16, 17. (a) Sa unsang paagi si Pablo nakabaton ug kaisog sa pag-alagad? (b) Unsang mga paagi ang atong himoon kon mahadlok kita sa ubang bahin sa atong Kristohanong ministeryo?

¹⁶ Ngadto sa mga Kristohanon sa Tesalonica, si Pablo misulat: “Human nga kami miantos una ug gitratar sa kawalay-tahod (ingon gayod sa inyong nahibaloan) sa Filipos, kami nagbaton ug kaisog pinaagi sa atong Diyos nga ipamulong kaninyo ang maayong balita sa Diyos uban ang kusganon nga pakigbisog.” (1 Tesalonica 2:2) Sa unsang paagi si Pablo ug ang iyang mga kauban “gitratar sa kawalay-tahod” sa Filipos? Sumala sa ubang mga eskolar, ang Gregong pulong nga gigamit ni Pablo nagpadayag ug makainsulto, makauulaw, o madagmalong pagtratar. Ang mga awtoridad sa Filipos nagbunal kanila sa garote, nagbanlod kanila sa bilanggoan, ug nagbutang kanila sa sipohan. (Buhat 16:16-24) Sa unsang paagi ang maong masakit nga eksperyensiya nakaapektar kang Pablo? Sila ba didto sa sunod nga siyudad sa iyang misyonaryong panaw, ang Tesalonica, nakakita kang Pablo nga misibog sa kahadlok? Wala, siya “nagbaton ug kaisog.” Iyang gidaog ang kahadlok ug nagpadayon sa pagsangyaw nga maisogon.

¹⁷ Diin gikan ang kaisog ni Pablo? Gikan ba sa kinailadman? Dili, matod pa niya nga siya nagbaton ug kaisog “pinaagi sa atong Diyos.” Usa ka reperensiyang basahon alang sa mga maghuhubad sa Bibliya nag-ingon nga kining pulonga mahimong hubaron “ang Diyos magkuha sa kahadlok gikan sa atong mga kasingkasing.” Busa kon wala ka kaayo mobatig kaisog labot sa imong ministeryo, o kon ang usa ka partikular nga bahin niana daw makahadlok, nganong dili mangaliyupo kang Jehova nga mao usay himoon diha kanimo? Hangyoa siya nga kuhaon ang kahadlok gikan sa imong kasingkasing. Hangyoa siya nga tabangan ka nga makabaton ug kaisog alang sa buluhaton. Dugang pa, paghimog pipila ka praktikal nga mga paagi. Pananglitan, paghikay nga may makauban sa buluhaton nga hanas sa matang sa pagsangyaw nga nakapabalaka kanimo. Basin naglangkit kini sa teritoryo sa negosyo, pagsangyaw sa kadalanan, di-pormal nga pagsangyaw, o pagsangyaw pinaagi sa telepono. Tingali ang imong kauban andam sa pagpanguna sa sinugdanan. Kon mao, paniid ug pagkat-on. Apan pagbaton ug kaisog sa pagsulay niini.

18. Unsang mga panalangin ang atong matagamtam kon magbaton kita ug kaisog sa atong pag-alagad?

¹⁸ Kon makabaton ka na ug kaisog, hunahunaa kon unsa unyay mosangpot. Kon ikaw molahutay ug dili ka magpadala sa pagkalugda, malagmit makabaton ka ug maayong mga eksperyensiya sa pagpaambit sa kamatuoran, mga eksperyensiya nga basin imong masayloan. (Tan-awa ang panid 25.) Ikaw makabaton ug katagbawan sa pagkahibalo nga ikaw nakapahimuot kang Jehova pinaagi sa pagbuhat ug usa ka butang nga malisod alang kanimo. Imong matagamtam ang iyang panalangin ug tabang sa pagbuntog sa imong mga kahadlok. Ang imong pagtuo mas molig-on. Sa pagkatinuod, dili ka makaalagad sa paglig-on sa pagtuo sa uban nga dili una lig-onon ang imong kaugalingong pagtuo sa samang higayon.​—Judas 20, 21.

Sila Nakabatog Kaisog

DILI gayod sayon ang pagbatog kaisog aron makasangyaw. Sa pagkatinuod, si apostol Pablo miingon nga sa usa ka higayon, iya kining gihimo “uban ang kusganon nga pakigbisog.” (1 Tesalonica 2:2) Ang ‘pagpakigbisog’ ba sa pagsangyaw takos sa kahago? Walay garantiya nga makabaton ka ug katingalahang mga kasinatian, apan ang katawhan sa Diyos malipay gayod nga sila nakabatog kaisog. Tagda ang pipila ka pananglitan.

