Pag-awit ug mga Pagdayeg Kang Jehova
“Magaawit ako kang Jehova, kay siya nahimong tinuboy pag-ayo.”—EXODO 15:1.
1. Unsang mga kinaiya ug mga hiyas ni Jehova ang mohatag kanatog katarongan sa pagdayeg kaniya?
NAPULOG-TULO ka beses gihatag sa Salmo 150 ang sugo nga dayegon si Jehova o Ja. Mipatugbaw ang kataposang bersikulo: “Tanang buhing butang—ipadayeg si Ja. Dayegon ninyo si Ja!” Ingong mga Saksi ni Jehova, nasayod kita nga si Jehova takos sa atong pagdayeg. Siya mao ang Unibersohanong Soberano, ang Labing Hataas, ang Hari sa kahangtoran, atong Maglalalang, atong Manggagasa. Siya dili-hitupngan, linain, walay-ikatanding, walay-kapareho sa daghang paagi. Siya nasayod-sa-tanan, gamhanan-sa-tanan, hingpit sa hustisya, ug personipikasyon sa gugma. Siya maoy maayo labaw sa tanan; siya maunongon. (Lucas 18:19; Pinadayag 15:3, 4) Takos ba siya sa atong pagdayeg? Sa pagkatinuod siya takos gayod!
2. Unsang mga katarongan ang atong nabatonan sa pagpahayag ug pagtan-aw ug utang-kabubut-on kang Jehova?
2 Si Jehova takos dili lamang sa atong pagsimba ug pagdayeg kondili hasta usab sa atong pagtan-aw ug utang-kabubut-on ug pasalamat tungod sa tanan nga iyang nabuhat alang kanato. Siya maoy Tighatag sa “matag maayong gasa ug matag hingpit nga hatag.” (Santiago 1:17) Siya mao ang Tuboran, ang Tinubdan, sa tanang kinabuhi. (Salmo 36:9) Ang tanang butang nga gipahimuslan nato ingong mga membro sa tawhanong banay nagagikan kaniya, kay siya mao ang atong Dakong Maglalalang. (Isaias 42:5) Siya mao usab ang Tighatag sa tanang espirituwal nga mga panalangin nga moabot kanato pinaagi sa iyang espiritu, iyang organisasyon, ug iyang Pulong. Aduna kitay kapasayloan sa mga sala pinasukad sa pagtagana niya sa iyang Anak ingong atong lukat. (Juan 3:16) Atong nabatonan ang paglaom sa Gingharian sa ‘bag-ong mga langit ug usa ka bag-ong yuta nga niana magapabilin ang pagkamatarong.’ (2 Pedro 3:13) Kita adunay maayong pakig-uban sa isigka-Kristohanon. (Roma 1:11, 12) Nabatonan nato ang kadungganan ug mga panalangin sa pagkahimo nga iyang mga Saksi. (Isaias 43:10-12) Ug atong nabatonan ang bililhong pribilehiyo sa pag-ampo. (Mateo 6:9-13) Sa pagkatinuod, kita adunay daghang katarongan sa paghatag ug mga pasalamat kang Jehova!
Mga Paagi nga Kita Makadayeg Kang Jehova
3. Sa unsang lainlaing mga paagi makadayeg kita kang Jehova ug makapahayag sa atong pagtan-aw ug utang-kabubut-on kaniya?
3 Sa unsang paagi kita, ingong debotadong mga alagad ni Jehova, magadayeg kaniya ug magapahayag sa atong pagtan-aw ug utang-kabubut-on? Makahimo kita niana pinaagi sa pagpakig-ambit diha sa Kristohanong ministeryo—pagsangyaw sa balay-balay, paghimog mga balik-duaw, pagdumalag mga pagtuon sa Bibliya, ug paghimo sa pagsangyaw sa kadalanan. Makadayeg usab kita kaniya pinaagi sa pagsangyaw sa di-pormal nga paagi kon adunay kahigayonan. Lain pa usab, kita makadayeg kang Jehova pinaagi sa atong matarong nga panggawi, bisan pinaagi sa hapsay ug kasarangang pagpamiste ug pagpamostura sa atong kaugalingon. Ang mga Saksi ni Jehova sagad gidayeg tungod sa pagkasulundan niining mga bahina. Dugang pa, makadayeg kita kang Jehova ug makapasalamat kaniya pinaagi sa pag-ampo.—Tan-awa ang 1 Cronicas 29:10-13.
