Kinsa ba Gayod ang mga Ministro sa Diyos?

“NIINING mahukmanong takna kami nagatambag sa among Katolikong mga sundalo sa pagbuhat sa ilang katungdanan sa pagsugot sa Fuehrer [Hitler].”​—Ang Katolikong mga obispo sa Alemanya, sumala sa gikutlo sa The New York Times, Septiyembre 25, 1939.

“Abi mo, padre, sa among ayroplano ang usa sa among mga tripulante maoy Katoliko, ug imo siyang gibendisyonan sa wala pa kami molupad sa mga misyon sa pagbomba sa Alemanya. Karon, ang samang Katolikong relihiyon sa Alemanya nagbendisyon sa sa usa ka Katolikong tripulante sa usa ka Alemang ayroplano nga moanhi ug moguba sa among mga siyudad. Busa ang pangutana nga akong isukna mao, ‘Kinsay gidapigan sa Diyos?’” Kana ang gipamulong sa usa ka Britanikong pilotong opisyal, si David Walker, sa pakigkabildo sa usa ka Katolikong pari panahon sa Gubat sa Kalibotan II.

Sa kasukwahi, ang libolibong Saksi ni Jehova migugol ug daghang katuigan sa kahadlokang mga kampong konsentrasyon sa Nazi tungod kay dili mosulting heil Hitler o makig-away diha sa iyang armadong kusog. Sa Alyadong kanasoran, daghang Saksi ang gipriso tungod sa pagdumili sa militaryong serbisyo.

Kinsa ang tinuod nga mga ministro sa Diyos, ug unsang mga kinahanglanon ang pagakab-oton nila?

Pagtuo sa Bibliya

Ang usa ka tinuod nga ministro sa Diyos dayag kinahanglang magbaton ug lig-ong pagtuo sa Bibliya. Angay usab nga siya may igong kahibalo niini aron ikatudlo kini sa uban. Apan daghan sa klero sa Kakristiyanohan wala makakab-ot niining paninugdang mga kinahanglanon. Ang usa ka medikal nga doktor sa South Africa miingon nga ang mga ministro sa Anglican nga Iglesya, nga iyang gipasakopan sa nangagi, nagpahimulos ug “gamay kaayo” sa Bibliya, ug ang mga sermon daw mao ang personal nga opinyon sa magwawali. Mireklamo usab siya bahin sa mga membro sa klero, sama kang Arsobispo Tutu sa Cape Town, tungod sa pagkalangkit sa politika.

Sa kasukwahi, ang matinumanong mga alagad ni Jehova hugot nagtuo sa Bibliya ug nagagugol sa dako nilang panahon sa pagtuon ug pagsaysay niini sa uban. Ang ilang interes sa Bibliya ug ilang gugma niana lalom kaayo nga nakagama silag bug-os nadukiduki ug tukma kaayong hubad nga gitawag New World Translation of the Holy Scriptures, nga gibase sa awtoritatibong Hebreohanon, Aramaiko, ug Gregong mga manuskrito sa Bibliya. Ang maong Bibliya sa Reference Edition niini may linibong mga potnot ug cross-references sa pagtabang sa mga magbabasa nga makasabot sa mas maayo sa Bibliya ug mas makasaysay niana sa uban. Dugang pa, kining talagsaong hubad sa Bibliya gihubad na, sa tibuok o sa bahin, ngadto sa 10 ka laing pinulongan, ug tinagpulo ka milyong kopya ang natagtag sa tibuok kalibotan.

Matuod nga mga Ministro ug ang Moralidad

Ang Bibliya grabeng nagasaway sa tanang matang sa sala sa sekso​—apil ang pagpanapaw, pakighilawas, homoseksuwalidad, ug bestialidad. (Levitico 20:10-15; Roma 1:26, 27; Galacia 5:19) Ang tinuod Kristohanong mga ministro bug-os kasingkasing nga nagalaban sa moral nga mga sukdanan sa Diyos. Oo, ang mga Saksi ni Jehova nagaisip nga seryoso kaayo sa kasugoan sa Diyos. Ginapalagpot nila kadtong sa pagkadili mahinulsolon nagahimo nianang mga salaa, samtang sila nagapakitag kaluoy niadtong tinuod mahinulsolon sa imoral nga mga buhat ug nagahinlo sa ilang mga kinabuhi.​—1 Corinto 5:11-13; 2 Corinto 2:5-8.

Sa South Africa, ang Anglicanong Dekano sa Cape Town gitahong miingon: “Ang pila ka samang-seksong mga relasyon mas maayo kay sa ilang heteroseksuwal nga mga katumbas ug tungod sa matang sa gugma, ako naneguro nga mas ginalipay nila ang Diyos.” Ang balit-ad mao ang tinuod. Ang Diyos nagadumot sa maong mga relasyon.​—1 Corinto 6:9, 10.

