Mga Tigpahimulos sa ‘Kakabos ug Kaignorante’?
“ANG mga Saksi ni Jehova . . . nagapahimulos sa kakabos, sa pagpasagad, ug sa kaignorante sa ubay-ubay natong katawhan,” nagpatuo ang Mexicanong magsusulat si Jorge Garcia, “aron sa mausbawon magamhan nila ang ilang konsensiya.”—Excelsior sa Marso 9, 1983.
Ang susamang mga sumbong batok sa mga Saksi ni Jehova subsob madungog sa Latin Amerika. ‘Walay mausa nga tawong dungganon ang mahimong usa sa mga Saksi ni Jehova,’ matud sa pila ka propesyonal nga tawo, mga politiko, ug relihiyosong mga lider. ‘Ang mga Saksi ni Jehova nagakuha sa ilang mga sumusunod gikan sa kabos, ignoranteng mga tawo.’ Matuod nga daghan sa mga Saksi ni Jehova ang kabos, apan nagkahulogan ba kini nga ang mga Saksi ni Jehova ‘nagapahimulos sa kakabos, pagpasagad, ug kaignorante?’ Ang kamatuoran ba nga daghang ubos ug kabos nga mga tawo nagasanong sa ilang mga pagtulon-an nagkahulogang sayop ang maong mga pagtulon-an?
Sa pagtubag niining mga pangutanaha, hinumdoman nato ang unang siglo sa atong Komung Panahon. Unsang matang sa mga tawo ang nadani sa Kristiyanidad niadtong panahona?
Kristiyanidad—Kon Nganong Nakadani sa mga Timawa
Ang modernong-adlawng mga kritiko sa mga Saksi ni Jehova nagapalanog lamang sa mga pulong sa unang-siglong mga magsusupak sa Kristiyanidad. Pananglitan, palandonga ang Gregong mga makinaadmanon nga nagpuyo sa karaang siyudad sa Corinto. Sumala sa pagpahayag niini ni apostol Pablo, “ang mga Grego nangita sa kaalam.” (1 Corinto 1:22) Hinuon, gikinahanglan nila, dili ang Biblikanhong kaalam, kondili ang lisod-hisabtang mga argumentong pinilosopo. Ug sa dihang si apostol Pablo “wala moanha nga may hinobrang sinultihan o kinaadman” kondili nagpahayag hinuon sa yanong mensahe ni “Kristo, ug kaniya nga gilansang,” ang Kristiyanidad gitamay ingong “binuang”.—1 Corinto 1:23; 2:1, 2.
Nan, si Pablo ‘nagpahimulos ba sa kaignorante,’ kay nakadani sa mga ubos ug timawa uban sa ubang molupyo sa Corinto? Dili gayod. Si Pablo nagpatin-aw ngadto sa mga Kristohanon didto: “Kay inyong nakita ang iyang pagtawag kaninyo, mga igsoon, nga dili daghan ang makinaadmanon sa unodnong paagi ang gitawag, . . . apan gipili sa Diyos ang mga butang binuang sa kalibotan, aron iyang mapakaulawan ang mga tawong makinaadmanon . . . aron walay unod ang makapasigarbo sa panan-aw sa Diyos.”—1 Corinto 1:26-29.
Sukad sa sinugdanan, ang Kristiyanidad usa ka relihiyon nga nakadani sa panguna sa timawa, kabos nga mga tawo. Ang 12 ka apostol ni Jehova—ang patukoranan sa iyang iglesya—wala kuhaa gikan sa edukadong mga eskriba ug mga Pariseo. (Efeso 2:20) Hinunoa, sila naggikan sa mga mamumuo, nga ang upat mangingisda ang trabaho. (Mateo 4:18-22; 10:2, 3) Sila maoy mga tawo nga giisip sa relihiyosong mga pangulo ingong “walay kahibalo ug kasagaran,” nga nagkahulogan nga ang ilang edukasyon maoy elementarya ug dili gikan sa mga tunghaan sa hataas nga edukasyon. (Buhat 4:13) Ang “mahibaloon” nga mga eskriba ug mga Pariseo nagtamay sa dugay-nang-gipaabot nga Mesiyas, nga nagtamay sa iyang mga pagtulon-an ug iyang mga sumusunod. Nagbaton sila sa tinamdan nga ‘walay mausang madungganon ang nagasunod kang Jesus.’