4. Unsa ang usa sa labing nindot nga mga paagi nga makadayeg kita sa atong mahigugmaong langitnong Amahan?
4 Dugang pa, usa sa labing nindot nga mga paagi nga kita makadayeg sa atong mahigugmaong langitnong Amahan maoy pinaagi sa pagpasidungog kaniya ug sa iyang mga maayong hiyas pinaagig mananoy nga mga awit sa Gingharian. Daghang maghohoni ug mga magsusulat sa musika mouyon nga ang labing nindot nga tulonggon mao ang tingog sa tawo. Ang mga batid sa klasikal nga musika nagtinguha nga mosulat ug mga opera tungod kay adunay dako kaayong katagbawan sa pagpamati sa tingog sa tawo nga nagaawit.
5. Tungod sa unsang mga katarongan angay nga atong isipong ugdang ang atong pag-awit sa mga alawiton sa Gingharian?
5 Pagkadako gayod sa kalipay ni Jehova nga mamati sa mga tawo nga magaawit, ilabina kon sila nagaawit sa mga awit sa pagdayeg ug pagtan-aw ug utang kabubut-on! Nan sa pagkatinuod, kinahanglang isipon natong ugdang ang atong pag-awit sa mga alawiton sa Gingharian panahon sa atong lainlaing mga panagkatigom—mga tigom sa kongregasyon, mga sirkitong asembliya, mga adlaw sa espesyal nga asembliya, distritong mga kombensiyon, ug internasyonal nga mga kombensiyon. Ang atong mga alawiton napuno sa kahimut-anan gayong mga honi, nga ang katahom niana subsob gidayeg sa mga tagagawas. Kon dugang nga hatagan natog bug-os nga pagtagad ang espiritu sa pag-awit sa mga alawiton sa Gingharian, sa dugang hatagan natog kalipay ang uban ug makabenepisyo sa atong kaugalingon.
Pag-awit ug mga Pagdayeg Kang Jehova sa Kapanahonan sa Bibliya
6. Sa unsang paagi gipahayag sa mga Israelinhon ang pagpabili sa pagkaluwas nila sa Pulang Dagat?
6 Ang Pulong sa Diyos nagtug-an kanato nga si Moises ug ang uban pa sa mga Israelinhon miawit nga madaogon bahin sa pagkanaluwas gikan sa kasundalohan ni Paraon sa Pulang Dagat. Ang ilang awit nagsugod sa mga pulong: “Magaawit ako kang Jehova, kay siya nahimong tinuboy pag-ayo. Ang kabayo ug ang nagkabayo niini iyang gibanlod sa dagat. Si Ja mao ang akong kusog ug akong gahom, sanglit siya nahimong akong kaluwasan. Kini mao ang akong Diyos, ug ako magadayeg kaniya.” (Exodo 15:1, 2) Makahanduraw gayod kita sa kadasig ug kangaya sa mga Israelinhon samtang giawit nila kadtong mga pulonga human sa milagroso nilang pagkaluwas!
7. Unsang laing iladong mga higayon nga ang Hebreohanong Kasulatan nagtala sa pagdayeg sa mga Israelinhon kang Jehova pinaagi sa awit?
7 Sa 1 Cronicas 16:1, 4-36, atong mabasa nga si Jehova gidayeg pinaagi sa pag-awit ug pinaagi sa pagtugtog sa musikal nga mga tulonggon sa dihang gidala ni David ang Arka ngadto sa Jerusalem. Masadyaon gayod nga okasyon kadto. May pag-awit usab ug pagdayeg kang Jehova nga dinuyogan sa honi sa tulonggon sa panahon nga gipahinungod ni Haring Solomon ang templo sa Jerusalem. Atong mabasa sa 2 Cronicas 5:13, 14: “Nahitabo nga ang mga magtutunog sa trumpeta ug ang mga mag-aawit daw usa sa pagpahinabo nga ang usa ka lanog madungog sa pagdayeg ug pagpasalamat kang Jehova, ug sa diha nga ilang gipatugbaw ang lanog pinaagi sa mga trumpeta ug mga piyangpiyang ug mga tulonggon sa awit ug sa pagdayeg kang Jehova, ‘kay siya maayo, kay ang iyang mahigugmaong-kalulot maoy sa panahong walay tino,’ ang balay mismo napuno sa usa ka panganod, ang balay mismo ni Jehova, ug ang mga saserdote wala na makapadayon sa pag-alagad tungod sa panganod; kay ang himaya ni Jehova mipuno sa balay sa matuod nga Diyos.” Unsay gipakita niana? Nga si Jehova namati niadtong awit sa pagdayeg ug nahimuot usab niana, sumala sa gipaila sa dili-kinaiyanhong panganod. Sa ulahi, dihay pag-awit sa duha ka koro sa panahon sa inagurasyon sa mga paril sa Jerusalem sa mga adlaw ni Nehemias.—Nehemias 12:27-42.