Ang Matuod nga mga Ministro Nagatudlog Matuod nga mga Doktrina

Ang matuod nga mga ministro nagatudlog mga doktrina nga gibaseng malig-on sa Pulong sa Diyos. Ang bakak nga mga ministro nagatudlog mga doktrina nga walay pagpaluyo o pasikaranan sa Bibliya. Tagda, pananglitan, ang doktrina sa Trinidad. Sumala sa ginaingon sa The Encyclopædia Britannica (ika-15ng Edisyon): “Ang pulong Trinidad o ang tataw nga doktrina dili makita sa Bag-ong Testamento, si Jesus ug ang iyang mga sumusunod walay katuyoan sa pagsupak sa Shema sa Daang Testamento: ‘Pamati, Oh Israel: Ang Ginoo sa atong Diyos maoy usa ka Ginoo’ (Deut. 6:4).” Ang Trinidad wala mahimong opisyal nga pagtulon-an sa iglesya hangtod sa ikaupat nga siglo K.P. Ngani, maoy tungod sa bahin sa pagkamadungganon ug impluwensiya sa Romanong emperador Constantino nga ang bakak nga doktrina giporma sa Konsilyo sa Nicaea sa 325 K.P.

Ang pagtulon-ang Trinidad nagpahinabo nga daghang sakop sa iglesya, matinud-anong mga nangita sa kamatuoran, mawad-ag pagsalig sa ilang mga ministro. Kini nahitabo sa usa ka batan-ong babaye sa South Africa nga dili makatuo nga ang iyang relihiyon, ang Dutch Reformed Church, nagtudlo sa makalibog nga pagtulon-an sama sa Trinidad hangtod nga usa sa mga Saksi ni Jehova naghatag kaniyag dokumentadong pamatuod nga kini mao gayod ang kahimtang! Ang usa ka tigulang retiradong abogado, nga taga-South Africa usab, miluwat gikan sa iyang iglesya tungod kay “ang lainlaing naandang mga doktrina nga gitudlo sa mga iglesya bug-os sayop ug malimbongon.”

Ang laing bakak nga pagtulon-an sa Kakristiyanohan mao ang impiyernong-kalayo. Bisan tuod wala iwali o tuohi nga kaylap kay sa nangagi, kini mao gihapon ang opisyal nga pagtulon-an sa kadaghanang iglesya. Kini nagaangkon nga sa pagkamatay ang lawas mamatay apan ang kalag, kay dili mamatay, magpadayong buhi, ug kadtong sa nangagi nagkinabuhig daotang kinabuhi pagasakiton sa nagdilaab nga kalayo hangtod sa hangtod. Nagtuo ka ba niana? Labi pang hinungdanon, matuod ba kana? Dili sumala sa Bibliya, nga nagaingon: “Ang kalag nga makasala​—kana mismo mamatay.” (Ezekiel 18:4, 20) Dugang pa, ang dinasig nga apostol Pablo misulat: “Ang bayad sa sala mao ang kamatayon”​—dili ang impiyernong-kalayo!​—Roma 6:23.

Atong hisgotan karon kon unsang mga sukdanan ang kinahanglang kab-oton sa matuod Kristohanong mga ministro.

Kasulatanhong mga Kinahanglanon sa Matuod nga mga Ministro

Ang Ingles nga pulong “minister” maoy usa ka hubad sa Gregong pulong “di·aʹko·nos,” nga dili piho ang kagikan. Kini nagatumong sa usa nga nagatuman sa mga sugo sa lain, ilabina sa usa ka agalon. Busa, ang pulong sa Bibliya nagahisgot sa tino sa usa ka sulugoon. Ang paggamit sa pulong diha sa Bibliya nagapasabot sa usa nga dili mohunong sa mapaubsanong pag-alagad sa bug-os sa uban. Gipasiugda ni Jesus ang panginahanglan sa maong mapaubsanong pag-alagad, sumala sa gipakita sa mosunod nga panig-ingnan.

Usa ka adlaw, sa dayon nang mamatay si Jesus sa kahoy sa pagsakit, ang inahan ni Santiago ug Juan miduol kaniya ug miingon: “Imando nga kining duha ko ka anak magalingkod unta, ang usa sa imong tuo nga kamot ug ang usa sa imong wala, diha sa imong gingharian.” Nasuko niadto ang ubang tinun-an. Dayon malulutong gitudloan sila ni Jesus ug hinungdanong pagtulon-an. Siya nagtigom kanila ug miingon: “Si bisan kinsa nga buot mahimong dako sa inyong taliwala kinahanglang mahimong inyong alagad, ug si bisan kinsa nga mahimong una sa inyong taliwala kinahanglang mahimong inyong ulipon.”​—Mateo 20:20, 21, 24-27.

