“Ayaw Gayod ug Surender”
SA DIHANG natawo, si Wilma Rudolph gamay kaayo ug masakiton. Siya nakakat-on sa paglakaw sa kuwatro anyos. Unya nagkasakit siya sa scarlet fever ug pulmonya nga grabe kaayo. Bisag nabuhi siya, naparalisis ang iyang wala nga batiis. Desidido nga makalakaw si Wilma, gimasahe sa iyang inahan ang iyang migamay nga batiis ug gitudloan ang iyang tulo pa ka gulang-gulang nga anak sa paghimo niini. Busa upat ang nagpulipuli sa “paghilot kang Wilma” kada adlaw.
Sa nag-otso anyos si Wilma, makalakaw siya nga may sangga sa batiis. Wala magdugay siya makadagan ug makadula. Desidido siya sa pagbuntog sa iyang depekto. Ang ehersisyo nakatabang kaniya, ug ang tambag usab sa iyang inahan: “Ayaw gayod ug surender.”
Wala mosurender si Wilma. Ug sa 1960, sa Olympics sa Roma, Italya, siya nakadawat ug tulo ka medalyang bulawan. Siya nakadaog sa 100- ug 200-ka-metro nga lumba sa dagan ug nakauna sa kataposang bahin sa 400-ka-metro nga relay.
Sa unang gubat sa kalibotan, sa siyete anyos pa siya, si Glenn Cunningham nag-antos sa makamatay nga pagkapaso sa iyang mga batiis. Daghang bulan siyang naghigda sa banig ug gisultihan nga basin dili na siya makalakaw pag-usab. Kada adlaw hiloton sa iyang inahan ang iyang nadaot nga mga kaunoran ug gidasig siya sa paglakaw ug unya pagdagan. Wala mosurender si Glen. Sa pagkamatuod, siya sa kataposan ang nakadaog sa 1,600 ka metrong lumba diha sa lumbaanan sulod sa Madison Square Garden. Ug, sa 1934, siya ang nakakuha sa kinatas-ang rekord sa kalibotan sa usa ka milyang pagdagan.
Sa usa ka panahon sa kinabuhi kitang tanan makaatubang ug mga kakulian sa usa ka matang o sa lain. Kasagaran kini maoy suliran sa panglawas. Inay magpadaog sa kaparotan, pagkamaayo kon desidido kita nga dili gayod mosurender! “Ayaw gayod pagkawala sa kasibot,” misulat si apostol Pablo labot sa espirituwal nga mga paningkamot. “Bisan tuod nagakahugo ang atong pagkatawo nga makita sa gawas [atong pisikal nga lawas], ang atong pagkatawo nga anaa sa sulod ginabag-o [o gihatagan ug lab-as nga kusog] sa adlaw-adlaw.”—2 Corinto 4:16.
[Picture Credit Line sa panid 31]
UPI/Bettmann Newsphotos