Pagpakitag Gugma Niadtong Nanginahanglan
ANG mga Kristohanon adunay obligasyon ug pribilehiyo sa pagpakitag gugma ngadto sa ilang mga igsoong lalaki ug babaye nga nanginahanglan. (1 Juan 3:17, 18) Si apostol Pablo misulat: “Buhaton nato ang maayo ngadto sa tanan, apan ilabina kanilang iglabot nato sa pagtuo.” (Galacia 6:10) Usa ka igsoong lalaki nga nag-alagad kang Jehova sa duolag upat ka dekada di pa dugay nakasinati sa gugma sa Kristohanong panag-igsoonay sa pagkasakit sa iyang asawa ug sa misunod nga kamatayon. Siya misulat:
“Sukad nga giatiman ko ang akong asawa diha sa balay sa iyang pagkasakit, wala na ako makapanarbaho sa duolag duha ka bulan. Nahupayan gayod ako sa dihang ang mga higala sa kongregasyon kinabubut-ong mitabang kanamo! Among nadawat ang daghang gasang salapi—‘aron sa pag-ayuda sa ekstrang mga galastohan,’ maoy gisulat diha sa gipataban nga mga kard—bayad sa prenda, sa suga ug tubig, ug ubang galastohan.
“Duha ka semana una pa sa kamatayon sa akong asawa, ang among magtatan-aw sa sirkito miduaw kanamo sa makapadasig nga paagi. Gipasalida pa niya ang mga eslayd nga tan-awon sa kongregasyon sa hinapos sa semana. Nakapaminaw kami sa mga tigom diha sa telepono—lakip na ang mga tigom sa dayon na ang pagsangyaw nga gidumala sa magtatan-aw sa sirkito. Makausa niini, gipasulti niya kadtong tanang presente ug ‘komosta,’ ingong usa ka grupo, ngadto sa akong asawa. Busa, bisan tuod siya nahilain sa pisikal, wala gayod siya mibating nag-inusara.
“Sulod sa usa ka oras human sa iyang kamatayon, halos ang tanang ansiyano didto sa akong balay. Kapin sa usa ka gatos ka igsoong lalaki ug babaye ang mihapit nianang adlawa lamang. Ang pagkaon ‘milagrosong’ gitagana diha sa lamesa alang sa tanan. Dili na nako mahubit ang tanang gasa, mga ekspresyon sa simpatiya, makapahupayng mga pulong, ug mga pag-ampo nga gitanyag alang kanako. Pagkamakapalig-on gayod nila! Sa kataposan kinahanglan nakong ingnan ang mga igsoon sa paghunong na sa pagtaganag mga pagkaon ug pagtabang sa pagpanghinlo sa balay!
“Diin pa kondili sa organisasyon ni Jehova lamang nga atong makaplagan ang maong walay kahakog nga mga ekspresyon sa pagkamabination, kabalaka, ug gugma? Kadaghanang tawo karon nakabaton lamag diyutayng tinuod nga mga higala. Gipanalanginan kita ni Jehova ug dakong pamilya sa espirituwal nga mga igsoong lalaki ug babaye!”—Marcos 10:29, 30.