Hinumdomi kon unsay nahitabo sa usa ka okasyon sa dihang sila nagpadalag mga polis aron “sa pagdakop” kang Jesus. Ang mga polis namalik nga walay dala. Ngano man? Nagaingon ang rekord sa Bibliya: “Ang mga polis mitubag: ‘Wala pay tawo ang sukad nakasultig sama niini.’” Oo, sila natingala sa mga pagtulon-an ni Kristo! Apan unsay sanong sa edukadong relihiyosong mga pangulo? “Sa baylo ang mga Pariseo mitubag: ‘Nagpahisalaag ba usab diay kamo? Dili ba walay mausa sa mga punoan o sa mga Pariseo ang nagtuo kaniya?’” (Juan 7:32, 44-48) Sa ingon ang garbo maoy mipugong kanila sa pagtuo kang Jesus. Matuod, ang Bibliya nagaingon nga “bisan gani sa mga punoan daghan ang nagtuo kaniya, apan tungod sa mga Pariseo kini wala nila itug-an, aron sila dili palagpoton gikan sa sinagoga; kay ilang gihigugma ang paghimaya sa mga tawo inay ang paghimaya sa Diyos.”—Juan 12:42, 43.
Tiaw na! Kadtong mga tawhana aktuwal nakombinsir nga nabatonan ni Jesus ang kamatuoran, apan sila midumiling mahimong iyang mga tinun-an tungod sa kahadlok sa mga tawo. Yanong dili sayon nga isakripisyo sa maong mga punoan ang ilang kadungganan sa sosyal, politikanhon, ug relihiyosong mga pundok aron mahimong mga sumusunod ni Jesus. Dili katingalahang si Jesus miingon: “Sa pagkamatuod ako magaingon kaninyo nga malisod nga ang usa ka tawong dato makasulod sa gingharian sa mga langit”! (Mateo 19:23) Busa, sa malangkobon, ang maong mga tawo garboso kaayo nga dili mosunod sa usa ka relihiyon nga nagkinahanglan nga sila magmapaubsanon aron ‘pas-anon ang ilang kahoy sa pagsakit ug mosunod kang Jesus.’ (Mateo 16:24) Sa ingon si Kristo kas-a miingon diha sa pag-ampo: “Sa dayag ginadayeg ko ikaw, Amahan, ang Ginoo sa langit ug sa yuta, tungod kay imong gitagoan kining mga butanga gikan sa mga tawong makinaadmanon ug utokan, ug imong gipadayag kana ngadto sa mga bata.” (Lucas 10:21) Lahi sa kalibotanong mga utokan, ang maong mga tawo madawaton sa kamatuoran.—Itandi sa Mateo 18:3.
Ang Diyos Walay Pinalabi
Misulat ang tinun-ang si Santiago: “Gipili sa Diyos ang mga kabos sa kalibotan aron mahimong bahandianon sa pagtuo ug mga manununod sa gingharian, nga iyang gisaad niadtong nahigugma kaniya, dili ba?” (Santiago 2:5) Nan, nagkahulogan ba kining kadtong bahandianon ug may sekular nga edukasyon gidid-an sa pag-alagad sa Diyos? Dili gayod! Tapos madawat sa unang Hentil nga kinabig, si Cornelio, ang balaang espiritu, si Pedro miingon: “Sa pagkamatuod naila ko nga ang Diyos walay pinalabi, apan sa tanang nasod ang tawo nga nahadlok kaniya ug nagabuhat sa pagkamatarong dalawaton kaniya.” (Buhat 10:34, 35) Tingali nahinumdoman ni Pedro ang mga pulong ni Jehova kang Samuel, nga gisulti kasiglohang miagi: “Kay ang Diyos makakita dili sumala sa makita sa tawo, kay ang yanong tawo makakita kon unsay makita sa mga mata; apan alang kang Jehova, iyang makita kon unsay anaa sa kasingkasing.”—1 Samuel 16:7.
Nan, makaiikag nga ang Bibliya nagaingon nga “ang usa ka dakong panon sa mga saserdote ang nagmasinugtanon sa pagtuo.” (Buhat 6:7) Nakaplagan, usab, ang mga Kristohanon sulod sa madungganong “panimalay ni Cesar.” (Filipos 4:22) Ug bisan pag ang kinabag-an sa mga Kristohanon maoy kabos, may pipila sa kongregasyon nga bahandianon.—1 Timoteo 6:17.
Modernong mga Panahon
Nan, dili kita angay matingala nga ang kamatuoran karong adlawa namunga sa panguna sa taliwala sa kasagarang mga tawo. Si Jehova nagatan-aw gihapon, dili sa deposito sa bangko sa usa ka tawo o sa sekular nga edukasyon, kondili sa kasingkasing. (Proverbio 21:2) Hinumdomi, usab, nga si Jesus miingon: “Walay makaanhi kanako gawas ang Amahan, nga nagpadala kanako, magapaduol kaniya.” (Juan 6:44) Tino, ipaduol sa Amahan kaniya kadto lamang mapaubsanon ug matudloan, dili ba?
