Sa tibuok kalibotan, ang mga tawo lainlaig opinyon bahin sa alkoholikong ilimnon. Ang uban moinom usahay dihang kauban nila ang ilang mga higala. Ang uban modesisyon nga di gyod moinom. Ang uban pod magpalabig inom maong mahubog sila. Unsay panghunahuna sa Bibliya sa alkoholikong ilimnon?

1. Sayop ba nga moinom ug alkoholikong ilimnon?

Wala idili sa Bibliya ang pag-inom ug alkoholikong ilimnon. Gani, dihang gihisgotan sa Bibliya ang daghang regalo nga gihatag sa Diyos kanato, giapil niini ang “bino nga makapalipay sa kasingkasing sa tawo.” (Salmo 104:14, 15) Sa Bibliya, naay matinumanong mga lalaki ug babaye nga miinom ug alkoholikong ilimnon.—1 Timoteo 5:23.

2. Unsay tambag sa Bibliya para niadtong moinom?

Gidili ni Jehova ang sobrang pag-inom ug ang paghuboghubog. (Galacia 5:21) Ang iyang Pulong nag-ingon: “Likayi nga maapil ka niadtong sobrang moinom ug bino.” (Proverbio 23:20) Busa kon modesisyon ta nga moinom—bisan dihang wala tay kauban—dili ta angayng moinom ug sobra nga dili na ta makahunahunag sakto, dili na nato makontrol ang atong isulti ug buhaton, o madaot na ang atong panglawas. Kon dili nato makontrol ang atong pag-inom, angay tang modesisyon nga dili na lang moinom.

3. Unsaon nato pagpakita nga gitahod nato ang desisyon sa uban bahin sa alkoholikong ilimnon?

Ang kada usa maoy modesisyon kon moinom ba siya o dili. Dili nato angayng hukman ang uban kon modesisyon sila nga moinom ug gamay, ug dili pod nato angayng pugson ang uban nga moinom kon dili nila gusto. (Roma 14:10) Modesisyon ta nga dili moinom kon moresulta nig problema ngadto sa uban. (Basaha ang Roma 14:21.) Atong ‘tinguhaon, dili ang atong kaugalingong kaayohan, kondili nianang sa laing tawo.’—Basaha ang 1 Corinto 10:23, 24.

TUN-IG DUGANG

4. Pagdesisyon kon moinom ba ka

Unsay panghunahuna ni Jesus sa pag-inom ug alkoholikong ilimnon? Aron mahibaloan ang tubag, konsideraha ang unang milagro nga iyang gihimo. Basaha ang Juan 2:1-11, ug dayon hisgoti kini nga mga pangutana:

• Base niini nga milagro, unsay panghunahuna ni Jesus sa alkoholikong ilimnon ug niadtong moinom?

• Kay wala man idili ni Jesus ang pag-inom ug alkoholikong ilimnon, unsay angayng panghunahuna sa usa ka Kristohanon niadtong modesisyon nga moinom?

Pero bisan tuod ang usa ka Kristohanon naay kagawasang moinom, naay mga kahimtang nga dili maalamong moinom siya. Basaha ang Proverbio 22:3, ug dayon konsideraha kon sa mosunod nga mga kahimtang moinom ba ka o dili:

• Magdrayb ka o mag-operate ug makina.

• Buntis ka.

• Giingnan ka sa doktor nga dili moinom ug alkoholikong ilimnon.

• Maglisod kag kontrol kon unsa ka daghan ang imong imnon.

• Gidili sa balaod nga moinom kag alkoholikong ilimnon.

• Naa kay kauban nga midesisyon nga dili na moinom kay sa una naglisod siyag kontrol sa iyang pag-inom.

Angay ba kang mag-serve ug alkoholikong ilimnon sa reception sa kasal o sa ubang tapoktapok? Aron matabangan ka sa pagdesisyon, i-play ang VIDEO.

VIDEO: Angay ba Kong Mag-serve ug Alkoholikong Ilimnon? (2:41)

Basaha ang Roma 13:13 ug 1 Corinto 10:31, 32. Human mabasa ang matag teksto, hisgoti kini nga pangutana:

• Nganong ang pagpadapat niini nga prinsipyo makatabang nimo sa paghimog desisyon nga makapalipay kang Jehova?

5. Pagdesisyon kon unsa ka daghan ang imong imnon

Kon modesisyon ka nga moinom ug alkoholikong ilimnon, hinumdomi ni: Bisag wala idili ni Jehova ang pag-inom ug alkoholikong ilimnon, iyang gidili ang sobrang pag-inom. Ngano? Basaha ang Oseas 4:11, 18, ug dayon hisgoti kini nga pangutana:

• Unsay mahitabo kon ang usa ka tawo magpalabig inom?