8. Unsay nagpakita nga ang pag-awit giisip nga ugdang sa mga Israelinhon?
8 Sa pagkamatuod, ang pag-awit maoy hinungdanon kaayong bahin sa pagsimba sa templo nga ang 4,000 ka Levihanon gigahin alang sa musikal nga pag-alagad. (1 Cronicas 23:4, 5) Kana sila maoy moduyog sa mga mag-aawit. Ang musika, ilabina ang mga mag-aawit, nagbaton ug usa ka hinungdanong bahin diha sa pagsimba, dili gayod hinuon aron magsilsil sa mas bug-at nga mga butang sa Kasugoan, kondili aron itagana ang tukmang espiritu alang sa pagsimba. Miabag kadto sa mga Israelinhon sa pagsimba kang Jehova sa madasigong paagi. Matikdi ang pagpangandam ug pagtagad sa detalye nga gihatag sa maong bahin: “Ang gidaghanon nila kauban sa ilang mga igsoon nga nabansay sa pag-awit kang Jehova, ang tanan mga batid, miabot ug duha ka gatos ug kawaloag-walo.” (1 Cronicas 25:7) Matikdi kon unsa ka ugdang ang pag-isip nila sa pag-awit sa pagdayeg kang Jehova. Sila nabansay sa pag-awit ug maoy mga batid!
9. Unsang pasiugda ang gihatag sa pag-awit diha sa Kristohanon Gregong Kasulatan?
9 Pag-abot sa unang siglo sa atong komong panahon, unsay atong masayran? Si Jesus, sa gabii sa pagluib kaniya, bisan pag diha sa hunahuna ang daghan kaayong bug-at nga mga butang, mibati gihapon sa panginahanglan nga taposon ang iyang pagsaulog sa Paskuwa ug ang pagsugod sa Memoryal sa iyang kamatayon pinaagi sa pag-awit ug mga pagdayeg kang Jehova. (Mateo 26:30) Gawas pa, atong mabasa nga “sa mga tungang gabii,” si Pablo ug Silas, human bunali ug bilanggoa, “nag-ampo ug nagdayeg sa Diyos pinaagi sa awit; oo, ang mga binilanggo nakadungog kanila.”—Buhat 16:25.
Pag-awit ug mga Pagdayeg—Usa ka Hinungdanong Bahin sa Atong Pagsimba
10. Unsang mga sugo ang gihatag sa Pulong sa Diyos kon bahin sa pagdayeg kaniya pinaagi sa awit?
10 Gibati mo ba kaha nga ang pag-awit ug mga alawiton sa Gingharian dili kaayo hinungdanon aron imong hatagan kini sa imong kinasingkasing nga pagtagad? Kon mao, dili ba angay nga timbangtimbangon mo pag-usab ang butang, tungod sa gibutang nga bili ni Jehova nga Diyos ug ni Jesu-Kristo diha sa pag-awit ug mga pagdayeg? Ngani, ang Pulong sa Diyos napunog mga sugo sa pagdayeg kang Jehova ug pag-awit ug mga pagdayeg kaniya! Pananglitan, sa Isaias 42:10, atong mabasa: “Pag-awit kang Jehova ug usa ka bag-ong alawiton, ug ang iyang pagdayeg gikan sa kinatumyan sa yuta, kamo nga mangadto sa dagat ug nianang nagpuno niini, kamong mga pulo ug kamong nagapuyo niini.”—Tan-awa usab ang Salmo 96:1; 98:1.