Sa usa sa iyang nahitala, makapalig-ong mga pakigpulong publiko, gipasidan-an ni Jesus ang mamiminaw mahitungod sa mga eskriba ug mga Pariseo. Gipunting usab niya ang pipila sa iladong mga sayop niining bakak, salingkapaw nga mga ministro. Gibatbat niya sila ingon nga hambogiro kaayo ug mapugsanon ug kanunay gustong mailado.​—Mateo 23:1-7.

Karong adlawa, daghang klerigo, ilabina ang mga pari sa Iglesya Katolika ug, sa pila ka kaso, mga Anglikano, nagabaod nga sila tawgon nga “Padre.” Pananglitan, usa ka pari sa Iglesya sa Inglaterra sa Mozambique, sa gisukna pila ka tuig nga miagi sa usa sa mga Saksi ni Jehova kon nganong gigamit niya ang titulong “Padre,” mitubag: “Magarbohon ako niana!” Ug, siyempre, ilado na nga ang papa sa Roma nagakalipay nga pagatawgon nga “Santo Papa”​—bisan pa sa instruksiyon ni Jesus ngadto sa iyang mga tinun-an nga “walay bisan kinsa sa yuta nga tawgon nga inyong amahan, sanglit usa lamang ang inyong Amahan, ug siya anaa sa langit.” Gidugang ni Jesus kining paninugdang prinsipyo: “Si bisan kinsa nga nagabayaw sa iyang kaugalingon pagapaubson.”​—Mateo 23:9-12, The Jerusalem Bible.

Ang mga Babaye Angay Bang Ordinahan?

Sa dili pa dugay, may pag-uswag sa gidaghanon sa mga babaye nga giordinahan ingong mga membro sa klero. Apan si Pablo nagtugon kang Timoteo: “Dili ko itugot nga ang usa ka babaye magatudlo, o magbuot sa usa ka lalaki.” (1 Timoteo 2:12) Bisan pa niana, kini wala magkahulogang ang usa ka Kristohanong babaye dili makatudlo sa iyang mga anak o makatudlo taliwala sa kadaghanan, apan siya dili angay magtudlo diha sa kongregasyon.

Nan, angay bang ang mga babaye dili gayod mosulti sa Kristohanong mga tigom? Ang mga Saksi ni Jehova nagatuon niining magasina, ang Bantayanang Torre, sa usa sa ilang senemanang mga tigom, nga nagagamit sa mga artikulong gisuplementohan sa mga pangutana sa mga parapo. Ang ministrong nagadumala sa pagtuon, nga kanunayng usa ka igsoong lalaki, nagatawag sa mga membro sa kongregasyon, apil ang mga igsoong babaye, sa pagtubag niining mga pangutanaha. Apan kining mga bayhana wala magtudlo. Sila yanong nagapahayag diha sa ilang mga pulong mismo sa mga hunahuna diha sa artikulo. Bisan ang mga bata gidasig nga moapil sa paghatag sa mga tubag, ug kadaghanan ang ilang mga komento, nga kasagarang mubo ug yano, makaigo sa punto​—sa paggamit ug popular nga pamulong.

Gigamit usab ni Pablo kining pamulong mahitungod sa mga babaye: “Unya, kon may buot nilang mahibaloan, mangutana sila sa ilang mga bana sa balay, kay makauulaw nga ang usa ka babaye mosulti sa kongregasyon.” (1 Corinto 14:35) Kini nagkahulogan nga kon ang mga igsoong babaye dili makasabot o matugaw sa pila ka pamulong nga nabasa o nahimo panahon sa mga tigom, angay dili nila ipatungha ang mga puntong kabingkilan atubangan sa kongregasyon. Hinunoa, angay mangutana sila sa ilang mga bana sa pagtin-aw sa mga butang sa dihang sila anaa sa balay.

Bisan pa niana, may mga higayon nga ang Kristohanong mga babaye makasangyaw ngadto sa mga lalaki. Ang mga Saksi ni Jehova nagagugol ug dakong panahon sa pagsangyaw sa maayong balita sa Gingharian sa balay-balay. Sa dihang ang usa ka babayeng magsasangyaw makahibalag ug usa ka lalaki, kinahanglan bang siya yanong manabi ug molakaw? Siyempre dili. Sa maong kahimtang, siya wala magawali ngadto sa usa ka kongregasyon, kondili ngadto sa usa ka tawo nga tingali usa ka dili-magtutuo. Sa susama, ang usa ka babayeng ministro makatuon sa Bibliya uban sa dili-Kristohanong pamilya bisan pag presente ang amahan.