Bisan pa niana, kini wala magpasabot nga ang edukado ug giingong propesyonal nga mga tawo wala mangahimong mga Saksi ni Jehova. Sa gihatag ni Pablo ang yano, apan kusganong pagpatin-aw sa kamatuoran sa atubangan ni Haring Agrippa, ang hari miangkon: “Sa mubong panahon ikaw makadani kanako nga mahimong Kristohanon.” (Buhat 26:27, 28) Sa susama, daghang mga edukado ang nadani sa kamatuoran tungod sa tin-aw ug makataronganong katin-awan sa kamatuoran sa Bibliya nga ginahatag sa mga Saksi ni Jehova. Hinumdomi, ang tawong mapaubsanon wala gayod magpasabot nga dili edukado. Si Moises gitawag “ang labing maaghop sa tanang tawo sa ibabaw sa yuta.” (Numeros 12:3) Bisan pa niana, siya “natudloan sa tanang kinaadman sa mga Ehiptohanon.”—Buhat 7:22.
Hinuon, mamatikdan nga sa dihang ang mga tawong may gamayng sekular nga edukasyon mosugod sa pagpakig-uban sa mga Saksi ni Jehova, sila kasagarang mohimo sa mga lakang sa pagpauswag sa ilang edukasyonal nga mga kahanas. Sila nagapaningkamot sa pagpauswag sa ilang mga batasan sa pagbasa ug pagtuon aron makakat-on sa paninugdang mga pagtulon-an sa Bibliya ug makanunot sa makanunayong agos sa mga basahon sa Bibliya nga gipatik sa mga Saksi ni Jehova. Kon buot sa usa ka tawong sinsero nga makatuon sa Bibliya apan nababagan sa pagkadili-makabasa, kadaghanan mahikay ang libreng pagtudlo pinaagi sa lokal nga kongregasyon.
Ang Watchtower Society nagapatik gani sa usa ka pulyetong may ulohang Learn to Read and Write. Kining pulyetoha nakatabang sa libolibong tawo sa pagtuon sa pagbasa sa Asia, Aprika, ug Sentral ug Sur Amerika. Sa usa ka nasod sa Latin Amerika, 51,249 nakatuon sa pagbasa ug pagsulat sa miaging 26 anyos sa tabang sa maong pulyeto! Sa usa ka gamayng balangay sa Latin Amerika, ang inspektor sa Departamento sa Edukasyon nakigtagbo sa mga hawas sa ubay-ubayng lainlaing organisasyon—apil ang mga Saksi ni Jehova. Ang Saksi didto nagsulti kanila bahin sa pulyetong Learn to Read ug nagdapit sa grupo ngadto sa usa sa mga tigom sa mga Saksi.
Ang grupo mitambong sa Tunghaan sa Teokratikanhong Ministeryo—usa ka miting nga gidesinyo sa pagtabang sa mga lalaki ug mga babaye nga mahimong epektibong mga magtutudlo. Sa ilang katingala, ilang nakita ang usa ka lalaki nga ilang nasayrang dili makabasa—didto sa entablado ug naghatag sa usa ka pakigpulong sa Bibliya! Matud sa usa sa mga bisita, usa ka prinsipal sa tunghaan: “Dili posibleng kining tawhana nga atong nailhan sa kanunay nga dili makabasa makasulti sa Kinatsila [imbes sa iyang nitibong diyalekto], ilabina na nga mohatag ug pakigpulong sa usa ka mamiminaw, apan kana iyang ginahimo.”
Busa inay kay pahimuslan ang mga tawong timawa, ang matuod nga mga Kristohanon karong adlawa nagatabang kanila sa pagpauswag sa ilang kaugalingon pinaagi sa pagtabang kanila nga makadangat sa kahibalo sa kamatuoran. Ang maong mga Kristohanon nagatuman sa edukasyonal nga buluhatong gisugo ni Jesus sa dihang siya miingon: “Busa panlakaw kamo ug paghimog mga tinun-an sa katawhan sa tanang nasod, . . . nga magatudlo kanila sa pagbantay sa tanang butang akong gisugo kaninyo.” (Mateo 28:19, 20) Ug ingong resulta, kada tuig tinagpulo ka libo gikan sa tanang hut-ong sa katilingban ang nagaanib sa mga Saksi ni Jehova.