11. Unsang tambag ang gihatag ni apostol Pablo kon bahin sa pag-awit?
11 Si apostol Pablo nasayod nga ang pag-awit makapasadya sa atong galamhan, mao nga sa makaduha siya mitambag kanato bahin sa maong butang. Atong mabasa sa Efeso 5:18, 19: “Padayong magpakapuno sa espiritu, nga magapamulong nganha sa inyong kaugalingon uban sa mga salmo ug mga pagdayeg sa Diyos ug espirituwal nga mga awit, nga magaawit ug magaduyog sa inyong kaugalingon uban sa musika diha sa inyong mga kasingkasing ngadto kang Jehova.” Ug sa Colosas 3:16, atong mabasa: “Papuy-a nga madagayaon nganha kaninyo ang pulong sa Kristo diha sa tanang kaalam. Padayon nga magtudloay ug magpahimangnoay sa usag usa uban ang mga salmo, mga pagdayeg ngadto sa Diyos, espirituwal nga mga awit uban ang pagkamadanihon, nga magaawit diha sa inyong mga kasingkasing ngadto kang Jehova.”
12. Unsang mga pananglitan ang atong nabatonan sa atong mga awit nga nagatabang kanato sa pagtudlo ug pagpahimangno sa usag usa?
12 Matikdi nga sa matag higayon gipunting ni Pablo nga balikbalik ang pag-awit, sa dihang gihisgotan niya ‘ang mga salmo, mga pagdayeg sa Diyos, espirituwal nga mga awit, nga magaawit uban sa musika diha sa inyong mga kasingkasing.’ Gawas pa, giunhan niya ang iyang mga gipamulong ngadto sa mga taga-Colosas pinaagi sa pag-ingon nga pinaagi niini kita makahimo nga “magtudloay ug magpahimangnoay sa usag usa.” Ug kita tinuod nga nagabuhat niana, sumala sa makita sa mga titulo mismo sa atong mga alawiton—“Tanang Kalalangan, Dayega si Jehova!” (numero 5), “Magmalig-on, Dili Matarog!” (numero 10), “Magmasadya sa Paglaom sa Gingharian!” (numero 16), “Dili Mahadlok Kanila!” (numero 27), “Dayega si Jehova nga Atong Diyos!” (numero 100), sa paghatag ug pipila lang ka pananglitan.
13. Sa unsang paagi “ang matinumanon ug maalamong ulipon” nagpakita sa kahinungdanon sa pag-awit ingong bahin sa atong pagsimba?
13 Nahiuyon niining mga sugoa, “ang matinumanon ug maalamong ulipon” mihikay nga ang atong mga panagkatigom—mga tigom sa kongregasyon, mga sirkitong asembliya, mga adlaw sa espesyal nga asembliya, distritong mga kombensiyon, ug internasyonal nga mga kombensiyon—sugdan ug taposon sa pag-awit ug mga alawiton sa Gingharian. (Mateo 24:45) Dugang pa, ang mga alawiton gieskedyul nga awiton sa ubang mga panahon sulod niining mga panagkatigoma. Sanglit ang atong mga tigom sagad magsugod pinaagi sa pag-awit ug usa ka alawiton sa Gingharian, dili ba tinoon nato nga makaabot sa hustong panahon, nga may igong kasayo aron makaambit nianang bahina sa atong pagsimba? Ug sanglit ang mga tigom taposon man pinaagi sa pag-awit, dili ba angay nga magpabilin kita hangtod sa paniklop nga awit ug sa pag-ampo sunod dayon niana?
14. Unsang mga pananglitan ang atong nabatonan sa pagpilig haom nga mga alawiton alang sa atong mga programa?
14 Ang mga awit panahon sa atong mga tigom gipili pag-ayo aron mahiuyon sa programa. Pananglitan, panahon sa “Diyosnong Pagtulon-an” Distritong mga Kombensiyon sa 1993, ang awit numero 191, “Himoa ang Kamatuoran nga Imo Na,” nga nagdasig sa mga Kristohanon nga makigbugno batok kang Satanas, sa kalibotan, ug sa makasasalang unod, nagsunod dayon sa tulo ka pakigpulong nga naghisgot niining mga kaawaya. Sa susama, ang awit numero 164, “Kabataan—Gasang Mahal sa Diyos,” nga daghag tambag alang sa mga ginikanan, misunod human gayod sa usa ka pakigpulong nga nagpasiugda sa mga katungdanan sa mga ginikanan sa pagbansay sa ilang kabataan. Ang awit numero 70, “Sundoga si Jeremias,” maoy nag-una sa sunodsunod nga mga pakigpulong nga gipasukad sa mga tagna ni Jeremias. Ug human sa usa ka simposyum sa lainlaing mga bahin sa atong ministeryo sa Gingharian mao ang awit numero 156, “Buot Ko,” nga usa ka awit nga labot gayod sa pag-alagad. Ang samang pag-amping gihimo sa pagpilig mga alawiton alang sa Pagtuon sa Bantayanang Torre, Tigom sa Pag-alagad, ug sa Tunghaan sa Teokratikanhong Ministeryo. Kini nagpasabot nga sa dihang ang mga ansiano mohatag ug mga pakigpulong publiko ug magpaila sa alawiton nga gamiton sa pagsugod sa programa, angay nga mopili silag usa ka alawiton nga mohaom sa tema sa ilang pakigpulong.
