Sulat Gikan sa Nagamandong Lawas

Minahal nga mga Igsoon:

Ang atong langitnong Amahan, si Jehova, mao ang kinalabwang panig-ingnan sa gugma. Busa, ang Bibliya nag-ingon: “Ang Diyos gugma.” (1 Juan 4:8) Bisag si Jehova mao ang Labing Gamhanan, ang iyang Pulong wala gayod mag-ingon, “ang Diyos gahom.” Gipasukad niya sa gugma ang iyang pagmando. Dili ikahibulong nga madani gayod kita kaniya!

Makalilipay nga kita dili pugson ni Jehova sa pag-alagad kaniya. Siya dili diktador. Gusto niya nga moalagad kita kaniya kay ato siyang gihigugma. Kana magpakita nga gusto nato ang iyang pagmando kay nagtuo ta nga ang iyang paagi sa pagmando maoy matarong ug mahigugmaon. Dayag kini sukad pa sa sinugdanan sa kasaysayan sa tawo.

Inay pugson ni Jehova si Adan ug Eva sa pagsunod kaniya, iyang gihatagan silag kagawasan sa pagpili. Kon tinuod nilang gihigugma si Jehova ug gipabilhan ang iyang nahimo kanila, ila untang suklan ang tentasyon ni Satanas nga morebelde.

Sa ulahi, si Moises miingon diha sa iyang pagpanamilit sa nasod sa Israel: “Gibutang ko sa imong atubangan niining adlawa ang kinabuhi ug ang kaayohan, ug ang kamatayon ug ang kadaotan.” (Deut. 30:15) Sila may kagawasan sa pagpili kon unsay gusto nilang pagkinabuhi. Sa susama, si Josue miingon sa mga Israelinhon: “Kon daotan sa inyong mga mata nga moalagad kang Jehova, pagpili alang sa inyong kaugalingon karong adlawa kon kinsay inyong alagaran.” Agig tubag, ang katawhan miingon: “Halayo ra alang kanamo nga mobiya kang Jehova.” (Jos. 24:15, 16) Kana usab ang atong pagbati karon. Tungod kay atong gihigugma si Jehova, “halayo ra” kanato nga mobiya kaniya.

Ingong sakop sa Kristohanong kongregasyon, nahibalo kita kon unsay nalangkit sa atong kagawasan sa pagpili. Bisag ang mga ansiyano may katungod sa pagtambag ug pagdisiplina, dili sila angayng modominar o mokontrolar sa kinabuhi o pagtuo sa uban. Si apostol Pablo misulat: “Dili nga kami mao ang mga agalon sa inyong pagtuo, kondili kami mga isigkamagbubuhat alang sa inyong kalipay, kay kamo nagabarog tungod sa inyong pagtuo.”—2 Cor. 1:24.

Pagkamakalilipay ang pagbuhat sa butang nga gusto natong buhaton imbes napugos lang sa paghimo niana! Si Jehova nag-awhag kanato sa pagbuhat kon unsay maayo tungod sa gugma. Gipasiugda kini diha sa inspiradong mga pulong ni Pablo: “Kon ihatag ko ang tanan kong mga gipanag-iya aron pakaonon ang uban, ug kon itugyan ko ang akong lawas, aron ako makapanghambog, apan walay gugma, kini dili magapulos kanako.”—1 Cor. 13:3.

Makahatag gayod ug dakong kalipay ug kadayeganan kang Jehova nga ang milyonmilyong igsoon nag-alagad kaniya sa tibuok kasingkasing!

Tungod niini, gihigugma usab ni Jehova ang tanang alagad niya, lakip kaninyong mga bata ug tin-edyer nga nagpakita nga gihigugma ninyo si Jehova imbes ang kalibotan ug ang tanang gitanyag niini alang sa inyong katagbawan. Makasalig mo nga kami nahigugma usab kaninyo.—Luc. 12:42, 43.

Tungod sa inyong gugma kang Jehova, kamong tanang igsoon—lalaki, babaye, ug batan-on—nakagugol sa miaging tuig ug 1,748,697,447 ka oras sa pagsangyaw sa maayong balita. May 7,782,346 nga nakigbahin sa pagsangyaw sa tibuok yuta. Kami nalipay nga 268,777 ang nagpabawtismo isip simbolo sa ilang pagpahinungod kang Jehova, apil ang daghang batan-on. Nagpasabot kini nga sa aberids, 5,168 ang nabawtismohan kada semana. Pagkamakalilipay gayod kini!

Niining panahon sa kataposan, ang katawhan sa Diyos nagsagubang ug daghang problema, kalisdanan, paglutos, sakit, ug pagkatigulang. Apan kita determinadong dili “mosibog” o “moangka.” Kamong tanan amo gayong gihigugma.—Heb. 10:39; 2 Cor. 4:16.

Inyong mga igsoon,