Mga Alagad sa Diyos—Usa ka Organisado ug Malipayong Katawhan
“Malipayon ang katawhan kansang Diyos mao si Jehova!”—SALMO 144:15.
1, 2. (a) Nganong si Jehova may katungod nga magbutang ug mga sukdanan alang sa iyang mga alagad? (b) Unsa ang duha sa mga hiyas ni Jehova nga ilabinang buot natong sundogon?
SI Jehova mao ang Unibersohanong Soberano, ang labing gamhanang Diyos, ang Maglalalang. (Genesis 1:1; Salmo 100:3) Tungod niana, siya may katungod sa paghatag ug mga sukdanan sa kagawian alang sa iyang mga alagad, nga nasayod kon unsay labing maayo alang kanila. (Salmo 143:8) Ug siya mao ang ilang Labing Dakong Panig-ingnan kansang mga hiyas kinahanglang sundogon nila. “Pagkahimong mga tigsundog sa Diyos, ingon nga hinigugmang mga anak,” misulat ang usa ka apostol.—Efeso 5:1.
2 Ang usa ka hiyas sa Diyos nga kinahanglan natong sundogon nalangkit sa pag-organisar. Siya ‘dili Diyos sa kasamok.’ (1 Corinto 14:33) Sa dihang mainampingon kitang maniid kon unsay gilalang sa Diyos, kita matukmod sa paghinapos nga siya mao ang labing organisadong Persona sa uniberso. Sa laing bahin, ang laing hiyas sa Diyos nga buot niyang sundogon sa iyang mga alagad mao ang iyang kalipay, kay siya mao “ang malipayon nga Diyos.” (1 Timoteo 1:11) Busa, ang iyang abilidad sa pag-organisar gitimbangan sa kalipay. Walay usa ka hiyas ang gihimong labaw nga magadaot sa laing hiyas.
3. Sa unsang paagi ang daghag-bituon nga kalangitan nagapasundayag sa abilidad sa Diyos sa pag-organisar?
3 Ang tanan nga gibuhat ni Jehova, gikan sa kinadak-an ngadto sa kinagamyan, naghatag ug pamatuod nga siya usa ka Diyos sa organisasyon. Tagda, pananglitan, ang makitang uniberso. Kini adunay linibo ka bilyong bituon. Apan wala kini magkatibuagsa bisan diin na lang. Ang astrophysicist nga si George Greenstein nag-ingon nga adunay “usa ka sumbanan ang pagkaorganisar sa mga bituon.” Sila giorganisar ngadto sa mga pundok nga gitawag ug mga galaksiya, nga ang pipila adunay ginatos ka bilyong bituon. Ug gibanabana nga adunay binilyong galaksiya! Ang mga galaksiya giorganisar usab, nga ubay-ubay kanila (gikan sa pipila ngadto sa linibo) gipundok ngadto sa mga pungpong sa mga galaksiya. Ug ang mga pungpong sa mga galaksiya gituohang giorganisar ngadto sa mas dagko pa ganing mga pundok nga gitawag ug dagkong mga pungpong.—Salmo 19:1; Isaias 40:25, 26.
4, 5. Paghatag ug mga panig-ingnan sa organisasyon taliwala sa buhing mga butang sa yuta.
4 Ang maayo kaayong pag-organisar sa mga linalang sa Diyos makita bisan diin, dili lamang diha sa makitang kalangitan kondili dinhi usab sa yuta, uban sa dili-maisip nga buhing mga butang niini. Mahitungod niining tanan, si Paul Davies, usa ka propesor sa pisika, misulat nga ang mga tigpaniid “nalisang” sa “kahalangdon ug makuting organisasyon sa pisikal nga kalibotan.”—Salmo 104:24.