15. Sa unsang paagi ang tsirman sa tigom makapausbaw sa pagpabili alang sa alawiton nga awiton?
15 Sa pagpahibalo sa alawiton nga awiton, ang tsirman makapausbaw sa pagpabili sa alawiton pinaagi sa paghatag sa titulo o tema niini. Kita dili magaawit sa mga numero kondili sa Kasulatanhong mga tema. Makatabang usab sa kongregasyon nga dugang magpabili sa alawiton kon ipahayag ang kasulatan ubos sa titulo. Lain pa usab, ang pila ka pulong nahiangay, aron ang tanan makaduyog sa diwa sa awit.
Ipakita ang Pagpabili sa Pagkamaayo ni Jehova Pinaagi sa Pag-awit
16. Sa unsang paagi kita makaduyog sa espiritu sa atong mga alawiton?
16 Sanglit ang mga pulong sa atong mga alawiton sa Gingharian puno ug kahulogan, kinahanglang ibug-os nato ang pagtagad sa mga pulong samtang ato kanang giawit. Buot natong makaduyog sa espiritu sa matag alawiton. Ang pipila, sama nianang naghisgot sa gugma, usa ka bunga sa espiritu, maoy dulot sa kasingkasing. (Galacia 5:22) Kini atong giawit uban sa lalom nga pagbati ug kainit. Ang uban masadyaon, ug angay nga paningkamotan nato ang pag-awit niini nga malipayon. Ang uban pa maoy maabtikon nagamartsa nga mga alawiton, ug kini pagaawiton nga may kadasig ug dakong pagsalig. Sa atong Tunghaan sa Teokratikanhong Ministeryo, kita gitambagan sa pagpahayag sa kainit ug pagbati ingon man kadasig sa atong mga pagsangyaw. Ang pagpadayag sa kainit, pagbati, ug kadasig sa dihang magaawit sa atong mga alawiton labi pang hinungdanon.
17. (a) Unsang pagbadlong nga gipahamtang sa dili-matinumanong mga Israelinhon ang dili nato buot ipadapat sa atong pag-awit? (b) Unsay mosangpot sa dihang isipon natong ugdang ang tambag nga anaa sa atong mga alawiton?
17 Kon kita magaawit sa atong mga alawiton sa Gingharian nga may ubang mga butang nga gihunahuna, nga dili bug-os nagaila sa kahulogan sa mga pulong, dili ba kita mahisama sa dili-matinumanong mga Israelinhon nga gibadlong tungod kay, bisan pag ilang gidayeg ang Diyos pinaagi sa ilang mga ngabil, ang ilang mga kasingkasing halayo kaayo kaniya? (Mateo 15:8) Dili nato gustong ang maong pagbadlong ipadapat nganha sa atong paagi sa pag-awit sa mga alawiton sa Gingharian, dili ba? Pinaagi sa pag-awit sa paagi nga magpakitag pagpabili sa atong mga alawiton sa Gingharian, atong madasig dili lamang ang atong kaugalingon kondili hasta usab kadtong naglingkod haduol kanato, lakip ang mga batan-on. Oo, kon ang tanan nga nag-awit diha sa atong mga Kingdom Hall mag-isip nga maugdang sa tambag nga anaa sa maong mga alawiton, kini mahimong usa ka dakong pagdasig nga magmadasigon sa ministeryo ug malikayan ang mga lit-ag sa buhat nga daotan.
