Ang Hunahuna sa Bibliya Bahin sa Kalinaw ug Kasegurohan
Gidawat sa daghang tawo ang dayag nga kamatuoran sa kiling padulong sa labawng panaghiusa sa kalibotan ug sa kalinaw ug kasegurohan nga mahimong ipatungha niini. Naglaom sila nga ang maong kalihokan mosangpot sa usa ka maayong kalibotan. Apan gipaila sa Bibliya nga labaw ang nalangkit kay sa gipadayag sa gawas nga dagway.
ANG ulohang kalinaw ug kasegurohan makaikag ilabina sa mga Kristohanon tungod sa gisulat ni apostol Pablo ubos sa inspirasyon ngadto sa usa ka Kristohanong kongregasyon sa unang siglo. Ang iyang mga pulong nahitala diha sa Bibliya sa 1 Tesalonica 5:3: “Sa diha nga sila magaingon ‘Kalinaw ug kasegurohan!’ unya ang kalit nga kalaglagan mahitabo kanila sama sa kasakit sa pag-anak sa usa ka babayeng mabdos; ug sila dili makaikyas.” Kining kasulatana mopatunghag hinungdanong mga pangutana.
Kalinaw ug Kasegurohan—Pasiuna sa Unsa?
Kon basahon nimo ang konteksto sa mga pulong ni Pablo nga gikutlo sa ibabaw, imong makita nga ang mga tawong magaingon “kalinaw ug kasegurohan” dili nagmata pag-ayong mga Kristohanon, apan hinunoa, maoy mga tawo nga nahikatulog kon bahin sa kon unsay nagakahitabo gayod. Sila anaa sa peligrosong kahimtang apan wala makaalinggat niana kay sila naghunahuna nga ang kahimtang maarang-arang. Mahitungod sa mga Kristohanon, hinuon, si Pablo miingon: “Mahitungod sa mga panahon ug mga hugna sa panahon, mga igsoon, dili kinahanglan nga may igasulti kaninyo.” (1 Tesalonica 5:1) Oo, angay nga kita mahibalo sa taknaan sa Diyos sa mga panghitabo. Ngano? Kay si Pablo miingon nga ang usa ka panahon sa kalit nga kalaglagan, gitawag “adlaw ni Jehova,” moabot “nga sama gayod sa usa ka kawatan sa kagabhion.”—1 Tesalonica 5:2.
Unsay nalangkit sa gitagnang pahayag sa kalinaw ug kasegurohan? Tin-aw, kini dili lamang yanong sultihanay. Ang mga tawo nagsultihay bahin sa kalinaw halos sama ka dugay sa ilang pagbugno sa mga gubat. Ang mga pulong ni Pablo nagpunting gayod sa usa ka panahon sa dihang mopatim-aw nga ang kanasoran nakakab-ot sa kalinaw ug kasegurohan sa talagsaon nga paagi. Apan kini mosangpot nga pangibabaw lamang. Ang pangibabaw nga kalinaw ug kasegurohan nga mosangpot sa kalit nga kalaglagan dayag nga dili tinuod nga kalinaw o lunsay nga kasegurohan.
Si Jesus naghisgot usab bahin niining kalit nga kalaglagan. Gitawag niya kini nga usa ka “dakong kasakitan nga wala pa sukad mahitabo sukad sa sinugdanan sa kalibotan hangtod karon, wala, ni mahitabo pa pag-usab.” Ubay-ubay nga katuigan una kang Jesus, si manalagna Daniel naghisgot usab niini, ug gibatbat niya kini ingong “usa ka panahon sa kasakitan nga wala pa sukad mahitabo sukad nga may usa ka nasod hangtod niadtong panahona.”—Mateo 24:21; Daniel 12:1.
Tawga kini nga usa ka dakong kasakitan, tawga kini nga usa ka dakong kagul-anan—sa bisan unsang kaso, sumala sa mga tagna, kini magapapas sa tanang timaan sa yutan-ong sistema ni Satanas. Inay magpasabot sa balaang pag-uyon, ang gitagnang pahayag sa kalinaw ug kasegurohan mosangpot sa katugbang mismo!—Itandi ang Sofonias 3:8.