5 Tagda ang pipila ka panig-ingnan sa “makuting organisasyon” nga makaplagan diha sa buhing mga butang. Ang siruhano sa utok nga si Joseph Evans nagpahayag bahin sa tawhanong utok ug sa taludtod: “Ang katinuod sa dakong kahusay makapahingangha.” Bahin sa mikroskopikong buhing selula, ang bakteryologo nga si H. J. Shaughnessy miingon: “Ang kakomplikado ug matahom nga kahusay sa kalibotan sa mga mikrobyo kahibulongan kaayong pagkahimo nga kini nagpadayag nga bahin gayod sa hinimo sa Diyos nga sistema.” Ug ang biyologo sa molekula nga si Michael Denton nag-ingon bahin sa genetic code (DNA) sulod sa selula: “Episyente kaayo kini nga ang tanang impormasyon . . . nga gikinahanglan sa pagtino sa desinyo sa tanang matang sa mga organismo nga naglungtad sukad dinhi sa planeta . . . masulod sa usa ka kutsarita ug may luna pa gani alang sa tanang impormasyon sa tanang libro nga nasulat sukad.”—Tan-awa ang Salmo 139:16.
6, 7. Unsang organisasyon ang gipakita taliwala sa espiritung mga linalang, ug sa unsang paagi sila nagpahayag ug apresasyon sa ilang Magbubuhat?
6 Dili lang kay giorganisar ni Jehova ang iyang materyal nga mga linalang kondili giorganisar usab niya ang iyang espirituhanong mga linalang sa langit. Ang Daniel 7:10 nagpahibalo kanato nga ang mga manulonda sa gidaghanon nga ‘napulo ka libo ka napulo ka libo nagabarog sa atubangan ni Jehova.’ Ang usa ka gatos ka milyong gamhanang espiritung mga linalang nagaalagad, nga ang matag usa gitudlo sa buluhatong angay kaniya! Makapahingangha ang paghunahuna sa katakos nga gikinahanglan sa pag-organisar sa maong gidaghanon. Sa katukma, ang Bibliya nag-ingon: “Dayega si Jehova, Oh kamong mga manulonda niya, nga gamhanan, nga nagatuman sa iyang pulong, pinaagi sa pagpatalinghog sa tingog sa iyang pulong. Dayega si Jehova, kamong tanang [manulondang] panon niya, kamong mga alagad niya, nga nagabuhat sa iyang kabubut-on.”—Salmo 103:20, 21; Pinadayag 5:11.
7 Pagkanindot nga pagkaorganisar ug pagkaepisyente ang mga buhat sa Maglalalang! Dili ikatingala nga ang gamhanang espirituhanong mga linalang sa langit nagapahayag diha sa katingalahan ug mapinasakopong paagi: “Takos ikaw, Jehova, nga mismo among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.”—Pinadayag 4:11.
8. Unsang mga panig-ingnan ang nagpakita nga giorganisar ni Jehova ang iyang mga alagad sa yuta?
8 Si Jehova nag-organisar usab sa iyang mga alagad sa yuta. Sa dihang gipahinabo niya ang Lunop sa adlaw ni Noe niadtong 2370 W.K.P., si Noe ug ang lain pang pito ka tawo nakalabang-buhi sa Lunop ingong pamilyahanong organisasyon. Sa Exodo niadtong 1513 W.K.P., si Jehova nagpagula ug minilyon sa iyang katawhan gikan sa pagkaulipon sa Ehipto ug naghatag kanilag detalyadong mga kasugoan aron maorganisar ang ilang adlaw-adlawng mga kalihokan ug pagsimba. Ug sa ulahi, didto sa Yutang Saad, tinagpulo ka libo kanila ang giorganisar alang sa linain nga pag-alagad sa templo. (1 Cronicas 23:4, 5) Sa unang siglo, ang Kristohanong mga kongregasyon giorganisar ilalom sa langitnong pagtultol: “Iyang gihatag ang pipila ingong mga apostol, ang pipila ingong mga propeta, ang pipila ingong mga tig-ebanghelyo, ang pipila ingong mga pastol ug mga magtutudlo, alang sa pagpasibo ug balik sa mga balaan, alang sa ministeryal nga buluhaton.”—Efeso 4:11, 12.
Modernong-Adlaw nga mga Alagad Giorganisar Usab
9, 10. Sa unsang paagi giorganisar ni Jehova ang iyang katawhan sa atong panahon?