Unsay atong himoon aron dili masobrahan ang atong pag-inom? Kinahanglang nahibalo ta sa atong limitasyon. Basaha ang Proverbio 11:2, ug dayon hisgoti kini nga pangutana:

• Nganong maayo nga magbutang kag limitasyon kon unsa ka daghan ang imong imnon?

6. Kon unsay makatabang nga mahunong ang pagpalabig inom

VIDEO: ‘Gilaay Na Ko sa Akong Kinabuhi’ (6:32)

• Sa video, unsay epekto kang Dmitry kon makainom siya?

• Nahunong ba dayon niya ang iyang bisyo?

• Sa unsang paagi niya nahunong ang iyang bisyo?

Basaha ang 1 Corinto 6:10, 11, ug dayon hisgoti kini nga mga pangutana:

• Unsa ka seryoso ang paghuboghubog?

• Unsay nagpakita nga puwedeng magbag-o ang usa nga palainom o palahubog?

Basaha ang Mateo 5:30, ug dayon hisgoti kini nga pangutana:

• Ang ilustrasyon sa pagputol ug kamot nagpakita nga kinahanglan tang magsakripisyo aron mapalipay si Jehova. Unsay imong himoon kon nalisdan ka sa paghunong sa bisyo nga pag-inom?a

Basaha ang 1 Corinto 15:33, ug dayon hisgoti kini nga pangutana:

• Sa unsang paagi ang imong mga higala makaimpluwensiya kon unsa ka daghan ang imong imnon?

SUMARYO

Gitagana ni Jehova ang alkoholikong ilimnon para malipay ta, pero gidili niya ang sobrang pag-inom ug ang paghuboghubog.

Review

• Unsay panghunahuna sa Bibliya sa alkoholikong ilimnon?

• Nganong peligroso ang sobrang pag-inom?

• Unsaon nato pagpakita nga gitahod nato ang desisyon sa uban bahin sa pag-inom?

SUSIHA

Sa unsang paagi ang mga teenager makahimog hustong mga desisyon bahin sa pag-inom ug alkoholikong ilimnon?

Hunahunaa ang Resulta Kon Moinom Ka (2:31)

Sayra kon unsay himoon aron mahunong ang problema sa pag-inom.

“Ibutang sa Lugar ang Alkoholikong Ilimnon” (Ang Bantayanang Torre, Enero 1, 2010)

Angay bang moapil ang usa ka Kristohanon sa pag-toast?

“Mga Pangutana Gikan sa mga Magbabasa” (Ang Bantayanang Torre, Pebrero 15, 2007)

Sa estorya nga “Mora Kog Baril nga di Mapuno,” basaha kon sa unsang paagi nahunong sa usa ka lalaki ang sobrang pag-inom.

“Ang Bibliya Makabag-o sa Kinabuhi” (Ang Bantayanang Torre, Mayo 1, 2012)

Matag usa nato naay ganahang sininaan ug pamostura. Kon sundon nato ang pipila ka simpleng prinsipyo sa Bibliya, makapili ta sa atong gustong sininaan ug pamostura ug mapalipay pa gyod nato si Jehova. Hisgotan nato ang pipila sa maong mga prinsipyo.

1. Unsa nga mga prinsipyo ang angayng maggiya nato sa pagdesisyon bahin sa sininaan ug pamostura?

Angay tang mopilig “desente nga sinina, uban ang pagtahod sa kaugalingon ug sa uban ug maayong panghunahuna,” ug angay nga kanunay tang hinlo aron makita sa uban ang atong “debosyon sa Diyos.” (1 Timoteo 2:9, 10) Konsideraha ning upat ka prinsipyo: (1) Ang atong sininaan angayng “desente.” Sa imong namatikdan sa mga tigom sa kongregasyon, ang katawhan ni Jehova lainlaig gusto nga sininaan, pero ang atong sinina ug estilo sa buhok nagpakitag pagtahod sa Diyos nga atong gisimba. (2) Ang sininaan nga magpakitag “pagtahod sa kaugalingon ug sa uban” nagpasabot nga likayan nato ang sinina nga seksi o mokuhag sobrang atensiyon. (3) Nagpakita tag “maayong panghunahuna” dihang dili nato sundon ang tanang uso nga sininaan ug pamostura. (4) Ang atong hitsura angayng magpakita kanunay sa atong “debosyon sa Diyos,” aron makita sa uban nga nagsimba ta sa matuod nga Diyos.—1 Corinto 10:31.

