LYDIA

Kini nga babaye ug ang iyang panimalay maoy lakip sa unang mga tawo sa Uropa nga midawat sa Kristiyanidad ingong resulta sa buluhaton ni apostol Pablo didto sa Filipos sa mga 50 K.P. Sa sinugdan siya nagpuyo sa Tiatira, usa ka siyudad sa Asia Minor nga nabantog tungod sa industriya niini sa tina. Sa ulahi, didto sa Filipos sa Macedonia, si Lydia namaligyag purpura, tina o kaha mga besti ug mga panapton nga gitina pinaagi niini. Mopatim-aw nga siya ang ulo sa iyang panimalay (kini mahimong maglakip sa mga ulipon ug mga sulugoon), ug busa, siya lagmit maoy usa ka biyuda o tagsaanon.​—Buh 16:​14, 15.

Tungod kay “usa ka magsisimba sa Diyos,” si Lydia lagmit usa ka Hudiyong kinabig. Tingali dihay pipila lamang ka Hudiyo ug walay sinagoga sa Filipos mao nga sa adlawng Igpapahulay siya ug ang ubang debotadong mga babaye nagtigom didto sa daplin sa suba sa gawas sa siyudad. Sa dihang si apostol Pablo misangyaw niini nga mga babaye, si Lydia namati pag-ayo. Human mabawtismohi uban sa iyang panimalay, siya nangaliyupo kang Pablo ug sa iyang mga kauban sa pag-estar uban kaniya, nga nag-ingon: “Kon inyo akong nahukman nga matinuohon kang Jehova, ari kamo ug estar sa akong balay.” Ang maong tiunay nga tanyag sa pagkamaabiabihon dili gayod madumilian. Ang magsusulat sa Mga Buhat, ang kauban ni Pablo sa panaw nga si Lucas, midugang: “Gipugos gayod kami niya nga moestar.”​—Buh 16:11-15.

Sa ulahi, human makagawas sa bilanggoan si Pablo ug Silas, sila miadto pag-usab sa balay ni Lydia. Didto gidasig nila ang mga igsoon ug dayon mibiya sa Filipos.​—Buh 16:36-40.

Lagmit sa usa ka bahin tungod sa pagkamaabiabihon ni Lydia, si Pablo misulat sa mga taga-Filipos: “Nagpasalamat ako kanunay sa akong Diyos sa matag paghandom ko kaninyo sa matag pangamuyo ko alang kaninyong tanan, samtang nangamuyo ako uban ang kalipay, tungod sa inyong giamot alang sa maayong balita sukad sa unang adlaw hangtod niining gutloa.”​—Flp 1:3-5.