9 Sa susama, si Jehova nag-organisar sa iyang modernong-adlawng mga alagad aron sila makabuhat sa iyang buluhaton sa atong adlaw sa epektibong paagi—pagsangyaw sa maayong balita sa iyang Gingharian sa dili pa niya taposon kining presenteng dili-diyosnong sistema sa mga butang. (Mateo 24:14) Tagda kon unsay nalangkit niining tibuok-yutang buluhaton ug kon unsa ka hinungdanon ang maayong organisasyon. Minilyong lalaki, mga babaye, ug mga bata ang ginabansay sa pagtudlo sa mga kamatuoran sa Bibliya ngadto sa uban. Aron sa pag-abag niining maong pagbansay, daghan kaayong mga Bibliya ug binase-sa-Bibliyang mga publikasyon ang gipatik. Aw, ang matag isyu sa Ang Bantayanang Torre gipatik karon sa kapin sa 16 ka milyon diha sa 118 ka pinulongan, ug ang Pagmata! mga 13 ka milyon diha sa 73 ka pinulongan. Halos tanang isyu gipatik nga dungan aron nga halos tanang alagad ni Jehova makadawat sa samang impormasyon sa samang panahon.
10 Dugang pa, kapin sa 73,000 ka kongregasyon sa mga Saksi ni Jehova sa tibuok kalibotan ang giorganisar nga magtigom nga regular alang sa instruksiyon sa Bibliya. (Hebreohanon 10:24, 25) May linibo usab ka dagkong panagkatigom—sirkitong mga asembliya ug distritong mga kombensiyon—matag tuig. Anaa ang dinagko tibuok-yutang pagpanukod sa bag-o o gipanindot nga mga Kingdom Hall, mga Assembly Hall, mga balayng Bethel, ug mga pasilidad alang sa pag-imprinta ug mga literatura sa Bibliya. Adunay mga tunghaan alang sa dugang pagbansay sa mga magtutudlo sa Bibliya, sama sa Watchtower Bible School of Gilead alang sa mga misyonaryo ug sa Tunghaan sa Payunir nga Pag-alagad, nga ginahimo sa mga kayutaan sa tibuok yuta.
11. Unsang umaabot nga kaayohan ang modangat gumikan sa pagkat-on sa maayong pag-organisar karon?
11 Pagkamaayong pagkaorganisar ni Jehova ang iyang katawhan sa yuta sa ‘pagbuhat sa bug-os sa ilang ministeryo,’ nga gitabangan sa iyang nagaalagad nga mga manulonda! (2 Timoteo 4:5; Hebreohanon 1:13, 14; Pinadayag 14:6) Pinaagi sa pagtudlo sa iyang mga alagad sa mga paagi sa maayong organisasyon karon, ang Diyos nagapalampos ug lain pang butang. Ang iyang mga alagad ginaandam na pag-ayo aron nga sa dihang sila makalabang-buhi sa kataposan niining sistema sa mga butang, sila mahimong organisado na sa pagsugod sa kinabuhi sa bag-ong kalibotan. Unya, sa organisadong paagi ilalom sa pagtultol ni Jehova, sila magsugod sa pagtukod sa tibuok-yutang Paraiso. Sila usab mahimong andam na kaayo sa pagtudlo sa detalyadong mga kinahanglanon sa Diyos alang sa kinabuhi ngadto sa binilyong katawhan nga pagabanhawon gikan sa mga patay.—Isaias 11:9; 54:13; Buhat 24:15; Pinadayag 20:12, 13.
Organisado Apan Malipayon
12, 13. Nganong makaingon kita nga buot ni Jehova nga magmalipayon ang iyang katawhan?
12 Bisan tuod si Jehova maoy usa ka talagsaong magbubuhat ug maayo kaayong organisador, siya dili tig-a ug kasingkasing, estrikto, o minakina. Hinunoa, siya maoy mabination, malipayon kaayong Persona nga interesado sa atong kalipay. “Siya aduna may kahangawa kaninyo,” mipahayag ang 1 Pedro 5:7. Makita nato ang iyang kahangawa ug ang iyang tinguha nga ang iyang mga alagad magmalipayon diha sa iyang gibuhat alang sa mga tawo. Pananglitan, sa dihang gilalang sa Diyos ang hingpit nga lalaki ug babaye, gibutang niya sila sa usa ka paraiso sa kahimuot. (Genesis 1:26-31; 2:8, 9) Gihatagan niya sila sa tanan nilang gikinahanglan sa paghimo kanilang malipayon kaayo. Apan nawala kanila ang tanan pinaagi sa rebelyon. Ingong resulta sa ilang sala, atong napanunod ang pagkadili-hingpit ug kamatayon.—Roma 3:23; 5:12.
