Ayaw Paghambin ug Kayugot

DAW mas nagakalisod sukad masukad nga malikayang mayugot sa dihang ang usa ka tawo nakapasilo kanato. Ang Bibliya dunay praktikal nga tambag alang sa maong mga kahimtang. “Pagkapungot,” si apostol Pablo misulat, “apan ayaw pagpakasala; ayaw pasalopa ang adlaw nga kamo anaa sa suko nga kahimtang.”​—Efeso 4:26.

Sa dihang ang usa ka tawo makasala kanato, normal lamang nga mobati ug usa ka sukod sa kapungot. Nga si apostol Pablo nag-ingong “pagkapungot” nagpasabot nga ang kasuko usahay tukma​—tingali ingong sanong sa mapihigong pagtratar o sayop nga pagpatuman sa hustisya. (Itandi ang 2 Corinto 11:29.) Apan kon pasagdang dili mahusay, bisan ang makataronganong kasuko mahimong mosangpot sa kadaot, nga motultol sa dakong sala. (Genesis 34:1-31; 49:5-7; Salmo 106:32, 33) Busa, unsay imong mahimo sa dihang mapungot ka?

Sa kadaghanang kaso nga naglangkit sa ginagmayng mga kalapasan, mahimong imong husayon ang kahimtang diha sa imong kasingkasing “ug magpakahilom” o duolon ang nakasala ug hisgotan ang isyu. (Salmo 4:4; Mateo 5:23, 24) Sa bisan haing paagi, labing maayong husayon dayon ang nahitabo aron ang kayugot dili mograbe ug mamunga ug malaglagong mga sangpotanan.​—Efeso 4:31.

Si Jehova dagayang nagapasaylo sa atong mga sala, bisan ang mga sala nga sa kawalay-alamag wala nato maamgohing nahimo. Dili ba usab kita sa samang paagi makapasaylo sa ginagmayng mga kalapasan sa isigkatawo?​—Colosas 3:13; 1 Pedro 4:8.

Makaiikag, ang Gregong pulong alang sa “pagpasaylo” sa literal nagkahulogang “palabyon.” Ang pagpasaylo wala magkinahanglan nga atong pakamenoson o konsentihon ang sayop. Usahay lagmit yano kining maglangkit sa pagpalabay sa kahimtang, nga nakaamgo nga ang paghambin ug kayugot magdugang lamang sa imong palas-anon ug makabungkag sa panaghiusa sa Kristohanong kongregasyon. Dugang pa, makadaot sa imong panglawas ang paghambin ug kayugot!​—Salmo 103:9.