Mga Bahin Maylabot sa Panahon Gipadayag
Ang bag-ong dayag nga mga lakang padulong sa labawng panaghiusa sa kalibotan ug sa misangpot nga mga paglaom sa kalinaw ug kasegurohan mao bay katumanan sa matagnaong pasidaan ni Pablo? Aw, sumala sa gipunting kanunay niining magasina, sukad 1914 atong nasaksihan ang katumanan sa ubay-ubayng tagna sa Bibliya nga nalangkit sa langitnong presensiya ni Jesus diha sa gahom sa Gingharian. (Mateo, mga kapitulo 24, 25; 2 Timoteo 3:1-5; Pinadayag 6:1-8) Gipasabot ni Jesus nga ang adlaw ni Jehova, sa dihang ang kalit nga kalaglagan modangat sa mga daotan, moabot samtang ang mga sakop sa kaliwatan sa mga tawo nga nakasaksi sa pagsugod niining panahona maoy buhi pa.—Lucas 21:29-33.
Gipailaila usab ni apostol Pablo ang usa ka bahin maylabot sa panahon. Miingon siya: “Samtang sila magahisgot sa kalinaw ug kasegurohan, dihadiha ang katalagman modangat kanila.” Ang maong paghubad sa mga pulong ni Pablo diha sa The New English Bible tin-awng nagapakita nga ang dakong kasakitan mahitabo “samtang sila nagahisgot.” Sama sa usa ka kawatan sa kagabhion—nga dili mahibaloan daan—ang kalaglagan moabot sa dihang kini wala dahoma, sa dihang ang pagtagad sa kadaghanang mga tawo maoy diha sa ilang gilaomang kalinaw ug kasegurohan. Busa, samtang sa pagkakaron kita dili makaingon sa tino nga ang presenteng kahimtang sa kalinaw ug kasegurohan nagatuman sa mga pulong ni Pablo—o sa unsang gidak-on maugmad pa ang panagsultihay bahin sa kalinaw ug kasegurohan—ang kamatuoran nga ang maong paghisgot madungog karon sa way-ingon nga gidak-on magpasidaan sa mga Kristohanon nga kinahanglang magpabiling nagmata sa tanang panahon.
‘Pagtuloranay’ Tali sa mga Gahom sa Kalibotan
Sa naghisgot siya sa panahon sa kagul-anan, si manalagna Daniel mipailaila usab sa usa ka bahin maylabot sa panahon. Gipakita niya nga ang panahon sa kagul-anan mahitabo sa pagkatapos sa dugay nang panagbangi tali sa duha ka gamhanang bloke, ang usa gitawag “ang hari sa amihanan” ug ang lain, “ang hari sa habagatan.” (Daniel 11:5-43) Sukad sa kataposan sa Gubat sa Kalibotan II, ang maong mga gamhanang bloke gihawasan sa usa ka kapitalistang “hari sa habagatan” ug sa sosyalistang “hari sa amihanan.”
Si Daniel mitagna nga ang mayugtanong panag-indig tali niining duha ka bloke, sumala sa gimatikdan sulod sa miaging 45 ka tuig, maoy sama sa “pagtuloranay,” sama sa duha ka magdudumog nga makigbisog nga makabentaha. Karong bag-o, ang pagtuloranay daw nakunhoran. Ingong pananglitan, sa Mayo sa miaging tuig, ang Sobyet nga ministro sa langyawng kahikayan nagpahayag nga natapos na ang Bugnaw nga Gubat. Niadtong Hunyo, ang magasing Time naghisgot sa usa ka komperensiya sa gamhanang mga nasod tali sa Tinipong Bansa ug sa Unyon Sobyet ug miingon: “Ang pipila sa mga kasabotan bahin sa pagpugong sa armas ug nukleyar nga pagsulay mopatim-aw nga talagsaong kahimoan sa pila ka tuig kanhi. Karon, bisan kon tingbon ang tanang kasabotan, mopatim-aw nga sila daw supak sa tayuktok nga hitabo.”
Kon kaha kining daw pagsinabtanay tali sa duha ka gamhanang nasod maoy temporaryo o permanente, panahon maoy motug-an. Hinuon, usa ka butang ang tin-aw. Ang yugto sa panahon nga gihisgotan ni Jesus maoy abante kaayo. Ug ang mga butang nagakahitabo sa kalibotan nagpaila nga kita duol na sa mga hitabo nga gitagna ni apostol Pablo ug ni propeta Daniel. Bisan pag ang bag-ong panghitabong politikal sa usa ka sukod maoy tungod sa impluwensiya sa mga iglesya sa Kakristiyanohan, kana dili mosangpot sa malungtarong kalinaw. Ang ebidensiya mao nga kana mosangpot sa kaatbang alang sa kanasoran niining kalibotana.
[Hulagway sa panid 6]
Ang panahon maoy motug-an hangtod kanus-a ang daw pagsinabtanay tali sa duha ka gamhanang nasod
[Credit Line]
USSR nga Misyon Ngadto sa HK