoon sa kinabuhi sa usa ka tawo ang adunay ingon ka dakong kalaoman alang sa kalipay o sa kasubo. Ang mahigugmaong kaminyoon mahimong makapatugob ug makapatagbaw kaayo. Sa kasukwahi, ang samok nga kaminyoon mahimong tinubdan kanunay sa kasakit ug kaguol.—Proverbio 21:19; 26:21.

Sama sa uban, ang matuod nga mga Kristohanon buot nga ang ilang kaminyoon magdalag kangaya ug katagbawan. Apan nagtinguha usab sila nga pahimut-an ang Diyos ug pasidunggan siya. (Colosas 3:23) Ingong Maglalalang ug Magmumugna sa kaminyoon, nasayod pag-ayo ang Diyos kon unsa gayod ang atong tinuod nga mga panginahanglan ug kon unsay labing maayo kanato. (Genesis 2:22-24; Isaias 48:17-19) Gawas pa, nakasaksi na siyag milyonmilyong kaminyoon, nga maayo ug daotan, latas sa mga milenyo sa paglungtad sa tawo. Nasayod siya kon unsay mosaler ug kon unsay dili. (Salmo 32:8) Pinaagi sa iyang Pulong, ang Bibliya, iyang gipahiluna ang tin-aw, tinong mga prinsipyo nga makatabang ni bisan kinsang Kristohanon nga makapili pinasikad sa kahibalo. Unsa ang pipila niining mga prinsipyoha?

Ayaw Pagtan-aw Lamang sa Panagway

Diin ang mga indibiduwal libre sa pagpili kon kinsay ilang minyoan, mahimong ilang mahimamat ang posibleng mga kapikas sa kaswal nga paagi o ipailaila pinaagi sa mga higala o pamilya. Sagad, ang romantikong interes unang napukaw tungod sa kaibog. Bisag kini maoy kinaiyanhon ug puwersadong panukmod, ang Bibliya nagdasig kanato nga dili motan-aw sa panagway lamang sa dihang magplanong magminyo.

“Ang katahom mahimong malimbongon, ug ang kaanyag mahimong kawang; apan ang babaye nga nahadlok kang Jehova mao ang makabaton ug pagdayeg alang sa iyang kaugalingon,” nag-ingon ang Proverbio 31:30. Si apostol Pedro naghisgot bahin sa “dili-madunoton nga sapot sa malinawon ug malumong espiritu, nga maoy dakog bili sa mga mata sa Diyos.” (1 Pedro 3:4) Oo, ang espirituwal nga mga hiyas sa umaabot nga kapikas—ang debosyon sa maong tawo ngadto sa Diyos ug gugma alang sa Diyos maingon man ang iyang Kristohanong personalidad—labi pang hinungdanon kay sa pisikal nga kaanyag. Hinungdanon ang paggahin ug panahon sa pagpili nga dili mapihigon, nga magpili ug tawo nga may samang espirituwal nga mga tumong ug kinsa naningkamot usab sa pagpasundayag sa mga bunga sa espiritu sa Diyos. Dako kinig mahimo aron matino ang usa ka malipayong panag-uban sa kaminyoon.—Proverbio 19:2; Galacia 5:22, 23.

‘Magminyo Diha Lamang sa Ginoo’

Ang pagbaton ug samang mga tumong ug mga tinuohan uban sa tawong buot nimong minyoan hinungdanon kaayo. Tinuod nga hagit ang kaminyoon, nga nagkinahanglag daghang pagpasibo sa kinaiya ug tinamdan sa duha ka kiliran. Makataronganon, kon daghan kamog kasamahan sa imong umaabot nga kapikas, mas sayon ang maong mga pagpasibo.