13 Bisan tuod dili hingpit karon, kitang mga tawo makakaplag gihapon ug kalipay diha sa gibuhat sa Diyos. Adunay daghang butang nga magpalipay kanato—dagkong mga bukid; matahom nga mga lanaw, mga suba, mga dagat ug mga baybayon; buloknon, humot nga mga bulak ug ubang nagkalainlaing mga tanom; dagayang lamiang mga pagkaon; maanindot nga mga pagsalop sa adlaw nga dili kita kapoyan sa pagtan-aw; ang daghag-bituon nga kalangitan nga masud-ong nato sa kagabhion; ang daghan kaayong matang sa kahayopan ug madanihong mga nati nga magduladula; makainspirar nga musika; makapainteres ug mapuslanong trabaho; maayong mga higala. Dayag nga ang Usa nga naghikay sa maong mga butang maoy malipayong indibiduwal nga malingaw sa paglipay sa uban.
14. Unsang pagkatimbang ang gipangayo ni Jehova kanato diha sa pagsundog kaniya?
14 Busa, ang organisado nga pagkaepisyente dili lamang mao ang gitinguha ni Jehova. Buot usab niya nga magmalipayon ang iyang mga alagad, maingon nga siya malipayon. Dili siya buot nga organisahon nila ang mga butang sa panatikong paagi nga makawala sa ilang kalipay. Kinahanglang timbangan sa mga alagad sa Diyos ang mga kabatid sa pag-organisar sa kalipay, sama sa iyang gibuhat, kay kon diin ang iyang gamhanang balaang espiritu, anaa ang kalipay. Sa pagkamatuod, ang Galacia 5:22 nagpakita nga ang ikaduhang bunga sa balaang espiritu sa Diyos nga nagalihok diha sa iyang katawhan mao ang “kalipay.”
Ang Gugma Nagapamungag Kalipay
15. Nganong hinungdanon kaayo ang gugma sa atong kalipay?
15 Makapainteres kaayo ang pagmatikod nga ang Bibliya nagaingon: “Ang Diyos gugma.” (1 Juan 4:8, 16) Wala gayod kini mag-ingon: “Ang Diyos organisasyon.” Ang gugma maoy labing dakong hiyas sa Diyos, ug kinahanglang sundogon kini sa iyang mga alagad. Mao kanay hinungdan nga ang unang bunga sa espiritu sa Diyos nga gilista sa Galacia 5:22 mao ang “gugma,” nga gisundan sa “kalipay.” Ang gugma magapamungag kalipay. Sa dihang sundogon nato ang gugma ni Jehova sa atong mga pagpakiglabot sa uban, mosunod ang kalipay, kay ang mahigugmaong mga tawo maoy malipayong mga tawo.
16. Giunsa pagpakita ni Jesus ang kahinungdanon sa gugma?
16 Ang kahinungdanon sa pagsundog sa diyosnong gugma gihimong panguna diha sa mga pagtulon-an ni Jesus. Siya miingon: “Ingon sa gitudlo sa Amahan kanako ako nagapamulong niining mga butanga.” (Juan 8:28) Unsa, ilabina, ang gitudlo kang Jesus nga, sa baylo, iyang gitudlo sa uban? Kana mao nga ang duha ka kinadak-ang sugo maoy higugmaon ang Diyos ug higugmaon ang silingan. (Mateo 22:36-39) Gipakita ni Jesus ang maong gugma. Matud niya: “Akong gihigugma ang Amahan,” nga nagpamatuod niana pinaagi sa pagbuhat sa kabubut-on sa Diyos hangtod sa kamatayon. Ug gipakita niya ang iyang gugma alang sa katawhan pinaagi sa pagpakamatay alang kanila. Giingnan ni apostol Pablo ang mga Kristohanon sa Efeso: ‘Si Kristo nahigugma kaninyo ug mitugyan sa iyang kaugalingon alang kaninyo.’ (Juan 14:31; Efeso 5:2) Busa, giingnan ni Jesus ang iyang mga sumusunod: “Mao kini ang akong sugo, nga maghigugmaay kamo sa usag usa ingon sa akong paghigugma kaninyo.”—Juan 15:12, 13.