Si Jesu-Kristo​—Usa ka Masilakong Sulundan

Si Jesus usa ka masilakong sulundan nga maayong atong sundon! Siya mao ang labing maayong magtutudlo, ang labing maayong magsasangyaw, ang labing madasigong trabahante, ug ang labing mahigugmaong magtatambag nga nabuhi sukad sa yuta. Ang pagsunod sa iyang mga lakang maoy dako kaayong pribilehiyo. Naningkamot ka ba sa pagbuhat niana?

Milyonmilyong Saksi ni Jehova nagabuhat sa ilang maarangan sa pagsundog kaniya, bisan pag dili hingpit. Ang iyang mga paagi lahi kaayo sa iya sa kadaghanang klerigo karong adlawa. Wala siya magbagting sa mga lingganay sa simbahan ug maghulat nga moanha ang mga tawo, bisan pag daghan ang nangabot sa ilang kaugalingong pagbuot. Hinunoa, siya miadto sa mga tawo ug nagtudlo kanila diha sa ilang mga balay, sa publikong mga dapit, sa mga bukid, ug sa baybayon sa Dagat sa Galilea. May panahong siya nakigsulti sa mga pundok nga mikabat sa libolibo, sumala sa giilustrar sa ubos.​—Mateo 9:35; 13:36; Lucas 8:1.

Pagtabang sa mga Kabos, mga Masakiton, ug mga Tigulang

Pila kanila ang anaa karong adlawa? Ginatos ka milyon. Ug ang gidaghanon tuling nagatubo samtang ang mga kahimtang sa kalibotan tuling nagakadaotan ug nagsingabot sa iyang hingpit nga kataposan ang presenteng sistema sa mga butang sa gubat sa Armageddon. (Pinadayag 16:16) Ang kinaiyanhong mga katalagman, mga kagutmanan, ug mga epidemya nagadugang sa kadaot ug pag-antos. Ang unang mga Kristohanon kinahanglang mosagubang usab sa maong mga suliran. Sa mga 46 K.P., sa dihang si Claudio mao ang emperador sa Roma, may kaylap nga kagutmanan. Busa, unsay gibuhat sa mga tinun-an? Sila “mihukom, ang matag usa sumala sa maabot niya, sa pagpadalag hinabang ngadto sa mga igsoon nga nagpuyo sa Judea.”​—Buhat 11:27-30.

Sa modernong panahon, ang mga Saksi ni Jehova makadaghan naghatag ug dakong hinabang niadtong nagaantos o nanginahanglan. Dili pa dugay, sa dihang ang Mozambique gidaot sa gubat sibil​—uban sa misangpot nga teribleng kanihit sa pagkaon, biste, mga tambal, ug ubang kinahanglanong butang​—ang mga Saksi ni Jehova sa kanait nga South Africa miayuda sa ilang mga igsoong naglisod. Ang daghang pagkaon, biste, ug ubang butang gikolekta ug gipadala ngadto sa Maputo, ang kaulohang siyudad, sa dagko kaayong mga trak.

Nagatuman sa Tagna sa Bibliya

Oo, ang matuod nga mga ministro sa Diyos karong adlawa dunay kahibulongang pribilehiyo sa pag-apil sa pagtuman sa mga tagna sa Bibliya. Sa unsang paagi? Sa makasaysayanhong okasyon sa dihang nangutana ang mga tinun-an kang Jesus: “Kanus-a ba mahitabo kining mga butanga, ug unsa man ang ilhanan sa imong presensiya ug sa kataposan sa sistema sa mga butang?” siya mitubag nga sa usa ka panahon sa mga gubat sa kalibotan, mga kagutmanan, mga linog, ug pagkamalapason, “kining maayong balita sa gingharian igawali sa tibuok gipuy-ang yuta.” (Mateo 24:3, 14) Gihatag ni Pablo ang panig-ingnan alang sa tanang matuod nga ministro pinaagi sa pagwali “gikan sa balay ngadto sa balay.”​—Buhat 20:20.

Ang mga Saksi ni Jehova ilado sa tibuok kalibotan sa ilang kadasig sa maong buluhatong pagsangyaw. Tingali sila miduaw sa inyong balay. Nanimati ka bang maayo kanila? Kon wala, nganong dili kana buhaton sa sunod panahong moduaw sila? Basin mahingangha ka sa maayong paagi!

[Kapsiyon sa panid 4]

Gibase sa hulagway sa U.S. Army