Mga Pangutana Gikan sa mga Magbabasa
Sa Filipos 2:9, si Pablo nag-ingon mahitungod kang Jesus: “Ang Diyos mibayaw kaniya ngadto sa usa ka labaw nga katungdanan ug sa maluluton mihatag kaniya sa ngalan nga labaw sa tanang uban pa nga ngalan.” Unsa kining bag-o nga ngalan? Ug kon si Jesus ubos kang Jehova, sa unsang paagi ang ngalan ni Jesus labaw sa tanang uban pa nga ngalan?
Ang Filipos 2:8, 9 mabasa: “Labaw pa niana, sa dihang iyang [Jesus] nakaplagan ang iyang kaugalingon nga diha sa dagway sa usa ka tawo, siya mipaubos sa iyang kaugalingon ug nagmasinugtanon hangtod sa kamatayon, oo, kamatayon diha sa sakitanang estaka. Tungod niini mismong katarongana usab ang Diyos mibayaw kaniya ngadto sa usa ka labaw nga katungdanan ug sa maluluton mihatag kaniya sa ngalan nga labaw sa tanang uban pa nga ngalan.”
Kining tekstoha wala magkahulogan nga sanglit si Jehova lamang ang adunay ngalan nga bug-os nga labaw sa tanang uban pa nga ngalan, si Jesus mao ra gayod nga persona kang Jehova. Ingon sa gipakita sa konteksto sa Filipos kapitulo 2, nadawat ni Jesus ang iyang binayaw nga ngalan human sa iyang pagkabanhaw. Una pa niana, wala niya kana mabatoni. Sa laing bahin, si Jehova kanunay nga supremo, ug ang iyang posisyon wala gayod mausab. Ang kamatuoran nga nadawat ni Jesus ang ngalan nga mas labaw sa ngalan nga iyang nabatonan una pa sa iyang yutan-ong pag-alagad nagpamatuod nga siya dili sama kang Jehova. Sa dihang miingon si Pablo nga si Jesus gihatagan ug usa ka ngalan nga labaw sa tanang uban pa nga ngalan, iyang gipasabot nga si Jesus niining tungora nagbaton sa kinatas-ang ngalan sa tanang linalang sa Diyos.
Unsa ang hataas nga ngalan ni Jesus? Ang Isaias 9:6 makatabang kanato sa pagtubag. Sa pagtagna bahin sa pag-abot sa Mesiyas, si Jesus, kana nga bersikulo nag-ingon: “Ang prinsipenhong pagmando igatungtong sa iyang abaga. Ug ang iyang ngalan pagatawgon nga Kahibulongang Magtatambag, Makagagahom nga Diyos, Amahan nga Walay Kataposan, Prinsipe sa Pakigdait.” Dinhi ang “ngalan” ni Jesus dunay kalabotan sa iyang hataas nga posisyon ug awtoridad, nga mao usab ang atong pagsabot “sa ngalan nga labaw sa tanang uban pa nga ngalan” nga gihisgotan sa Filipos 2:9. Ang matag tuhod gimandoan sa pagluhod kang Jesus sa pag-ila sa hataas nga posisyon sa awtoridad nga gihatag ni Jehova kaniya—usa ka posisyon sa awtoridad nga mas hataas kay niadtong gihatag sa bisan kinsang ubang linalang. Ang pulong “uban” niini nga hubad wala direktang gihawasan diha sa pasikaranang Gregong teksto, apan kini ang masabot pinaagi sa diwa sa bersikulo. Ang “ngalan” ni Jesus dili labaw sa iyang kaugalingong ngalan kondili labaw sa ngalan sa tanang ubang linalang.
Pagkadako sa atong kalipay nga makigduyog sa tanang matinumanong mga manulonda ug mga tawo sa pagluhod sa pag-ila sa ngalan ni Jesus! Ato kining gihimo pinaagi sa pagpasakop sa atong kaugalingon kang Jesus diha sa binayaw ug gamhanang posisyon nga gihatag kaniya ni Jehova—“alang sa kahimayaan sa Diyos nga Amahan.”—Filipos 2:11; Mateo 28:18.