17. Giunsa pagpakita ni Pablo nga hinungdanon ang pagpahayag ug gugma sa uban?
17 Gipahayag ni Pablo kon unsa ka hinungdanon kining diyosnong gugma pinaagi sa pag-ingon: “Kon ako nagasulti diha sa mga dila sa mga tawo ug sa mga anghel apan walay gugma, ako nahimong usa ka nagatunog nga tulunggong tumbaga o usa ka nagapangkaay nga piyangpiyang. Ug kon ako may gasa sa pagpropesiya ug sinati sa tanang sagradong mga tinago ug sa tanang kahibalo, ug kon gibatonan ko ang tanan nga pagtuo aron ilalin ang mga bukid, apan walay gugma, ako walay kapuslanan. Ug kon akong ihatag ang tanan kong mga gipanag-iya aron pakaonon ang uban, ug kon itugyan ko ang akong lawas, aron ako makapanghambog, apan walay gugma, wala gayoy gikapulos kanako. . . . Nagapabilin ang pagtuo, paglaom, gugma, kining tulo; apan ang kinalabwan niini nila mao ang gugma.”—1 Corinto 13:1-3, 13.
18. Unsay atong madahom gikan kang Jehova nga magdugang sa atong kalipay?
18 Sa dihang sundogon nato ang gugma ni Jehova, makasalig kita sa iyang gugma kanato, bisan sa dihang masayop kita, kay siya maoy “usa ka Diyos nga maluluy-on ug mapuangoron, mahinay sa pagkasuko ug dagaya sa mahigugmaong kalulot ug kamatuoran.” (Exodo 34:6) Kon kita sinserong maghinulsol sa dihang kita masayop, ang Diyos dili mahinumdom niini kondili mahigugmaong magpasaylo kanato. (Salmo 103:1-3) Oo, “si Jehova malumo kaayo sa pagmahal ug maluluy-on.” (Santiago 5:11) Ang pagkasayod niini makapalipay kanato.
Igoigo nga Kalipay Karon
19, 20. (a) Nganong ang bug-os nga kalipay dili posible karon? (b) Giunsa pagpakita sa Bibliya nga kita makabaton ug igoigo nga kalipay niining panahona?
19 Hinunoa, posible bang magmalipayon karong adlawa, samtang nagkinabuhi kita sa kataposang mga adlaw niining tugob-sa-krimen, mapintas, imoral nga kalibotan ilalom ni Satanas, diin giatubang nato ang sakit ug kamatayon? Siyempre, dili kita makadahom karon sa gidak-on sa kalipay nga maglungtad unya sa bag-ong kalibotan sa Diyos, sama sa gitagna sa iyang Pulong: “Ania karon magalalang ako ug bag-ong mga langit ug usa ka bag-ong yuta; ug ang unang mga butang dili na pagahinumdoman, ni motungha pa sa kasingkasing. Apan paglipay, kamong katawhan, ug pagmaya sa walay kataposan diha sa akong gilalang.”—Isaias 65:17, 18.
20 Ang kalipay nga mabatonan sa mga alagad sa Diyos karon maoy igoigo o relatibo tungod sa ilang pagkasayod sa iyang kabubut-on ug pagkabaton ug tukmang kahibalo sa kahibulongang mga panalangin nga moabot sa dili madugay diha sa iyang paraisonhong bag-ong kalibotan. (Juan 17:3; Pinadayag 21:4) Mao kanay hinungdan nga makaingon ang Bibliya: “Oh Jehova sa mga panon, malipayon ang tawo nga nagasalig kanimo,” “malipayon ang tanan nga nagakahadlok kang Jehova, kinsa nagalakaw sa iyang mga dalan,” “malipayon ang mga malumog-buot, sanglit magapanunod sila sa yuta.” (Salmo 84:12; 128:1; Mateo 5:5) Busa, bisan pa sa malisod nga mga kahimtang karon nga kinahanglan natong pakigbisogan, makabaton kita ug igoigong gidak-on sa kalipay. Bisan pag mahitabo kanato ang daotang mga butang, dili kita maguol sama niadtong wala makaila kang Jehova ug wala makabaton ug paglaom sa walay-kataposang kinabuhi.—1 Tesalonica 4:13.