Motabang kini kanato sa pagsabot kon nganong si apostol Pablo nagtambag sa mga Kristohanon nga dili ‘magpayugo nga dili timbang uban sa mga dili-magtutuo.’ (2 Corinto 6:14) Nasayod si Pablo nga ang pagpakigminyo sa usa nga dili samag pagtuo ug pagsabot sa mga prinsipyo sa Bibliya makamugna ug kasungian ug di-pagsinabtanay. Ang tambag nga ‘magminyo diha lamang sa Ginoo’ makataronganon. (1 Corinto 7:39) Nagbanaag kini sa panghunahuna sa Diyos. Kadtong maalamong mosunod niini makalikay sa daghang seryosong mga komplikasyon ug mga suliran.—Proverbio 2:1, 9.

Tinuyo nga mga Kaminyoon

Komosta sa mga dapit diin naandan gihapon ang tinuyo nga mga kaminyoon? Sa habagatang India, pananglitan, gibanabana sa pipila nga 80 porsiyento sa tanang kaminyoon ang tinuyo. Ilaha nang desisyon kon ang Kristohanong mga ginikanan mosunod niini nga tradisyon o dili. Buweno, ang tinuyo nga mga kaminyoon mosaler kon ang espirituwal nga mga prinsipyo maoy mopatigbabaw.

Kadtong mopabor sa tinuyo nga mga kaminyoon mobati nga ang proseso sa paghimog mga desisyon nahiluna diha sa mga kamot sa sinati ug hamtong nga mga tawo. “Ang ubang ginikanan mobati nga tungod sa edad ug kakulang sa kasinatian sa ilang mga anak, sila dili masaligan sa paghukom sa hustong paagi bahin sa espirituwal nga kahamtong sa umaabot nga kapikas,” matod sa usa ka Kristohanong ansiyano sa Aprika. “Ang mga batan-on walay-kasinatian sa kinabuhi ug mahimong mohukom sa mga butang sumala sa emosyon,” dugang pa sa usa ka nagapanawng magtatan-aw nga taga-India. Sanglit ang mga ginikanan labawng nahibalo sa kinaiya sa ilang mga anak kay ni bisan kinsa, sila mobati nga anaa sila sa talagsaong kahimtang nga mopili sa maalamong paagi alang sa ilang mga anak. Maalamon usab kon ilang tagdon ang mga panglantaw sa batan-ong lalaki ug babaye.

Ugaling lang, kon isalikway sa mga ginikanan ang mga prinsipyo sa Bibliya, mahimong basolan nila kon ang kaminyoon sa kapulihay adunay mga suliran. Tungod kay sagad gamay ra ang kahigayonan alang sa umaabot nga mga kapikas sa kaminyoon nga magkailhanay ug maayo sa usag usa, ang mga suliran mahimong moresulta. Ug kon kini mahitabo, saysay pa sa usa ka Kristohanong amahan sa India, “ang tendensiya mao ang paghan-ok sa pagbasol ngadto sa mga ginikanan.”

Alang sa Kristohanong mga ginikanan nga nagahikay-daan ug kaminyoon, ang bahin sa motibo angayng tagdon usab. Sa dihang ang materyalistikanhong mga tumong o ang tinguha sa dungog maoy mopalabi sa pagpilig usa ka kapikas sa kaminyoon, ang mga suliran motungha. (1 Timoteo 6:9) Busa, kadtong nagahikay-daan ug kaminyoon angayng mangutana sa ilang kaugalingon, ‘Kini ba nga pagpili gihimo aron sa pagseguro sa kalipay ug espirituwal nga kahimsog sa bana ug asawa? O, di kaha, aron ba pausbawon ang kahimtang o kabtangan sa pamilya o pagbaton ug pipila ka pinansiyal nga kaayohan?’—Proverbio 20:21.

Tin-aw ug mapuslanon ang tambag sa Bibliya. Sa dihang ginatimbangtimbang na ang usa ka kapikas sa kaminyoon, ang kaligdong ug espirituwalidad sa umaabot nga kapikas angay nga maoy unang tagdon, walay-sapayan kon giunsa pagpili. Kon kini himoon, si Jehova nga Diyos, ang Awtor sa kahikayan sa kaminyoon, mapasidunggan ug kadtong magminyo makasugod diha sa lig-ong espirituwal nga pundasyon. (Mateo 7:24, 25) Makatampo kinig dako sa usa ka malipayon, malamboong panag-uban.