Mga Pangutana Gikan sa mga Magbabasa
◼ Kinsa “ang napulog-duha” nga gipakitaan ni Jesus, sumala sa gihisgotan sa 1 Corinto 15:5?
Ang pagpakita nga gihisgotan sa 1 Corinto 15:5 mopatim-aw nga mao kanang hitabo nga girekord sa Juan 20:26-29, nga diin nalangkit si Tomas. Apan, kini naghisgot sa mga apostoles ingong usa ka grupo ug hayan naglakip kang Matias.
Sa naghisgot sa pagkabanhaw, misulat si Pablo bahin sa pagpakita ni Jesus sa mga tawo human nga Siya gibanhaw. Ang apostol miingon nga si Kristo “mipakita kang Cephas, ug unya ngadto sa napulog-duha. Tapos niadto mipakita siya ngadto sa kapin sa lima ka gatos ka mga igsoon.”—1 Corinto 15:5, 6.
Taliwala niadtong misunod kaniya ingong mga disipulo, mipili si Jesus ug 12 ka apostoles. (Mateo 10:2-5) Si Judas Iscariote maoy usa sa 12, apan nahimong mabudhion siya, iyang giluiban si Jesus, ug dayon naghikog. (Mateo 26:20-25; 27:3-10) Busa dihang namatay ug nabanhaw si Jesus dihay 11 lamang ka matinumanong mga apostoles ang nabilin gikan sa orihinal nga 12. Mipakita si Jesus sa nagkalainlaing mga disipulo gikan sa iyang pagkabanhaw ug sa pagkayab ngadto sa langit. Tapos niadto nasabtan sa mga apostoles ang panginahanglan sa pagpuli kang Judas. Pinaagi sa pagtultol sa Diyos, si Matias ang napili, ug “siya naihap nga kauban sa napulog-usa ka mga apostoles.”—Buhat 1:6-26.
Ang uban nahibulong nganong misulat si Pablo nga mipakita si Jesus sa “napulog-duha,” sanglit niadtong panahona patay na man si Judas ug wala pa man mapili si Matias. Sa pagkaespisipiko, niadtong higayona diha lamay “napulog-usa ka apostoles” nga sa sinugdan gitudlo ug gipadala ni Jesus.—Lucas 6:13-16.
Normal ang pagsulti sa usa ka grupo ingong usa bisan kon dili presente ang usa ka membro. (“Ang hunta direktiba mihukom . . .” “Ang lawas sa mga ansiano nagtigom . . .”) Busa ang terminong “napulog-duha” hayan gigamit sa paghisgot sa tibuok grupo sa mga apostoles, bisan pag ang usa kun duha dili presente sa maong okasyon. (Itandi sa Buhat 6:1-6.) Dihang unang mipakita si Jesus sa mga disipulo sa usa ka tinakpang lawak, “Si Tomas, ang usa sa napulog-duha, . . . wala mahiuban kanila.” Sa walo ka adlaw sa ulahi presente siya ug nawala ang iyang pagduhaduha. (Juan 20:19-29) Bisag wala pa matudlo si Matias sa pagpuli kang Judas, dugay na siyang disipulo. (Buhat 1:21, 22) Sanglit suod siyang nakauban sa orihinal nga mga apostoles ug wala magdugay siya “naihap nga kauban” nila, ang mahandomong komento ni Jesus bahin sa pagpakita ngadto sa “napulog-duha” hayan naglakip kang Matias.