2. Sa unsang paagi ang atong hitsura makaapektar sa atong mga igsoon sa pagtuo?

Bisag naa tay kagawasan sa pagpili kon unsay atong isul-ob, angay natong hunahunaon ang epekto niini sa uban. Maningkamot ta nga dili makapandol sa uban ug “himoon sa matag usa nato kon unsay makaayo sa atong isigkatawo aron malig-on siya.”—Basaha ang Roma 15:1, 2.

3. Sa unsang paagi ang atong hitsura makadani sa uban ngadto sa matuod nga pagsimba?

Maningkamot ta kanunay nga ang atong sininaan haom sa kahimtang, pero mas mag-amping ta bahin niini dihang motambong tag tigom sa kongregasyon ug makigbahin sa ministeryo. Dili nato gusto nga ang mga tawo dili maminaw sa maayong balita tungod sa atong hitsura. Hinuon, gusto nato nga pinaagi sa atong hitsura, ang mga tawo mainteres sa kamatuoran ug “mas madayeg pa ang pagtulon-an sa atong Manluluwas.”—Tito 2:10.

TUN-IG DUGANG

4. Kon maayo ang atong hitsura, atong ikapakita ang pagtahod kang Jehova

Unsa ang pinakaimportanteng rason nga kinahanglang maayo ang atong hitsura? Basaha ang Salmo 47:2, ug dayon hisgoti kini nga mga pangutana:

• Kay nahibalo ta nga nagrepresentar ta kang Jehova, unsay angayng epekto niini sa atong sininaan?

• Para nimo, kinahanglan ba gyong hatagan natog atensiyon ang atong hitsura dihang motambong tag tigom ug makigbahin sa ministeryo? Nganong kanay imong tubag?

5. Kon unsaon paghimog maayong mga desisyon bahin sa sininaan ug pamostura

I-play ang VIDEO.

VIDEO: “Himoa ang Tanan Alang sa Kahimayaan sa Diyos” (10:18)

Mahalon man o dili ang atong mga sinina, kinahanglang hinlo ni ug haom sa mga kahimtang. Basaha ang 1 Corinto 10:24 ug 1 Timoteo 2:9, 10. Dayon hisgoti kon nganong likayan nato ang pagsul-ob ug sinina nga . . .

• lago o sobra ka kaswal.

• fitting kaayo o seksi.

Ang mga Kristohanon dili ilalom sa Moisesnong Balaod, pero daghan silag makat-onan gikan niini bahin sa panghunahuna ni Jehova. Basaha ang Deuteronomio 22:5, ug dayon hisgoti kini nga pangutana:

• Nganong angay natong likayan ang sininaan ug pamostura nga ang lalaki mora nag babaye tan-awon o ang babaye mora nag lalaki tan-awon?

Basaha ang 1 Corinto 10:32, 33 ug 1 Juan 2:15, 16, ug dayon hisgoti kini nga mga pangutana:

• Nganong angay natong hunahunaon kon ang atong hitsura makapandol ba sa uban diha sa komunidad o sa kongregasyon?

• Unsa nga mga sininaan ug pamostura ang komon sa inyong lugar?

• Para nimo, ang pipila ba niana nga mga estilo dili haom sa mga Kristohanon? Nganong kanay imong tubag?

SUMARYO

Dihang mohimo tag maayong mga desisyon bahin sa atong sininaan ug pamostura, atong ikapakita ang pagtahod kang Jehova ug sa uban.

Review

• Nganong importante kang Jehova ang atong sininaan ug pamostura?

• Unsa nga mga prinsipyo ang angayng maggiya nato sa pagdesisyon bahin sa atong hitsura?

• Sa unsang paagi ang atong hitsura makaapektar sa panghunahuna sa uban bahin sa matuod nga pagsimba?

SUSIHA

Sayra kon unsay hunahunaon sa uban bahin nimo tungod sa imong sinina.

“Unsay Akong Hitsura?” (Web article)

Sayra kon nganong maalamon nga maghunahuna sa dili pa magpa-tattoo.

“Unsay Giingon sa Bibliya Bahin sa mga Patik?” (Web article)

Konsideraha ang dugang nga mga prinsipyo nga makagiya sa atong pagdesisyon.

“Ang Imo Bang Sininaan Naghimaya sa Diyos?” (Ang Bantayanang Torre, Septiyembre 2016)

Sa unsang paagi ang usa ka babaye nga gustong mapalipay ang Diyos nakabaton ug balanseng panghunahuna bahin sa sininaan ug pamostura sa uban?

“Ang Pamesti ug Panghindik Maoy Nakapugong Kanako sa Pagdawat sa Kamatuoran” (Pagmata!, Disyembre 22, 2003)