21. Sa unsang paagi ang paghatag sa ilang kaugalingon makadugang sa kalipay sa mga alagad ni Jehova?
21 Ang kalipay modangat usab sa mga alagad ni Jehova tungod kay sila naggugol ug panahon, kusog, ug kahinguhaan sa pagtudlo sa mga kamatuoran sa Bibliya ngadto sa uban, ilabina sa mga tawo nga ‘nagapanghupaw ug nagatiyabaw tungod sa mga dulumtanan’ nga ginahimo diha sa kalibotan ni Satanas. (Ezekiel 9:4) Ang Bibliya nag-ingon: “Malipayon si bisan kinsa nga may konsiderasyon sa kabos; sa adlaw sa katalagman si Jehova magatagana kaniya ug kaikyasan. Si Jehova mismo magabantay kaniya ug magatipig kaniyang buhi. Siya ipahayag nga malipayon dinhi sa yuta.” (Salmo 41:1, 2) Sumala sa giingon ni Jesus, “adunay labaw nga kalipay sa paghatag kay sa pagdawat.”—Buhat 20:35.
22. (a) Mahitungod sa kalipay, itandi ang mga alagad sa Diyos niadtong wala mag-alagad kaniya. (b) Sa unsang linaing katarongan nga kita kinahanglang magdahom nga malipay?
22 Busa bisan tuod ang mga alagad sa Diyos dili makadahom ug kinalabwang kalipay niining presenteng panahon, makabaton silag kalipay nga wala mapahimusli niadtong wala mag-alagad sa Diyos. Si Jehova nagpahayag: “Tan-awa! Ang akong mga alagad magasinggit sa kalipay tungod sa maayong kahimtang sa kasingkasing, apan kamo magahilak tungod sa kasubo sa kasingkasing ug kamo magabakho tungod sa tumang kaguol sa espiritu.” (Isaias 65:14) Dugang pa, kadtong nagaalagad sa Diyos adunay linaing katarongan nga malipay karon—nakabaton sila sa iyang balaang espiritu nga “gikahatag sa Diyos niadtong nagasugot kaniya ingong magmamando.” (Buhat 5:32) Ug hinumdomi, kon diin ang espiritu sa Diyos, didto anaa ang kalipay.—Galacia 5:22.
23. Unsay atong hisgotan sa atong sunod nga pagtuon?
23 Diha sa organisasyon sa mga alagad sa Diyos karon, ang hinungdanong bahin gidula sa mga tigulang, sa “mga ansiano,” kinsa nagapanguna diha sa mga kongregasyon, nga nagadugang sa kalipay sa katawhan ni Jehova. (Tito 1:5) Sa unsang paagi kining maong mga bag-ohan mag-isip sa ilang mga responsabilidad ug sa ilang relasyon sa ilang espirituwal nga mga igsoong lalaki ug babaye? Ang atong sunod nga artikulo magahisgot niini.
Unsaon Nimo Pagtubag?
◻ Sa unsang paagi ang paglalang nagapamatuod sa pagkaorganisado ni Jehova?
◻ Giunsa pag-organisar ni Jehova ang iyang mga alagad kaniadto ug karon?
◻ Unsang pagkatimbang ang buot ni Jehova nga ipasundayag nato?
◻ Unsa ka hinungdanon ang gugma sa atong kalipay?
◻ Unsang matanga sa kalipay ang atong madahom sa atong panahon?
[Picture Credit Line sa panid 10]
Ibabaw: Kortesiya sa ROE/Anglo-Australian Observatory, letrato ni David Malin