Ang Hunahuna sa Bibliya

Kon sa Unsang Paagi Matagbaw ang Imong Espirituwal nga Panginahanglan

INGON nga ang tawo nanginahanglag pagkaon, siya usab may espirituwal nga panginahanglan. Apan kon pagkaon ang hisgotan, daghan kaayo ug kapilian. Daghan ba usab kitag kapilian kon maylabot sa pagtagbaw sa atong espirituwal nga panginahanglan? Dili maihap ang relihiyosong mga tradisyon ug mga rituwal sa nagkadaiyang kultura nga gituohang makatagbaw sa atong espirituwal nga panginahanglan.

Alang sa uban dili na importante kon unsang relihiyon o tinuohan ang imong pilion basta nagsimba lang ka sa Diyos. Unsay imong hunahuna? Hinungdanon ba ang pagpilig paagi kon unsaon nimo pagtagbaw ang imong espirituwal nga panginahanglan? Unsay giingon sa Bibliya?

Kon Unsa ang Matuod nga Espirituwalidad

Ang Bibliya, diha sa Genesis 1:27, nagpadayag kon nganong ang tawo dunay espirituwal nga panginahanglan: “Gilalang sa Diyos ang tawo sumala sa iyang larawan, sa larawan sa Diyos iyang gilalang siya; lalaki ug babaye iyang gilalang sila.” Sanglit si Jehova nga Diyos maoy espiritu, ang tawo dili gayod mahisama kaniya kondili mahimong masundog sa mga tawo ang iyang mga hiyas. Gipabilhan ug gipasundayag sa unang tawo nga si Adan ang mga hiyas sa iyang Maglalalang sama sa gugma, kalulot, kaluoy, hustisya, ug pagpugong sa kaugalingon. Aduna usab siyay konsensiya, ang katakos sa pag-ila sa husto ug daotan, ug kana naggiya kaniya sa paggamit sa iyang kagawasan uyon sa mga balaod sa Diyos. Ang maong mga hiyas ug katakos maoy nakapalahi kaniya gikan sa mga hayop ug tungod niana siya makahimo sa pagbuhat sa kabubut-on sa iyang Maglalalang.—Genesis 1:28; Roma 2:14.

Ang Bibliya nagpadayag nga adunay gitagana ang Diyos nga motabang kanato sa pagtagbaw sa atong espirituwal nga panginahanglan. Ang 1 Corinto 2:12-15 naghisgot nga ang usa ka espirituwal nga tawo makadawat sa espiritu nga gikan sa Diyos. Kini nga espiritu mao ang aktibong puwersa sa Diyos, ug gikinahanglan kini aron kita makakat-on sa mga butang bahin sa Diyos. Pinaagi niini maugmad nato ang katakos sa paglantaw sa mga butang sumala sa panglantaw sa Diyos. Apan alang sa tawong pisikal, nga wala makabaton sa espiritu sa Diyos, ang espirituwal nga mga butang maoy kabuangan. Ug ang iyang panglantaw sa mga butang maoy sumala lamang sa tawhanong kaalam.

Busa, bisan pag kita gilalang nga may mga hiyas nga sama sa Diyos, dili nato maugmad ang matuod nga espirituwalidad pinaagi sa kaugalingong paningkamot ug sa tawhanong kaalam. Gikinahanglan ang tabang sa balaang espiritu. Sa pagkatinuod, kadtong nangagpas sa dili-diyosnong mga butang ug sa ilang kaugalingong mga tinguha wala magpagiya sa espiritu sa Diyos, ug tungod niana dili sila makaugmad ug matuod nga espirituwalidad. Sila naulipon sa ilang unodnong mga pangibog ug mga hilig.—1 Corinto 2:14; Judas 18, 19.

Pagtagbaw sa Atong Panginahanglan

Una sa tanan, aron atong matagbaw ang atong espirituwal nga panginahanglan kinahanglan nga ilhon nato si Jehova ingong Maglalalang ug tinubdan sa atong kinabuhi. (Pinadayag 4:11) Busa ang atong kinabuhi may kahulogan lamang kon kita nagbuhat sa iyang kabubut-on. (Salmo 115:1) Kon buhaton nato ang kabubut-on sa Diyos, ang atong kinabuhi dunay direksiyon ug katuyoan. Ang pagbuhat niana maoy sama ra ka hinungdanon sa pagtagbaw sa atong pisikal nga panginahanglan, sama sa pagkaon. Busa si Jesus, nga usa ka espirituwal nga tawo, miingon: “Ang akong pagkaon mao ang pagbuhat sa kabubut-on niya nga nagpadala kanako.” (Juan 4:34) Ang pagbuhat sa kabubut-on sa Diyos nakapalig-on kaniya, nga naghatag kaniyag kalagsik ug katagbawan.

Sanglit kita gilalang man sa larawan sa Diyos, matagbaw usab nato ang atong espirituwal nga panginahanglan kon atong sundogon ang iyang mga hiyas. (Colosas 3:10) Sa paghimo niana, malikayan nato ang mga buhat nga makadaot kanato ug sa atong relasyon sa uban. (Efeso 4:24-32) Kon kita magkinabuhi uyon sa mga sukdanan ni Jehova, mouswag ang atong personalidad ug magmalinawon ang atong hunahuna sanglit hinlo ang atong konsensiya.—Roma 2:15.

Gibutyag ni Jesus ang usa pa ka hinungdanong butang nga makatabang aron matagbaw nato ang atong espirituwal nga panginahanglan. Siya miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mateo 4:4) Kinahanglang atimanon nato kanunay ang atong espirituwalidad. Pinaagi sa Bibliya, si Jehova naghatag ug makapatagbawng tubag sa mga pangutana bahin sa kinabuhi—nga kasagarang ginasukna sa mga tawo.—2 Timoteo 3:16, 17.

Tinubdan sa Tinuod nga Kalipay

Kon ang usa ka tawo gutmon, siya mahimong mokaon ug lami apan dili-sustansiyadong pagkaon. Sa susama, kon kita gigutom sa espirituwal mahimong tagbawon nato kana pinaagi sa pagpakigbahin sa mapuslanong mga kalihokan ug pagsunod sa tawhanong mga pilosopiya nga gituohan natong makapatagbaw sa espirituwal. Apan ingon nga ang dili-sustansiyadong mga pagkaon moresulta sa malnutrisyon, sakit, o mas grabe pa niana, ang pagtagbaw sa atong espirituwal nga panginahanglan sa dili hustong paagi makadaot usab kanato.

Apan kon kita makigsuod kang Jehova nga Diyos, maningkamot sa pagbuhat sa iyang kabubut-on, ug magpagiya kaniya, makaingon kita nga tinuod gayod ang giingon sa Bibliya: “Malipayon kadtong mahunahunaon sa ilang espirituwal nga panginahanglan.”—Mateo 5:3.

NAKAPAMALANDONG KA BA?

◼ Nganong kita adunay espirituwal nga panginahanglan?—Genesis 1:27.

◼ Matagbaw ba nato ang atong espirituwal nga panginahanglan pinaagi sa atong kaugalingong paningkamot?—1 Corinto 2:12-15.

◼ Unsay angay natong himoon aron matagbaw nato ang atong espirituwal nga panginahanglan?—Mateo 4:4; Juan 4:34; Colosas 3:10.

[Blurb sa panid 13]

Ang pagtagbaw sa atong espirituwal nga panginahanglan sa dili hustong paagi makadaot gayod kanato