Diin Nila Gikuha ang Ilang Kusog?

KON imong tan-awon ug maayo ang alibangbang niining letratoha, imong makita nga ang usa sa upat ka pako niini wala gayoy gamit. Bisan pa, ang alibangbang padayon sa pagpaniba ug paglupad. Dili kini talagsaong kaso. Ang mga alibangbang naobserbahan nga naglupadlupad adlaw-adlaw nga kulag 70 porsiento sa ilang pako.

Sa susama, nagpakita ang daghang tawo ug malig-ong espiritu. Bisan pag nag-antos ug grabeng pisikal o emosyonal nga mga suliran, sila wala molunga.​—Itandi ang 2 Corinto 4:16.

Si apostol Pablo mismo nakaagom ug grabeng mga kalisod sa panahon sa iyang misyonaryong mga panaw. Siya gilatigo, gibunalan, gibato, ug gibilanggo. Dugang pa, nakaagom siya ug usa ka matang sa depekto, tingali usa ka suliran sa iyang mga mata, nga kanunayng “tunok sa unod” alang kaniya.​—2 Corinto 12:7-9; Galacia 4:15.

Usa ka Kristohanong ansiano nga ginganlag David, nga nakigbisog sa grabeng mga atake sa depresyon sulod sa daghang tuig, nagtuo nga ang kalig-on ni Jehova hinungdanon alang sa iyang pagkaayo. “Sa daghang higayon, ang gihagoang kalamposan daw nagkahanaw,” misaysay siya. “Sa atubangan niini nga kaluya sa buut, ako bug-os nga misalig kang Jehova, ug tinuod nga gilig-on niya ako. May mga higayon nga nag-ampo ako sa daghang oras. Sa dihang makigsulti ako kang Jehova, ang akong mga pagbati sa kamingaw ug pagkawalay kapuslanan nahupayan. Nakigbisog ako sa mga yugto sa pag-atake sa dagkong kaluya, apan salamat kang Jehova, gikan niining maong kaluya miabot ang kalig-on​—bisan kalig-on sa pagtabang sa uban.”

Gilig-on ni Jehova nga Diyos si Pablo. Busa, siya nakaingon: “Sa dihang ako maluya, niana ako gamhanan.” (2 Corinto 12:10) Oo, ang mga kaluya ni Pablo nagtudlo kaniya sa pagsalig sa hinatag-sa-Diyos nga kalig-on. “Sa tanang butang ako adunay kusog tungod kaniya nga nagahatag ug gahom kanako,” matod sa apostol. (Filipos 4:13) Tino nga si Jehova naghatag ug kalig-on sa iyang mga alagad.