Usa ka otso-anyos nga batang babaye nga ginganlag Tara namati pag-ayo samtang ang magtutudlo nag-asoy sa klase nga sa panahon sa Gubat sa Kalibotan II, ang kampong konsentrasyon sa mga binilanggong Hudiyo kinahanglang magbutang ug dalag nga Star of David aron mailhan. Si Tara nagpalandong kon siya angay bang mosulti. “Nag-ampo ako nga nagbuka ang akong mga mata,” siya nahinumdom. Dayon iyang giisa ang iyang kamot ug miingon nga didto usab niadtong mga kampoha ang mga Saksi ni Jehova, ug sila kinahanglang magbutang ug purpura nga trianggulo. Ang magtutudlo naikag ug nagpasalamat kaniya. Ang komento ni Tara nagbukas sa dalan alang sa dugang panaghisgot uban sa magtutudlo, kinsa sa ulahi nagpasalida pa gani sa iyang tibuok klase sa video nga Jehovah’s Witnesses Stand Firm Against Nazi Assault.

Sa Guinea, Kasadpang Aprika, usa ka batan-ong dili-bawtismadong magmamantala nga ginganlag Irène gustong mouswag sa iyang ministeryo. Ang misyonaryo nga nagtuon kaniya sa Bibliya nagdasig kaniya sa pagsulay sa pagpahimutang sa mga magasing Bantayanang Torre ug Pagmata! ngadto sa kaubang mga estudyante sa eskuylahan. Si Irène nagpanuko tungod kay ang iyang mga klasmet dili-masanongon. Apan, napalihok sa pagdasig sa misyonaryo, si Irène midesidir sa pagduol sa unang estudyante nga daw labing masupakon. Sa katingala ni Irène, ang dalagita masanongon ug maikagong midawat sa mga magasin. Ang ubang mga estudyante midawat usab. Si Irène nakapahimutang ug mas daghang magasin nianang bulana kay sa iyang napahimutang sa nag-unang lima kon tiponon.

Sa Trinidad usa ka ansiyano nagpanuko ug diyutay sa pagduol sa prinsipal sa usa ka eskuylahan sa pagpakita kaniya sa edukasyonal nga bili sa Pagmata! nga magasin. Bisan pa niana, siya nakabatog kaisog. Siya nag-ingon: “Nag-ampo ako samtang misulod ako sa kinoralang mga tinukod. Dili ako makatuo nga maayo diay kaayo ang prinsipal.” Iyang gidawat ang magasing Pagmata! nga naghisgot bahin sa “Unsay Paglaom sa mga Batan-on Karon?” ug misugod pa gani sa paggamit niini sa pagtudlo sa klase. Sukad niadto, siya nakadawat ug 40 ka magasin nga naghisgot bahin sa nagkalainlaing mga isyu.

Sa batabata pa, si Vaughn maglisod gayod sa pagsangyaw. “Nerbiyoson ako, ang akong mga palad panington, ug paspas akong mosulti​—dili gayod ako makaarang sa pagsultig hinay.” Bisan pa niana, siya nahimong bug-os-panahong ministro. Apan, maglisod gayod siya sa pagsulti. Kas-a, human sa makapalugdang adlaw sa pagpangitag trabaho, buot niyang sangyawan ang usa ka tawo diha sa tren, “aron moarang-arang ug diyutay ang makapaluyang adlaw.” Apan nahadlok siya sa importanteng-tan-awong mga negosyante diha sa tren sa subwey. Sa kataposan, siya nakabatog kaisog sa pagsulti sa usa ka edarang tawo tupad kaniya. Usa ka dugayng panag-estoryahay ang misangpot. “May maayo kang mga pangutana bisan bata pa,” miingon ang negosyante, nga nangutana, “Usa ba ikaw ka teologo?” Si Vaughn mitubag, “Dili, ako usa sa mga Saksi ni Jehova.” “Ah,” ang tawo mipahiyom. “Mao diay.”

Kining tanang mga Saksi​—ug daghan pang uban—​nalipay nga sila nakabatog kaisog sa pagsangyaw. Ikaw mohimo ba ug sama?