18. Unsa ang epekto sa pag-awit sa mga alawiton sa Gingharian diha sa usa ka babaye?
18 Matag karon ug unya, ang mga tagagawas nagdayeg sa atong pag-awit sa mga alawiton sa Gingharian. Ang Bantayanang Torre kas-a nagpatik niining butanga: “Nga ang [atong] pag-awit makapadangat usab sa mga tawo sa pagkahibalo kang Jehova nga Diyos gipakita sa usa ka kasinatian sa usa ka babaye nga nabawtismohan sa 1973 ‘Balaang Kadaogan’ nga Asembliya, sa Yankee Stadium, siyudad sa New York. Siya unang miduaw sa usa ka lokal nga Kingdom Hall nga nag-inusara ug nagpabilin alang sa duha ka tigom. Samtang ang kongregasyon miawit . . . ‘Itutok ang Imong mga Mata sa Ganti!,’ siya nakadayeg kaayo sa mga pulong ug sa paagi sa pag-awit niana nga mihukom siya nga kini ang dapit nga buot niyang maanaa. Human niadto miduol siya sa usa sa mga Saksi ug mihangyo sa usa ka pagtuon sa Bibliya, ug [siya] nagpadayon sa pag-uswag hangtod nahimong Kristohanong saksi ni Jehova.”
19. Unsang kataposang pagdasig ang gihatag bahin sa pag-awit nga tibuok-kalag sa atong mga alawiton sa Gingharian?
19 Sa kadaghanan sa atong mga tigom, adunay diyutay rang kahigayonan sa mamiminaw sa pagpahayag sa ilang mga pagbati ug pagpabili. Apan kitang tanan makapahayag sa atong gibati bahin sa pagkamaayo ni Jehova pinaagi sa kinasingkasing nga pagduyog sa pag-awit sa mga awit sa Gingharian. Gawas pa, kon kita magkatigom, dili ba kita anaa sa maayong espiritu? Busa angay gayod nga mobati kitang gustong moawit! (Santiago 5:13) Sa pagkatinuod, sa gidak-on nga atong pabilhan ang pagkamaayo ni Jehova ug ang iyang dili-takos nga kalulot, atong pagaawiton nga tibuok-kalag ang mga pagdayeg kaniya.
Unsay Imong Tubag?
◻ Unsa ang duha ka pangunang katarongan sa pagdayeg kang Jehova?
◻ Sa unsang lainlaing mga paagi makadayeg kita kang Jehova?
◻ Unsa ang usa sa labing nindot nga mga paagi nga makadayeg kita kang Jehova?
◻ Unsang Kasulatanhong mga pananglitan ang atong nabatonan sa pagdayeg kang Jehova pinaagi sa awit?
◻ Sa unsang paagi kita makaawit nga may angayng pagpabili sa mga alawiton sa Gingharian?
[Kahon sa panid 11]
Kalipayi Kanang mga Awita!
Morag ang pipila may gamayng kalisdanan sa pagkat-on sa ubay-ubayng mga alawiton. Bisan pa, ang pila ka mga kongregasyon walay dakong suliran sa pag-awit sa kadaghanan niining mga awita. Tingali ang diyutay pang dugang paningkamot sa pagkat-on nianang sa sinugdan morag dili sinati mao lang ang gikinahanglan. Sa dihang masinati na sa maong mga alawiton, ang kongregasyon kasagaran moangay kanila nga labaw pa kay niadtong wala magkinahanglag paningkamot sa pagkat-on. Unya ang tanan sa kongregasyon makaawit nga masaligon. Oo, sila mahimong magkalipay nianang mga awita!
[Kahon sa panid 12]
Pag-awit ug mga Alawiton sa Gingharian sa Sosyal nga mga Panagtapok
Ang atong pag-awit sa mga alawiton sa Gingharian dili kinahanglang diha lamang sa Kingdom Hall. Si Pablo ug Silas miawit ug mga pagdayeg kang Jehova samtang didto sa sulod sa bilanggoan. (Buhat 16:25) Ug ang tinun-ang si Santiago miingon: “Aduna bay masadyaon? Paawita siya ug mga pagdayeg sa Diyos.” (Santiago 5:13, potnot) Sa sosyal nga mga panagtapok sadya ang tanan. Busa nganong dili moawit ug mga alawiton sa Gingharian? Kini mahimong kahimut-anan ilabina kon ang pag-awit duyogan sa piyano o sista. Kon wala kana, anaa ang mga teyp sa tugtog sa piyano sa atong mga alawiton sa Gingharian; daghang Saksing pamilya ang nagbaton sa album sa maong mga teyp. Kana dili lang maayong iduyog sa pag-awit apan labing maayo usab alang sa anindot nga paluyong musika.
[Hulagway sa panid 8, 9]
Human sa pagkaluwas nila sa Pulang Dagat, ang Israel mipahayag sa ilang kangaya pinaagi sa pag-awit
[Hulagway sa panid 10]
Ang mangayaong pag-awit maoy usa ka bahin sa Kristohanong pagsimba karong adlawa